Djoshuwa

21 Hino misoro ye mhuri ye ku dii ra baba e dzinza ra Revhi akaenda kuna Ereazari mupristi, Djoshuwa mwana wa Nuni, uye ku misoro ye mhuri ye ku dii ra baba e madzinza e Israeri, akaenda kuna Ereazari mupristi 2 uye akaabvunza ku Siro mu nyika yo Kanani kuti: “Djehovha eciseenzesa Mozesi akabhuya kuti taidikana kupaswa mathaundi ekuti tigare, pamwepo no mbuto dze kuushira zvipfuyo zvedu.” 3 Hino maererano no zvakabhuiwa na Djehovha, Aisraeri akadusa pa nhaka yawo kamare mathaundi awo pamwepo no mbuto dzo kuushira uye akazvipasa ku Arevhi.

4 Mudjenya wekutanga wakawira ku mhuri dze Akowati; Arevhi ainga ari ana a Aroni mupristi, akatambira mathaundi 13 peciseenzeswa mudjenya kubva ku madzinza a Djudha, a Simioni, uye a Bhenjamii.

5 Uye Akowati amweni ainga asara akatambira* mathaundi gumi kubva ku mhuri dze dzinza ra Efraimu, dzinza ra Dhani, uye hafu ye dzinza ra Manase.

6 Uye Ajersoni akatambira mathaundi 13 kubva ku mhuri dze dzinza ra Isakari, dzinza ra Azeri, dzinza ra Nafitari, uye hafu yo dzinza ra Manase ku Bhazani.

7 Amerari maererano no mhuri dzawo, akatambira mathaundi 12 kubva ku dzinza ra Rubheni, dzinza ra Gadhi, uye dzinza ra Zebhuroni.

8 Ngokudaro, Aisraeri akapasa Arevhi eciseenzesa mudjenya mathaundi aya no mbuto dzawo dze kuushira, hinga zvakabhuiwa na Djehovha eciseenzesa Mozesi.

9 Kubva ku dzinza ra Djudha uye ku dzinza ra Simioni, awona akaapasa mathaundi anoteera, anodudzwa nge zina; 10 mathaundi awona akapaswa ku ana a Aroni, ainga ari e mhuri dze Akowati, mu mhuri dze Arevhi, ngokuti mudjenya wekutanga wakawira kaari. 11 Akaapasa Kiriyati-arbha, kureya Hebroni, ku mutanha we matunhu we Djudha, uyewo no mbuto dze kuushira dzainga dzakaatenderedza (Arbha wainga ari baba a Anaki.) 12 Asi minda no mizi dze mathaundi awona zvakapaswa kuna Karebhe, mwana wa Jefunee, kuti zvigare zviro zvake.

13 Uye ana e mupristi Aroni, akapasa thaundi re kutizira ku uya unouraya munhu umweni, kureya Hebroni no mbuto dzaro dze kuushira, uyewo Ribna no mbuto dzaro dze kuushira, 14 Jatiri no mbuto dzaro dze kuushira, Estemoa no mbuto dzaro dze kuushira, 15 Oroni no mbuto dzaro dze kuushira, Dhebhiri no mbuto dzaro dze kuushira, 16 Aini no mbuto dzaro dze kuushira, Juta no mbuto dzaro dze kuushira, uye Bheti-semesi no mbuto dzaro dze kuushira, mathaundi mapfumbamwe e madzinza aya mairi.

17 Kubva ku dzinza ra Bhenjamii: Jibhioni no mbuto dzaro dze kuushira, Jebha no mbuto dzaro dze kuushira, 18 Anatoti no mbuto dzaro dze kuushira, uye Arimoni no mbuto dzaro dze kuushira, mathaundi marongomuna.

19 Mathaundi ese akapaswa ana a Aroni ekuti ainga ari apristi, ainga ari mathaundi 13 no mbuto dzawo dze kuushira.

20 Uye amweni akasara mu mhuri dze Akowati pakati pe Arevhi akatambira peciseenzeswa midjenya mathaundi e dzinza ra Efraimu. 21 Awona akatambira thaundi re kutizira ku uya unouraya munhu umweni, kureya Sikemu no mbuto dzaro dze kuushira, mu mutanha we matunhu we Efraimu; uyewo Jezeri no mbuto dzaro dze kuushira, 22 Kibhizaimu no mbuto dzaro dze kuushira, uye Bheti-oroni no mbuto dzaro dze kuushira, mathaundi marongomuna.

23 Kubva ku dzinza ra Dhani: Eriteke no mbuto dzaro dze kuushira, Jibhetoni no mbuto dzaro dze kuushira, 24 Aijaroni no mbuto dzaro dze kuushira, Gati-rimoni no mbuto dzaro dze kuushira, mathaundi marongomuna.

25 Kubva ku hafu yo dzinza ra Manase: Taanaki no mbuto dzaro dze kuushira uye Gati-rimoni no mbuto dzaro dze kuushira, mathaundi mairi.

26 Kubatanidza ese amweni akasara e mu mhuri ye Akowati akatambira mathaundi gumi pamwepo no mbuto dzawo dze kuushira.

27 Uye Ajersoni e ku mhuri dze Arevhi akatambira kubva ku hafu ye dzinza ra Manase thaundi re kutizira ku uya unouraya munhu umweni, kureya Gorani ku Bhazani, pamwepo no mbuto dzaro dze kuushira; Bhesitera no mbuto dzaro dze kuushira, mathaundi mairi.

28 Kubva ku dzinza ra Isakari: Kisioni no mbuto dzaro dze kuushira, Dhabherati no mbuto dzaro dze kuushira, 29 Jarimuti no mbuto dzaro dze kuushira, uye Eni-Ganimu no mbuto dzaro dze kuushira, mathaundi marongomuna.

30 Kubva ku dzinza ra Azeri: Mishari no mbuto dzaro dze kuushira, uye Abhidhoni no mbuto dzaro dze kuushira, 31 Erikati no mbuto dzaro dze kuushira, uye Reobhi no mbuto dzaro dze kuushira, mathaundi marongomuna.

32 Kubva ku dzinza ra Nafitari: Thaundi re kutizira ku uya unouraya munhu umweni, kureya Kedhesi ku Garireya no mbuto dzaro dze kuushira; uyewo Amoti-dhori no mbuto dzaro dze kuushira, Kartani no mbuto dzaro dze kuushira, mathaundi matatu.

33 Kubatanidza ese, Ajersoni akatambira maererano no mhuri dzawo mathaundi 13 no mbuto dzawo dze kuushira.

34 Uye ku mhuri dze Amerari, Arevhi akasara, akatambira kubva ku dzinza ra Zebhuroni: Jokineamu no mbuto dzaro dze kuushira, Karta no mbuto dzaro dze kuushira, 35 Dhimina no mbuto dzaro dze kuushira, uye Naarari no mbuto dzaro dze kuushira, mathaundi marongomuna.

36 Kubva ku dzinza ra Rubheni: Bhezeri no mbuto dzaro dze kuushira, Jaazi no mbuto dzaro dze kuushira, 37 Kedhemoti no mbuto dzaro dze kuushira, uye Mefati no mbuto dzaro dze kuushira, mathaundi marongomuna.

38 Kubva ku dzinza ra Gadhi: Thaundi re kutizira ku munhu unouraya munhu umweni, kureya Ramoti ku Giriyadhi no mbuto dzaro dze kuushira; uyewo Maanaimu no mbuto dzaro dze kuushira, 39 Hesibhoni no mbuto dzaro dze kuushira, uye Jazeri no mbuto dzaro dze kuushira, ese ainga ari mathaundi marongomuna.

40 Kubatanidza ese, Amerari, kureya amweni akasara ku mhuri dze Arevhi akatambira mathaundi 12, maererano no mhuri dzawo.

41 Mukati me nhaka ye Israeri, Arevhi akapaswa mathaundi 48 pamwepo no mbuto dzawo dze kuushira. 42 Thaundi rimwe na rimwe rainga rino mbuto dze kuushira nge mu muceto, mathaundi ese aya ainga akadaro.

43 Ngokudaro, Djehovha akapasa Aisraeri nyika yese yaainga akapikira ku madzitsekuru awo, awona akatora nyika iyona uye akagaremo. 44 Kusiya izvona, Djehovha akaazorodza mu matii ese, hinga zvaainga akapikira ku madzitsekuru awo; uye apana kunyazi muzondi umwe hake pa azondi awo ese wakakwanisa kuakunda. Djehovha akakanda azondi awo ese mu nyara dzawo. 45 Pa zvipikirhwa zvese zvakanaka zvakaizwa na Djehovha ku dzinza ra Israeri apana kunyazi cipikirhwa* cimwe haco cisikazi kudzadzika; zvipikirhwa zvese zvakadzadzika.