Bɛn Onyankopɔn
So Biribi Betumi ‘Atew Yɛn Afi Nyankopɔn Dɔ Ho’?
YƐN mu hena na ɔrempɛ sɛ wɔdɔ no? Nokwarem no, sɛ yɛte nka sɛ yɛn abusuafo ne yɛn nnamfonom dɔ yɛn a, ɛma yɛn ani gye. Nanso awerɛhosɛm ne sɛ, onipa nyɛ sumii na yɛde yɛn ti ato no so. Yɛn adɔfo betumi ayɛ biribi ma ayɛ yɛn yaw, wobetumi apo yɛn, anaa mpo wɔayi yɛn baako ahyɛ yɛn nsa. Nanso obi wɔ hɔ a ne dɔ nsa da. Wɔaka ɔdɔ a Yehowa Nyankopɔn wɔ ma n’asomfo no ho asɛm fɛfɛɛfɛ wɔ Romafo 8:38, 39.
Ɔsomafo Paulo kae sɛ, “Migye di yiye.” Dɛn na na ogye di? Sɛ biribiara ntumi “ntew yɛn mfi Nyankopɔn dɔ” ho. Paulo anka ne nkutoo ho asɛm, na mmom ɔkae sɛ “yɛn”—kyerɛ sɛ wɔn a wɔde nokwaredi som Onyankopɔn no nyinaa. Nea ɛbɛyɛ na Paulo ahyɛ n’asɛm no mu den no, ɔkaa nneɛma a ɛrentumi nsiw Yehowa kwan ma ɔnna ɔdɔ adi nkyerɛ n’asomfo a wɔatu wɔn ho ama no no ho asɛm.
“Owu anaa nkwa.” Ɔdɔ a Yehowa wɔ ma ne nkurɔfo no to ntwa bere a wɔawu no. Nea ɛkyerɛ sɛ Onyankopɔn dɔ wɔn no, ɔkae nnipa a wɔte saa, na obenyan wɔn de wɔn aba nkwa mu wɔ wiase foforo a trenee wom no mu. (Yohane 5:28, 29; Adiyisɛm 21:3, 4) Nanso ɔdɔ a Onyankopɔn wɔ ma n’asomfo anokwafo no nsakra ɛmfa ho nea ebia ɛbɛto wɔn wɔ wiase nhyehyɛe yi mu no.
“Abɔfo anaa nniso.” Nnipa a wɔwɔ tumi betumi anya afoforo so nkɛntɛnso, nanso obiara ntumi nhyɛ Yehowa so. Ahonhom abɔde a wɔwɔ tumi kɛse te sɛ ɔbɔfo a akyiri yi ɔbɛyɛɛ Satan no mpo ntumi nsiw ɔdɔ a Onyankopɔn wɔ ma n’asomfo no kwan. (Adiyisɛm 12:10) Na saa ara nso na nniso a ebia wɔbɛsɔre atia nokware Kristofo no ntumi nsesa adwene a Onyankopɔn wɔ wɔ n’asomfo ho no.—1 Korintofo 4:13.
“Nneɛma a ɛwɔ hɔ anaa nneɛma a ɛrebɛba.” Onyankopɔn dɔ ano nnwo da. Biribiara nni hɔ a ɛbɛto Onyankopɔn nkurɔfo nnɛ anaa daakye a ebetumi asiw ɔdɔ a ɔwɔ ma wɔn no kwan.
“Anaa tumi.” Ná Paulo adi kan aka ɔsoro ne asase so atumfoɔ—“abɔfo” ne “nniso”—ho asɛm, nanso seesei de, ɔbɔ “tumi” din. Hela asɛmfua a ɔde dii dwuma wɔ ha no kyerɛ nneɛma pii. Ɛmfa ho nea ɛkyerɛ biara no, yenim nokwasɛm yi: Tumi biara nni ɔsoro anaa asase so a ebetumi asiw ɔdɔ a Yehowa wɔ ma ne nkurɔfo no kwan.
“Nea ɛwɔ soro anaa nea ɛwɔ fam.” Ɛmfa ho nea ɛbɛto Yehowa nkurɔfo wɔ asase yi so no, ɔda so ara dɔ wɔn.
“Anaa abɔde foforo biara.” Abɔde foforo a Paulo kaa ho asɛm, a abɔde nyinaa ka ho no kyerɛ sɛ, biribiara ntumi ntetew ɔdɔ a ɛda Yehowa ne n’asomfo anokwafo ntam no mu.
Ɔdɔ a nnipa wɔ ma afoforo no ano tumi dwo, nanso ɔdɔ a Onyankopɔn wɔ ma wɔn a wogye no di no nsesa da; ɛwɔ hɔ daa. Akyinnye biara nni ho sɛ eyi a yenim no ka yɛn ma yɛbɛn Yehowa kɛse, na yɛyɛ nea yebetumi biara de kyerɛ sɛ yɛdɔ no.