Bible No Adwene

So Ɛsɛ sɛ Wokɔ Asɔrefie Anaa Asɔredan mu Kɔbɔ Onyankopɔn Mpae?

NNIPA pii kɔ asɔredan anaa asɔrefie ahorow mu kɔbɔ Onyankopɔn mpae daa. Ebinom tu kwan tenten kɔbɔ mpae wɔ mmeae a ɛte saa. So wote nka sɛ ɛsɛ sɛ wokɔ asɔrefie anaa asɔredan bi mu kɔbɔ Onyankopɔn mpae? Anaa wususuw sɛ wubetumi aka wo nsɛm akyerɛ no bere biara anaa wɔ baabiara? Dɛn na Bible no ka?

Wɔ adesamma asetena mfiase no, na adan a wɔsom Onyankopɔn wom biara nni hɔ. Ná yɛn awofo a wodi kan no te turo fɛfɛ bi mu. (Genesis 2:8) Ɛhɔ na na wofi tumi ne wɔn Bɔfo, Yehowa Nyankopɔn di nkitaho. Akyiri yi, bere a nnipa redɔɔso no, nnipa atreneefo te sɛ Noa, “ne nokware Nyankopɔn nantewee”—nanso wɔn mu biara ansom no wɔ asɔredan mu. (Genesis 6:9) Ná wɔyɛ nnipa a wɔdɔ Yehowa a wɔbɔ no mpae daa, na wonyaa n’anim dom.

Onyankopɔn Nte Adan a Wɔde Nsa Asi Mu

Ná mmarima anokwafo a wɔtenaa ase tete no nim sɛ asase ne amansan kɛse yi Bɔfo no nte adan a wɔde nsa asi mu. Ɔhene Solomon nyansafo no bisae sɛ: “Enti Onyankopɔn ne adesamma bɛtena asase so ampa ara?” Na ogye toom sɛ: “Hwɛ! Ɔsoro ne ɔsoro mu soro mpo ntumi nkora wo.” (2 Beresosɛm 6:18) Nokwarem no, na tete Israelfo no wɔ ahyiae ntamadan, na akyiri yi wonyaa asɔrefie a na wohyiam di afe afe afahyɛ ahorow sɛnea Onyankopɔn Mmara kyerɛ no. (Exodus 23:14-17) Nanso na wotumi bɔ Onyankopɔn mpae bere biara—bere a wɔrehwɛ wɔn nguan, wɔreyɛ adwuma wɔ wɔn mfuw mu, wɔreyɛ ade abom sɛ abusua, anaa wɔn nkutoo atew wɔn ho wɔ baabi no.—Dwom 65:2; Mateo 6:6.

Saa ara na yɛn nso yebetumi abɔ Onyankopɔn mpae wɔ baabiara ne bere biara. Ná yɛn nhwɛsofo, Yesu Kristo, taa kɔ baabi a ɛhɔ yɛ komm a obiara nni hɔ kɔbɔ mpae. (Marko 1:35) Sɛ nhwɛso no, bere bi “ɔkɔɔ bepɔw so kɔbɔɔ mpae, na ɔbɔɔ Onyankopɔn mpae anadwo mũ no nyinaa.”—Luka 6:12.

Ɛwom, esiane sɛ na Yesu yɛ Yudani nti, daa na ɔkɔ afahyɛ ahorow a wɔyɛ wɔ Yerusalem asɔrefie hɔ no bi. (Yohane 2:13, 14) Nanso, ɔhyɛɛ nkɔm sɛ bere bi bɛba a nokware som renkɔ so wɔ asɔrefie hɔ bio. Bere a na Yesu ne Samariani bea bi rekasa wɔ bepɔw so, beae a Samariani no nkurɔfo asɔrefie si no, ɔkae sɛ: “Dɔn no reba a morensom Agya no wɔ bepɔw yi so anaa Yerusalem.” Na ɔtoaa so sɛ nokware asomfo “bɛsom Agya no honhom ne nokware mu.”—Yohane 4:21, 23.

Yiw, Yesu amfa n’adwene ansi adan a wɔde ntayaa ne dɔte asi so, mmom ɔde sii nokware som a wobefi koma pa mu de ama so. Nanso, so na ɛno kyerɛ sɛ Yesu akyidifo, a akyiri yi wɔbɛfrɛɛ wɔn Kristofo no, rensom Onyankopɔn wɔ dan mu? (Asomafo Nnwuma 11:26) Dabi, na ntease wom.

Onyankopɔn Nkurɔfo Yɛ Kristofo Abusua

Onyankopɔn asomfo anokwafo yɛ abusua—wɔyɛ Kristofo abusua. (Luka 8:21) Abusua a ɛyɛ papa no mufo bom yɛ nneɛma pii, te sɛ aduan a wobom di, na eyi hyɛ wɔn abusuabɔ no mu den. Saa ara na ɛte wɔ Onyankopɔn som mu. Kristofo nhyiam ahorow te sɛ aduan a wodi wɔ honhom fam, efisɛ esiesie sɛnea obi te ankasa, na ɛhyɛ Onyankopɔn asomfo ntam abusuabɔ mu den. Kristoni ɔsomafo Paulo kyerɛwee sɛ: “Momma yensusuw yɛn ho yɛn ho ho, nkanyan yɛn ho yɛn ho nkɔ ɔdɔ ne nnwuma pa mu, na mommma yɛnnkwati sɛ yɛne yɛn ho behyiam sɛnea ayɛ ebinom su no, na mmom yɛnhyehyɛ yɛn ho nkuran.”—Hebrifo 10:24, 25.

Enti nokware asomfo gye tom sɛ asafo no wɔ dwuma titiriw a edi efisɛ ɛma Kristoni biara nya su pa ahorow a sɛ anka watew ne ho a, ɔrenya. Su ahorow yi bi ne ɔdɔ, bɔne fafiri, ayamye, odwo, ne asomdwoe.—2 Korintofo 2:7; Galatifo 5:19-23.

Ɛhe na na tete Kristofo no hyiam som? Ná wɔtaa hyiam wɔ afoforo afie mu. (Romafo 16:5; Kolosefo 4:15) Sɛ nhwɛso no, bere a ɔsomafo Paulo rekyerɛw ne yɔnko Kristoni bi no, ɔkaa ‘asafo a ɛwɔ ne fie no’ nso ho asɛm.a—Filemon 1, 2.

Saa ara na nnɛ nso, Onyankopɔn nkurɔfo nhia asɔredan kyenkyenee biara, na mmom wohia mmeae a obiara a ɔbɛba hɔ no betumi anya baabi atena ama ne ho atɔ no. Yehowa Adansefo de mmeae a ɛtete saa a wɔfrɛ no Ahenni Asa no di dwuma. Nokwarem no, ebetumi aba sɛ Ahenni Asa wɔ mpɔtam a wote no. Ɛyɛ adan a wɔasi no kama a ɛnyɛ kyenkyenee, na nhyiam a wɔyɛ wɔ hɔ no nkyere so pii—wɔto nnwom, bɔ mpae, na wosua Bible.

Yehowa Adansefo mfa nkitaho a wɔne Onyankopɔn di wɔ kokoam no nni agoru koraa. Ne saa nti, wogye bere bɔ mpae da biara sɛ abusua ne ankorankoro. Yakobo 4:8 ka sɛ: “Mommɛn Onyankopɔn na ɔbɛbɛn mo.”—g12-E 08.

[Ase hɔ asɛm]

SO WOADWEN HO?

● So Onyankopɔn te asɔredan anaa asɔrefie a wɔde nsa asi mu?​—2 Beresosɛm 6:18.

● Ɛhe na Yesu kɔbɔɔ mpae anadwo bi no?​—Luka 6:12.

● Dɛn nti na nokware asomfo hyiam som?​—Hebrifo 10:24, 25.

[Asɛm a wɔafa aka wɔ kratafa 15]

So mmeae ahorow bi a wobɛbɔ mpae no na ɛbɛma wɔatie wo mpaebɔ?