Henanom Na Ɛsɛ Sɛ Wodi Bi?

Onyankopɔn Asɛm Wɔ Nkwa

MARCH 29, bere a owia akɔtɔ no, wɔbɛyɛ nhyiam horow mpempem pii wɔ wiase nyinaa. Eyi yɛ Yesu Kristo wu nkae afahyɛ no. Hyɛ abodoo ne bobesa a wɔde bɛfa wɔn a wɔahyiam no anim no nsow. Henanom na ɛsɛ sɛ wodi bi?

Nea Yesu ka kyerɛɛ n’asomafo anokwafo 11 no bere a ɔde saa nkae adidi yi sii hɔ no boa ma yebua saa asɛm no. Bere a ɔde bobesa kuruwa no maa n’asomafo no, ɔkae sɛ: “Kuruwa yi ne apam foforo me mogya mu, ɛno na mo nti wɔrehwie agu.” (Luka 22:20) Enti ɛdenam Yesu Kristo afɔrebɔ wu no so no, wɔde “apam foforo” bi sii hɔ. Dɛn ne “kan” apam anaasɛ apam “dedaw” a ebesii ananmu no?​—Hebrifo 8:13.

Eyi ne Mmara apam no. Wɔne Israel man no yɛe bere a wofii Misraim nkoasom mu no akyi bere tiaa bi. Ná Mose ne saa apam a Yehowa Nyankopɔn ne Israel yɛe no ntam gyinafo (sɛnea Yesu ne “apam foforo ntamgyinafo” no) . Mmoa a wɔde bɔɔ afɔre wɔ Bepɔw Sinai so no na ɛhyɛɛ Mmara apam no mu den de sii hɔ. (Hebrifo 9:15-20) Nanso, ɛfata sɛ yɛhyɛ no nsow sɛ nnipakuw kɛse a wɔnyɛ Israelfo dii Israelfo no akyi ne wɔn fii Misraim. Na ɛwom sɛ wonyaa saa apam yi ho mfaso horow de, nso ná wɔnka apam no ho.​—Exodus 12:38, 43-45, 48, 49.

Tebea bi a ɛte saa ara wɔ hɔ wɔ apam foforo no fam. Kristofo a wɔfrɛ wɔn “Onyankopɔn Israel” no nkutoo na wɔde wɔn ba saa apam a wɔne Yehowa Nyankopɔn yɛ no mu. (Galatifo 6:16) Yesu kaa Kristofo nnipa kakraa yi ho asɛm sɛ “kuw ketewa.” (Luka 12:32) Nanso, Kristofo “nnipakuw kɛse” foforo wɔ hɔ, a Yesu kaa wɔn ho asɛm sɛ ne “nguan foforo.” (Adiyisɛm 7:9, 10, 14; Yohane 10:16) Ɛwom sɛ eyinom nya apam foforo no ho mfaso de, nso wɔnka ho.

Ɔsomafo Yohane kyerɛɛ nsonoe a ɛda akuw abien a wonya Yesu afɔrebɔ no ho mfaso no ntam no mu bere a ɔkyerɛkyerɛɛ mu faa Kristo ho sɛ: “Ɔno ne yɛn bɔne [“kuw ketewa” no bɔne] ho mpata, na ɛnyɛ yɛn de nko, na mmom wiase nyinaa de ho bi.”​—1 Yohane 2:2.

Enti wɔ Kristo wu nkaedi no ase no, wɔn a wɔyɛ “Onyankopɔn Israel” no mufo nkutoo na ɛsɛ sɛ wodi abodoo no bi na wɔnom bobesa no bi. Saa honhom mu Israelfo yi dodow bɛyɛ 144,000 a wɔne Kristo bedi tumi wo ne soro Ahenni no mu. (Adiyisɛm 14:1) Na, “nguan foforo” a woyɛ nnipa pii a wofi aman horow so, a wonni bi no, benya daa nkwa wɔ Paradise asase no so, na wɔanya mfaso horow a Ahenni nniso no de bɛba no.

April Da Biara Da Asɛm

(Wopɛ nsɛm a wɔahyehyɛ awie no a, hwɛ nhoma no mu)