3, 4. Dɛn nti na nnipa a wɔte saa no wɔ adwene a wokura no mu ahotoso?

³ So daakye ho adwene a ɛte sɛɛ no yɛ adaeso ara kwa, a wɔn yam a, anka aba ara kɛkɛ? Dabida. Egyina gyidi a ɛwɔ nnyinaso pintinn a ɛne sɛ sɛnea ɛte biara no, Paradise yi bɛba ampa no so. (Hebrifo 11:1) Dɛn nti na wɔwɔ awerɛhyem saa? Efisɛ amansan Bɔfo a ɔne ade nyinaa so tumfoɔ no na wahyɛ ho bɔ.

⁴ Bible no ka Onyankopɔn bɔhyɛ ho asɛm sɛ: “Asɛm biako pɛ ntɔɔ fam, nsɛmpa a [Yehowa] mo Nyankopɔn kae wɔ mo ho no nyinaa mu: ne nyinaa aba mu ama mo, emu asɛm biako pɛ antɔ fam.” “Onyankopɔn nyɛ onipa, na wadi atoro . . . So ɔno de, ɔbɛka asɛm bi na ɔrenyɛ, anaasɛ ɔbɛkasa na ɔremma entim?” “Asafo [Yehowa] aka ntam sɛ: Ampa ara, sɛnea misusuwii no, saa na ɛbɛba mu, na sɛnea mabɔ me tirim no, ebegyina.”—Yosua 23:14; Numeri 23:19; Yesaia 14:24.

5. Nsemmisa bɛn na ehia sɛ wɔma ho mmuae?

⁵ Nanso, sɛ na Onyankopɔn atirimpɔw ne sɛ ɔde asase so paradise bi a amanehunu nnim bɛba a, dɛn nti na nea edi kan koraa no, ɔmaa kwan ma nsɛmmɔne sisii? Dɛn nti na ɔtwɛnee mfe mpemnsia de besi nnɛ ansa na wasiesie nea atoto no? So ebia amanehunu a akɔ so wɔ saa mfehaha no mu nyinaa no kyerɛ sɛ Onyankopɔn nnwen yɛn ho ankasa, anaasɛ onni hɔ mpo anaa?

3, 4. Ɔkwan bɛn so na amansan no boa yɛn ma yehu sɛ Onyankopɔn wɔ hɔ?

³ Wɔɔkyeyɛfo bi na ɔyɛɛ wɔɔkye. Na yɛn okyinsoroma kuw a ɛyɛ hwanyann yiye, a ɛwɔ Owia ne ho okyinsoroma ahorow a wɔde ahoɔhare di ho kyinhyia pɛpɛɛpɛ wɔ mfehaha no mu nyinaa no nso ɛ? Na nsorommakuw a ɛyɛ nwonwa a yɛwom, a wɔfrɛ no Milky Way, ne mu nsoromma bɛboro ɔpepepem 100 no nso ɛ? So woagyina anadwo ahwɛ Milky Way no pɛn? So ɛyɛɛ wo fɛ? Afei susuw yɛn amansan kɛse pa ara a ɛwɔ nsorommakuw ɔpepepem huhaa a ɛte sɛ yɛn Milky Way de yi ara pɛ no ho! Bio nso, ɔsoro abɔde ahorow no dwumadi ayɛ nea wotumi de ho to so wɔ mfehaha no mu araa ma wɔde wɔn atoto wɔɔkye a ɛkyerɛ dɔn wɔ bere ano pɛpɛɛpɛ no ho.

⁴ Sɛ wɔɔkye a ɛnyɛ hwanyann no kyerɛ sɛ wɔɔkyeyɛfo bi wɔ hɔ a, ɛnde nokwarem no, amansan hwanyann a ɛyɛ nwonwa no kyerɛ sɛ obi a ɔhyɛɛ da yɛe bi wɔ hɔ. Enti na Bible no to nsa frɛ yɛn sɛ ‘yɛmma yɛn ani so nhwɛ,’ na afei ebisa sɛ: “Hena na ɔbɔɔ eyinom?” Mmuae no ne sɛ: “Ɛyɛ [Onyankopɔn] a obu wɔn dɔm ano kan wɔn, na ɔde wɔn nyinaa din frɛfrɛ wɔn. Esiane ne tumi a ɛdɔɔso ne n’ahoɔden kɛse nti, wɔn mu biako mpo nyera.” (Yesaia 40:26, New World Translation) Enti, ɛyɛ tumi bi a aniwa nhu no, ɔwɔ nkɛntɛnso ne nyansa—Onyankopɔn—na ɔbɔɔ amansan no.

Wɔyɛɛ Asase Ɔkwan a Ɛda Nsow So

5-7. Asase ho nokwasɛm ahorow bɛn na ɛkyerɛ sɛ Obi na ɔyɛe?

⁵ Dodow a nyansahufo sua asase no ho ade no, dodow no ara na wohu sɛ wɔyɛɛ no ɔkwan a ɛda nsow so maa nnipa sɛ wɔntra so. Ɛne owia no ntam kwan yɛ nea ɛfata pɛpɛɛpɛ na ama anya hann ne ɔhyew sɛnea ɛsɛ. Etwa owia no ho hyia pɛnkoro wɔ afe mu, na ɛdannan ne ho sɛnea ɛfata ma wim nsakrae ahorow tumi ba asase no afã horow pii. Asase no ankasa twa ne ho hyia nnɔnhwerew 24 biara, na ɛma yenya mmere a hann ne sum ba daa. Mframa ahorow a atwa ho ahyia no adi afra sɛnea ɛfata, na ama yɛatumi ahome na abɔ yɛn ho ban afi nneɛma a efi wim ba a ebetumi apira yɛn no ho. Ɛwɔ nsu ne dɔte a ɛho hia na ama aduan abɔ nso.

⁶ Sɛ saa nneɛma no nyinaa, ne afoforo, a ɛbom yɛ adwuma no nni hɔ a, anka asetra rentumi nyɛ yiye. So ɛnonom nyinaa bae ara kwa? Science News se: “Ɛte sɛ nea ɛbɛyɛ den sɛ tebea horow pɔtee a ɛyɛ pɛpɛɛpɛ saa no betumi aba ara kwa.” Dabi, ɛrentumi mma ara kwa. Odwumfo bi a waben na ɔbɔɔ ne tirim yɛe.

⁷ Sɛ wokɔ fie fɛfɛ bi mu kohu sɛ wɔde nnuan pii asie wɔ hɔ, sɛ ɛwɔ mfiri a ɛbɛma hɔ ayɛ hyew anaa ayɛ nwunu, na wɔayɛ nhyehyɛe pa a ɛbɛma wɔanya nsu wɔ hɔ a, dɛn na wubesusuw? Sɛ ne nyinaa ankasa na ɛbae ara kwa? Dabi, nokwarem no, wobɛka sɛ obi a ɔwɔ nyansa na ɔde ahwɛyiye kɛse yɛe. Wɔde ahwɛyiye kɛse na ɛyɛɛ asase no nso na ama ɛsotefo nsa aka nea wohia, ɛyɛ hwanyann na wɔde nneɛma a wobehia asie mu pii sen ofie biara.

8. Asase no ho dɛn bio na ɛkyerɛ sɛ Onyankopɔn fi ɔdɔ mu dwen yɛn ho?

⁸ Bio nso, susuw nneɛma bebree a ɛma asetra yɛ anigye pii no ho. Hwɛ nhwiren fɛfɛɛfɛ a egu ahorow pii na eyi hua huamhuam a nnipa ani gye ho no. Afei nnuan a egu ahorow pii na ɛyɛ dɛ yiye no wɔ hɔ. Kwae ahorow, mmepɔw, atare, ne abɔde afoforo a wɔn hwɛ yɛ fɛ yiye wɔ hɔ. Na owia a ɛkɔtɔ fɛfɛɛfɛ a ɛma asetra yɛ anigye pii no nso ɛ? Na sɛ yɛba mmoa mu nso a, so sɛnea nkraman mma, nnyinamoa mma, ne mmoa afoforo mma nketewa di agoru no mma yɛn ani nnye anaa? Enti asase no ma yenya anigyede ahorow a yɛnhwɛ kwan na ɛho nhia ankasa na ama nkwa akɔ so atra hɔ. Eyinom kyerɛ sɛ wofi ɔdɔ mu dwen adesamma ho na wɔyɛɛ asase no, sɛnea ɛbɛyɛ na yɛanya asetra mu anigye, na ɛnyɛ sɛ yɛbɛtra nkwa mu ara kɛkɛ.

9. Hena na ɔbɔɔ asase no, na dɛn nti na ɔbɔe?

⁹ Enti, nea nyansa wom ara ne sɛ yebegye nneɛma yi nyinaa Mafo no atom, te sɛ Bible kyerɛwfo a ɔkaa Yehowa Nyankopɔn ho asɛm sɛ: “Wo na woyɛɛ ɔsoro ne asase” no. Atirimpɔw bɛn nti na ɔyɛe? Ɔma mmuae denam Onyankopɔn a ɔka ne ho asɛm sɛ ‘Nea ɔnwenee asase na ɔyɛe, ɔno na ɔde sii hɔ; wammɔ no hunu, na ɔnwenee sɛ wɔntra so’ no so.—Yesaia 37:16; 45:18.