Dɛn Na Bible Aka?

Enti Onyankopɔn bua obiara mpaebɔ?

WOBƐKA SƐ . . .

• Obua obiara mpaebɔ

• Obua ebinom mpaebɔ

• Ommua obiara mpaebɔ

NEA BIBLE NO KA

“Yehowa bɛn wɔn a wɔfrɛ no nyinaa, wɔn a wɔfrɛ no nokwaredi mu no.”​—Dwom 145:18.

DƐN BIO NA BIBLE NO KA?

• Onyankopɔn ntie wɔn a wɔyɛ ne so asoɔden no mpaebɔ. (Yesaia 1:15) Nanso sɛ wɔsakra wɔn akwan a, ɔne wɔn ‘bɛtoto nneɛma yiye.’​—Yesaia 1:18.

• Sɛ Onyankopɔn bebua mpae bi a, ɛsɛ sɛ ɛne n’asɛm a ɛwɔ Bible mu no hyia.​—1 Yohane 5:14.

Sɛ yɛrebɔ mpae a, ɛsɛ sɛ yegyina hɔ anaa yɛkotow?

EBINOM GYE DI sɛ, sɛ wɔrebɔ mpae a, ɛsɛ sɛ wobu nkotodwe, wosi wɔn ti ase, anaa wɔka wɔn nsa bom. Wudwen ho sɛn?

NEA BIBLE NO KA

Onyankopɔn atie nnipa bi a wɔbɔɔ mpae bere a na ‘wɔte hɔ’ anaa ‘wogyina hɔ’ anaa ‘wobutuw hɔ’ anaa ‘wɔabu nkotodwe.’ (1 Beresosɛm 17:16; 2 Beresosɛm 30:27; Esra 10:1; Asomafo Nnwuma 9:40) Sɛ yɛrebɔ mpae a, Onyankopɔn nhwɛ kwan sɛ yebegyina hɔ anaa yɛbɛkotow.

DƐN BIO NA BIBLE NO KA?

• Onyankopɔn tie ahobrɛasefo mpaebɔ.​—Dwom 138:6.

• Wubetumi de kasa biara abɔ mpae. Wopɛ nso a, wobɛbɔ mpae no wɔ wo tirim.​—2 Beresosɛm 6:32, 33; Nehemia 2:1-6.