Wonni Nokware wɔ Baabiara!

Dannya yɛ adwuma ma aguadikuw kɛse bi a ɛwɔ Hong Kong. Bere a ɔkɔsraa adwumakuw bi a wobetumi ayɛ nneɛma abrɛ wɔn no, ɔne wɔn kaa sɛnea wɔbɛma n’adwumakuw no nneɛma a edi mũ a wɔde bɛyɛ adwuma no ho asɛm. Akyiri yi, bere a wohyiae wɔ adidibea bi no, adwumakuw sohwɛfo no maa Danny nhoma kotoku bi. Danny hwɛɛ mu no, ohui sɛ sika dɔla mpempem pii a ɛyɛ adanmude wom—sika a ɛbɛyɛ sɛ n’akatua a onya no afe mũ nyinaa.

● Nnipa pii ahyia Danny tebea yi bi. Wɔ wiase afanan nyinaa no, nokware a wonni atrɛw na abu so araa ma ɛyɛ nwonwa. Sɛ nhwɛso no, asɛnnibea kyerɛwtohɔ ahorow da no adi sɛ, wɔ afe 2001 ne 2007 ntam no, German adwumakuw kɛse bi tuaa dɔla ɔpepepem sɛ adanmude de hwehwɛɛ nnwuma fii afoforo hɔ.

Ɛwom sɛ nnansa yi aniwusɛm a akɔ so wɔ nnwumakuw akɛse mu no ama wɔayeyɛ nhyehyɛe foforo de, nanso ɛte sɛ nea tebea no resɛe wɔ baabiara. Nhwehwɛmu bi a Transparency International (kuw a ɛko tia dwowtwa) yɛe wɔ afe 2010 mu no da no adi sɛ, wɔ wiase nyinaa no, “nyansakorɔn anya nkɔanim wɔ mfe abiɛsa a atwam no mu.”

Dɛn nti na nnipa pii nni nokware saa? So nokwaredi so wɔ mfaso? Sɛ saa a, ɔkwan bɛn so? So Bible no betumi aboa yɛn?

[Ase hɔ asɛm]