Ɔwɛn-Aban INTANƐT SO NHOMAKORABEA

‘Anigye Ne Honhom Kronkron Hyɛɛ Wɔn Ma’

‘Di Onyankopɔn Ahenni Ho Adanse Fefeefe’
- 5. Kyerɛ nea anuanom no faa mu ansa na wɔretumi adi adanse wɔ Kipro supɔw so.
  
  ⁵ Bere a Barnaba ne Saul nantew koduu Seleukia po so hyɛn gyinabea a ɛbɛn Antiokia no, wɔfaa po so hyɛn twaa kilomita bɛyɛ 200 kɔɔ Kipro supɔw so.d Esiane sɛ na Barnaba fi Kipro nti, akyinnye biara nni ho sɛ n’ani gyei sɛ ɔbɛkɔ akɔka asɛmpa no wɔ ne kurom hɔ. Bere a mmarima yi duu Salami, kurow a ɛwɔ supɔw no apuei fam no, wɔansɛe bere koraa. Ntɛm ara, “wofii ase kaa Onyankopɔn asɛm no wɔ Yudafo hyia adan mu.”e (Aso. 13:5) Barnaba ne Saul tuu kwan fii Kipro tia kosii tia; ɛbɛyɛ sɛ wɔrekɔ nyinaa na wɔreka asɛmpa no wɔ nkurow akɛse a ɛwowɔ kwan so no mu. Yennim ɔkwan pɔtee a wɔfaa so, nanso ebetumi aba sɛ asɛmpatrɛwfo yi nantew twaa kilomita bɛyɛ 160!
  
  YUDAFO HYIA ADAN
  
  Nea Greek asɛmfua a wɔkyerɛ ase “hyiadan” kyerɛ paa ne “sɛ wɔreboaboa ano.” Mfiase no, na ɛkyerɛ Yudafo nhyiam anaa Yudafo bagua, nanso akyiri yi, beae anaa ɔdan a wɔyɛ saa nhyiam no wom na wɔfrɛɛ hɔ saa.
  
  Nkurɔfo gye di sɛ ɛyɛ bere a Yudafo wɔ Babilon nkoasom mu no na wɔsisii hyia adan no anaasɛ mfe 70 a wɔkodii wɔ nkoasom mu no akyi pɛɛ na wɔsisii. Wɔsisii hyia adan no de yɛɛ baabi a wɔgye akwankyerɛ, baabi a wɔsom, baabi a wɔkenkan Kyerɛwnsɛm no, ne baabi a wɔhyɛ nnipa nkuran ma wɔde Kyerɛwnsɛm no yɛ adwuma. Asomafo no bere so no, na hyiadan wɔ kurow biara so wɔ Palestina. Wokɔ kurow kɛse biara mu a, na hyiadan a ɛwɔ hɔ no boro baako, na Yerusalem mpo de, na ɛhɔ de dɔɔso.
  
  Bere a Yudafo a wɔakodi Babilon no fii hɔ no, ɛnyɛ wɔn nyinaa na wɔsan baa Palestina. Wɔn mu bebree kɔɔ aman foforo so kɔyɛɛ adwuma. Bɛyɛ mfe ahanum ansa na wɔrewo Yesu no mpo, na Yudafo no bi tete Persia Ahemman no amantam 127 no nyinaa mu. (Ester 1:1; 3:8) Akyiri yi, Yudafo no bi kɔtenatenaa Mediterranea Po no ho nkurow nyinaa nso mu. Yudafo a wɔbɔ petee saa no sisii hyia adan wɔ mmeae a wɔkɔtenatenae no nyinaa.
  
  Edu Homeda biara a, na wɔkenkan Mmara no kyerɛkyerɛ mu wɔ hyia adan no mu. Na wɔma obi gyina apa so kenkan Mmara no bere a nkurɔfo tete n’anim ne ne benkum ne ne nifa retie. Yudafo mmarima a na wɔbɔ mmɔden wɔ ɔsom no mu no, na hokwan wɔ hɔ ma wɔn mu biara sɛ ɔkenkan Mmara no, ɔkyerɛkyerɛ, na otu fo nso.

‘Anigye Ne Honhom Kronkron Hyɛɛ Wɔn Ma’

‘Di Onyankopɔn Ahenni Ho Adanse Fefeefe’
- d Asomafo no bere so no, sɛ mframa ano nyɛ den pii a, na hyɛn tumi twa bɛyɛ kilomita 160 da koro. Sɛ mframa ano yɛ den a, na entumi ntwa saa kwan no.