Aban Awɛmfo Tee Asɛmpa No

Na ɛyɛ afe 59 Y.B. mu. Saa bere no ɔsraani panyin bi a wɔfrɛ no Yulio ne n’asraafo dii nneduafo bi anim kɔfaa Porta Capena pon mu kɔɔ Roma. Wokopuee Palatine Bepɔw so; ɛhɔ na Ɔhempɔn Nero ahemfie si. Wohui sɛ Aban Awɛmfo de asekan ahyehyɛ wɔn “toga” mu rebɔ ahemfie no ho ban.a Yulio de asraafo no faa Roma kurow no mfinimfini kɔforoo Viminal Bepɔw no. Wɔkɔfaa turo bi mu, na na afɔremuka pii sisi hɔ a wɔbɔ afɔre ma Roma anyame wɔ so. Afei nso wotwaam wɔ baabi a asraafo teɛteɛ wɔn apɔw mu.

Aban Awɛmfo mfonini bi. Ebinom kyerɛ sɛ na ɛwɔ Klaudio nkaedum so; wɔyɛɛ nkaedum no wɔ afe 51 Y.B. mu

Na ɔsomafo Paulo ka nneduafo no ho. Bere bi ahum totoo po so hyɛn a na Paulo te mu no. Onyankopɔn bɔfo ka kyerɛɛ no sɛ: “Etwa sɛ wugyina Kaesare anim.” (Aso. 27:24) Afei de na bere aso sɛ Paulo gyina Kaesare anim anaa? Ɔtoo n’ani hwɛɛ Roma Ahemman no ahenkurow no, na ɛbɛyɛ sɛ ɔkaee asɛm a Awurade Yesu ka kyerɛɛ no wɔ Antonia Abantenten a ɛwɔ Yerusalem no. Yesu kae sɛ: “Nya akokoduru! Na sɛnea woadi me ho adanse fefeefe wɔ Yerusalem no, saa ara na ɛsɛ sɛ wudi adanse wɔ Roma nso.”—Aso. 23:10, 11.

Ebia Paulo gyina hwɛɛ Castra Praetoria no. Na ɛyɛ abantenten kakraa bi a wɔde ntayaa kɔkɔɔ asi. Ɛhɔ na na Aban Awɛmfo bɛyɛ 12,000 a wɔbɔ ɔhempɔn no ho ban ne asraafo mpempem ne kurow no mu polisifo tete. Saa abantenten yi kaee nkurɔfo sɛ ɔhempɔn no tumi sõ. Aban Awɛmfo no ara nso na na wɔhwɛ nneduafo so wɔ Roma Ahemman no afã foforo, enti Yulio dii nneduafo no anim faa ɔpon bi mu kɔɔ Roma. Wɔfaa ɔhaw ne abɛbrɛsɛ mu wɔ wɔn akwantu no mu ɔsram pii, nanso afei de, wɔabedu Roma.—Aso. 27:1-3, 43, 44.

PAULO AMMA ‘BIRIBIARA ANSIW NO KWAN’

Onyankopɔn maa Paulo nyaa anisoadehu sɛ hyɛn no mu nipa biako koraa renwu. Ahurutoa bi kaa Paulo nanso hwee anyɛ no. Ɔsaa nkurɔfo yare wɔ Malta supɔw no so, na ɛhɔfo no kae sɛ ɔyɛ onyame bi. Ɛbɛyɛ sɛ asɛm yi tenne maa Aban Awɛmfo pii tee.

Na Paulo ne anuanom a ‘wofi Roma baa Apia Gua so ne Nsadan-Mmiɛnsa’ no ahyia dedaw. (Aso. 28:15) Ná nea ɛda Paulo koma so ne sɛ ɔbɛka asɛmpa no wɔ Roma, nanso ɔdeduani de, ɔbɛyɛ dɛn ayɛ saa? (Rom. 1:14, 15) Ebinom susuw sɛ wɔde nneduafo no kɔhyɛɛ nea ɔda awɛmfo ano no nsa. Sɛ saa na ɛte a, ɛnde yebetumi aka sɛ wɔde Paulo kɔmaa Aban Awɛmfo panyin a wɔfrɛ no Afranius Burrus. Ɛbɛyɛ sɛ ɔhempɔn no nni hɔ a ɔno na ɔwɔ hɔ.b Afei de Paulo fii awɛmfo mpanyimfo nsam kodii ɔsraani bi nsam. Wɔmaa Paulo ankasa pɛɛ baabi a ɔbɛtena. Afei wɔmaa no kwan sɛ obetumi agye ahɔho aka asɛm no akyerɛ wɔn a “biribiara ansiw ho kwan.”—Aso. 28:16, 30, 31.

Aban Awɛmfo wɔ Nero Bere So

Awɛmfo atenae da sika yi so; wotwae wɔ afeha a edi kan mu

Na Aban Awɛmfo ka ntam sɛ wɔbɛbɔ ɔhempɔn no ne n’abusua ho ban. Sɛ wɔrekɔ ko a, wokura frankaa a ɔhempɔn no mfonini da mu ne kyɛm a Tiberio Kaesare akekantwɛre agyiraehyɛde wɔ ho. Na wɔakyekyɛ Aban Awɛmfo no mu akuwakuw ma ɔsraani panyin da kuw biara ano. Sɛ na agodie bi rekɔ so wɔ agoruhwɛbea a, na wɔhwɛ ma biribiara kɔ so pɛpɛɛpɛ. Afei nso ogya tɔ baabi a, wɔboa dum no. Sɛ Aban Awɛmfo som mfe 16 na wɔpɛ sɛ wogyae adwuma no a, wotumi gyae, nanso asraafo a wɔaka no de, wɔrentumi nnyae gye sɛ wɔasom mfe 25. Na wotua Aban Awɛmfo no ka sen asraafo a wɔaka no, wɔma wɔn nneɛma ahorow pii, na sɛ obi gyae adwuma no a, sika puduo na wɔde gya no kwan. Bio, sɛ ɛba sɛ wɔbɛyɛ deduani bi ayayade anaa wobekum no a, Aban Awɛmfo yi na wodi saa dwuma no. Bere a wɔsan de Paulo too afiase wɔ Roma no, ebetumi aba sɛ Aban Awɛmfo na wokum no.—2 Tim. 4:16, 17.

Courtesy Classical Numismatic Group, Inc./cngcoins.com

PAULO DII “NKETEWA NE AKƐSE NYINAA” ADANSE

Ebetumi aba sɛ Burrus bisabisaa ɔsomafo Paulo nsɛm wɔ Awɛmfo atenae anaa ahemfie hɔ ansa na ɔde no rekɔ Nero anim. Paulo amma hokwan yi ammɔ no; odii “nketewa ne akɛse nyinaa” adanse. (Aso. 26:19-23) Yennim nea Burrus huu wɔ Paulo ho, nanso asɛm no ne sɛ wamfa no anto afiase wɔ Awɛmfo atenae hɔ.c

Paulo frɛɛ “Yudafo no mu atitiriw” ne “nnipa pii baa baabi a ɔte no” dii wɔn adanse. Yebetumi aka sɛ Paulo dii Aban Awɛmfo no nso adanse efisɛ bere a ‘odii Onyankopɔn ahenni ho adanse fefeefe kaa Yesu ho asɛm’ kyerɛɛ Yudafo “fi anɔpa kosi anwummere” no, wɔtee.—Aso. 28:17, 23.

Obi rekyerɛw Paulo nkrataa ama no; ɔwɛmfo retie

Da biara na ɛsono Aban Awɛmfo a wɔwɛn ahemfie hɔ. Saa ara nso na na ɛsono awɛmfo a wɔwɛn Paulo da biara. Eyi nti awɛmfo pii tee asɛmpa no. Paulo dii mfe abien wɔ afiase. Saa bere no na ɔkyerɛw nkrataa kɔmaa Efesofo, Filipifo, Kolosefo ne Hebrifo Kristofo no. Na ɔka ma obi kyerɛw enti awɛmfo no tee ne nyinaa. Afei nso awɛmfo no hui sɛ ɔrekyerɛw krataa akɔma Kristoni bi a wɔfrɛ no Filemon. Bere a Paulo wɔ afiase no, ɔboaa akoa bi a wɔfrɛ no Onesimo a na waguan afi ne wura nkyɛn. Na Paulo ‘abɛyɛ ne papa wɔ afiase hɔ,’ na akyiri yi ɔma ɔsan kɔɔ ne wura hɔ. (Filem. 10) Akyinnye biara nni ho sɛ Paulo ne asraafo a wɔwɛn no no bɔɔ nkɔmmɔ. (1 Kor. 9:22) Ebia Paulo ne ɔsraani bi bɔɔ nkɔmmɔ huu akotade ho nsɛm na ɔde yɛɛ mfatoho wɔ ne krataa mu.—Efe. 6:13-17.

KA ONYANKOPƆN ASƐM NO AKOKODURU SO

Paulo afiasenna no maa Aban Awɛmfo ne afoforo pii tee asɛmpa no. (Filip. 1:12, 13) Aban Awɛmfo no nim nnipa pii wɔ Roma Ahemman no mu. Ebi ne ɔhempɔn no ne ne fiefo. Ɔhempɔn no fiefo yɛ n’abusuafo, n’asomfo ne ne nkoa, na wɔn mu bi bɛyɛɛ Kristofo. (Filip. 4:22) Akokoduru a Paulo de dii adanse no hyɛɛ anuanom a wɔwɔ Roma no mpamden ma ‘wɔkaa Onyankopɔn asɛm a wɔansuro.’—Filip. 1:14.

Tebea a yɛwom biara, yebetumi ama nnipa a wɔba yɛn nkyɛn ate asɛmpa no

Paulo asɛm no boa yɛn ma yehu sɛ ɛsɛ sɛ ‘yɛka asɛm no mmere pa ne mmere bɔne mu.’ (2 Tim. 4:2) Ebia yɛn mu bi aka dan mu, anaa yɛda ayaresabea, anaa yɛn gyidi nti wɔde yɛn ato afiase. Tebea a yɛwom biara, mpɛn dodow a nnipa ba yɛn nkyɛn de, yebetumi adi wɔn adanse. Sɛ yenya hokwan biara na yɛde akokoduru di adanse a, yebehu ampa sɛ ‘wɔnkyekyeree Onyankopɔn asɛm’ no.—2 Tim. 2:8, 9.

Sextus Afranius Burrus

Abopon a Sextus Afranius Burrus din wɔ so

Ɛbɛyɛ sɛ wɔwoo Burrus wɔ Vaison-la-Romaine. Ɛnnɛ ɛwɔ France anafo fam. Wohuu ɔbo bi wɔ hɔ a ne din gu so wɔ afe 1884 Y.B. mu. Afe 51 Y.B. mu no, Klaudio Kaesare yere Agrippina Kumaa bɔɔ Burrus aba so. Ɔyɛɛ no panyin wɔ Aban Awɛmfo no so. Agrippina maa nnipa baanu tetee ne ba kumaa Nero na daakye wakɔtena ɔhempɔn akongua no so. Wɔn mu biako ne Burrus, ɔsraani a wakwadare adwuma no mu. Ɔde Nero faa sraadi ntetee mu. Nea ɔka ho ne nyansapɛfo Seneca. Ɔno nso buee Nero adwenem. Akyiri yi Agrippina maa ne kunu Klaudio awuduru kum no. Owui ara pɛ na Burrus de Nero kɔɔ Castra Praetoria hɔ ma Aban Awɛmfo no yɛɛ no ɔhempɔn ansa na ɛrepue sɛ Klaudio awu. Ɛbaa saa no, Mmarahyɛ Bagua no gyee no toom saa ara. Nero kum ne maame afe 59 Y.B. mu nanso Burrus amma asɛm no ampue. Roma abakɔsɛm kyerɛwfo Suetonius ne Cassius Dio kae sɛ Nero maa Burrus awuduru kum no afe 62 Y.B. mu.

Musée Calvet Avignon

a Hwɛ adaka a wɔato din “Aban Awɛmfo wɔ Nero Bere So.”

b Hwɛ adaka a wɔato din “Sextus Afranius Burrus.”

c Tiberio Kaesare de Herode Agripa too afiase wɔ Awɛmfo atenae hɔ wɔ afe 36 Y.B. ne afe 37 Y.B. mu hɔ baabi. Tiberio se wakɔka sɛ Caligula bɛba abɛyɛ ɔhempɔn enti na ɔde no too afiase. Bere a Caligula bɛyɛɛ ɔhempɔn no, ɔmaa Herode yɛɛ Yudea hene.—Aso. 12:1.