Yehowa Adansefo baahe na wunim wɔn? Ebia wo ne yɛn mu binom na ɛyɛ adwuma, kɔ sukuu, anaa ɛte wo mpɔtam. Anaasɛ ebia yɛne wo abɔ Bible mu nkɔmmɔ pɛn. Yɛyɛ nnipa bɛn ankasa, na dɛn nti na yɛka yɛn gyidi ho asɛm kyerɛ nkurɔfo wɔ baguam?

Yɛte sɛ onipa biara. Yefi aman ahorow so na yɛn asetena mu nsɛm gu ahorow. Ná anka yɛn mu binom wɔ ɔsom ahorow mu, na na afoforo nso nnye Onyankopɔn nni. Nanso, ansa na yɛrebɛyɛ Adansefo no, yɛn nyinaa gyee bere hwehwɛɛ Bible nkyerɛkyerɛ mu yiye. (Asomafo Nnwuma 17:11) Yegyee nea yesuae no toom, na afei yɛn ankasa sii gyinae sɛ yɛbɛsom Yehowa Nyankopɔn.

Yenya Bible a yesua no so mfaso. Yɛn nso yɛwɔ yɛn haw ne yɛn mmerɛwyɛ ahorow a ɛsɛ sɛ yegyina ano te sɛ obiara. Nanso, esiane sɛ yɛbɔ mmɔden sɛ yɛde Bible mu nnyinasosɛm bɛbɔ yɛn bra da biara da nti, ama yɛn asetena atu mpɔn kɛse. (Dwom 128:1, 2) Ɛno ne ade biako nti a yɛka nneɛma pa a yɛasua afi Bible mu ho asɛm kyerɛ afoforo no.

Yɛde nea Onyankopɔn kyerɛkyerɛ yɛn no bɔ yɛn bra. Nea yesua fi Bible mu no ma esi yɛn yiye, na ɛma yenya obu ma afoforo. Ɛma yɛda su ahorow te sɛ nokwaredi ne ayamye nso adi. Bible mu nsɛm yi boa nkurɔfo ma wɔbɛyɛ ɔmanfo a wɔwɔ apɔwmuden na mfaso wɔ wɔn so, ɛde biakoyɛ ba abusua mu, na ɛma wɔbɔ ɔbra pa. Esiane sɛ yegye di sɛ “Onyankopɔn nhwɛ nnipa anim” nti, yebu yɛn ho sɛ yɛyɛ amanaman ntam abusua bi a yɛn gyidi ama yɛayɛ biako. Yɛnyɛ nnipa mu nyiyim, na yɛmfa yɛn ho nhyehyɛ amanyɔsɛm mu nso. Ɛwom sɛ yɛte sɛ onipa biara de, nanso yɛyɛ nnipa a yɛda nsow.—Asomafo Nnwuma 4:13; 10:34, 35.

• Ɔkwan bɛn so na Yehowa Adansefo te sɛ onipa biara?

• Dɛn na Adansefo no anya afi Bible a wɔresua no mu?

Nnipa pii susuw sɛ, Yehowa Adansefo yɛ ɔsom foforo bi a aba din. Nanso, bɛboro mfe 2,700 a atwam ni na wɔfrɛɛ nokware Nyankopɔn koro no asomfo sɛ ‘n’adansefo.’ (Yesaia 43:10-12) Ansa na afe 1931 reba no, na wɔfrɛ yɛn Bible Asuafo. Dɛn nti na yɛfaa edin Yehowa Adansefo?

Edin no ma wohu yɛn Nyankopɔn. Sɛnea tete nsaano nkyerɛwee ahorow kyerɛ no, Onyankopɔn din Yehowa no pue mpɛn mpempem pii wɔ Bible mu. Wɔ nkyerɛase ahorow pii mu no, wɔde abodin ahorow te sɛ Awurade anaa Onyankopɔn na asi saa din no ananmu. Nanso, na nokware Nyankopɔn no ada ne ho adi akyerɛ Mose sɛ ne din ne Yehowa. Ɔka kyerɛɛ Mose sɛ: “Eyi ne me din de kosi daa.” (Exodus 3:15) Ɔnam saa a ɔyɛe no so daa no adi sɛ ɔyɛ soronko wɔ atoro anyame nyinaa ho. Ɛyɛ yɛn anigye paa sɛ Onyankopɔn din kronkron no da yɛn so.

Ɛma wohu adwuma a yɛyɛ. Nnipa a wɔtenaa ase tete no mu pii, a ɔtreneeni Habel na odi kan no, dii Yehowa mu gyidi a na wɔwɔ no ho adanse. Mfehaha pii a atwam no, Noa, Abraham, Sara, Mose, Dawid, ne afoforo bɛkaa “adansefo mununkum kɛse” yi ho. (Hebrifo 11:4–12:1) Sɛnea obi tumi kɔ asɛnnibea kodi adanse ma obi a ɔnyɛɛ bɔne biara no, yɛn nso yɛasi yɛn bo sɛ yɛbɛma nkurɔfo ahu yɛn Nyankopɔn no ho nokwasɛm.

Yɛresuasua Yesu. Bible frɛ Yesu sɛ “ɔdansefo nokwafo.” (Adiyisɛm 3:14) Yesu ankasa kae sɛ ‘wama wɔahu Onyankopɔn din,’ na wakɔ so adi Onyankopɔn ho ‘nokware no ho adanse.’ (Yohane 17:26; 18:37) Enti, ɛsɛ sɛ wɔn a wɔyɛ Kristo akyidifo ankasa no di Yehowa din ho adanse na wɔma nkurɔfo hu edin no. Eyi na Yehowa Adansefo rebɔ mmɔden sɛ wɔbɛyɛ.

• Dɛn nti na Bible Asuafo no faa edin Yehowa Adansefo?

• Efi bere bɛn na Yehowa nyaa adansefo wɔ asase so?

• Hena ne Yehowa Dansefo a ɔsen biara?

Bible hyɛɛ nkɔm sɛ wɔ Kristo wu akyi no, akyerɛkyerɛfo atorofo bɛsɔre afi tete Kristofo no mu abekyinkyim Bible mu nokware no. (Asomafo Nnwuma 20:29, 30) Bere kɔɔ so no, saa pɛpɛɛpɛ na ɛbae. Wɔde abosonsomfo nkyerɛkyerɛ frafraa Yesu nkyerɛkyerɛ mu, na ɛde atoro Kristosom bae. (2 Timoteo 4:3, 4) Ɛnnɛ, yɛbɛyɛ dɛn atumi ahu paa sɛ yɛte nea Bible kyerɛkyerɛ ankasa no ase?

Bere dui sɛ Yehowa ma nokware no da adi. Ɔhyɛɛ nkɔm sɛ ‘nimdeɛ a edi mu bɛdɔɔso wɔ awiei bere’ no mu. (Daniel 12:4) Wɔ afe 1870 mu no, nnipakuw kakraa bi a na wɔrehwehwɛ nokware no behui sɛ asɔre nkyerɛkyerɛ pii nnyina Kyerɛwnsɛm no so. Enti, wofii ase sɛ wɔbɛyɛ nhwehwɛmu ahu nea Bible no kyerɛkyerɛ ankasa, na Yehowa boaa wɔn ma wɔtee kyerɛw nsɛm no ase.

Nnipa komapafo tɔɔ wɔn bo ase suaa Bible no. Ɔkwan a saa Bible Asuafo a na wɔwɔ koma pa a wodii kan no faa so suaa Bible no ara na yɛn nso yɛfa so sua Bible no. Ná wosusuw Bible mu nsɛm ho mmiako mmiako. Sɛ wohu Bible mu asɛm bi a ɛyɛ den ma wɔn sɛ wɔbɛte ase a, na wɔhwehwɛ Bible mu nsɛm foforo a ɛbɛboa wɔn ma wɔate ase. Sɛ wonya ntease a ɛne Kyerɛwnsɛm no mu nsɛm a aka hyia a, na wɔkyerɛw to hɔ. Bible no a wɔmaa ɛno ankasa kyerɛkyerɛɛ emu nsɛm ase no ma wɔsan huu Onyankopɔn din ne Ahenni no ho nokwasɛm, nea enti a Onyankopɔn bɔɔ nnipa ne asase, tebea a awufo wom, ne owusɔre ho anidaso no. Nhwehwɛmu a wɔyɛe no ma wɔdee wɔn ho fii gyidihunu ne nneyɛe bɔne pii ho.—Yohane 8:31, 32.

Eduu afe 1879 mu no, Bible Asuafo no hui sɛ bere adu sɛ wɔma wɔte nokware no ho asɛm wɔ wiase nyinaa. Enti wɔ saa afe no mu no, wofii ase tintim nsɛmma nhoma a yɛda so ara tintim no nnɛ a wɔfrɛ no Ɔwɛn-Aban Ɛka Yehowa Ahenni Kyerɛ no. Seesei, yɛreka Bible mu nsɛm a ɛyɛ nokware no ho asɛm wɔ aman 240 so ne kasa bɛboro 750 mu. Ɛnnɛ paa ne bere a nokware nimdeɛ adɔɔso sen biara!

• Kristo wu akyi no, dɛn na ɛbaa Bible mu nokware no so?

• Dɛn na ama yɛatumi asan ahu Onyankopɔn Asɛm mu nokware no bio?

Mfe pii na Yehowa Adansefo tintim Bible nkyerɛase ahorow de dii dwuma, na wɔkyekyɛɛ bi nso. Nanso, yebehui sɛ ɛho hia sɛ yɛyɛ nkyerɛase foforo a ɛbɛboa nkurɔfo yiye ma wɔasua “nokware no ho nimdeɛ a edi mũ” a Onyankopɔn pɛ sɛ obiara nya no. (1 Timoteo 2:3, 4) Enti, wɔ afe 1950 mu no, yefii ase yii Wiase Foforo Nkyerɛase Bible a wɔde kasa a wɔka no nnɛ akyerɛ ase no afã bi adi. Yɛde nokwaredi akyerɛ Bible yi ase pɛpɛɛpɛ akɔ kasa bɛboro 130 mu.

Ná yehia Bible a asete nyɛ den. Bere rekɔ so no, kasa sesa, na Bible nkyerɛase pii wɔ hɔ a nsɛm a wɔde kyerɛɛ ase no mu nna hɔ anaa atwam ma enti ɛyɛ den sɛ wɔbɛte ase. Afei nso, wɔasan ahu tete nsaano nkyerɛwee pii a edi mũ na ɛbɛn nea wodii kan kyerɛwee no ma enti ama wɔate Hebri, Aram, ne Hela a wɔde kyerɛw Bible no ase yiye.

Ná yehia nkyerɛase a ɛne Onyankopɔn asɛm no hyia pɛpɛɛpɛ. Ɛnsɛ sɛ wɔn a wɔkyerɛ Bible ase no kyerɛ Onyankopɔn asɛm a ɔde ne honhom ma wɔkyerɛwee no ase sɛnea wɔpɛ, na mmom ɛsɛ sɛ wɔkyerɛ ase ma ɛne nea wodii kan kyerɛwee no hyia pɛpɛɛpɛ. Nanso, wɔayi Onyankopɔn din a ɛne Yehowa no afi Kyerɛw Kronkron no mu wɔ Bible nkyerɛase dodow no ara mu.

Ná yehia Bible a ɛbɛhyɛ ne Kyerɛwfo no anuonyam. (2 Samuel 23:2) Sɛnea wɔayɛ ho mfonini wɔ ase hɔ no, wɔ Wiase Foforo Nkyerɛase no mu no, wɔasan de Yehowa din a epue bɛyɛ mpɛn 7,000 no ahyehyɛ mmeae a na ɛwɔ no sɛnea na ɛte wɔ Bible nsaano nkyerɛwee a akyɛ paa mu no. (Dwom 83:18) Esiane sɛ wɔde nsi yɛɛ nhwehwɛmu mfe pii nti, ama yɛanya Bible a ne kenkan yɛ dɛ efisɛ ɛma yehu Onyankopɔn nsusuwii yiye. Sɛ́ ebia mowɔ Wiase Foforo Nkyerɛase no bi wɔ mo kasa mu anaa munni bi no, yɛhyɛ wo nkuran sɛ fa yɛ wo nhyehyɛe sɛ wobɛkenkan Yehowa Asɛm no da biara da.—Yosua 1:8; Dwom 1:2, 3.

• Dɛn nti na yesii gyinae sɛ ehia sɛ yenya Bible nkyerɛase foforo?

• Dɛn na ɛyɛ papa sɛ obi a ɔpɛ sɛ ohu Onyankopɔn apɛde yɛ no da biara da?