-
Dɛn Na Bible Ka Fa Ɔbarima Ne Ɔbea Nna Ho?Wubetumi Anya Anigye Daa!—Nhoma a Yɛde Bɔ Bible Mu Nkɔmmɔ
-
-
ADESUA 41
Dɛn Na Bible Ka Fa Ɔbarima Ne Ɔbea Nna Ho?
Nnipa pii wɔ hɔ a, ɛyɛ a wɔfɛre sɛ wɔbɛka ɔbarima ne ɔbea nna ho asɛm. Bible de, sɛ ɛreka nna ho asɛm a, ɛmfa biribiara nsie, nanso wuhu sɛ nidi wom. Sɛ yetie nea Bible ka fa nna ho no a, ɛbɛboa yɛn, efisɛ Yehowa na ɔkyerɛw Bible no, na ɔno ara nso na ɔbɔɔ yɛn, enti onim nea eye ma yɛn. Wakyerɛ yɛn sɛnea ɛsɛ sɛ yɛbɔ yɛn bra na yɛatumi asɔ n’ani. Afei nso, wama yɛahu nea ɛsɛ sɛ yɛyɛ na yɛatumi atena ase daa.
1. Dɛn na Yehowa ka fa ɔbarima ne ɔbea nna ho?
Nna yɛ akyɛde a Yehowa de ama ɔbarima ne ɔbea a wɔaware. Ɔde saa akyɛde yi ama wɔn sɛnea ɛbɛyɛ a wɔn ani begye. Ɛsan boa ma wotumi wo mma. Ɛno da nkyɛn a, ɛyɛ ɔkwan baako a awarefo fa so de kyerɛ sɛ wɔdodɔ wɔn ho. Ɛno nti, Onyankopɔn Asɛm ka sɛ: “Wo ne ɔbea a wowaree no wo mmeranteberem no ani nnye.” (Mmebusɛm 5:18, 19) Yehowa hwɛ kwan sɛ, Kristofo a wɔaware bedi wɔn kununom anaa wɔn yerenom nokware; ɔmpɛ sɛ wɔbɛsɛe aware.—Kenkan Hebrifo 13:4.
2. Dɛn ne aguamammɔ?
Bible ma yehu sɛ, “aguamammɔfo . . . rennya Onyankopɔn Ahenni.” (1 Korintofo 6:9, 10) Wɔn a wɔkyerɛw Bible no wɔ Greek kasa mu no, wɔde asɛmfua por·neiʹa na ɛkyerɛkyerɛɛ aguamammɔ mu. Asɛmfua por·neiʹa no kyerɛ sɛn? Nea ɛkyerɛ no bi ne, (1) ɔbarima ne ɔbea a wɔnwaree a wonya nna mu nkitahodia, (2) ɔbarima ne ɔbarima a wɔne wɔn ho da anaa ɔbea ne ɔbea a wɔne wɔn ho da, ne (3) nnipa a wɔne mmoa da. Sɛ ‘yɛtwe yɛn ho fi aguamammɔ ho’ a, ɛbɛma yɛasɔ Yehowa ani, na ɛbɛboa yɛn ankasa.—1 Tesalonikafo 4:3.
SUA PII KA HO
Wobɛyɛ dɛn atwe wo ho afi aguamammɔ ho? Sɛ woma w’abrabɔ ho tew a, mfaso bɛn na wubenya? Ɔfã yi bɛboa wo ama woanya saa nsɛmmisa yi ho mmuae.
3. Guan fi aguamammɔ ho
Bere bi, na ɔbea bi pɛ sɛ ɔne ɔbarima nokwafo bi a wɔfrɛ no Yosef da. Nanso, Yosef guanee. Monkenkan Genesis 39:1-12. Muwie a munsusuw nsɛmmisa yi ho:
Adɛn nti na Yosef guanee?—Hwɛ nkyekyɛm 9.
Wohwɛ a, Yosef sii gyinae pa? Adɛn nti na woreka saa?
Ɛnnɛ, ɔkwan bɛn so na mmerante ne mmabaa betumi asuasua Yosef na wɔaguan afi aguamammɔ ho? Hwɛ VIDEO yi.
Yehowa pɛ sɛ yɛn nyinaa twe yɛn ho fi aguamammɔ ho. Monkenkan 1 Korintofo 6:18. Muwie a munsusuw nsɛmmisa yi ho:
Tebea ahorow bɛn na ebetumi ama obi abɔ aguaman?
Wobɛyɛ dɛn aguan afi aguamammɔ ho?
4. Sɛ wuhyia sɔhwɛ a, wubetumi agyina ano
Dɛn na ebetumi ama ayɛ den ama obi sɛ obeguan afi aguamammɔ ho? Hwɛ VIDEO yi. Muwie a munsusuw asɛmmisa yi ho:
Bere a onua no hui sɛ nneɛma a odwen ho ne sɛnea ɔyɛ n’ade no betumi ama wasɛe aware no, dɛn na ɔyɛe?
Obi a ɔyɛ Kristoni mapa mpo, ɛtɔ da a, ebetumi ayɛ den sɛ obedwinnwen nneɛma pa ho. Enti sɛ aguamansɛm ba w’adwene mu a, dɛn na ɛbɛboa wo na woankɔ so annwinnwen ho? Monkenkan Filipifo 4:8. Muwie a munsusuw nsɛmmisa yi ho:
Nneɛma bɛn na ɛsɛ sɛ yedwinnwen ho?
Sɛ wokenkan Bible, na wode w’adwene nyinaa si Yehowa som so a, sɛn na ɛbɛboa wo na woanyɛ bɔne?
5. Sɛ yɛde Yehowa mmara nsɛm bɔ yɛn bra a, yenya so mfaso
Yehowa nim nea eye ma yɛn. Ɔma yehu nea yɛyɛ a ɛbɛma yɛn abrabɔ ho atew, ne mfaso a yebenya afi abrabɔ pa so. Monkenkan Mmebusɛm 7:7-27 anaa monhwɛ VIDEO yi. Muwie a munsusuw nsɛmmisa yi ho:
Anammɔn bɛn na aberante no tui a ɛde no kɔɔ sɔhwɛ mu?—Hwɛ Mmebusɛm 7:8, 9.
Asɛm a ɛwɔ Mmebusɛm 7:23, 26 no ma yehu sɛ, sɛ obi bɔ aguaman a, ebetumi akɔfa ɔhaw pii abrɛ no. Sɛ yɛtwe yɛn ho fi aguamammɔ ho a, ɔhaw ahorow bɛn na ɛbɛbɔ yɛn ho ban afi ho?
Sɛ yɛma yɛn abrabɔ ho tew a, ɛbɛma yɛn ani agye, na yɛatena ase daa. Ɔkwan bɛn so?
Ebinom adwene yɛ wɔn sɛ, nea Bible ka fa ɔbarima ne ɔbarima nna anaa ɔbea ne ɔbea nna ho no yɛ kyenkyen dodo. Nanso ɛnyɛ saa na asɛm no te. Nea ɛwom ne sɛ, Onyankopɔn dɔ yɛn, na ɔpɛ sɛ obiara ani gye na ɔtena ase daa. Nanso sɛ yebetumi atena ase daa a, gye sɛ yɛde ne mmara nsɛm bɔ yɛn bra. Monkenkan 1 Korintofo 6:9-11. Muwie a munsusuw asɛmmisa yi ho:
Sɛ ɔbarima bi nya akɔnnɔ sɛ ɔne ɔbarima foforo bɛda, anaa ɔbea bi nya akɔnnɔ sɛ ɔne ɔbea foforo bɛda a, Onyankopɔn kyi. Nanso ɛno nko ara na ɔkasa tia anaa?
Sɛ yebetumi ayɛ nea ɛsɔ Onyankopɔn ani a, ɛsɛ sɛ yɛyɛ nsakrae wɔ yɛn abrabɔ mu. Sɛ obi mia n’ani yɛ nsakrae a, mfaso bɛn na obenya? Monkenkan Dwom 19:8, 11. Muwie a munsusuw nsɛmmisa yi ho:
Sɛnea Yehowa pɛ sɛ yɛbɔ yɛn bra no, wohwɛ a, ɛyɛ den dodo? Adɛn nti na woreka saa?
Yehowa aboa nnipa pii ama wɔde ne mmara reyɛ adwuma. Obetumi aboa wo nso
EBINOM KA SƐ: “Sɛ nnipa mmienu bi da a, ɛnyɛ hwee. Nea ehia ara ne sɛ wɔdɔ wɔn ho.”
Obi ka saa a, dɛn na wobɛka?
NEA YƐASUA
Nna yɛ akyɛde a Yehowa de ama ɔbarima ne ɔbea a wɔyɛ awarefo sɛnea ɛbɛyɛ a wɔn ani begye.
Ntimu
Nneɛma bɛn na obi yɛ a, ɛyɛ aguamammɔ?
Dɛn na ɛbɛboa yɛn ama yɛatwe yɛn ho afi aguamammɔ ho?
Sɛ yɛde Yehowa mmara bɔ yɛn bra a, mfaso bɛn na yebenya?
YƐ NHWEHWƐMU
Adɛn nti na Onyankopɔn pɛ sɛ ɔbarima ne ɔbea bi ware ansa na wɔatena abom? Kenkan saa asɛm yi, na wubehu nea enti a.
Ɛwom, Bible no kasa tia mmarima ne mmarima a wɔne wɔn ho da anaa mmea ne mmea a wɔne wɔn ho da. Nanso, ɛno nkyerɛ sɛ ɛsɛ sɛ yɛtan wɔn a wɔyɛ saa no. Kenkan saa asɛm yi, na wubehu nea enti a yɛreka saa.
“Sɛ Ɔbarima Ne Ɔbarima Bi Da Anaa Ɔbea Ne Ɔbea Bi Da a, Ɛyɛ Bɔne Anaa?” (Ɛwɔ jw.org)
Sɛ yɛde Onyankopɔn mmara a ɛfa nna ho no bɔ yɛn bra a, sɛn na ɛbɔ yɛn ho ban?
“Sɛ Obi Taforo Obi Barima Ho Anaa Ɔbea Bi Ase a, Ɛkyerɛ Sɛ Ɔne No Ada Anaa?” (Ɛwɔ jw.org)
Kenkan asɛm a yɛato din “Wɔde Nidi Maa Me” a ɛwɔ Ɔwɛn-Aban yi mu no, na wubehu nea ɛboaa ɔbarima bi a na ɔne mmarima da ma ɔsesaa n’abrabɔ sɛnea ɛbɛyɛ a ɔbɛsɔ Yehowa ani.
a Nna mu nkitahodi no bi ne sɛ ɔbarima ne ɔbea bi bɛda, obi bɛtaforo obi barima ho anaa ɔbea bi anan mu, obi bɛfa obi wɔ ne to, obi bɛgoro obi barima ho anaa ɔde ne nsa bɛhyehyɛ ɔbea bi ase a adwene no ne sɛ ɔde bɛkanyan nna ho akɔnnɔ.
-
-
Dɛn Na Bible Ka Fa Sigyadi Ne Aware Ho?Wubetumi Anya Anigye Daa!—Nhoma a Yɛde Bɔ Bible Mu Nkɔmmɔ
-
-
ADESUA 42
Dɛn Na Bible Ka Fa Sigyadi Ne Aware Ho?
Sɛ wokɔ aman bi so a, ebinom wɔ adwene sɛ, sɛ obi anware a, anigye a ɛde anigye de, ɔrennya bi da. Nanso nea ɛwom ne sɛ, ɛnyɛ awarefo nyinaa na wɔn ani gye, na obi yɛ sigyani nso a, ɛnkyerɛ sɛ n’asɛm yɛ mmɔbɔ. Nokwasɛm ne sɛ, Bible no ka sɛ sigyadi ne aware nyinaa yɛ akyɛde a efi Yehowa hɔ.
1. Mfaso a ɛwɔ sigyadi so no, ebi ne sɛn?
Bible ka sɛ: ‘Obiara a ɔbɛware no, ebesi no yiye. Nanso nea ɔnware no, ebesi no yiye asen nea ɔware.’ (Kenkan 1 Korintofo 7:32, 33, 38.) Adɛn nti na Bible ka sɛ, sɛ obi yɛ sigyani a, “ebesi no yiye” asen obi a waware? Sɛ Kristoni bi yɛ sigyani a, onni asɛyɛde pii te sɛ obi a waware, efisɛ onni ɔhokafo a ɛsɛ sɛ ɔhwɛ ma ne nsa ka nea ohia. Wei ma onya bere de yɛ nneɛma afoforo. Sɛ nhwɛso no, asigyafo bi tumi yɛ nneɛma pii wɔ Onyankopɔn som mu; wotumi tutu akwan kɔ mmeae afoforo kɔka asɛmpa no wɔ hɔ. Ɛno da nkyɛn a, wotumi nya bere pii de yɛ nneɛma a ɛbɛboa wɔn ama wɔabɛn Yehowa.
2. Sɛ obi ware wɔ mmara kwan so a, mfaso a ɛwɔ so no bi ne sɛn?
Sɛnea yɛadi kan ahu no, sigyadi so wɔ mfaso, na saa ara na aware nso wɔ ne de. Bible ka sɛ: “Baanu ye sen ɔbaako.” (Ɔsɛnkafo 4:9) Kristofo a wɔaware a wɔde Bible nnyinasosɛm yɛ adwuma no, wɔahu sɛ saa asɛm no yɛ nokware. Sɛ ɔbarima ne ɔbea bi ware wɔ mmara kwan so a, ɔbarima no hyɛ bɔ sɛ ɔbɛdɔ ne yere no na wabu no, na wama n’ani aku ne ho. Ɔbea no nso hyɛ bɔ sɛ ɔbɛyɛ saa. Esiane sɛ obiara ahyɛ ne yɔnko bɔ nti, ɛboa ma wɔyɛ nea wobetumi biara sɛ wɔbɛma aware no agyina. Nanso sɛ ɔbarima ne ɔbea te, na ɔnyɛɛ ne ho ade a, obiara tumi gyaw ne yɔnko hɔ bere a ɔpɛ biara. Mfaso foforo a ɛwɔ aware so ne sɛ, sɛ awarefo no wo a, ɛma mmofra no nya ahobammɔ.
3. Yehowa bu aware sɛn?
Yehowa na ɔhyehyɛɛ aware a edi kan no. Bere a ɔreka ɔbarima ne ɔbea no abom sɛ awarefo no, ɔkaa sɛ: “Ɔbarima begyaw ne papa ne ne maame hɔ na ɔde ne ho akɔbata ne yere ho.” (Genesis 2:24) Yehowa pɛ sɛ okunu ne ɔyere dodɔ wɔn ho, na wɔbata wɔn ho kosi sɛ wobewu. Ade baako pɛ na Yehowa aka sɛ awarefo betumi agyina so agyae aware. Ɛne sɛ, baako befi ne yɔnko akyi akɔsɛe aware. Ɛba saa a, nea ne ho nni asɛm no wɔ kwan sɛ ogyae aware anaa ɔkɔ so tena aware no ase.a (Mateo 19:9) Ɛno pa ho a, Yehowa mpene awaredodow so.—1 Timoteo 3:2.
SUA PII KA HO
Sɛ woyɛ sigyani anaa woaware a, wobɛyɛ dɛn ama w’ani agye, na wobɛyɛ dɛn ama Yehowa nso ani agye? Ɔfã yi bɛma woanya nsɛmmisa yi ho mmuae.
4. Sɛ woyɛ sigyani a, wobɛyɛ dɛn de saa akyɛde no ayɛ adwuma yiye?
Ná Yesu bu sigyadi sɛ ɛyɛ akyɛde. (Mateo 19:11, 12) Monkenkan Mateo 4:23. Muwie a munsusuw asɛmmisa yi ho:
Ná Yesu yɛ sigyani. Sɛn na ɔde saa akyɛde no som Yehowa na ɔde boaa afoforo?
Sɛ Kristofo a wɔyɛ asigyafo de akyɛde a wɔwɔ no som Yehowa a, wɔn ani begye sɛnea Yesu ani gyei no. Hwɛ VIDEO yi. Muwie a munsusuw asɛmmisa yi ho:
Nneɛma a mfaso wɔ so bɛn na Kristofo a wɔyɛ asigyafo betumi de asi wɔn ani so?
Wunim biribi?
Bible no nkyerɛ mfe pɔtee a ɛsɛ sɛ obi di ansa na waware. Nanso, ɛhyɛ yɛn nkuran sɛ, sɛ yɛpɛ sɛ yɛware a, yɛnhwɛ nhu sɛ ‘yɛnyɛ mmofra bio.’ Adɛn ntia? Efisɛ sɛ obi nnyin pii a, ɛyɛ a nna ho akɔnnɔ a ɛwɔ ne mu no ano yɛ den, na obetumi adi n’akɔnnɔ akyi asi gyinae a ɛnyɛ papa. —1 Korintofo 7:36.
5. Sɛ wopɛ sɛ woware a, tɔ wo bo ase hwehwɛ ɔhokafo a ɔfata
Sɛ obi pɛ sɛ ɔware a, ade baako a ehia sɛ odwen ho yiye paa ne onipa ko a ɔbɛware no. Monkenkan Mateo 19:4-6, 9. Muwie a munsusuw asɛmmisa yi ho:
Adɛn nti na ɛnsɛ sɛ Kristoni pere ne ho ware?
Wobɛyɛ dɛn ahu sɛ onipa a wopɛ sɛ woware no no bɛyɛ okunu pa anaa ɔyere pa? Bible no betumi aboa wo ama woahu. Nneɛma a wobɛhwɛ no nyinaa, nea ehia paa a ɛsɛ sɛ wohwɛ ne sɛ, ɔdɔ Yehowa anaa.b Monkenkan 1 Korintofo 7:39 ne 2 Korintofo 6:14. Muwie a, munsusuw nsɛmmisa yi ho:
Sɛ Kristoni bi pɛ sɛ ɔware a, adɛn nti na obi a ɔyɛ Kristoni nko ara na ɛsɛ sɛ ɔware no?
Sɛ yɛware obi a ɔnnɔ Yehowa a, wohwɛ a Yehowa bɛte nka sɛn?
Sɛ wode kɔndua to mmoa mmienu a ɛsono wɔn ahoɔden kɔn mu a, wɔn mmienu nyinaa bɛbrɛ. Saa ara na sɛ Kristoni bi ware obi a ɔnsom Yehowa a, wobehyia ɔhaw pii wɔ wɔn aware mu
6. Sɛnea Yehowa hu aware no, saa ara na wuhu no anaa?
Tete no, na Israelfo mmarima no bi tumi gyina biribiara kɛkɛ so gyae aware. Monkenkan Malaki 2:13, 14, 16. Muwie a munsusuw asɛmmisa yi ho:
Sɛ obi gyina biribiara kɛkɛ so gyae ne kunu anaa ne yere a, adɛn nti na Yehowa ani nnye ho?
Awaresɛe ne awaregyae nyɛ adepa. Efisɛ ɛma okunu anaa ɔyere a ne ho nni asɛm ne mmofra a wɔwɔ abusua no mu brɛ
Hwɛ VIDEO yi. Muwie a munsusuw asɛmmisa yi ho:
Sɛ wo kunu anaa wo yere nsom Yehowa a, dɛn na wubetumi ayɛ na mo aware asɔ?
7. Fa Yehowa mmara yɛ adwuma wɔ w’aware mu
Ɛtɔ da a, ebetumi ayɛ den sɛ obi a waware de Yehowa mmara bɛyɛ adwuma wɔ n’aware mu.c Nanso, sɛ otumi yɛ saa a, Yehowa behyira no paa. Hwɛ VIDEO yi.
Monkenkan Hebrifo 13:4. Muwie a munsusuw nsɛmmisa yi ho:
Wohwɛ a, mmara a Yehowa ahyehyɛ afa aware ho no, ntease wom? Adɛn nti na woreka saa?
Sɛ wokɔ aman pii so a, aban no ahyɛ mmara sɛ, sɛ nnipa mmienu pɛ sɛ wɔware anaa wogyae aware a, ɛsɛ sɛ wɔyɛ no wɔ mmara kwan so. Yehowa hwɛ kwan sɛ Kristofo bedi saa mmara no so. Monkenkan Tito 3:1. Muwie a munsusuw asɛmmisa yi ho:
Sɛ woaware a, wugye di sɛ mo aware no, aban no gye tom anaa?
OBI BETUMI ABISA SƐ: “Metumi ne obi atena a menwaree no. Enti adɛn nti na ɛsɛ sɛ meware?”
Sɛ obi ka saa a, dɛn na wobɛka?
NEA YƐASUA
Sigyadi ne aware yɛ akyɛde a efi Yehowa hɔ. Sɛ awarefo ne asigyafo nyinaa de Yehowa mmara bɔ wɔn bra a, wɔn ani begye, na wɔn koma bɛtɔ wɔn yam.
Ntimu
Sɛ obi nwaree a, nneɛma bɛn na obetumi ayɛ de akyerɛ sɛ ɔde ne sigyadi no reyɛ adwuma yiye?
Adɛn nti na Bible ka sɛ, sɛ yɛpɛ sɛ yɛware a, yɛnware obi a ɔyɛ Kristoni nko ara?
Ade baako pɛ na Bible ka sɛ obi betumi agyina so agyae aware. Ɛyɛ dɛn?
YƐ NHWEHWƐMU
Sɛ yɛka sɛ ware wɔ “Awurade mu nko ara” a, ɛkyerɛ sɛn?
Wobɛyɛ dɛn ahu sɛ woaso aware anaa wonsoe? Sɛ woaso aware nso a, wobɛyɛ dɛn ahu onipa ko a ɛsɛ sɛ woware no? Hwɛ video ntiantiaa mmienu yi, na ɛbɛboa wo ama woanya nsɛmmisa yi ho mmuae.
Ná ɛsɛ sɛ onua bi de nneɛma bɔ afɔre na watumi asom Yehowa. Bere a ɔyɛɛ saa no, ohuu sɛ nhyira a Yehowa de ama no no som bo koraa sen nea ɔde abɔ afɔre no.
Sɛ obi pɛ sɛ ogyae aware, anaa ɔne ne kunu anaa ne yere tetew mu a, nneɛma bɛn na ɛsɛ sɛ odi kan susuw ho?
“Di ‘Nea Onyankopɔn Aka Abom No’ Ni” (Ɔwɛn-Aban, December 2018)
a Sɛ yɛde awaresɛe to nkyɛn a, biribi wɔ hɔ a obi betumi agyina so atetew ne ho afi ne hokafo ho anaa? Hwɛ Nsɛm Bi Mu Nkyerɛkyerɛmu 4.
b Wokɔ aman bi so a, awofo na wɔhwehwɛ okunu anaa ɔyere ma wɔn mma. Mmeae a ɛtete saa no, sɛ awofo rehwehwɛ okunu anaa ɔyere ama wɔn ba a, ɛnyɛ onipa no sika anaa ne dibea na ɛsɛ sɛ wɔhwɛ, mmom ɛsɛ sɛ wɔhwɛ sɛ ɔdɔ Yehowa. Sɛ wɔyɛ saa a, ɛkyerɛ sɛ wɔdɔ wɔn ba no.
c Sɛ wo ne obi te na sɛ monwaree a, wo ara na ɛsɛ sɛ wusi gyinae sɛ wobɛware onipa no anaa worenware no.
-