Sɛ Wusua Nhoma Kɔ Akyiri Anaa Wunya Sika a, Ɛno Na Ɛbɛma Asi Wo Yiye Anaa?

Ebinom susuw sɛ wɔn a wɔakɔ sukuu akɔ akyiri ne wɔn a wɔyɛ adefo no, wɔawie; daakye asɛm nyɛ wɔn asɛm. Wɔn adwene yɛ wɔn sɛ, sɛ obi kɔ sukuupɔn kɔbɔ digrii a, adwuma biara a obenya no, obetumi ayɛ no yiye, n’abusua benya ne so mfaso, na ɔbɛyɛ ɔman ba pa. Wogye di sɛ, sɛ obi kɔ sukuu kɔ akyiri a, ɛbɛma wanya adwuma pa ayɛ, na obi nya sika bebree nso a, ɛbɛma n’ani agye.

GYINAE A NNIPA PII SI

Zhang Chen a ofi China kaa sɛ, “Ná migye di sɛ, sɛ mekɔ sukuupɔn kɔbɔ digrii a, merenni ohia bio efisɛ menya adwuma pa ayɛ, na m’ani begye paa wɔ asetena mu.”

Ebinom wɔ adwene bi sɛ, sɛ ebesi wɔn yiye paa wɔ abrabɔ mu a, gye sɛ wɔkɔ sukuupɔn a agye din. Wei nti, wotu kwan kɔ aburokyiri sɛ wɔrekosua nhoma. Saa ade no baa so paa. Nnansa yi ara a COVID-19 yare no bae a akwantu ho nsɛm yɛɛ basaa no, ɛnna ama aba fam. Afe 2012 mu no, adwumakuw bi a wɔfrɛ no Organisation for Economic Co-operation and Development yɛɛ nhwehwɛmu bi, na wɔde bɛtoo gua sɛ: “Sukuufo a wɔafi wɔn kurom sɛ wɔrekosua ade wɔ aburokyiri no, bɛboro fã yɛ Asiafo.”

Mpɛn pii no, awofo de nneɛma akɛseakɛse bɔ afɔre sɛnea ɛbɛyɛ a wɔn mma betumi akosua ade wɔ amannɔne. Ɔbarima bi a wɔfrɛ no Qixiang a ofi Taiwan kaa sɛ: “Ná yɛyɛ mmofra nnan, na na yɛn awofo nsam nni bi. Nanso wɔhwɛ maa yɛn nyinaa kɔɔ sukuupɔn wɔ United States.” Nea ɛte ne sɛ, awofo pii tɔn wɔn ho nneɛma anaa wɔkɔbɔ bosea sɛnea ɛbɛyɛ a wɔn mma betumi akɔ sukuu wɔ amannɔne. Ebewie ase no, na ɛka amene wɔn. Biribi saa na ɛtoo Qixiang awofo.

ƐYƐ AMPA SƐ WUSUA NHOMA KƆ AKYIRI A, EBESI WO YIYE?

Awuraa bi te ne kɔmputa anim reyɛ adwuma anadwo. Wutumi hu sɛ wabrɛ paa. — Ebinom akɔ sukuu akɔ akyiri, na ebinom nso de wɔn bere pii adi sika akyi, nanso wɔn nsa asi fam

Ɛwom, sɛ obi kɔ sukuu a, etumi boa no wɔ abrabɔ mu. Nanso nnipa pii ahu sɛ, ɛnyɛ bere nyinaa na ɛma wonya asetena pa a wɔrehwɛ kwan no. Ebinom wɔ hɔ a, sukuu a wɔpɛ sɛ wɔkɔ nti, wɔkɔbɔ bosea, na wɔde nneɛma bebree bɔ afɔre. Nanso wɔkɔ wie a, wonnya adwuma a wɔpɛ. Singaporeni bi a wɔfrɛ no Rachel Mui kaa wɔ Business Times koowaa krataa mu sɛ: “Nnipa a wɔawie sukuupɔn a wonnya adwuma nyɛ no, wɔn dodow kɔ ara na ɛrekɔ anim.” Jianjie te Taiwan; wakɔ sukuu akɔ akyiri paa. Ɔkaa sɛ, “Nnipa pii wɔ hɔ a, nea wokosuaa ho ade wɔ sukuupɔn no, ɛnyɛ ɛho adwuma koraa na wɔreyɛ. Nanso wɔbɛyɛ no dɛn? Ade yi, adwuma yi bi nni hɔ.”

Wɔn a wɔreyɛ adwuma a wokosuaa ho ade wɔ sukuupɔn no bi nso ahu sɛ, asetena a na wɔrehwɛ kwan no, ɛnyɛ ɛno na wɔn nsa aka no. Niran yɛ ɔbarima bi a ofi Thailand. Ofii ne kurom kɔɔ sukuupɔn wɔ United Kingdom. Nea okosuaa ho ade wɔ sukuu no, ɛho adwuma na onyae. Ɔkaa sɛ, “Ná minim sɛ, sɛ mekɔ sukuu konya abodin krataa a, menya adwuma pa ayɛ. Ampa ne ampa ara adwuma a minyae no, na wotua me yiye paa. Nanso mibehui sɛ, na adwuma no twe me mu, na na egye me bere pii. Eduu baabi no, woyii adwumayɛfo no bi adi, na me nso me ho kae. Ɛma mihui sɛ, obiara nni hɔ a obetumi de ne nsa asi ne bo aka sɛ, adwuma bi a ɔreyɛ nti, sɛnea ɛte biara ebesi no yiye.”

Asikafo ne wɔn a nkurɔfo adwene yɛ wɔn sɛ asi wɔn yiye mpo no, wohyia ɔhaw. Wɔn mu bi wɔ hɔ a, nneɛma nkɔ yiye wɔ wɔn abusua mu, wonni apɔwmuden, na ɛyɛ a wɔn nso, wodwen sika ho. Ɔbarima bi a wɔfrɛ no Katsutoshi a ofi Japan kaa sɛ, “Sika de, sɛ meka sɛ mannya bi a, na meboa. Nanso na minni anigye. Efisɛ na nkurɔfo ani bere me, na na wɔne me nni no yiye.” Maame bi a wɔfrɛ no Lam a ɔte Vietnam nso kaa sɛ, “Ɛyɛ a mihu sɛ ebinom ani abere pɛ sɛ wonya adwuma a ɛbɛma wɔadi yiye wɔ asetena mu. Nanso nea ɛwom paa ne sɛ, ɛde adwinnwen, ɔbrɛ, ne yare mmom na ɛba.”

SƐ OBI KƆ SUKUU KƆ AKYIRI ANAA ONYA SIKA PII A, ƐNKYERƐ SƐ EBESI NO YIYE

Ɛwom, sɛ obi kɔ sukuu kakraa kosua akenkan ne akyerɛw a, mfaso wɔ so. Afei nso, sɛ obi betumi ahwɛ ne ho ne n’abusua yiye a, ohia sika. Nanso sɛ obi kɔ sukuu kɔ akyiri anaa onya sika a, ɛno nkyerɛ sɛ ebesi no yiye wɔ abrabɔ mu. Adɛn nti na yɛreka saa? Hwɛ nea Kyerɛw Kronkron no ka.

SƐ OBI SUA NHOMA KƆ AKYIRI A, ƐNKYERƐ SƐ EBESI NO YIYE.

“Ɛnyɛ daa na ahoɔharefo di nkonim wɔ mmirikatu mu, . . . na ɛnyɛ daa na wɔn a wɔn adwenem dɔ nya ahode, na ɛnyɛ daa na esi animdefo yiye; efisɛ asiane to wɔn nyinaa bere a wɔnhwɛ kwan.”—ƆSƐNKAFO 9:11.

Sɛ obi kɔ sukuu kɔ akyiri a, ɛno nkyerɛ sɛ ebesi no yiye. Efisɛ nneɛma bi betumi asisi wɔ n’asetena mu a ɔyɛ ho hwee a, ɛrenyɛ yiye. Ɔman a ɔte mu no sikasɛm betumi ayɛ basaa ama ayɛ den sɛ obenya adwuma pa ayɛ. Ebetumi nso aba sɛ sɛnea onipa no te, baabi a ofi, kasa a ɔka, anaa ɔsom a ɔwom nti, nkurɔfo ne no renni no yiye, enti nneɛma a ɔde asi n’ani so sɛ ɔbɛyɛ wɔ asetena mu no, ɛbɛyɛ den sɛ ɔbɛyɛ.

SIKA WƆ NTABAN.

“Mmiri wo mogya ani mpɛ ahonyade. Gyae, na da ntease adi. Sɛ woto w’ani hwɛ ahonyade no a, worenhu, efisɛ sɛnea ɛte biara, ebefuw ntaban te sɛ ɔkɔre na atu akɔ wim.”—MMEBUSƐM 23:4, 5.

Ɛwom, sika betumi ama yɛn ho atɔ yɛn kakra. Nanso sɛ obi de ne ho to sika so a, ne nsa besi fam. Nneɛma betumi asesa prɛko pɛ ama sika bebree a obi de mfe pii ayɛ adwumaden aboaboa ano no nyinaa ahyew da koro pɛ. Ɛno da nkyɛn a, atoyerɛnkyɛm ahorow te sɛ asaasewosow, ogyahyehyew, ne nea ɛkeka ho betumi asɛe obi agyapade ama ne sikasɛm ayɛ basaa. Ebetumi mpo ama obi adan adedamfikyiri.

SIKA TAA DE ƆHAW BA.

“Ɔdefo de, nneɛma pii a ɔwɔ no mma ontumi nna.”—ƆSƐNKAFO 5:12.

Franklin te Hong Kong. Ohui sɛ, saa afotusɛm yi yɛ nokware paa. Ɔkɔɔ sukuu kɔɔ akyiri. Adwuma a na ɔyɛ no nso, na wotua no yiye paa. Akyiri yi, onyaa dibea kɛse wɔ adwuma mu. Nanso ɔkaa sɛ, “Adwuma no maa meyɛɛ hahaaha, na mihui sɛ na ɛrehaw m’apɔwmuden. Adwuma no ho adwinnwen nti, mekɔ kɛtɛ so a, na mintumi nna.” Eduu baabi no, ohui sɛ, sɛ wannyae adwuma no a, obewu. Ɔtoaa so sɛ, “Mibisaa me ho sɛ, ‘Dɛn nti koraa na merehaw me ho saa?’ Ɛma mifii ase dwinnwen nea enti a mewɔ wiase no ho.”

“Mmiri wo mogya ani mpɛ ahonyade.”—MMEBUSƐM 23:4

Sɛnea Franklin hui no, nnipa pii nso ahu sɛ, ɛnyɛ sukuu a obi bɛkɔ akɔ akyiri ne sika a obi benya no na ɛbɛma asi no yiye wɔ abrabɔ mu. Ɛno nti ebi asi gyinae sɛ, wɔrenni sika akyi, mmom, wɔbɛbɔ bra pa, na wɔayɛ nkurɔfo adɔe. Wɔn adwene ne sɛ, sɛ wɔyɛ saa a, ɛnna ɛbɛma asi wɔn yiye wɔ abrabɔ mu. Nanso yemmisa sɛ, ɛyɛ nokware anaa? Asɛm a edi hɔ no bɛma yɛanya saa asɛmmisa yi ho mmuae.