Bible ka sɛ nnipa nkwa ‘nna yɛ tiaa na ɔhaw ahyɛ mu ma.’ (Hiob 14:1) Nanso wohwɛ a, Onyankopɔn bɔɔ yɛn sɛ yemmedi nna kakraa bi wɔ asaase yi so na yenhu amane anaa? Sɛ ɛnyɛ n’adwene ne no a, ɛnde dɛn nti paa na ɔbɔɔ yɛn? Wohwɛ a, nea enti paa a Onyankopɔn bɔɔ yɛn no bɛba mu anaa? Wuhu nea Bible aka afa saa asɛm yi ho a, ɛbɛkyekye wo werɛ paa. Ma yɛnhwɛ.

1. Asetena bɛn na Yehowa pɛ sɛ yenya?

Yehowa pɛ sɛ yenya asetena papa paa. Nnipa mmienu a Yehowa dii kan bɔɔ wɔn ne Adam ne Hawa. Bere a ɔbɔɔ wɔn wiei no, ɔde wɔn kɔtenaa paradise fɛfɛɛfɛ bi mu. Ɛno na wɔfrɛ no Eden turo no. Afei “Onyankopɔn hyiraa wɔn, na Onyankopɔn ka kyerɛɛ wɔn sɛ: ‘Monwo na monnɔɔso na monhyɛ asaase so ma na munnya so tumi.’” (Genesis 1:28) Ná Yehowa pɛ sɛ wɔwo, wɔhwɛ ma asaase so baabiara dan paradise, na wɔhwɛ mmoa no so. Nea na Yehowa pɛ ara ne sɛ nnipa nyinaa benya apɔwmuden, na wɔatena ase daa.

Ɛwom, nneɛma ankɔ sɛnea Onyankopɔn pɛ,a nanso nea enti a ɔbɔɔ yɛn no nsesae. (Yesaia 46:10, 11) Ɔda so ara pɛ sɛ nnipa a wɔn aso yɛ mmerɛw tena asaase so daa a owu, yare, anaa biribi foforo biara nteetee wɔn.—Kenkan Adiyisɛm 21:3, 4.

2. Yɛbɛyɛ dɛn abɔ yɛn bra ama asi yɛn yiye nnɛ?

Sɛnea Yehowa bɔɔ yɛn nti, yehia ‘n’akwankyerɛ.’ Ɛno nti, ɛyɛ a yɛn ani gye ho sɛ yebehu no yiye na yɛasom no. (Kenkan Mateo 5:3-6.) Ɔpɛ sɛ yɛbɛn no na yɛne no fa adamfo, ‘yɛnantew n’akwan so, na yɛdɔ no.’ Afei nso, ɔpɛ sɛ yefi ‘yɛn koma nyinaa mu’ som no. (Deuteronomium 10:12; Dwom 25:14) Sɛ yetumi yɛ saa a, ɛmfa ho sɛ yɛwɔ ɔhaw ahorow mpo no, yɛn ani begye paa. Sɛ yɛsom Yehowa a, ɛma yehu nea enti a yɛbaa wiase, na ɛma yɛbɔ bra yiye.

3. Yehowa pɛ sɛ nnipa nya asetena papa paa

Hwɛ VIDEO yi. Muwie a munsusuw asɛmmisa yi ho.

VIDEO: Dɛn Nti Na Onyankopɔn Bɔɔ Asase? —Ne Fã Bi (1:41)

• Adɛn nti na Onyankopɔn bɔɔ yɛn asaase fɛfɛɛfɛ yi?

Monkenkan Ɔsɛnkafo 3:11. Muwie a munsusuw asɛmmisa yi ho:

• Dɛn na kyerɛwsɛm yi ma wuhu fa Yehowa ho?

4. Nea enti a Yehowa bɔɔ nnipa no nsesae

Monkenkan Dwom 37:11, 29 ne Yesaia 55:11. Muwie a munsusuw asɛmmisa yi ho:

• Yɛyɛ dɛn hu sɛ nea enti a Yehowa bɔɔ yɛn no nsesae?

5. Sɛ yɛsom Yehowa a, ɛma yehu nea enti paa a yɛwɔ wiase

VIDEO: Mabehu Nea Enti a Yɛwɔ Wiase (5:03)

• Bere a Terumi huu nea enti a Onyankopɔn bɔɔ nnipa no, ɛboaa no sɛn?

Monkenkan Ɔsɛnkafo 12:13. Muwie a munsusuw asɛmmisa yi ho:

• Yehowa ayɛ bi ama yɛn paa. Wohwɛ a, dɛn na ɛsɛ sɛ yɛyɛ de kyerɛ sɛ yɛn ani sɔ nea wayɛ ama yɛn no?

NEA YƐASUA

Yehowa pɛ sɛ yɛtena ase daa wɔ asaase so a yare, owu, anaa biribi foforo biara nteetee yɛn. Sɛ yefi yɛn koma nyinaa mu som Yehowa a, ɛma yɛn koma tɔ yɛn yam, efisɛ yenim sɛ yɛde yɛn abrabɔ reyɛ nea ɛfata.

Ntimu

• Dɛn nti paa na Yehowa bɔɔ Adam ne Hawa?

• Yɛyɛ dɛn hu sɛ nea enti a Onyankopɔn bɔɔ nnipa no nsesae?

• Dɛn na woyɛ a ɛbɛma asi wo yiye wɔ abrabɔ mu?

YƐ NHWEHWƐMU

Kenkan saa asɛm yi, na wubehu adanse a ɛkyerɛ sɛ na Eden turo no wɔ hɔ ankasa.

“Eden Turo No—Ɛyɛ Anansesɛm Anaa Na Ɛwɔ Hɔ Ankasa?” (Ɔwɛn-Aban)

Kenkan asɛm yi, na wubehu nea enti a yebetumi aka sɛ asaase no rensɛe da; ɛbɛwɔ hɔ daa.

“Wohwɛ a Wɔbɛsɛe Yɛn Asaase Yi?” (Ɛwɔ jw.org)

Dɛn nti na yɛwɔ wiase? Kenkan saa asɛm yi, na wubehu mmuae a Bible no de ma.

“Adɛn Nti na Yɛwɔ Wiase?” (Ɛwɔ jw.org)

Ná papa bi adwene yɛ no sɛ odi yiye na onhia hwee. Nanso sɛɛ na biribi ayera wɔ n’asetena mu. Hwɛ video yi, na wubehu sɛ akyiri yi obehuu nea na ayera wɔ n’asetena mu no.

Seesei Mewɔ Anigye Ankasa (3:55)

2. Henanom na wɔne Yesu bedi ade?

Ɛnyɛ Yesu nko ara na obedi ade. Onyankopɔn ayi nnipa bi afi “abusua ne kasa ne nkurɔfo ne ɔman biara mu . . . na wɔbɛyɛ ahemfo na wɔadi asaase so.” (Adiyisɛm 5:9, 10) Nnipa dodow sɛn na wɔne Kristo bedi ade? Nea enti a yɛrebisa saa ne sɛ, efi bere a ɔbaa asaase so besi nnɛ, nnipa bebree abɛyɛ n’akyidifo. Enti wɔn nyinaa na wɔbɛkɔ soro ne no akodi ade anaa? Daabi. Wɔn mu 144,000 pɛ na wɔbɛkɔ akɔka ne ho ne no adi ade. (Kenkan Adiyisɛm 14:1-4.) Kristofo a aka nyinaa bɛtena asaase so, na Onyankopɔn Ahenni no adi wɔn so.—Dwom 37:29.

Sɛnea yɛabehu no, Onyankopɔn Ahenni no afi ase redi tumi wɔ soro, na ɛrenkyɛ koraa, ɛbɛba abɛsesa nneɛma pii wɔ asaase so. Nneɛma pa a Ahenni no bɛyɛ ama yɛn no, yebesusuw bi ho wɔ adesua yi mu.

1. Ɔkwan bɛn so na Onyankopɔn Ahenni no bebu atɛntrenee, na ama obiara anya asomdwoe wɔ asaase yi so?

Armagedon ko no mu no, Yesu a ɔyɛ Onyankopɔn Ahenni so Hene no bɛsɛe abɔnefo, na wayi nnipa aban nyinaa afi hɔ. (Adiyisɛm 16:14, 16) Bible hyɛ yɛn bɔ sɛ: “Aka kakraa bi na nnebɔneyɛfo nni hɔ bio.” Armagedon ko no bɛma saa asɛm no aba mu. (Dwom 37:10) Yesu nam Ahenni no so bebu atɛntrenee, na wama asomdwoe ahyɛ asaase so ma.—Kenkan Yesaia 11:4.

2. Sɛ obiara a ɔwɔ asaase so yɛ nea Onyankopɔn pɛ a, wohwɛ a asetena bɛyɛ sɛn?

Sɛ Onyankopɔn Ahenni no bedi asaase so a, ‘asaase no bɛba abɛyɛ atreneefo dea, na wɔbɛtena so daa.’ (Dwom 37:29) Wo de, fa no sɛ obiara a ɔwɔ asaase so yɛ nneɛma pa nko ara, obiara dɔ Yehowa ne ne yɔnko nipa, na yare ne owu nni hɔ. Wohwɛ a, anka asetena bɛyɛ sɛn?

3. Sɛ wɔsɛe abɔnefo wie a, dɛn na Onyankopɔn Ahenni no bɛyɛ?

Sɛ wɔsɛe abɔnefo wie a, Yesu bedi ade mfe 1,000. Saa bere no, ɔne wɔn a wɔne no bedi ade a wɔn dodow yɛ 144,000 no bɛboa nnipa a wɔwɔ asaase so ama wɔade wɔn ho afi bɔne ho. Ɛntɔ ara sɛ mfirihyia 1000 no bɛba awiei no, na asaase nyinaa adan paradise. Saa bere no, nnipa nyinaa ani begye, efisɛ wɔde Yehowa mmara bɛyɛ adwuma. Ɛno akyi no, Yesu bɛsan de Ahenni no ama ne Papa, Yehowa. Efi saa bere no rekɔ no, Yehowa ‘din ho bɛtew,’ na obiara nni hɔ a obegu ne din ho fĩ bio. (Mateo 6:9, 10) Obiara bɛba abehu sɛ Yehowa yɛ Sodifo papa a odwen ne nkurɔfo ho. Afei Yehowa bɛsɛe Satan, abɔfo bɔne no, ne obiara a ɔbɛsɔre atia ne tumidi. (Adiyisɛm 20:7-10) Nneɛma pa ne nhyira a Onyankopɔn Ahenni no de bɛba asaase so no, ɛbɛtena hɔ afebɔɔ.

SUA PII KA HO

4. Onyankopɔn Ahenni beyi nnipa aban nyinaa afi hɔ

Bible ka sɛ: “Onipa di onipa so ma ewie no bɔne.” (Ɔsɛnkafo 8:9) Ɔbrɛ ne amanehunu a nnipa aban akɔfa aba nyinaa, Yehowa nam n’Ahenni no so beyi afi hɔ.

Monkenkan Daniel 2:44 ne 2 Tesalonikafo 1:6-8. Muwie a munsusuw nsɛmmisa yi ho:

• Nnipa aban ne wɔn akyitaafo nyinaa, dɛn na Yehowa ne ne Ba Yesu de bɛyɛ wɔn?

• Wohwɛ nea woasua afa Yehowa ne Yesu ho no a, wohwɛ a, sɛ wɔrebu nnipa atɛn a, wobebu atɛnkyea anaa wobebu atɛntrenee? Adɛn nti na woreka saa?

5. Yesu yɛ Ɔhene a ɔfata

Yesu a ɔyɛ Onyankopɔn Ahenni no so Hene no bɛyɛ nneɛma pii de aboa nnipa a wɔbɛtena asaase so no. Hwɛ VIDEO yi, na wubehu sɛ, Yesu adi kan ayɛ nneɛma bi a ɛkyerɛ sɛ ɔpɛ sɛ ɔboa nnipa. Wobɛsan ahu sɛ, Onyankopɔn ama no tumi a ɔde bɛyɛ saa.

VIDEO: Yesu Ama Yɛahu Nea Ahenni No Bɛyɛ Ama Nnipa Daakye (1:13)

Bere a Yesu wɔ asaase so no, ɔyɛɛ nneɛma bi a ɛbɛma yɛahu nea Onyankopɔn Ahenni no bɛyɛ daakye. Nhyira a edidi so yi mu nea ɛwɔ he na worehwɛ kwan denneennen? Nhyira biara a wubedu so no, ɛyɛ a kenkan kyerɛwnsɛm a ɛka ho no.

6. Onyankopɔn Ahenni no de nhyira pii bɛbrɛ yɛn

VIDEO: Nea Onyankopɔn Ahenni Bɛyɛ Ama Yɛn No Ho Mpopoe (4:38)

Monkenkan Dwom 145:16. Muwie a munsusuw asɛmmisa yi ho:

• Kyerɛwsɛm yi ma yehu sɛ Yehowa bɛma ‘ɔteasefo biara anya nea ohia nyinaa.’ Wei ma wote nka sɛn?

NEA YƐASUA

Nneɛma a Onyankopɔn abɔ ne tirim sɛ ɔbɛyɛ no, ɔnam n’Ahenni no so bɛyɛ ne nyinaa. Obesiesie asaase no ama ayɛ paradise, na ɔde ama apapafo atena so, na wɔbɛsom no afebɔɔ.

Ntimu

• Sɛn na Onyankopɔn Ahenni no bɛma Yehowa din ho atew?

• Nhyira ahorow a Bible ahyɛ bɔ sɛ yɛn nsa bɛka no, adɛn nti na yebetumi agye adi sɛ Onyankopɔn Ahenni no bɛma ne nyinaa abam?

• Nhyira a Ahenni no de bɛba no, emu nea ɛwɔ he na worehwɛ kwan denneennen?

YƐ NHWEHWƐMU

Kenkan saa asɛm yi, na wubehu nea Armagedon kyerɛ ankasa.

“Dɛn Ne Armagedon Ko No?” (Ɛwɔ jw.org)

Yesu kaa sɛ “ahohiahia kɛse” bi bɛba. Sɛ saa bere no du a, nneɛma bɛn na ebesisi? Kenkan saa asɛm yi, na wubehu.

“Dɛn Ne Ahohiahia Kɛse No?” (Ɛwɔ jw.org)

Nhyira a Onyankopɔn Ahenni no de bɛba daakye no, hwɛ sɛnea mmusua betumi abom adwinnwen ho.

Fa No Sɛ Wowɔ Paradise (1:50)

Kenkan asɛm a yɛato din “Ná Nsɛm Pii Kyere M’adwene” a ɛwɔ Ɔwɛn-Aban yi mu no, na wubehu sɛnea ɔbarima bi a na ɔyɛ ɔmammɔfo nyaa ne nsɛmmisa ho mmuae.

“Bible Tumi Sesa Nnipa” (Ɔwɛn-Aban, January 1, 2012)