Esiane tebea yi nti, Yesu nsɛm a ɔka kyerɛɛ ɔbarima bi a na waben wɔ Yudafo mmara mu no de asuade pii ma. Ɔbarima no kɔɔ Yesu nkyɛn kobisaa no sɛ: “Kyerɛkyerɛfo, menyɛ dɛn na manya daa nkwa?” Mmuaema mu no, Yesu twee n’adwene sii Mose Mmara no so, nea ɛhyɛ sɛ ‘fa wo koma nyinaa, wo kra nyinaa, w’ahoɔden nyinaa ne w’adwene nyinaa dɔ Yehowa,’ na ‘dɔ wo yɔnko sɛ wo ho’ no so. Afei mmaranimfo no bisaa Yesu sɛ: “Hena ne me yɔnko?” (Luka 10:25-29; Leviticus 19:18; Deuteronomium 6:5) Sɛnea na Farisifo no susuw no, asɛm “yɔnko” no fa wɔn a wodi Yudasom atetesɛm so nkutoo ho—nokwarem no, na ɛmfa Amanaman mufo anaa Samariafo ho. Sɛ na mmaranimfo a ɔrepɛ biribi ahu yi susuw sɛ Yesu bɛfoa saa adwene no so a, ɛnde na ne ho rebedwiriw no.

Asuade a Ɛwom Ma Yɛn

Ɔbarima a obisaa Yesu asɛm no yɛɛ saa de pɛe sɛ “obu ne ho bem.” (Luka 10:29) Ebia osusuwii sɛ Yesu bɛkamfo no sɛ wabata Mose Mmara no ho pintinn. Nanso na saa nipa a ogye ne ho di yi hia sɛ osua nokware a ɛwɔ Bible abebusɛm yi mu no: “Onipa kwan biara kwan teɛ n’ani so, na koma karifo ne [Yehowa, NW].”—Mmebusɛm 21:2.