1, 2. (a) Nsato a ɛyɛ anigye bɛn na wɔde to wɔn a wɔpɛ sɛ wɔde ɔsom kronn tra ase nyinaa anim? (b) Dɛn na ebetumi ayɛ asiane kɛse ama yɛn honhom fam yiyedi?

SƐ Yesu asuafo no, yenim nsa a ɔto frɛ yɛn yi yiye: “Mo a moayɛ adwuma abrɛ na wɔasoa mo nnosoa nyinaa, mommra me nkyɛn, na mɛma moahome. . . . Na me kɔndua yɛ mmerɛw, na m’adesoa yɛ hare.” (Mateo 11:28-30) Kristofo nya ‘ahosan mmere a efi Yehowa ankasa nkyɛn’ nso. (Asomafo no Nnwuma 3:19, NW) Akyinnye biara nni ho sɛ Bible mu nokware a woasua, daakye ho anidaso a ɛyɛ anigye a wowɔ, ne Yehowa nnyinasosɛm ahorow a wode di dwuma wɔ w’asetram no ama w’ankasa woanya ahosan bi.

² Nanso, Yehowa asomfo bi tumi brɛ wɔ nkate fam. Wɔ tebea ahorow bi mu no, saa abasamtu yi ba bere tiaa bi. Ɛtɔ mmere bi nso a, saa nkate no kɔ so bere tenten. Bere kɔ so no, ebia ebinom bɛte nka sɛ wɔn Kristofo asɛyɛde ahorow no abɛyɛ adesoa ama wɔn sen sɛ anka ɛbɛma wɔanya abotɔyam sɛnea Yesu hyɛɛ bɔ no. Nkate a ɛte saa a ɛmfata yi betumi de Kristoni ne Yehowa ntam abusuabɔ ato asiane mu ankasa.

Kristosom Nyɛ Nhyɛso

5. Abirabɔ bɛn na ɛte sɛ nea ɛwɔ Kristo suani a obi bɛyɛ no mu?

⁵ Nokwarem no, Kristoni a obi bɛyɛ no gye mmɔdenbɔ kɛse. (Luka 13:24) Yesu kae mpo sɛ: “Obiara a ɔnsoa n’asɛndua na onni m’akyi no, ontumi nyɛ me suani.” (Luka 14:27) Wɔ nnipa ani so no, ebia ɛbɛyɛ sɛ nea saa nsɛm yi ne asɛm a Yesu kae sɛ n’adesoa yɛ hare na ɔhome wom no bɔ abira, nanso sɛ yɛbɛka paa a, abirabɔ biara nnim.

6, 7. Dɛn nti na yebetumi aka sɛ ɔsom a yɛde ma no nhyɛ brɛ?

⁶ Ɛwom sɛ mmɔden a ɛboro so ne adwumaden a obi yɛ wɔ biribi ho bɛma wabrɛ wɔ honam fam de, nanso ebetumi ama wanya anigye ne abotɔyam bere a onim sɛ biribi pa bi befi mu aba no. (Ɔsɛnkafo 3:13, 22) Na adepa bɛn na ɛsen sɛ yɛbɛka Bible mu nokware a ɛyɛ anigye ho asɛm akyerɛ yɛn ayɔnkofo? Afei nso, sɛ yɛde mmɔden kɛse a yɛbɔ sɛ yɛde Onyankopɔn abrabɔ ho gyinapɛn a ɛkorɔn bɛtra ase no toto mfaso a efi saayɛ mu ba no ho a, ɛnsɛ hwee koraa. (Mmebusɛm 2:10-20) Sɛ wɔtaa yɛn mpo a, yebu no nidi sɛ yehu amane esiane Onyankopɔn Ahenni nti.—1 Petro 4:14.

⁷ Yesu adesoa yɛ hare ankasa, titiriw bere a wɔde toto wɔn a wɔwɔ atoro som nnesoa ase na wɔwɔ honhom fam sum mu ho no. Onyankopɔn wɔ ɔdɔ a emu yɛ den ma yɛn na ɔnhwehwɛ nneɛma a ɛboro so mfi yɛn hɔ. Yehowa ‘ahyɛde nyɛ den.’ (1 Yohane 5:3) Nokware Kristosom a wɔka ho asɛm wɔ Kyerɛwnsɛm no mu no nyɛ nhyɛso. Ɛda adi pefee sɛ ɔsom a yɛde ma no nhyɛ brɛ na ɛmma yɛn abam mmu.