ADESUA 23

Woyere Wo Ho Bɔ Asu a, Wubenya Nhyira!

Nea Yɛaprente

Yesu kaa sɛ ɛsɛ sɛ Kristofo nyinaa bɔ asu. (Kenkan Mateo 28:19, 20.) Yɛka asubɔ koraa a, ɛkyerɛ sɛn? Dɛn na ɛsɛ sɛ obi yɛ na watumi abɔ asu?

1. Dɛn ne asubɔ?

Asɛmfua a yɛakyerɛ ase wɔ Twi kasa mu sɛ “asubɔ” no, efi Greek asɛm bi mu, na nea ɛkyerɛ ne sɛ “wode biribi bewura” nsu mu. Bere a wɔrebɔ Yesu asu no, wɔde no wuraa Asubɔnten Yordan mu, na afei “opue fii nsu no mu.” (Marko 1:9, 10) Nokware Kristofo nso, sɛ wɔrebɔ wɔn asu a, wɔde wɔn nipadua nyinaa wura nsu no mu.

2. Sɛ obi bɔ asu a, ɛkyerɛ sɛn?

Sɛ wɔbɔ obi asu a, ɛkyerɛ sɛ wahyira ne ho so ama Yehowa Nyankopɔn. Sɛ obi rehyira ne ho so a, ɔyɛ no sɛn? Ansa na obi bɛbɔ asu no, odi kan bɔ Yehowa mpae sɛ, ɔpɛ sɛ ɔde ne nkwa nna nyinaa som no. Onii no hyɛ Yehowa bɔ sɛ ɔbɛsom ɔno nko ara, na ɔbɛma n’apɛde ahia no asen biribiara. Osi gyinae sɛ ‘ɔrenyɛ nea ɔno ara pɛ bio, na mmom obedi Yesu akyi daa’ asuasua no, na ɔde ne nkyerɛkyerɛ abɔ ne bra. (Mateo 16:24) Sɛ obi hyira ne ho so na ɔbɔ asu a, ebue kwan ma ɔne Yehowa ne ne nuanom Kristofo fa adamfo a emu yɛ den.

3. Dɛn na ɛsɛ sɛ obi yɛ na watumi abɔ asu?

Sɛ wubetumi abɔ asu a, ɛsɛ sɛ wusua Yehowa ho ade na wunya ne mu gyidi. (Kenkan Hebrifo 11:6.) Bere a worehu Yehowa yiye na wo gyidi reyɛ den no, ɔdɔ a wowɔ ma no no nso bɛyɛ kɛse. Ɛba saa a, w’ani begye ho sɛ wobɛka ne ho asɛm akyerɛ afoforo, na wode ne mmara nsɛm abɔ wo bra. (2 Timoteo 4:2; 1 Yohane 5:3) Sɛ obi fi ase ‘nantew ɔkwampa so wɔ Yehowa anim na ɔyɛ nea ɛsɔ n’ani’ a, obetumi asi gyinae sɛ obehyira ne ho so ama Onyankopɔn na wabɔ asu.—Kolosefo 1:9, 10.a

SUA PII KA HO

Hwɛ nea wubetumi asua afi Yesu asubɔ no mu ne nea obi yɛ a ɛbɛboa no ama watumi abɔ asu.

4. Yebetumi asua biribi afi sɛnea wɔbɔɔ Yesu asu no mu

Monkenkan Mateo 3:13-17 na wubehu nea ɛkɔɔ so bere a na wɔrebɔ Yesu asu no ho nsɛm pii. Muwie a munsusuw nsɛmmisa yi ho:

Wɔrebɔ Yesu asu no, na ɔyɛ abofra a wɔawo no foforo anaa?
Ɔkwan bɛn so na wɔbɔɔ no asu? Wɔde nsu petepetee ne so kɛkɛ anaa?

Adwuma titiriw a Onyankopɔn de hyɛɛ Yesu nsa sɛ ɔmmɛyɛ wɔ asaase so no, ɔbɔɔ asu wiei no na ofii ase. Monkenkan Luka 3:21-23 ne Yohane 6:38. Muwie a munsusuw asɛmmisa yi ho:

Bere a Yesu bɔɔ asu wiei no, adwuma bɛn na ɔde dii kan wɔ n’asetena mu?

5. Wubetumi abɔ asu ama ayɛ yiye!

Ebia wubenya adwene sɛ worentumi nhyira wo ho so mma Onyankopɔn na kampɛsɛ woabɔ asu. Nanso, sɛ wusua Yehowa ho ade na wubehu no yiye a, ɛbɛyɛ mmerɛw ama wo sɛ wubesi saa gyinae no. Hwɛ VIDEO yi, na wubehu nea ebinom yɛe a ɛboaa wɔn ma wotumi hyiraa wɔn ho so bɔɔ asu.

VIDEO: Sɛnea Wubetumi Afa Yehowa Adamfo (1:11)

Monkenkan Yohane 17:3 ne Yakobo 1:5. Muwie a munsusuw asɛmmisa yi ho:

Nneɛma bɛn na obi yɛ a ɛbɛboa no ama wabɔ asu?

A. Ɔbea bi rebɔ mpae de ahyira ne ho so ama Onyankopɔn.

B. Wɔrebɔ saa ɔbea no ara asu sɛ Yehowa Danseni; wɔde no rebewura nsu no mu.

Sɛ yɛbɔ mpae ka kyerɛ Yehowa sɛ yɛpɛ sɛ yɛde yɛn nkwa nna nyinaa som no a, ɛkyerɛ sɛ yɛahyira yɛn ho so
Sɛ yɛbɔ asu a, yɛma obiara hu sɛ yɛahyira yɛn ho so ama Onyankopɔn

6. Sɛ wobɔ asu a, wobɛba abɛka Yehowa nkurɔfo ho

Sɛ wobɔ asu a, wobɛba abɛka Yehowa abusua kɛse no ho. Ɛwom, ɛsono baabi a yɛn mu biara fi ne n’amammerɛ, nanso yɛn gyidi yɛ baako, na yɛn nyinaa de Onyankopɔn asɛm bɔ yɛn bra. Monkenkan Dwom 25:14 ne 1 Petro 2:17. Muwie a munsusuw asɛmmisa yi ho:

Sɛ obi bɔ asu a, adamfofa bɛn na ɛbɛba abɛda ɔne Yehowa ne Yehowa asomfo ntam?

Mfoni ahorow: Onuawa bi a wabɔ asu redwinnwen nnamfo pa a ɔwɔ wɔ asafo no mu ho, na wei ama n’ani agye. 1. Ɔreka ne haw akyerɛ onuawa bi. 2. Ɔreboa onuawa bi a n’ani afi ama wanantew. 3. Ɔne anuanom ahorow a ɛsono wɔn mfe ato nsa redidi. 4. Ɔredi papa bi adanse, na onuawa foforo bi ka ne ho. 5. Ɔne anuanom mmea mmienu bi a ɛsono baabi a wofi retwa mfoni wɔ nhyiam bi ase.

EBINOM KA SƐ: “Minnya nyɛɛ m’adwene sɛ mɛbɔ asu.”

Saa na wote nka anaa? Sɛ saa a, wohwɛ a mfaso wɔ so sɛ wode besi w’ani so sɛ wobɛbɔ asu anaa?

NEA YƐASUA

Yesu kaa sɛ ɛsɛ sɛ Kristofo bɔ asu. Sɛ obi betumi abɔ asu a, ɛsɛ sɛ onya Yehowa mu gyidi paa, ɔde ne mmara nsɛm bɔ ne bra, na ohyira ne ho so ma no.

Ntimu

Dɛn ne asubɔ, na dɛn nti na ehia sɛ obi bɔ asu?
Sɛ obi bɔ asu a, dɛn na ɛkyerɛ?
Sɛ obi betumi ahyira ne ho so na wabɔ asu a, nneɛma bɛn na ɛsɛ sɛ ɔyɛ?

Kyerɛw da a muwiee adesua no hyɛ ha:

Fa Wei Si W’ani So

Sɛ wohwɛ nhoma yi fã a ɛto so nnan no a, n’awiei hɔ no, wubehu nsɛm a yɛato din, “Metumi Afi Ase Ne Asafo No Abom Akɔ Asɛnka Anaa?” ne “Masiesie Me Ho Sɛ Mɛbɔ Asu Anaa?” wɔ hɔ. Hwɛ nsɛmmisa a ɛwɔ hɔ no, na ɛbɛma woahu nea ɛsɛ sɛ woyɛ na woatumi afi asɛnka ase, na afei woabɔ asu.

Ade foforo a wubetumi ayɛ:

Ade foforo a wubetumi ayɛ

YƐ NHWEHWƐMU

Sɛ yɛka sɛ yɛabɔ obi asu a, ɛkyerɛ sɛn?

“Dɛn Ne Asubɔ?” (Ɛwɔ jw.org)

Kenkan saa asɛm yi, na wubehu nneɛma a ɛsɛ sɛ obi yɛ na ama watumi abɔ asu.

“Obi Dɔ Yehowa Na N’ani Sɔ Nea Wayɛ Ama No a, Ɔbɛbɔ Asu” (Ɔwɛn-Aban, March 2020)

Kenkan saa asɛm yi, na wubehu nea ɛmaa papa bi sii gyinae sɛ ɔbɛbɔ asu.

“Ná Wɔpɛ sɛ Me Ara Mehwehwɛ mu Hu Nokware No” (Ɔwɛn-Aban, February 1, 2013)

Sɛ obi de si n’ani so sɛ ɔbɛbɔ asu a, mfaso wɔ so paa. Kenkan saa asɛm yi, na wubehu nea enti a ɛte saa. Afei, wubehu nneɛma a ɛsɛ sɛ woyɛ na woatumi abɔ asu.

“Ɛsɛ Sɛ Mebɔ Asu Anaa?” (Nsɛm a Mmabun Bisa—Mmuae a Ɛbɛboa Wɔn, Ɔfã 2, ti 37)

a Yɛmfa no sɛ obi abɔ asu wɔ asɔre bi mu dedaw a, ɛho behia sɛ ɔsan bɔ asu bio anaa? Yiw. Adɛn ntia? Efisɛ asɔre a na onipa no wom no ankyerɛkyerɛ no nokwasɛm a ɛwɔ Bible no mu.—Hwɛ Asomafo Nnwuma 19:1-5 ne Adesua 13.