Na nea ɔsomaa me no ka me ho; onnyaw me nko, efisɛ meyɛ nea ɛsɔ n’ani daa.”

Bɔne nkoa a Yudafo no pow sɛ wɔyɛ no de wɔn gyina gyinabea a asiane wom mu. Yesu kyerɛkyerɛ mu sɛ: “Akoa nka ofie daa; na ɔba de, ɔtra hɔ daa.” Esiane sɛ akoa nni awunyade hokwan biara nti, ɔwɔ asiane a ɛne pam a wobetumi apam no bere biara no mu. Ɔba a wɔwoo no anaasɛ wɔagye no aba fie hɔ no nkutoo na ɔtra hɔ “daa,” kyerɛ sɛ ɔte hɔ bere tenten a ɔda so te ase no.