14. Dɛn na ɛda mfaso a ɛwɔ asɛmpaka adwuma a wɔyɛ wɔ afie afie no so no adi?

¹⁴ Ɛwom sɛ wɔadi Onyankopɔn asomfo ho fɛw abu wɔn sɛ wɔyɛ nkwasea esiane sɛ wɔde ɔkwan a asomafo no nam so kaa Ahenni no ho asɛm no di dwuma nti no de, nanso aba a ɛyɛ nwonwa a wɔn dwumadi sow no da no adi sɛ Onyankopɔn nhyira wɔ so. Sɛ nhwɛso no, Britaniani asetra mu nsɛm ho nimdefo Bryan Wilson yɛɛ Yehowa Adansefo nkɔso wɔ Japan ho nhwehwɛmu na ɔbɔɔ amanneɛ sɛ: “Dodow a wɔabɛyɛ Yehowa Adansefo no [ɔha biara mu 58.3] ka sɛ nea ɛma wodii kan nyaa ho anigye ne ɔdawurubɔfo a ɔkɔɔ wɔn fie.” Afei nso, mfe bi a atwam ni no Katolekni sɔfo John A. O’Brien ka kyerɛɛ asɔfo bɛyɛ 200 wɔ St. Joseph’s Seminary wɔ New York sɛ: “Nea ɛmaa ɔhotefo Paulo dwumadi tuu mpɔn kɛse ne mmɔdenbɔ a ɔde yɛɛ afie afie adwuma de hwehwɛɛ asuafo afoforo no. Ɛyɛ serew sɛ saa kwan a asomafo no faa so kaa asɛm no yɛ nea akuw a wɔnyɛ Katolekfo, titiriw Yehowa Adansefo, na wɔde redi dwuma nnɛ.

19. (a) Dɛn na ɛho hia na ama obi ayɛ nea Onyankopɔn paw no? (b) Nhwɛso bɛn na Kristo yɛe wɔ eyi fam? (d) Ɛdenam pene a wobɛpene so sɛ wobɛma wiase yi abu wo sɛ ɔkwasea no so no, hokwan ahorow bɛn na wubetumi anya?

¹⁹ Nokwarem no, wo na ɛsɛ sɛ wubua asɛm a ɛne sɛ: So meyɛ obi a Onyankopɔn bɛpaw? Ɛnyɛ nhomanim anaa dibea wɔ wiase so na ogyina paw. Na mmom nea ogyina so paw ne ɔpɛ a wowɔ sɛ wobɛyɛ Onyankopɔn adwuma wɔ ne kwan so, bere a esiane saa yɛ nti wiase yi bu wo sɛ woyɛ ɔkwasea anaa obi a ɔyɛ mmerɛw no. Yesu Kristo yɛɛ nhwɛso no. Ná ɔpene so sɛ ne bere sofo bebu no sɛ ɔkwasea sɛnea ɛbɛyɛ na wada “Onyankopɔn nyansa” adi akyerɛ wɔn a ɔkaa asɛm kyerɛɛ wɔn no. (1 Korintofo 1:30) Sɛ ɛyɛ wo pɛ sɛ wobɛka Ahenni asɛm a wiase bu no sɛ nkwaseasɛm no akyerɛ a, ɛnde na wode wo ho resi hɔ ma Yehowa Nyankopɔn de wo adi dwuma sɛ n’Adansefo no mu biako na wo nsa aka daa nkwa akyɛde wɔ ne trenee nhyehyɛe foforo a nhyira wom no mu.