17. Hokwan a asɔretiafo wɔ bɛn na ɛbɛba awiei, na asɛm bɛn na yɛbɛkae nnansa yi ara?

¹⁷ Nokwarem no, yenim sɛ asɔretiafo bɛkɔ so ataa yɛn. Nanso, yɛbɛkɔ so aka asɛmpa no, na yɛbɛka bi akyerɛ wɔn a wɔsɔre tia yɛn no mpo. (Mat. 24:14, 21) Nanso, ɛnnɛ, hokwan a saa asɔretiafo no wɔ a wɔde bɛsakra wɔn adwene na wɔanya nkwa no bɛba awiei nnansa yi ara. Yehowa din ho a wɔbɛtew no ho hia koraa sen nkwagye a nnipa benya no. (Monkenkan Hesekiel 38:23.) Sɛ aman nyinaa a wɔwɔ asase yi so ka wɔn ho bom sɛ wɔbɛsɛe Onyankopɔn nkurɔfo a, yɛbɛkae asɛm a edi so yi a odwontofo no kae wɔ ne mpaebɔ no mu no. Ɔkae sɛ: “Ma wɔn ani nwu, na wɔn ho nyeraw wɔn daa; ma wɔn anim ngu ase na wɔnsɛe.”—Dw. 83:17, NW.

18, 19. (a) Dɛn na ɛreba wɔn a wɔasi wɔn bo sɛ wɔbɛsɔre atia Yehowa tumidi no so? (b) Yehowa tumidi a wɔrebɛma obiara ahu sɛ ɛno na ɛfata koraa no ka wo dɛn?

¹⁸ Wɔbɛsɛe wɔn a wɔasi wɔn bo sɛ wɔbɛsɔre atia Yehowa tumidi no pasaa. Onyankopɔn Asɛm ma yehu sɛ wɔn a ‘wontie asɛmpa no’ a wobekum wɔn wɔ Harmagedon no benya “daa ɔsɛe.” (2 Tes. 1:7-9) Ɔsɛe a wɔde bɛba wɔn so, na wɔagye wɔn a wɔsom Yehowa nokware mu nkwa no bɛyɛ adanse a edi mu a ɛkyerɛ sɛ Yehowa ne nokware Nyankopɔn koro no. Yɛbɛkae nkonimdi kɛse yi daa wɔ wiase foforo no mu. Wɔn a ‘wɔteɛ ne wɔn a wɔnteɛ a wɔbɛsɔre afi awufo mu’ no bɛte Yehowa anwonwade kɛse no ho asɛm. (Aso. 24:15) Wɔ wiase foforo no mu no, wobenya adanse a edi mu a ɛkyerɛ sɛ nyansa wom sɛ wɔbɛhyɛ Yehowa tumidi ase. Na ahobrɛasefo a wɔwɔ wɔn mu no behu no ntɛm ara sɛ Yehowa ne nokware Nyankopɔn koro no.

“Eyi Ne Onyankopɔn Din Kronkron Kɛse no Ampa”

Nicholas a ofi Cusa no na ɔkaa saa asɛm no wɔ ɔkasa bi a ɔmae wɔ afe 1430 mu.a Ná ɔyɛ ɔbarima a n’ani gye nneɛma pii ho, na sɛ nhwɛso no, osuaa Hela, Hebri, nyansapɛ, nyamekyerɛ, akontaabu, ne nsoromma ho ade. Bere a odii mfe 22 no, obenyaa abodin sɛ ɔbenfo wɔ Roma Katolek asɔre mmara mu. Wɔpaw no ɔsɔfopɔn wɔ afe 1448 mu.

Bɛyɛ mfe 550 a atwam mu no, Nicholas a ofi Cusa no sii atrae maa nnipa a wɔn mfe akɔ anim ne wɔn a wɔayɛ ayarefo wɔ Kues a ɛyɛ kurow bi a ɛwɔ Bonn anafo fam bɛyɛ kilomita 130 wɔ Germany. Seesei wɔfrɛ hɔ Bernkastel-Kues. Ɛnnɛ, Cusa nhomakorabea a nsaano nkyerɛwee bɛboro 310 wom wɔ saa atrae hɔ. Nsaano nkyerɛwee no mu biako ne Codex Cusanus 220 a emu na ɔkasa a Nicholas a ofi Cusa no mae wɔ afe 1430 mu no wɔ. Wɔ saa ɔkasa a wɔato din In principio erat verbum (Mfiase no na Asɛm no Wɔ Hɔ) mu no, Nicholas a ofi Cusa no de Latin nkyerɛwee Iehoua na egyinaa hɔ maa Yehowa.b Asɛm a edi hɔ yi a ɛfa Onyankopɔn din ho no wɔ nhoma no kratafa 56: “Edin a Onyankopɔn de ama ne ho. Ɛno ne Tetragrammaton, a ɛkyerɛ sɛ, nkyerɛwde anan na wɔde kyerɛw edin no. . . . Eyi ne Onyankopɔn din kronkron kɛse no ampa.” Nicholas a ofi Cusa asɛm no ne nokwasɛm a ɛne sɛ Onyankopɔn din wɔ Hebri Kyerɛwnsɛm no mfitiase nkyerɛwee no mu no hyia.—Ex. 6:3.

Saa nhoma a wobuebue mu yi a wɔkyerɛw no wɔ afeha a ɛto so 15 mfiase no ne nsaano nkyerɛwee a akyɛ sen biara no mu biako a ɛwɔ hɔ a wɔkyerɛw Tetragrammaton no “Iehoua” wom. Saa nsaano nkyerɛwee yi yɛ adanse foforo a ɛwɔ hɔ a ɛkyerɛ sɛ, na wɔtaa kyerɛw Onyankopɔn din no wɔ ɔkwan bi so a ɛne Onyankopɔn din “Yehowa” no di nsɛ mfehaha pii.