Nimdeɛ a Ɛde Kɔ Daa Nkwa Mu Nhoma no a Yɛde Bɛma

¹ Yɛn ani gyei bere a woyii nhoma foforo, Nimdeɛ a Ɛde Kɔ Daa Nkwa Mu, adi no! Wɔasiesie no sɛnea ɛbɛboa nkurɔfo ma wɔanya nokware no ho nimdeɛ a edi mu ntɛmntɛm. Wɔ March mu no, yebenya hokwan a edi kan sɛ yɛde nhoma yi bɛma wɔ yɛn asasesin mu. Dɛn na yebetumi aka de akanyan anigye?

² Ɔkwan a ebia wobetumi afa so de ama obi a ne gyidi wɔ Onyankopɔn mu ayɛ mmerɛw ama n’ani agye ho ni:

◼ “Wɔtetee nnipa pii ma wobenyaa gyidi wɔ Onyankopɔn mu, nanso nnɛ wɔabehu sɛ wɔn gyidi no nte sɛ nea na ɛte kan no. Wususuw sɛ dɛn nti na aba saa? [Twɛn ma ommua.] Ɛdenam amansan yi mu nneɛma a ɛyɛ nwonwa a yebesusuw ho so no, Onyankopɔn mu gyidi a yɛwɔ no mu bɛyɛ den. [Kenkan Dwom 19:1.] Onii ko a ne mmara kyerɛ ɔsoro abɔde yi kwan no de akwankyerɛ a ɛsom bo nso ama yɛn. [Kenkan Dwom 19:7-9.] Nkyekyem ahorow yi si hia a ɛho hia sɛ yesua nea yebetumi nyinaa wɔ Onyankopɔn ne n’atirimpɔw ahorow ho so dua. [Twe adwene si mfonini a ɛwɔ nkratafa 4 ne 5 no so, na kenkan asɛm a ɛwɔ ase hɔ no.] Sɛ wobɛpɛ sɛ wunya saa nimdeɛ soronko yi mu mfaso a, m’ani begye sɛ megyaw saa nhoma yi ama wo.”

³ Bere a wowɔ amanneɛbɔ nsɛm bi a ɛhaw adwene wɔ wo tirim no, wubetumi aka sɛ:

◼ “Akyinnye biara nni ho sɛ wotee [ka asɛm ko]. Woasusuw ho pɛn sɛ ebia atɛnkyea ne amanehunu a yehu wɔ baabiara anaa yɛn ankasa hyia no haw Onyankopɔn ampa? [Twɛn ma ommua.] Bible no ma yɛn awerɛhyem sɛ Onyankopɔn dɔ yɛn na ɔbɛboa yɛn wɔ ahohia bere mu.” Kenkan Dwom 72:12-17 no afã ahorow bi. Bue nhoma no mu kɔ kratafa 70, na kyerɛ sɛ, saa Nimdeɛ a Ɛde Kɔ Daa Nkwa Mu nhoma yi bua asɛm a ɔpepem pii abisa yi, Dɛn nti na Onyankopɔn ma amanehunu ho kwan? “Bible no mmuae wɔ saa asɛmmisa no ho bɛkyekye wo werɛ yiye. Mɛpɛ sɛ migyaw nhoma yi ma wo sɛnea ɛbɛyɛ a w’ankasa wubetumi akenkan ho asɛm.”

⁴ Sɛ wuhyia ɔwofo a, wubetumi adan adwene akɔ abusua no so:

◼ “Awofo dodow no ara gye tom sɛ wohyia nsɛnnennen pii bere a wɔbɔ mmɔden sɛ wobekura abusua asetra a ɛyɛ anigye mu no. Wohwɛ a dɛn ne ɛho akwanside akɛse? [Twɛn ma ommua.] Yɛn mu dodow no ara bɔ yɛn ho mmɔden sɛnea yebetumi biara, nanso yɛn ani taa sɔ mmoa a ɛbɛma yɛatumi anya mfaso kɛse. Bible de afotu a ɛkyɛn so ma. [Kenkan Kolosefo 3:12, 18-21 no afã ahorow bi.] Bible wɔ pii ka wɔ asɛm yi ho sɛnea wɔakyerɛkyerɛ mu wɔ nhoma yi ti 15 a ekura asɛmti ‘Abusua a Ɛhyɛ Onyankopɔn Anuonyam a Wobɛhyehyɛ’ mu no. Ɛka Bible mu afotu a ɛkyerɛ sɛnea yebedi aware mu haw so ne sɛnea yebegyina nsɛnnennen a yɛn mma hyia no ano. Migye di sɛ w’ani begye ho sɛ wobɛkenkan.”

⁵ Sɛ wopɛ biribi tiawa a, wubetumi asɔ eyi ahwɛ:

◼ “Woasusuw nea enti a yenyinyin na yewuwu ho pɛn? Nhoma yi ti 6 kyerɛkyerɛ nea ɛde owu bae ne sɛnea Onyankopɔn beyi afi hɔ mu. Bible ka kyerɛ yɛn sɛ, Onyankopɔn de daa nkwa ahyɛ wɔn a wɔdɔ no no bɔ. [Kenkan Yohane 17:3.] Sɛ wobɛpɛ sɛ wokenkan eyi ho asɛm a, wubehu sɛ nhoma yi ma nimdeɛ yiye.”

⁶ Sɛ yɛasiesie yɛn ho yiye a, yebetumi de nhoma yi adi dwuma de ‘abue Kyerɛwnsɛm no mu’ akyerɛ afoforo wɔ ɔkwan a ɛde anigye kɛse bɛbrɛ wɔn so!​—Luka 24:32.

San Kɔ Wɔn a Wɔkyerɛɛ Anigye

¹ Bere a wɔreyi nhoma foforo, Nimdeɛ a Ɛde Kɔ Daa Nkwa Mu adi no, nhyiam no ɔkasafo no kyerɛkyerɛɛ mu sɛ “ɛsɛ sɛ asuafo a wɔwɔ koma pa no tumi sua nneɛma pii denam sua a wobesua so na wotumi gyina Yehowa afã na wɔbɔ wɔn asu.” Wɔayɛ nhoma no sɛnea wɔde bɛkyerɛkyerɛ nokware no ntɛmntɛm. Ɛde nsɛntiaa pɔtẽẽ bi a ebetumi akanyan osuani no ma wɔatu mpɔn wɔ honhom fam ma. Ɛde nokware no ma wɔ ɔkwampa so na ɛmfa adwene nsi atoro nkyerɛkyerɛ so. Sɛ yebedi yiye wɔ adwinnade yi a yɛde bedi dwuma no mu a, ɛsɛ sɛ yɛsan kɔhwɛ wɔn a wɔkyerɛɛ anigye no.

² Sɛ wokasa kyerɛɛ obi a onni Nyankopɔn mu gyidi nanso ɔkyerɛɛ anigye bi a, wubetumi afi ase denam nhoma no mu mfonini a ɛwɔ nkratafa 4 ne 5 no a wode bɛkyerɛ no so na woaka sɛ:

◼ “Bere a edi kan a mebaa ha no, yɛhwɛɛ mfonini yi a nneɛma a ɛyɛ fɛ wom a ɛyɛ anigye no. Asɛm a ɛwɔ ase no bisa sɛ, ‘Dɛn na ɛsɛ sɛ woyɛ na woanya mu atra?’ Wubebua ɛno dɛn? [Twɛn ma ommua.] Bible no da ahiade atitiriw no mu biako adi pefee. [Kenkan Yohane 17:3.] Ɛho hia sɛ yenya nimdeɛ ka gyidi a yɛwɔ wɔ Onyankopɔn mu no ho. Ɔkwan soronko a yebetumi afa so asua nea ehia sɛ yehu ne sɛ yebesua Bible no nkakrankakra.” Dan kɔ ti 1 na kyerɛ no nkuranhyɛ nsɛm a ɛwɔ nkyekyem 1 kosi 5 mu no bi. Kyerɛkyerɛ no sɛnea yɛyɛ Bible adesua, na kyerɛ no sɛ wobɛsan aba ne no abesusuw nsɛm pii ho.

³ Sɛ wosan kɔ sɛ worekɔtoa mo nkɔmmɔbɔ a ɛfa nea enti a Onyankopɔn ama amanehunu ho kwan no so a, wubetumi aka sɛ:

◼ “Bere a etwa to a mebaa ha no, yɛbɔɔ nkɔmmɔ faa [nea mokaa ho asɛm biara] ho. Asemmisa bi sɔre faa nea enti a Onyankopɔn ama amanehunu ho kwan ho. W’adwene yɛɛ wo dɛn? [Twɛn ma ommua.] Ɛyɛ nkuranhyɛ sɛ yebehu sɛ ɛnyɛ Onyankopɔn na wama tebea ahorow a ɛhaw adwene a ɛtete saa no aba.” Dan nkɔ nkratafa 71-2 wɔ Nimdeɛ a Ɛde Kɔ Daa Nkwa Mu nhoma no mu, na munsusuw Kyerɛwnsɛm a wɔaka ho asɛm wɔ nkyekyem 3 kosi 5 no ho. Kyerɛ no sɛ wobɛsan aba abɛkyerɛkyerɛ nea enti a yebetumi anya awerɛhyem sɛ ɛrenkyɛ na amanehunu a Onyankopɔn ama ho kwan no aba awiei mu.

⁴ Sɛ woresan akɔsra ɔwofo bi a abusua mu ɔhaw ahorow ho nsɛm haw no a, wubetumi aka eyi:

◼ “Minim sɛ wo, sɛ ɔwofo no, pɛ sɛ esi wo mma yiye. Esiane sɛ ɛrentumi nyɛ yiye sɛ wobɛbɔ wɔn ho ban afi ade bɔne biara ho nti, ɛsɛ sɛ wokyerɛkyerɛ wɔn sɛnea wobegyina asetra mu haw ahorow ano. Wususuw sɛ ɔkwan bɛn so na wubetumi ayɛ ɛno? [Twɛn ma ommua.] Nneɛma a ɛho hia sen biara no mu biako a ɔwofo betumi de ama ne ntetee.” Dan kɔ nkratafa 145-6 wɔ Nimdeɛ nhoma no mu, na twe n’adwene si Bible afotu a nyansa wom no so, na si hia a ɛho hia ne sɛnea ɛsodi betumi ayɛ nhyira no so dua. Kyerɛ no sɛ wobɛsan aba abɛkyerɛ no sɛnea obetumi de saa nhoma yi asua pii afa abusua asetra mu ano Hɔ

nigye a obenya ho.

⁵ Sɛ woresan akɔ baabi a wokaa asɛntiaa bi a, wubetumi aka sɛ:

◼ “Ná ɛnyɛ Onyankopɔn atirimpɔw da sɛ yebenyinyin na yɛawuwu. Ná n’atirimpɔw ne sɛ yɛbɛtra ase daa wɔ paradise asase so.” Fa mfonini a ɛwɔ nkratafa 188-9 no kyerɛ no. Kenkan kratafa 184 nkyekyem 11 no. Yɛ nsrahwɛ foforo ho nhyehyɛe.

⁶ Akyinnye biara nni ho sɛ saa nhoma foforo yi yɛ nsiesiei foforo a efi Yehowa hɔ a ɔde ‘reyɛ’ anoboaboa adwuma no wɔ nna a edi akyiri yi mu ‘ntɛmntɛm.’ (Yes. 60:22) Sɛ yɛde di dwuma yiye a, yebetumi ama obi anya nimdeɛ a ɛbɛboa no ma wanya daa nkwa.