Woasiesie Wo Ho Sɛ Wobɛbɔ Asu Anaa?

Efi bere a wufii ase suaa Bible no, yegye di sɛ woasua Yehowa ho ade pii. Ebia nea woasua nti, woayɛ nsakrae pii wɔ w’abrabɔ mu. Nanso ebia biribi nti, woretwentwɛn wo nan ase sɛ wubehyira wo ho so ama Yehowa, na woabɔ asu. Adesua yi bɛma woahu nneɛma ahorow bi a ɛma ɛyɛ den ma ebinom sɛ wɔbɛbɔ asu, ne nea wubetumi ayɛ afa ho.

1. Nimdeɛ dodow sɛn na wuhia na woatumi abɔ asu?

Ɛsɛ sɛ wunya “nokware no ho nimdeɛ a edi mu” ansa na woatumi abɔ asu. (1 Timoteo 2:4) Wei nkyerɛ sɛ, ɛsɛ sɛ wutumi yi Bible asɛmmisa biara ano ansa na woatumi abɔ asu. Kristofo a wɔabɔ asu akyɛ mpo, wɔkɔ so ara sua ade. (Kolosefo 1:9, 10) Nanso nkyerɛkyerɛ atitiriw a ɛwɔ Bible mu no de, ehia sɛ wote ase. Asafo mu mpanyimfo no bɛhwɛ sɛ, nimdeɛ a wuhia na woatumi abɔ asu no, woanya anaa.

2. Nneɛma bɛn na ɛsɛ sɛ woyɛ ansa na woatumi abɔ asu?

Ansa na wubetumi abɔ asu no, ɛsɛ sɛ ‘wosakra w’adwene na wodan wo ho.’ (Kenkan Asomafo Nnwuma 3:19.) Wei kyerɛ sɛ, bɔne biara a woayɛ no, ɛsɛ sɛ wunu wo ho, na wosrɛ Yehowa sɛ ɔmfa nkyɛ wo. Afei, ɛsɛ sɛ wusi wo bo sɛ, worenyɛ biribiara a Onyankopɔn mpɛ, na wobɛbɔ wo bra ama asɔ n’ani. Ɛno da nkyɛn a, ɛsɛ sɛ wokɔ asafo nhyiam, na wo ne asafo no bom yɛ asɛnka adwuma no.

3. Adɛn nti na ɛnsɛ sɛ wusuro sɛ wobɛbɔ asu?

Ɛyɛ a ebinom suro sɛ anhwɛ a, wɔrentumi nni ɛbɔ a wɔhyɛɛ Yehowa no so. Ɛwom, ɛtɔ da a wubedi mfomso, nanso ɛba saa a, mma w’abam mmu. Mmarima ne mmea anokwafo a wɔn ho asɛm wɔ Bible mu no, wɔn nso wodii mfomso. Yehowa nim sɛ bɔne wɔ n’asomfo ho, enti ɔnhwɛ kwan sɛ wɔbɛyɛ wɔn ade pɛpɛɛpɛ. (Kenkan Dwom 103:13, 14.) Sɛ ohu sɛ woreyɛ nea wubetumi nyinaa a, n’ani sɔ paa! Wayɛ krado sɛ ɔbɛboa wo. Yehowa ama yɛn awerɛhyem sɛ, biribiara “rentumi ntew yɛn mfi [ne] dɔ ho.”—Kenkan Romafo 8:38, 39.

SUA PII KA HO

4. Hu Yehowa yiye

Yehowa ho nimdeɛ sɛn na wuhia na woatumi abɔ asu? Ɛsɛ sɛ wusua ne ho ade, wuhu no yiye, na wunya ɔdɔ ma no. Ɛno bɛma w’ani agye ho sɛ wobɛyɛ nea ɛsɔ n’ani. Hwɛ VIDEO yi, na wubehu sɛnea ebinom atumi asua Yehowa ho ade anya ɔdɔ ama no. Muwie a, munsusuw asɛmmisa yi ho:

VIDEO: Nea Ɛma Obi Tumi Bɔ Asu (3:56)

• Video no mu no, dɛn na ɛboaa ebinom ma wotumi bɔɔ asu?

Monkenkan Romafo 12:2. Muwie a munsusuw nsɛmmisa yi ho:

• Wugye di sɛ nea woresua afi Bible mu anaa nea Yehowa Adansefo ne wo resua no yɛ nokware? Anaa ɛyɛ a, w’adwene nsi wo pi?

• Sɛ w’adwene nsi wo pi a, dɛn na wubetumi ayɛ afa ho?

5. Nneɛma a ebetumi ama ayɛ den sɛ wobɛbɔ asu no, yere wo ho di so

Sɛ yesi gyinae sɛ yebehyira yɛn ho so ama Yehowa na yɛabɔ asu a, yebehyia ɔhaw ahorow. Hwɛ VIDEO yi, na wubehu wei ho nhwɛso. Muwie a munsusuw nsɛmmisa yi ho:

VIDEO: Ɔdɔ a Yɛwɔ Ma Yehowa No Boa Yɛn Ma Yedi Akwanside Ahorow So (5:22)

• Akwanside ahorow bɛn na na ɛsɛ sɛ Narangerel di so na watumi asom Yehowa?

• Sɛn na ɔdɔ a ɔwɔ ma Yehowa no boaa no ma otumi dii akwanside ahorow a ohyiae no so?

Monkenkan Mmebusɛm 29:25 ne 2 Timoteo 1:7. Muwie a munsusuw asɛmmisa yi ho:

• Dɛn na ɛbɛma yɛanya akokoduru de adi akwanside ahorow so?

6. Nya awerɛhyem sɛ Yehowa bɛboa wo

Yehowa bɛboa wo ama woayɛ nea ɛsɔ n’ani. Hwɛ VIDEO yi. Muwie a munsusuw nsɛmmisa yi ho:

VIDEO: Yehowa Nyankopɔn Bɛboa Wo (2:50)

• Adɛn nti na na ɛyɛ den ma Bible suani no sɛ ɔbɛbɔ asu?

• Dɛn na ohui a ɛboaa no ma onyaa Yehowa mu ahotoso paa?

Monkenkan Yesaia 41:10, 13. Muwie a munsusuw asɛmmisa yi ho:

• Sɛ wohyɛ bɔ sɛ wobɛsom Yehowa a, adɛn nti na ɛsɛ sɛ wunya awerɛhyem sɛ wubetumi adi so?

7. Ɔdɔ a Yehowa ada no adi akyerɛ wo no, kyerɛ ho anisɔ

Sɛ wokɔ so dwinnwen sɛnea Yehowa dɔ wo no ho a, ɛbɛma anisɔ a wowɔ ma no no ayɛ kɛse, na w’ani begye ho sɛ wobɛsom no daa. Monkenkan Dwom 40:5. Muwie a munsusuw asɛmmisa yi ho:

• Nhyira a wo nsa aka afi Yehowa hɔ no, emu nea ɛwɔ he na w’ani sɔ paa?

Ná odiyifo Yeremia dɔ Yehowa, na na n’asɛm da ne koma so. Afei, na n’ani gye ho paa sɛ Yehowa din da ne so. Ɔkaa sɛ: “W’asɛm ma midii ahurusi nyaa anigye wɔ me koma mu, efisɛ wo din da me so, O Yehowa Nyankopɔn.” (Yeremia 15:16) Bua nsɛmmisa a edidi so yi:

• Sɛ obi yɛ Yehowa Danseni a, adɛn nti na ɛyɛ hokwan kɛse paa?

• Wopɛ sɛ wobɔ asu bɛyɛ Yehowa Danseni anaa?

• Biribi siw wo kwan sɛ wobɛyɛ saa anaa?

• Wohwɛ a, dɛn na ɛsɛ sɛ woyɛ na woatumi abɔ asu?

NEA YƐASUA

Akwanside biara a ama ayɛ den sɛ wobɛbɔ asu no, Yehowa betumi aboa wo ama woadi so.

Ntimu

• Bible mu nimdeɛ sɛn na wuhia ansa na woatumi abɔ asu?

• Nsakrae bɛn na ɛho behia sɛ woyɛ ansa na woatumi abɔ asu?

• Adɛn nti na ɛnsɛ sɛ wusuro sɛ wobɛbɔ asu?

YƐ NHWEHWƐMU

Kenkan saa asɛm yi, na wubehu nea enti paa a ɛsɛ sɛ wusi gyinae sɛ wobɛbɔ asu.

“Woasiesie Wo Ho Sɛ Wobɛbɔ Asu Anaa?” (Ɔwɛn-Aban, March 2020)

Kenkan saa asɛm yi, na wubehu nneɛma pɔtee bi a ebetumi ama ayɛ den sɛ wobɛbɔ asu, ne sɛnea wubetumi adi so.

“Dɛn Na Esiw Me Asubɔ Ho Kwan?” (Ɔwɛn-Aban, March 2019)

Hwɛ video yi, na wubehu sɛnea ɔbarima bi tumi dii akwanside ahorow bi so na ɔbɔɔ asu.

‘Dɛn Na Ɛretwe W’asubɔ San?’ (1:10)

Kan no, na ɛyɛ den ma ɔbarima bi a wɔfrɛ no Ataa sɛ obesi gyinae na wabɔ asu. Hwɛ nea ɛboaa no ma otumi bɔɔ asu.

Me Paa Na Yehowa Ahyira Me Sei? (7:21)