2. Ade foforo bɛn na Yohane Suboni kae sɛ Yesu bɛyɛ, na na ade foforo yi fa dɛn ho?

² Bere a Yohane Suboni resiesie kwan mu ama Yesu no, ɔkae sɛ Yesu bɛyɛ ade foforo bi. Kyerɛwtohɔ no se: “[Yohane] kae sɛ: Nea ne ho yɛ den sen me di m’akyi reba a mensɛ sɛ mekotow mesan ne mpaboa hama. Me de, mede nsu na ɛbɔ mo asu, na ɔno de, ɔde honhom kronkron na ɛbɛbɔ mo asu.” (Marko 1:7, 8) Ɛde besi saa bere no, na wɔmfaa honhom kronkron mmɔɔ obiara asu. Ná eyi yɛ nhyehyɛe foforo a wɔde honhom kronkron dii dwuma wom, na na ɛfa Yehowa atirimpɔw a ɛne sɛ obesiesie nnipa ama ɔsoro adedi a afei na na ɔrebeyi no adi ho.

5. Bere bɛn na wɔde honhom kronkron bɔɔ asuafo anokwafo no asu, na honhom kronkron dwumadi a ɛfa ho bɛn na ɛkɔɔ so bere koro no ara?

⁵ Bere a Yesu ne Nikodemo rekasa no, na honhom kronkron aba Yesu so dedaw abɛsra no ama tumi a obedi daakye wɔ Onyankopɔn Ahenni so no, na na Onyankopɔn aka no baguam sɛ Yesu yɛ Ne Ba. (Mateo 3:16, 17) Yehowa woo honhom mu mma pii wɔ Pentekoste 33 Y.B. Wɔde honhom kronkron bɔɔ asuafo anokwafo a na wɔahyiam wɔ abansoro dan mu wɔ Yerusalem no asu. Bere koro no ara, wofi honhom kronkron mu woo wɔn foforo sɛ Onyankopɔn honhom mu mma. (Asomafo no Nnwuma 2:2-4, 38; Romafo 8:15) Afei nso, wɔde honhom kronkron sraa wɔn, a atirimpɔw no ne sɛ daakye wobenya ɔsoro apɛgyade, na wɔde honhom kronkron sɔw wɔn ano nea edi kan, de dii adanse sɛ saa ɔsoro anidaso no renni huammɔ.—2 Korintofo 1:21, 22.