Brochure Ahorow a Yɛde Bɛhwehwɛ Anigyefo

¹ Brochure ahorow yɛ nnwinnade a tumi wom. Brochure nam nkratafa 32 pɛ so betumi de Kyerɛwnsɛm mu nokware ahorow asi hɔ pintinn, na abɔ nsusuwii ne nkyerɛkyerɛ a ɛne Onyankopɔn ho nimdeɛ bɔ abira agu.—2 Kor. 10:5.

² Ɔbarima bi kenkan Yehowa Adansefo—Wɔde Biakoyɛ Reyɛ Onyankopɔn Apɛde wɔ Wiase Nyinaa brochure no wiei no, ɛkaa no ma ɔkyerɛw sɛ: “Minhuu ahyehyɛde bi a ɛte sɛɛ da. . . . Ɛyɛ nwonwa sɛ wubehu nnipa a wobu Onyankopɔn apɛdeyɛ aniberesɛm kɛse saa wɔ bere a nyamesom mu nyaatwomyɛ abu so kɛse yi mu.” Ɔkɔmfo bi a ɔwɔ Afrika suaa Nya Asetra mu Anigye wɔ Asase so Daa! brochure no. Tumi bɛn na enyaa wɔ ne so? Ogyaee akɔmfosɛm no, ɔmaa mmea a ɔne wɔn te no fii ne nkyɛn kɔe ma ɛkaa ne yere panyin nkutoo. Wɔde wɔn aware no kɔhyɛɛ mmara ase.

³ So Ɛsɛ sɛ Wugye Baasakoro no Di brochure no yɛ nokware no adwinnade a wɔakyerɛw no yiye, ntease wom na etu mpɔn. Bere a The Sunday Gleaner a ɛwɔ Jamaica, West Indies, no nyamesom ho sɛnkyerɛwfo reka ho asɛm no, ɔkae sɛ: “Ɛyɛ nhoma . . . a Adansefo no de ahokokwaw akyerɛw no yiye, na mprempren Baasakorofo—anaa Baanukorofo biara—nni ahotɔ. Nhomawa no afa nsɛm pii afi abakɔsɛm ne nyamekyerɛ nhoma ahorow mu aka de akyerɛ sɛ Baasakoro nkyerɛkyerɛ no mfi Bible no mu. . . . Ɛyɛ den yiye ma nyamesom ho sɛnkyerɛwfo yi sɛ obehu sɛnea obi a ɔntaa nkɔ asɔre—anaa nea ɔtaa kɔ asɔre mpo—betumi abua nsɛm a tumi wom a ɛyɛ den sɛ wɔbɛbɔ agu a Adansefo no aboaboa ano de kasa tia adwene a ɛne sɛ Yesu ne Nyankopɔn no.”

⁴ Fa Di Dwuma Yiye: Sɛ nnwinnade fɛfɛ a wogye tom yi betu mpɔn a, ɛsɛ sɛ yɛde ma nnipa a wɔbɛkenkan. Esiane sɛ yɛwɔ brochure ahorow a ɛsono asɛmti a emu biara ka ho asɛm nti, ɛsɛ sɛ yɛbɔ mmɔden de nea yebu no sɛ ɛfata onii a yedi no adanse no sen biara no ma no. Yɛn brochure ahorow no mu nsɛm a yebehu, na yɛde ahorow ahorow ahyɛ yɛn nneɛma mu bɛma ayɛ mmerɛw kɛse sɛ yɛde bedi dwuma yiye, sɛ́ ɛyɛ asɛnka mu, fie, anaa baabi foforo no.

⁵ Sɛ nhwɛso no, sɛ wo ne obi a ontumi nhu nea Kristoman Baasakoro no kyerɛ anaa ebia osusuw sɛ Yesu ne Nyankopɔn no kasa a, brochure bɛn na wode bedi dwuma? Sɛ obi bisa nea enti a ɔdɔ Nyankopɔn ma amanehunu pii ho kwan a, brochure bɛn na ebedi n’ahiade ho dwuma? Sɛ obi ka sɛ ehia sɛ yenya nniso a nnipa no benya mu mfaso a, brochure bɛn na ebetumi afata ama no?

⁶ Brochure a wode bedi dwuma a wubehu akyi no, bɔ mmɔden sɛ wobɛkanyan onipa no anigye wɔ emu nsɛm ho. Sɛ tebea no ma kwan a, fa asɛm anaa mfonini bi a ebetumi akanyan n’anigye ma wakenkan asɛm no kyerɛ no. Anaasɛ wubetumi ne no akenkan nkyekyem biako anaa abien, ne emu kyerɛw nsɛm a wɔamfa mu nsɛm amma mu no na moasusuw asɛm no ho. Wɔnam saa kwan yi so afi Bible adesua pii ase.

⁷ Yɛn brochure ahorow no de mmuae a egyina Kyerɛwnsɛm so ma, na ɛma wɔn a wosi akyide a wɔyɛ wɔ wiase no mu ho apini no nya anidaso. (Fa toto Hesekiel 9:4 ho.) Nnipa a wɔte sɛ nguan bɛkyerɛ nhoma a ɛte sɛɛ mu nkrasɛm no ho anisɔ. Ɛyɛ hokwan a yɛanya sɛ yɛde brochure ahorow no bedi dwuma yiye wɔ afe no nyinaa mu wɔ yɛn som adwuma no afã horow nyinaa mu bere a yɛhwehwɛ anigyefo no.

Ɔwɛn-Aban ne Nyan! a Yɛde Bedi Dwuma Yiye

¹ Ɔwɛn-Aban ne Nyan! ne nsɛmma nhoma a ɛsom bo na mfaso wɔ so sen biara a nkurɔfo betumi akenkan nnɛ. Dɛn ntia? Efisɛ honhom fam nokware ahorow a ɛwom no betumi anya nnipa asetra so nkɛntɛnso pa daa. Nanso, nnipa pii nnim wɔn honhom fam ahiade nyinaa anaa wonnim faako a wobedi ho dwuma. Ɛyɛ hokwan a yɛanya sɛ yebesuasua ɔsomafo Paulo denam nkurɔfo a yɛbɛboa wɔn ma wɔabue wɔn ani wɔ honhom fam no so.—Mat. 5:3; Aso. 26:18.

² Nya Adwempa na Siesie Wo Ho Yiye: Ɛda adi sɛ nnipa a wɔte sɛ nguan wɔ mo asasesin no mu a wɔbɛkyerɛ nokware no ho anisɔ. Ebia ebinom behia nkuranhyɛ a efi ayamye mu kɛkɛ na wɔakenkan nsɛmma nhoma no. Enti da adwempa ne nsiyɛ adi bere a wode Ɔwɛn-Aban ne Nyan! no rema no. Nya nsɛmma nhoma no bi wɔ wo nneɛma mu bere nyinaa, na fa hokwan biara di dwuma fa ma, bere a wode nhoma afoforo redi dwuma mpo no.

³ Dɛn na ebetumi ama yɛatu mpɔn kɛse wɔ nsɛmma nhoma kyekyɛ mu? Nea edi kan no, ɛsɛ sɛ yɛn ankasa kyerɛ ho anisɔ ankasa. Ɛsɛ sɛ yehu nsɛmma nhoma a yɛde rema no mu nsɛm, na eyi bɛhyɛ ahotoso ne ɔpɛ a yɛwɔ sɛ yɛde bɛma no mu den. Ma asɛm yi ntra w’adwenem bere a wudi kan kenkan no. Yɛ krado sɛ wobɛpaw nsɛm a wubesi so dua wɔ asɛnka mu. Bisa wo ho sɛ: ‘Henanom titiriw na wɔn ani begye asɛm yi ho? So ɔbea warefo, abofra anaa ebia oguadini bi bɛkyerɛ ho anisɔ? So asɛm yi bɛkanyan sukuuni, ɔwarefo, anaa obi a odwen nneɛma a atwa yɛn ho ahyia ho no anigye?’ Sɛ yebetu mpɔn ampa a, ɛsɛ sɛ yetumi gyina yɛn ankasa nimdeɛ ne nsɛmma nhoma no mu nsɛm a ɛyɛ ne bere mu de ho anigye so kamfo kyerɛ.

⁴ Fa Dedaw no Di Dwuma Yiye: Kae sɛ, sɛ yɛamfa Ɔwɛn-Aban ne Nyan! no amma wɔ ɔsram biako anaa abien ntam wɔ bere a wotintim no akyi mpo a, na ɛnkyerɛ sɛ mfaso nni so bio. Bere mma hia a emu nsɛm ho hia no so ntew, na sɛ dedaw no nsɛe a, ɛnsɛ sɛ yɛtwentwɛn yɛn nan ase sɛ yɛde bɛma. Nsɛmma nhoma dedaw a yɛboaboa ano gu hɔ a yɛmfa nni dwuma da no kyerɛ sɛ yɛn ani nsɔ nnwinnade a ɛsom bo yi. Nsɛmma nhoma no mu biara kura nokware ahorow a ebetumi akanyan honhom fam nneɛma ho akɔnnɔ na adi ho dwuma. Sɛ anka yebeyi dedaw no agu baabi na yɛn werɛ afi no, ɛbɛyɛ papa sɛ yɛbɔ mmɔden yiye de mema anigyefo anaa anyɛ yiye koraa no, yegyaw gu baabi a afoforo nhu bere a yɛanto nkurɔfo wɔ fie no.

⁵ Nyan! nsɛmma nhoma no aboa nnipa pii a mfiase no na wonnwen honhom fam nneɛma ho no ma wɔahu wɔn honhom fam ahiade. Ɔwɛn-Aban no yɛ adwinnade titiriw wɔ Yehowa nkurɔfo honhom fam aduanma ho nhyehyɛe no mu. Nsɛmma nhoma abien yi mu biara boa ma foforo no di mu, na edi dwuma titiriw wɔ asɛmpaka no mu.

⁶ Bere a yɛde hokwan biara di dwuma de nsɛmma nhoma ahorow mema no, yebetumi anya ahotoso a edi mu sɛ ɛde mpɔntu bedi a wɔn a wɔte sɛ nguan no