‘Nsɛmma Nhoma a Ɛsɛ sɛ Wɔkan no Fekɔfekɔ’

DAVID sua mmara wɔ Obafemi Awolowo Sukuupɔn mu wɔ Nigeria. Nnansa yi, ɔkyerɛw Yehowa Adansefo baa dwumadibea a ɛwɔ wɔn hɔnom no krataa bi sɛ: “Mede Nyan! kɔma onuonyamfo bi a wadi mfe 70 a ɔyɛ mmarakyerɛfo wɔ sukuupɔn no mu daa. Da koro anɔpa bi a na ne nsa aka nea aba foforo no bi no, ɔka kyerɛɛ ɔhɔho bi a na ɔwɔ n’adwumayɛdan mu sɛ: ‘Nhoma bi wɔ hɔ a ɛsɛ sɛ yɛka hwɛ, afoforo wɔ hɔ a ɛsɛ sɛ yɛmene, na emu kakra bi nso wɔ hɔ a ɛsɛ sɛ yɛwesaw no fekɔfekɔ. Nyan! yɛ nsɛmma nhoma a ɛsɛ sɛ yɛwesaw no fekɔfekɔ.’”

David kae sɛ da foforo bi nso bere a na ɔrefi ɔbenfo no adwumayɛdan mu no, ɔtee sɛ ɔrekamfo Nyan! akyerɛ ɔhɔho foforo bi nso. “Ɔkamfoo nhwehwɛmu a ɛkɔ akyiri a wɔyɛ ansa na wɔakyerɛw Nyan! no ne sɛnea wɔde akokoduru ka nneɛma ho nsɛm nanso wɔkari pɛ no. Metee sɛ ɔreka sɛ: ‘Mekenkan nsɛmma nhoma no yiye. Ɛbɛyɛ sɛ Onyankopɔn na ɔma akyerɛwfo no nyansa ma wɔde kyerɛw nsɛm nwonwaso saa no.’”

Nyan! yɛ nhoma a ɛde ntetee ma na ɛka nneɛma pii ho nsɛm. Nea ɛsen biara no, nsɛmma nhoma yi ma wonya Ɔbɔadeɛ no bɔhyɛ a ɛwɔ Bible mu a ɛyɛ wiase nhyehyɛe foforo a asomdwoe ne ahobammɔ wom a ɛreba abesi mprempren nneɛma nhyehyɛe bɔne a amumɔyɛ wom no ananmu no mu awerɛhyem. Nhomawa a ekura nkratafa 32 a ɛne Dɛn na Onyankopɔn Hwehwɛ Fi Yɛn Hɔ? no twe adwene si Onyankopɔn atirimpɔw so, na ɛde Bible mu nsɛm a ɛkyerɛ nea ɛsɛ sɛ yɛyɛ na ama yɛasɔ n’ani ma yɛn. Wubetumi akra saa nhomawa yi bi denam kratasin a ɛka ho a wobɛhyehyɛ de amena address a wɔde ama no anaa address a ɛwɔ nsɛmma nhoma yi kratafa 5 no mu nea ɛfata no so.

□ Mepɛ sɛ me nsa ka Dɛn na Onyankopɔn Hwehwɛ Fi Yɛn Hɔ? nhomawa no bi.

□ Mesrɛ sɛ mo ne me mmɛyɛ ofie Bible adesua a wontua hwee.