Nea Yebetumi Asua Afi Samuel Asetenam Nsɛm Mu

Samuel dii nokware maa Yehowa ne nkwa nna nyinaa. Bere a ɔyɛ abofra no, wansuasua Eli mma mmienu, Hofni ne Finehas a na wɔn bra asɛe no. (1Sa 2:22-26) Samuel kɔɔ so nyinii, na Yehowa dii n’akyi. (1Sa 3:19) Ɛwom, ne nkwakoraabɔ mu no, ne mma anni Onyankopɔn nokware. Nanso ɔno de, ɔkɔɔ so nantew Yehowa akwan so.—1Sa 8:1-5.

Dɛn na yɛfa fi Samuel asɛm yi mu? Ɛne sɛ, sɛ woyɛ ɔbabun a, nya ahotoso sɛ, nea worefa mu ne sɛnea wote nka nyinaa Yehowa nim, na ɔte wo ase. Obetumi aboa wo ma woayɛ ɔkokodurufo. (Yes 41:10, 13) Sɛ woyɛ ɔwofo a wo ba agyae Yehowa som a, ma Samuel asɛm no nkyekye wo werɛ. Ná ɔrentumi nhyɛ ne mma no sɛ kyenkyen ara a wɔmfa Yehowa mmara nyɛ adwuma. Ogyaa tebea no maa Yehowa, nanso ɔno ankasa de, ɔkɔɔ so maa n’abrabɔ dii mu, na ɔyɛɛ nea ɛsɔ ne soro Agya Yehowa ani. Sɛ wusuasua Samuel a, wo nhwɛso pa no betumi akanyan wo ba no ma wasan aba Yehowa nkyɛn.

HWƐ VIDEO A YƐATO DIN SUA BIRIBI FI WƆN HƆ—SAMUEL NO. WUWIE A, BUA NSƐMMISA A EDIDI SO YI:

• 

  Bere a Samuel yɛ abofra no, ɔkwan bɛn so na ɔdaa akokoduru adi?

• 

  Dɛn na Danny yɛ de kyerɛe sɛ ɔwɔ akokoduru?

• 

  Samuel bɔɔ akwakoraa no, nhwɛso pa bɛn na ɔyɛe?

• 

  Ɔkwan bɛn so na Danny awofo yɛɛ nhwɛso pa?