Djoshuwa
14 Ii ndiyo nhaka yakatambirhwa nge Aisraeri mu nyika yo Kanani, yaakapaswa no mupristi Ereazari na Djoshuwa, mwana wa Nuni, uye no akuru e nyumba dzo madzibaba e madzinza e Israeri kuti igare nhaka yawo. 2 Nhaka ye madzinza mapfembamwe no hafu yakakowaniswa peciseenzeswa mudjenya, hinga zvainga zvabhuiwa na Djehovha eciseenzesa Mozesi. 3 Mozesi wainga apasa nhaka madzinza amweni mairi no hafu ku n’ombera* ko Djorodhani, asi aazi kupasa Arevhi nhaka. 4 Ana a Zuzee akaerengwa hinga madzinza mairi, ra Manase uye ra Efraimu; Arevhi aazi kutambira nhaka mu nyikeyo, awona akapaswa basi mathaundi kuti agare no mbuto ye kuushira zvipfuyo zvawo uye yokukandira zviro zvawo. 5 Ngokudaro, Aisraeri akakowanisa nyika iyona, hinga zvainga zvabvunzwa Mozesi na Djehovha.
6 Hino anarume e dzinza ra Djudha akakhwedera kuna Djoshuwa ku Jirigari, uye Karebhe mwana wa Jefunee Mukenizi, wakamubvunza kuti: “Iwewe unozviziya zvakabhuya Djehovha kuna Mozesi munhu wa Mwari we zvirokwazvo nge zvangu uye nge zvako ku Kadhesi-bharneya. 7 Inini ndainga ndino makore 40 Mozesi museenzi wa Djehovha paakandituma kubva ku Kadhesi-bharneya kuti ndiende koovhevha nyika, uye ndakahwirira, ndoreketa zvandakaona ngo mushobo wazvainga zviri kamare. 8 Kunyazi hazvo hama dzangu dzandakaenda nadzo dzakaita kuti anhu athye,* inini ndakazwira Djehovha Mwari wangu, no mwoyo wese.* 9 Mozesi wakapika pa zuwa irona eciti: ‘Nyika yawakatsika icagara nhaka yako no ana ako nokusikaperi, ngokuti iwewe wazwira Djehovha Mwari wangu, no mwoyo wese.’ 10 Hinga zvaakagondesa, Djehovha aita kuti ndirumbwe ndiri mupenyu ke makore ese aya 45, kubvira Djehovha paakaita gondeso ii kuna Mozesi, Aisraeri paaihamba ku renje; dakara na nyamasi ndiciri pano, uye ndaano makore 85. 11 Uye nyamasi, ndiciri no simba hingana randainga ndinaro pa zuwa randakatumwa na Mozesi. Ndiciri no simba rimwero hingana randainga ndinaro pa nguwa iyona, rokuti ndiende ku hondo kunyazi ro kuita mabasa amweni. 12 Ngokudaro, ndipase mutanha we matunhu uu wakagondeswa na Djehovha pa zuwa riya. Kunyazi hazvo wakazwa pa zuwa irona kuti mu mbuto iyona mainga muno Aanakimu no mathaundi makuru akatenderedzwa no muru, zvezvirokwazvo* Djehovha anonga aneni, uye ndicaadzingira, hinga zvandainga ndakagondeswa na Djehovha.”
13 Hino Djoshuwa wakamukomborera uye wakapasa Hebroni hinga nhaka kuna Karebhe mwana wa Jefunee. 14 Ndiyo ndaa Hebroni nge ya Karebhe mwana wa Jefunee Mukenizeu, hinga nhaka dakara na nyamasi, ngokuti iyena wakazwira Djehovha Mwari we Israeri, no mwoyo wese. 15 Kareko, Hebroni yaizwi Kiriyati-arbha (Arbha wainga ari mwanarume wakakura pakati pe Aanakimu). Uye nyikeyo yakagara mu runyararo.