3:10—So “ntotoso du du no nyinaa” a yɛde bɛba no kyerɛ sɛ ɛsɛ sɛ yɛde nea yɛwɔ nyinaa ma Yehowa? Yesu wu no beyii Mose Mmara no fii hɔ, enti Onyankopɔn nhwehwɛ sɛ yeyi yɛn sika mu ntotoso du du ma no. Nanso ntotoso du du gyina hɔ ma biribi. (Efesofo 2:15) Ɛnkyerɛ sɛ ɛsɛ sɛ yɛde nea yɛwɔ nyinaa ma Yehowa. Ɛwom sɛ na woyi ntotoso du du no afe afe de, nanso yɛn de, yɛde nea yɛwɔ nyinaa ma Yehowa pɛnkoro—bere a yehyira yɛn ho so ma no na yɛde nsu mu asubɔ yɛ ho sɛnkyerɛnne no. Efi saa bere no, biribiara a yɛwɔ no yɛ Yehowa dea. Nanso ɔma yɛn kwan ma yeyi nea yɛwɔ no bi de yɛ ne som adwuma. Ɛyɛ nea yɛn tebea ma yɛn kwan ne nea yɛn koma ka yɛn sɛ yɛmfa mma. Nneɛma a yɛde bɔ afɔre ma Yehowa no bi ne yɛn bere, yɛn ahoɔden, ne yɛn ahode a yɛde yɛ Ahenni asɛnka ne asuafoyɛ adwuma no. Kristofo nhyiam a yɛkɔ, yɛn mfɛfo gyidifo a wɔyare ne wɔn a wɔn mfe akɔ anim a yɛkɔsra wɔn, ne sika a yeyi de boa nokware som no nso ka ho.

3:10. Sɛ yɛamfa nea eye sen biara amma Yehowa a, yɛrennya ne nhyira.