Henanom Din Na Ɛwɔ “Nkwa Nhoma” No Mu?

Nea Bible ka

“Nkwa nhoma” anaa “nkae nhoma” no, emu na nnipa a wobenya daa nkwa akyɛde no nyinaa din wɔ. (Adiyisɛm 3:5; 20:12; Malaki 3:16) Onyankopɔn na ɔkyerɛ wɔn a wɔn din bɛba nkwa nhoma no mu. Ɔhwɛ sɛ onii no tie no na odi no nokware.​—Yohane 3:16; 1 Yohane 5:3.

Fi “bere a wɔhyɛɛ wiase ase” de besi nnɛ, Onyankopɔn kae obiara a wadi no nokware. Ɛte sɛ nea wakyerɛw wɔn din wɔ nhoma bi mu ara pɛ. (Adiyisɛm 17:8) Ɛbɛyɛ sɛ ɔbarima nokwafo Habel ne obi a odi kan a wɔkyerɛw ne din wɔ nkwa nhoma no mu. (Hebrifo 11:4) Nanso anokwafo din no, ɛnyɛ sɛ wɔakyerɛw agu baabi kɛkɛ. Efisɛ nkwa nhoma no ma yehu sɛ Yehowa yɛ ɔdɔ Nyankopɔn na ‘onim wɔn a wɔyɛ ne de.’​—2 Timoteo 2:19; 1 Yohane 4:8.

Edin a ɛwɔ “nkwa nhoma” no mu no, wotumi popa anaa?

Aane. Onyankopɔn kaa tete Israelfo a wɔyɛɛ asoɔden no ho asɛm sɛ: “Nea wayɛ me bɔne no na mɛpopa ne din afi me nhoma mu.” (Exodus 32:33) Sɛ yedi nokware a, yɛn din bɛkɔ so atena “nkwa nhoma” no mu.​—Adiyisɛm 20:12.