GENESI

1 Pakutanga, Mwari akasika denga no nyika.

2 Nyika yainga isikazi kugadzirhwa,* isina ciro, uye cidima cainga ciri pamusoro pe mvura yakadzika, uye simba ra* Mwari raihamba-hamba pamusoro pe mvura.

3 Uye Mwari akati: “Ngakuoneke ciedza.” Hino ciedza cakaonekepo. 4 Mumasure mazvo, Mwari akaona kuti ciedza cainga cakanaka uye Mwari akatanga kuparadzanisa ciedza no cidima. 5 Mwari akadainza ciedza kuti Masikati, asi cidima akacidainza kuti Usiku. Kakaita usiku no macibesi, zuwa rokutanga.

6 Hino Mwari akati: “Pakati po mvura ngapaoneke mbuto yakakura inoparadzanisa mvura imwe no imweni.” 7 Ngokudaro, Mwari akatanga kugadzira mbuto huru uye akaparadzanisa mvura iri pasi pe mbuto huru no mvura iri pamusoro pe mbuto huru. Uye izvona zvakaitika nge mushobo uwona. 8 Mwari akadainza mbuto huru kuti Denga. Uye kakaita usiku no macibesi, zuwa rocipiri.

9 Hino Mwari akati: “Mvura iri pasi pe denga ngaiungane pa mbuto imwe basi, uye ngapaoneke mbuto yakaoma.” Uye zvakaitika nge mushobo uwona. 10 Mwari akadainza mbuto yakaoma kuti Nyika, asi mvura yakaungana akaidainza kuti Bahari. Uye Mwari akaona kuti zvainga zvakanaka. 11 Hino Mwari akati: “Nyika ngaimere shango, miti dzinobara mbeu no miti dzinobara micero maererano no mishobo yadzo, ngaibare micero ino mbeu.” Uye zvakaitika nge mushobo uwona. 12 Nyika yakatanga kumera shango, miti dzinobara mbeu uye miti dzinobara micero ino mbeu, maererano no mishobo yadzo. Mwari akaona kuti zvainga zvakanaka. 13 Kakaita usiku uye macibesi, zuwa rocitatu.

14 Hino Mwari akati: “Ngakuoneke zvivheneko mu mbuto huru ye kudenga kuti zvisiyanise masikati no usiku, uye izvona zvicaseenza hinga zvipangidzo zve kuziya nazvo nguwa, mazuwa uye makore. 15 Izvona zvicaseenza hinga zvivheneko mu mbuto huru ye kudenga kuti zvivhenekere nyika.” Uye zvakaitika nge mushobo uwona. 16 Uye Mwari akaita zvivheneko zviiri zvikuru, civheneko cakakura kuti civhenekere masikati uye civheneko cakadodoka kuti civhenekere usiku, uye akaitawo nyeredzi. 17 Ngokudaro, Mwari akazvikanda mu mbuto huru ye kudenga kuti zvivhenekere pa nyika, 18 kuti izvona zvivhenekere masikati no usiku uye zviparadzanise ciedza no cidima. Mwari akaona kuti zvainga zvakanaka. 19 Kakaita usiku uye macibesi, zuwa rocirongomuna.

20 Hino Mwari akati: “Mu mvura ngamudzare no zvisikwa zvipenyu,* uye zvisikwa zvinomburuka ngazvimburuke pamusoro pe nyika, pamusoro pe mbuto huru ye kudenga.” 21 Uye Mwari akasika zvinyama zvikuru zve mu bahari no zvisikwa zvese zvipenyu* zvinohamba uye zvinogara zvakawanda mu mvura, uyezve zvisikwa zvese zvino mabaphiro, zvinomburuka, maererano no mishobo yazvo. Uye Mwari akaona kuti zvainga zvakanaka. 22 Ngokudaro, Mwari akazvikomborera, eciti: “Baranai muwande, mudzadze mvura ye mu bahari, uye zvisikwa zvinomburuka zve pa nyika ngazviwande.” 23 Kakaita usiku uye macibesi, zuwa rocishanu.

24 Hino Mwari akati: “Pa nyika ngapaoneke zvisikwa zvipenyu* maererano no mishobo yazvo, zvipfuyo, zvinyama zvinopsveremenda* uye zvinyama zve mushango zve pa nyika, maererano no mishobo yazvo.” Uye zvakaitika nge mushobo uwona. 25 Mwari akaita zvinyama zve mushango zve pa nyika maererano no mishobo yazvo, zvipfuyo maererano no mishobo yazvo uye zvinyama zvese zvinopsveremenda* maererano no mishobo yazvo. Uye Mwari akaona kuti zvainga zvakanaka.

26 Hino Mwari akati: “Ngatiite munhu no mufanikiso wedu, wakatodzana na isusu, uye ngaagare no simba pa howe dze mu bahari, pa zvisikwa zvinomburuka zve kudenga, pa zvipfuyo, pa nyika yese, uye pa zvinyama zvese zvinopsveremenda no zvinohamba pa nyika.” 27 Uye Mwari akasika munhu no mufanikiso wake, akamusika no mufanikiso wa Mwari; akasika mwanarume no mwanakadzi. 28 Uyezve, Mwari akaakomborera uye akati kaari: “Baranai muwande, mudzadze nyika uye muionerere; garai no simba pa howe dze mu bahari, pa zvisikwa zvinomburuka zve kudenga uye pa zvisikwa zvese zvipenyu zvinohamba pa nyika.”

29 Hino Mwari akati: “Inini ndinomupasai miti yese inobara mbeu iri pa nyika yese uye miti yese inobara micero ino mbeu. Iyona icaseenza hinga zvokurhya kamuri. 30 Uye zvinyama zvese zve mushango zve pa nyika, zvisikwa zvese zvinomburuka zve kudenga uye zvese zvipenyu zvinohamba pa nyika, ndinozvipasa shango rakasvipirira kuti zvirhye.” Uye zvakaitika nge mushobo uwona.

31 Mumasure mazvo, Mwari akaona kuti zvese zvaainga aita, zvainga zvakanaka maningi. Kakaita usiku uye macibesi, zuwa rocitanhatu.

2 Ngokudaro, denga no nyika no zvese zviri mazviri* zvakapera kusikwa. 2 Pa zuwa rocinomwe, Mwari ainga apedza kuita basa rake rese, uye iyena akazorora pa zuwa rocinomwe, pa basa rese raainga aita. 3 Uye Mwari akakomborera zuwa rocinomwe uye akariita cena, ngokuti pa zuwa irona Mwari akazorora pa zviro zvese zvaakasika, pa zvese zvaakasanangura kuita.

4 Ii ndiyo ngano yo denga no nyika pa nguwa yezvakasikwa, pa zuwa rokuti Djehovha* Mwari akaita denga no nyika.

5 Pa nyika painga pasati paano mapfiba uye shango rainga risati ramera, ngokuti Djehovha Mwari ainga asati anaisa mvura pa nyika uye painga pasina munhu kuti airime. 6 Asi mhute yaibva pa nyika, yaitotesa nyika yese.

7 Uye Djehovha Mwari akaita munhu ngo mataka, akafuridzira mu miro* dzake mwiya we upenyu; ngokudaro munhu wakagara cisikwa cipenyu.* 8 Uyezve, Djehovha Mwari akasima munda we Edheni kumabvazuwa; uye akakandemo munhu waainga asika. 9 Hino Djehovha Mwari akaita kuti mu mundemo mumere mishobo yese yo miti yakarungama uye yakanakira kurhyiwa, uyewo muti we upenyu pakati pe munda uye no muti we kuziya zvakanaka no zvakashata.

10 Painga pano murambo waitangira mu Edheni uye waidirira mundewo, pedzepo waiparadzana uye dzogara mirambo mirongomuna.* 11 Murambo wekutanga unodainzwa kuti Pisoni; uya unotenderedza nyika yese yo Avhira, uko kuno oro. 12 Oro yo nyika iyona yakanaka maningi. Ikona kunoonekawo bhidheriyo no onikisi. 13 Murambo wecipiri unodainzwa kuti Jioni; uu ndiwo unotenderera nyika yese yo Kushi. 14 Murambo wecitatu unozwi Idhekeri;* ndiwo uya unoenda kumabvazuwa ke Asiriya. Uye murambo we cirongomuna unozwi Eufrate.

15 Djehovha Mwari akatora munhu womukanda mu munda we Edheni kuti aurime uye aucengete. 16 Djehovha Mwari akapasazve munhu mutemo wekuti: “Micero yese ye miti iri mu munda ungarhya hako wakasudzunuka. 17 Asi audikani kurhya mucero we muti we kuziya zvakanaka no zvakashata, ngokuti pa zuwa raucaurhya, zvezvirokwazvo ucafa.”

18 Hino Djehovha Mwari akati: “Azvizi kunaka kuti mwanarume agare ega. Ndicamuitira mubetseri, unonyasa kusisirana naye.” 19 Djehovha Mwari ainga aita zvinyama zvese zve mushango* nge mataka uye zvisikwa zvese zvinomburuka zve kudenga, uye akazviendesa ku mwanarume kuti aone kuti waizozvipasa mazina okutii;* uye mushobo waaidainza cisikwa* cimwe na cimwe cipenyu, irona ndiro raizogara zina raco. 20 Ngokudaro, mwanarume wakapasa zina zvipfuyo zvese, zvisikwa zvese zvinomburuka zve kudenga, uye zvinyama zvese zve mushango; asi mwanarume wainga asina mubetseri unosisirana naye. 21 Hino Djehovha Mwari akaita kuti mwanarume abathwe no hope huru, uye paainga akawata, akamubvisa mbabvu imwe uye pedzepo akatsiya no nyama painga pabudepo mbabvu. 22 Djehovha Mwari akaita mwanakadzi no mbabvu yaakabvisa pa mwanarume, pedzepo womuunzisa ku mwanarumewo.

23 Ngokudaro, mwanarume wakati:

24 Ndiyo ndaa, mwanarume ucasiya baba ake na mai ake uye ucabatana* no mukadzi wake, uye ari airi acagara nyama imwe basi. 25 Ese ari airi ainga ari mitu, mwanarume no mukadzi wake; asi ainga asikapsveruki.

3 Nyoka ndiyo yainga yakangwara* maningi kupinda zvinyama zvese zve mushango zvakaizwa na Djehovha Mwari. Hino iyona yakati ku mwanakadzi: “Ndizvodi kamare kuti Mwari akabhuya kuti amudikani kurhya micero ye miti yese ye mu munda?” 2 Hino mwanakadzi wakabvunza nyoka kuti: “Tingarhya hedu micero ye miti yo mu munda. 3 Asi ngezve mucero we muti uri pakati pe munda, Mwari akati: ‘Musaurhye,* kunyazi kuupsvasa; mukandodaro, imwimwi mucafa.’” 4 Hino nyoka yakati ku mwanakadzi: “Zvezvirokwazvo, imwimwi amuzofi. 5 Ngokuti Mwari anoziya kuti pa zuwa ramucaurhya madziso enyu acafunungurhwa uye mucagara hingana Mwari, meciziya zvakanaka no zvakashata.”

6 Ngokudaro, mwanakadzi wakaona kuti mutiwo wainga wakanaka kuti urhyiwe, honde, uwona waidakadzisa ku hope; zvezvirokwazvo, mutiwo waipfadza kuuringira. Hino iyena wakakhaya mucero uwona uye wakatanga kuurhya. Pedzepo, wakapasawo mwamuna wake paainga aa ese, uye iyena wakatanga kuurhyawo. 7 Hino madziso awo akafununguka, uye awona akazwisisa kuti ainga ari mitu. Ndiyo ndaa, akasona masakani e muonde kuti afukidze umitu wawo.*

8 Nokuhamba ke nguwa, awona akazwa izwi ra Djehovha Mwari paainga ecihamba-hamba mu munda pa nguwa yekuti kaipipirira zvimhepo, uye mwanarume no mukadzi wake akafindarira Djehovha Mwari pakati pe miti ye mu munda. 9 Uye Djehovha Mwari aindorumbwa ecidainza mwanarume eciti: “Uri kupi?” 10 Pakupedzesera iyena wakadaira eciti: “Ndazwa izwi renyu ndiri mu munda, asi ndathya ngokuti ndainga ndiri mitu, ndiyo ndaa ndafindara.” 11 Ngokudaro, Mwari akamubvunzisa kuti: “Ndiani wakubvunza kuti wainga uri mitu? Iwewe warhya mucero wandakakubvunza uya kuti usaurhye kani?” 12 Mwanarume wakadaira eciti: “Mwanakadzi wamakandipasa kuti ndigare naye, ndiena wandipasa mucero we muti, ndiyo ndaa ndaurhya.” 13 Djehovha Mwari akabvunzisa mwanakadzi kuti: “Cinyi cawaita?” Mwanakadzi wakadaira eciti: “Nyoka yandicengedza, ndiyo ndaa ndarhya.”

14 Hino Djehovha Mwari akabvunza nyoka kuti: “Nge ndaa ye zvawaita izvi, iwewe watukwa pakati po zvipfuyo zvese no zvinyama zvese zve mushango. Ucapsveremenda* no ndani yako, uye ucarhya mataka mazuwa ese e upenyu wako. 15 Uye ndicakanda uzondi pakati pako no mwanakadzi uye pakati po mwana* wako no mwana* wake. Iyena ucadzengenyesa musoro wako, uye iwewe ucamuruma cisisino cake.”

16 Mwari akabvunzawo mwanakadzi kuti: “Ndicatunhudzira marhwadzo paunonga uno pamwiri; ucarhwadziwa maningi paunonga wecida kubara mwana, uye ucagara no cido cakakura maningi ce kuda kugara no mwamuna wako, uye iyena ucakutonga.”

17 Uye kuna Adhamu,* iyena akati: “Sezvo wapurutana izwi re mukadzi wako uye warhya mucero we muti wandakakubvunza kuti: Usaurhye,’ mataka ngaatukwe nge ndaa yako. Mazuwa ese e upenyu wako, ucashuphika kuitira kuti uone cokurhya cinobuda pa mataka. 18 Awona acamera minzwa no miti inobaya, uye ucarhya zvinomera zve mushango. 19 Ucarhya zvekurhya zve ziya re hope yako dakara wahwirira ku mataka, ngokuti wakabva kaari. Ngokuti iwewe uri mataka, ucahwirira ku mataka.”

20 Mumasure mazvo, Adhamu wakapasa zina mukadzi wake rokuti Evha,* ngokuti iyena ndiye waizogara mai o anhu ese. 21 Uye Djehovha Mwari akagadzirira Adhamu no mukadzi wake macira akareba o dehwe, kuitira kuti aapfekedze. 22 Ngokudaro, Djehovha Mwari akati: “Munhu wagara hinga isusu, eciziya zvakanaka no zvakashata. Hino, kuti iyena asatambanudze nyara yake wotorawo mucero we muti we upenyu, worhya uye worarama nokusikaperi, . . .” 23 Nge ndaa yazvo, Djehovha Mwari akaadzingira mu munda we Edheni kuti aende koorima mataka aakaizwa ndiwona. 24 Ngokudaro, iyena akadzingira munhu, uye kumabvazuwa ke munda we Edheni akakanda makerubhi uye supada yaibaka yaigara yecitenderera, kuti zvicengetedze gwanza raienda kuno muti we upenyu.

4 Hino Adhamu wakaita zvepamaponde na Evha mukadzi wake, uye mukadziwo wakabata pamwiri. Paakabara Kaini, iyena wakati: “Ndabara mwana we mwanarume no rubetso ra Djehovha.” 2 Nokuhamba ke nguwa, iyena wakabarazve Abheri, hama ya Kaini.

Abheri wakagara muushi we mabira, uye Kaini wakagara murimi. 3 Mumasure me kudarika nguwa, Kaini wakatora zvirimwa zvinganani kuti apase Djehovha hinga cipo. 4 Asi Abheri wakatora matangwe manganani e zvipfuyo zvake, pamwepo no mafuta azvo. Djehovha akapfarira Abheri no cipo cake, 5 asi aazi kupfarira Kaini no cipo cake. Hino Kaini wakagara no shungu uye wakatsukwara. 6 Nge ndaa yazvo, Djehovha akati kuna Kaini: “Ngei iwewe uno shungu uye wakatsukwara? 7 Kana ukaita zvakanaka, inini andizokupfariri here?* Asi kana ukatama kuita zvakanaka, citema ciri pa musuwo pako, uye icona ciri kuda maningi kukukunda; kodi iwewe unozokwanisa here kucikunda?”

8 Pedzepo, Kaini wakati kuna Abheri hama yake: “Ambai ku munda.” Paainga ari ku munda, Kaini wakaponda Abheri hama yake uye wakamuuraya. 9 Nokuhamba ke nguwa, Djehovha akabvunzisa Kaini kuti: “Abheri munukuna wako uri kupi?” Kaini wakadaira kuti: “Andikuzii kaari. Kodi inini ndiri mucengeti we munukuna wangu here?” 10 Hino Mwari akati: “Zvinyi zvawaita? Izwa basi! Ngazi yo munukuna wako iri kundidainzira yecibva mu mataka. 11 Zvino, iwewe watukwa uye wadzingirhwa pa nyika, iyo yakafungura muromo wayo kuti itambire ngazi yo hama yako yakadururhwa nge nyara dzako. 12 Paucarima mataka, awona aazobari zvirimwa.* Iwewe unozogara muherereki uye mutizi we pa nyika.” 13 Hino Kaini wakabvunza Djehovha kuti: “Muphanico we cishaishi cangu wakakura maningi zvekuti andikwanisi kuushingirira. 14 Nyamasi muri kundidzingira pa nyika, uye ndicagara kure no hope yenyu; inini ndicagara muherereki uye mutizi we pa nyika, uye munhu wese unondiona ucandiuraya.” 15 Hino Djehovha akamubvunza kuti: “Nge ndaa yazvo, munhu unouraya Kaini ucahwirinzirhwa kanomwe.”

Ngokudaro, Djehovha akakanda Kaini cipangidzo kuti asazouraiwe nge munhu waacazosongana naye. 16 Nge ndaa yazvo, Kaini wakabuda pamberi pa Djehovha uye wakatanga kugara ku nyika yo Noti, kumabvazuwa ke Edheni.

17 Pedzepo Kaini wakaita zvepamaponde no mukadzi wake, uye mukadzi wake wakabata pamwiri uye wakabara Inoki. Hino iyena wakawaka thaundi uye thaundiro wakaripasa zina ro mwana wake rokuti Inoki. 18 Nokuhamba ke nguwa, Inoki wakabara Iradhi. Iradhi wakabara Mejueri, Mejueri wakabara Metuzaeri, uye Metuzaeri wakabara Rameki.

19 Rameki wakawaka akadzi airi. Wekutanga waizwi Adha, wecipiri waizwi Zira. 20 Adha wakabara Djabhari. Uye Djabhari ndiye wakatanga kugara mu matenda no kucengeta zvipfuyo. 21 Hama yake yaizwi Djubhari. Iyena ndiye wakatanga kuridza rudimbwa* no mutoriro. 22 Zira wakabarawo Tubhari-kaini, uya waigadzira mishobo yese ye midziyo ye kobre no yo simbi uye hama yake yo mwanakadzi yaizwi Naama. 23 Hino, Rameki wakazobvunza akadzi ake airi Adha na Zira kuti:

25 Adhamu wakaitazve zvepamaponde no mukadzi wake, uye wakabara mwana we mwanarume. Uye wakamududza zina rokuti Seti,* ngokuti iyena wakati: “Mwari andipasa mwana umweni* pa mbuto ya Abheri, ngokuti Kaini wakamuuraya.” 26 Seti wakabarawo mwana we mwanarume, uye wakamududza kuti Enosi. Mu nguwa iyona anhu akatanga kudainza zina ra Djehovha.

5 Iri ndiro bhuku rinoreketa ngezve upenyu wa Adhamu. Pa zuwa rakasikwa Adhamu na Mwari, akamusika no mufanikiso wa Mwari. 2 Mwanarume no mwanakadzi akaasika. Pa zuwa raakasikwa, iyena akaakomborera uye akaapasa zina rokuti Munhu.*

3 Adhamu paainga aano makore 130, wakabara mwana we mwanarume wakatodzana naye, uye wakamududza zina rokuti Seti. 4 Mumasure me kubara Seti, Adhamu wakazorarama makore 800. Uye wakabara ana e anarume no e anakadzi. 5 Hino, mazuwa ese e upenyu wa Adhamu akaguma makore 930, pedzepo wakafa.

6 Seti wakazorarama makore 105, pedzepo wakabara Enosi. 7 Mumasure me kubara Enosi, Seti wakararama makore 807. Uye wakazobara ana e anarume no e anakadzi. 8 Hino, mazuwa ese e upenyu wa Seti akaguma makore 912, pedzepo wakafa.

9 Enosi wakararama makore 90, pedzepo wakabara Kenani. 10 Mumasure me kubara Kenani, Enosi wakararama makore 815. Uye wakazobara ana e anarume no e anakadzi. 11 Hino, mazuwa ese e upenyu wa Enosi akaguma makore 905, pedzepo wakafa.

12 Kenani wakararama makore 70, pedzepo wakabara Maarareri. 13 Mumasure me kubara Maarareri, Kenani wakararama makore 840. Uye wakazobara ana e anarume no e anakadzi. 14 Hino, mazuwa ese e upenyu wa Kenani akaguma makore 910, pedzepo wakafa.

15 Maarareri wakararama makore 65, pedzepo wakabara Djaredhi. 16 Mumasure me kubara Djaredhi, Maarareri wakararama makore 830. Uye wakazobara ana e anarume no e anakadzi. 17 Hino, mazuwa ese e upenyu wa Maarareri akaguma makore 895, pedzepo wakafa.

18 Djaredhi wakararama makore 162, pedzepo wakabara Inoki. 19 Mumasure me kubara Inoki, Djaredhi wakararama makore 800. Uye wakazobara ana e anarume no e anakadzi. 20 Hino, mazuwa ese e upenyu wa Djaredhi akaguma makore 962, pedzepo wakafa.

21 Inoki wakararama makore 65, pedzepo wakabara Metusera. 22 Mumasure me kubara Metusera, Inoki wakarumbwa ecihamba na Mwari we zvirokwazvo* ke makore 300. Uye wakazobara ana e anarume no e anakadzi. 23 Hino, mazuwa ese e upenyu wa Inoki akaguma makore 365. 24 Inoki wakarumbwa ecihamba na Mwari wezvirokwazvo. Pedzepo aazi kuzoonekazve, ngokuti Mwari akamutora.

25 Metusera wakararama makore 187, pedzepo wakabara Rameki. 26 Mumasure me kubara Rameki, Metusera wakararama makore 782. Uye wakazobara ana e anarume no e anakadzi. 27 Hino, mazuwa ese e upenyu wa Metusera akaguma makore 969, pedzepo wakafa.

28 Rameki wakararama makore 182, pedzepo wakabara mwana we mwanarume. 29 Iyena wakamududza zina rokuti Nowa,* eciti: “Uu ucatinyaradza no kutizorodza pa basa redu uye no kuseenza zvinoshupha katiri kuita no nyara dzedu nge ndaa ye mataka akatukwa na Djehovha.” 30 Mumasure me kubara Nowa, Rameki wakararama makore 595. Uye wakazobara ana e anarume no e anakadzi. 31 Hino, mazuwa ese e upenyu wa Rameki akaguma makore 777, pedzepo wakafa.

32 Nowa paakagara no makore 500, iyena wakabara Semi, Kami, na Djafeti.

6 Anhu paakatanga kuwanda pa nyika uye ecibara ana e anakadzi, 2 ana a Mwari we zvirokwazvo* akatanga kuona kuti ana e anhu ainga akarungama. Hino awona akatanga kutora ese aakasanangura kuti agare akadzi awo. 3 Hino Djehovha akati: “Andizosii munhu wakadaro nokusikaperi, ngokuti andoriwo munhu we nyama hake.* Ngokudaro, mazuwa ake acakwana 120.”

4 Mu mazuwa awona uye mu mazuwa akazoteera, pa nyika painga pano Manefirimu.* Ana a Mwari we zvirokwazvo akarumbwa eciita zvepamaponde no ana e anhu, uye awona akaabarira ana. Aya ndiwo anhu e kare ainga ano simba, anarume ainga ano mbiri.

5 Ngokudaro, Djehovha akaona kuti ushaishi we anhu wainga wanyanya pa nyika uye kuti zvese zvaairangarira uye zvainga zviri mu mwoyo mawo zvainga zvakashata nguwa dzese. 6 Djehovha akatsumba* nge kusika kaakaita anhu pa nyika, uye mwoyo wake wakarhwadziwa maningi.* 7 Hino Djehovha akati: “Ndicatsakatisa pa nyika anhu andakasika, anhu pamwepo no zvipfuyo, no zvinyama zvinopsveremenda,* uye no zvisikwa zvinomburuka zve kudenga, ngokuti ndiri kutsumba nge ndaa ye kuasika kandakaita.” 8 Asi Nowa wakapfarirhwa na Djehovha.

9 Ii ndiyo ngano inoreketa ngezve upenyu wa Nowa.

Nowa wainga ari munhu munatsi. Iyena wainga ari munhu asina ndaa pakati pe anhu e mu nguwa yake.* Nowa waihamba na Mwari we zvirokwazvo. 10 Nokuhamba ke nguwa, Nowa wakabara ana atatu, Semi, Kami, na Djafeti. 11 Asi nyika yainga yakashata mu maonero a Mwari we zvirokwazvo, uye nyika yainga yakadzara no zvecisimba. 12 Zvezvirokwazvo, Mwari akaringira pa nyika, uye akaona kuti yainga yashata; makwanza e munhu wese* ainga ashata pa nyika.

13 Mumasure mazvo, Mwari akabvunza Nowa kuti: “Ndasanangura kutsakatisa anhu ese,* ngokuti nyika yadzara no uzondi nge ndaa yawo; ndiyo ndaa ndicaatsakatisa pamwepo no nyika. 14 Gadzira areka* no matabwa e muti unobudisa zviro zvinonama. Mukati mayo, unodikana kugadzira makwartu uye woinama no thara* mukati no kunza kayo. 15 Areka ii unodikana kuiwaka kudai: Inodikana kukura makubhiti* 300, yopamhama makubhiti 50, uye yoreba makubhiti 30. 16 Iwewe ucagadzira janera rinopinza ciedza* mu areka, unozopima kubhiti rimwe kubva panotangira denga dakara pajanera. Unodikana kukanda musuwo pa areka ngo pamuceto uye wogadzira andari yokutanga, yocipiri, uye yocitatu.

17 “Inini ndicaunza ndambi pa nyika, kuti itsakatise zvisikwa zvese* zvino upenyu* zviri pasi pe denga. Zvese zviri pa nyika zvicafa. 18 Uye ndiri kuita citenderano na iwewe, uye iwewe unodikana kupinda mu areka pamwepo no ana ako, mukadzi wako, uye no akadzi e ana ako. 19 Uye pinza zvisikwa zvese zviri pa nyika zviri zviiri-zviiri, cekono no cekadzi, kuti zvipone pamwepo na iwewe; 20 zvisikwa zvinomburuka maererano no mushobo wazvo, zvipfuyo maererano no mushobo wazvo, uye zvinyama zvese zvinopsveremenda maererano no mushobo wazvo, zvinodikana kupinda imona maunonga uri zviri zviiri-zviiri kuti zvipone. 21 Asi iwewe unodikana kuunganidza zvokurhya zve mushobo wese, kuti zvizogare zvokurhya zvako no zve zvinyama.”

22 Uye Nowa wakaita zvese zvaainga abvunzwa na Mwari. Wakaita izvona kamare.

7 Mumasure mazvo, Djehovha akabvunza Nowa kuti: “Pinda mu areka, iwewe no ese o pa nyumba pako, ngokuti ndiwe wandaona kuti uri munatsi pakati pe mubarirhwana uu. 2 Pa mushobo wese we zvinyama zvakacena, tora zvinomwe,* zvekono no zvekadzi; uye pa zvinyama zvese zvisikazi kucena, tora zviiri basi, cekono no cekadzi; 3 uyewo, pa zvisikwa zvese zvinomburuka zve kudenga, tora zvinomwe,* zvekono no zvekadzi, kuti uponese mubarirhwana wazvo pa nyika. 4 Ngokuti kasara mazuwa manomwe basi kuti ndinaise mvura pa nyika yese, ke mazuwa 40, usiku no masikati, uye ndicatsakatisa pa nyika zviro zvese zvipenyu zvandakasika.” 5 Hino, Nowa wakaita zvese zvaainga abvunzwa na Djehovha kuti aite.

6 Nowa wainga ano makore 600 pakauya ndambi huru pa nyika. 7 Hino Nowa no ana ake, no mukadzi wake, no akadzi e ana ake, akapinda mu areka ndambi huru isati yauya. 8 Zvinyama zvese zvakacena no zvinyama zvese zvisikazi kucena, no zvisikwa zvinomburuka, no zvese zvinohamba pa nyika, 9 zvakapinda zviri zviiri-zviiri mu areka mainga muna Nowa, cekono no cekadzi, hinga zvainga zvabvunzwa Nowa na Mwari. 10 Uye mumasure me mazuwa manomwe, ndambi yakatanga pa nyika.

11 Mu gore rakakwanisa Nowa makore 600, mu mwedzi wecipiri, pa zuwa reci 17 re mwedzi uwona, pa zuwa irona zvitubu zvese zvikuru zve mvura yakadzika zvakafungurhwa uye misuwo dze mvura ye kudenga dzakafungurhwa. 12 Uye mvura yakanaya maningi pa nyika ke mazuwa 40, usiku no masikati. 13 Pa zuwa irona kamare, Nowa wakapinda mu areka no ana ake, Semi, Kami, na Djafeti; mukadzi wake no akadzi atatu e ana ake. 14 Awona akapinda no zvinyama zvese zve mushango maererano no mishobo yazvo, no zvipfuyo zvese maererano no mishobo yazvo, no zvinopsveremenda zvese zve pa nyika maererano no mishobo yazvo, no zvisikwa zvese zvinomburuka maererano no mishobo yazvo, shiri dzese, zvisikwa zvese zvino mabaphiro. 15 Zvisikwa zve mishobo yese zvino upenyu zvakarumbwa zvecipinda mu areka mainga muna Nowa zviri zviiri-zviiri. 16 Hino zvisikwa* zve mushobo wese zvakapinda, cekono no cekadzi, hinga zvaainga akabvunzwa na Mwari. Mumasure mazvo, Djehovha akafunga musuwo.

17 Mvura ye ndambi yakarumbwa yecinaya pa nyika ke mazuwa 40, uye yakarumbwa yecitunhudzirika, yakatanga kuthwara areka yoimutsa pamusoro pe nyika. 18 Mvura yakawanda maningi uye yakarumbwa yecitunhudzirika maningi pa nyika, asi areka yaiberuka pamusoro pe mvura. 19 Mvura yakawanda maningi pa nyika zvekuti matunhu ese akareba ari pasi pe denga akafukidzwa. 20 Mvura yakafukidza matunhu zvinodarika makubhiti 15.*

21 Hino zvisikwa zvese zvino upenyu zvaihamba pa nyika, zvinomburuka, zvipfuyo, zvinyama zve mushango, zvisikwa zvidoko zvinohamba zvakawanda zvakafa, kutobatanidzawo no anhu ese. 22 Zvese zvainga zviri pa nyika yakaoma zvainga zvino mwiya we kufema we upenyu mu miro* dzazvo, zvakafa. 23 Hino Iyena akatsakatisa zvipenyu zvese zvainga zviri pa nyika, kutobatanidzawo anhu, zvinyama, zvinyama zvinopsveremenda, uye zvisikwa zvinomburuka zve kudenga. Zvese zvakatsakatiswa pa nyika; Nowa basi no aainga anawo mu areka ndiwo akapona. 24 Uye mvura yakarumbwa yakafukidza nyika ke mazuwa 150.

8 Asi Mwari akaedzurira Nowa no zvinyama zvese zve mushango no zvipfuyo zvaainga anazvo mu areka, uye Mwari akaita kuti mhepo ivhuvhute pa nyika, uye mvura yakatanga kuphwa. 2 Zvitubu zve mvura yakadzika no misuyo ye mvura ye kudenga zvakafungwa, hino mvura yainaya yakaima. 3 Hino mvura yainga iri pa nyika yakatanga kuphwa padoko no padoko. Pakazopera mazuwa 150, mvura yainga yapunguka. 4 Pa zuwa 17 ro mwedzi wecinomwe, areka yakagara pamusoro pe matunhu e ku Ararate. 5 Uye mvura yakarumbwa yeciphwa padoko no padoko dakara mu mwedzi wecigumi. Mu mwedzi wecigumi, pa zuwa rokutanga re mwedzi uwona, pamusoro pe matunhu pakatanga kuoneka.

6 Hino pakupera ke mazuwa 40, Nowa wakafungura janera raainga akagadzira pa areka 7 uye akabudisa gunguwe; irona raimburuka kunza recihwirira, dakara mvura yainga iri pa nyika yaoma.

8 Nokuhamba ke nguwa, wakazobudisa njiwa* kuti aone kuti mvura yainga yaphwa here pa nyika. 9 Njiwa aizi kuona mbuto yekuti* imate, ndiyo ndaa yakahwirira mu areka ngokuti pa nyika painga pacakadzara no mvura. Hino wakazobudisa moko wake kunza uye wakapindisa njiweyo mu areka. 10 Iyena wakaetserazve mazuwa manomwe, pedzepo wakazobudisazve njiwa kunza ke areka. 11 Njiwa payakahwirira ce madekoni, iyena wakaona kuti yainga yakaruma sakani ro muorivhi rainga rabva kukhaiwa! Ngokudaro, Nowa wakaziya kuti mvura yainga yapunguka pa nyika. 12 Iyena wakaetserazve mazuwa manomwe. Wakazobudisazve njiwa iyani, asi iyona aizi kuhwirirazve kaari.

13 Mu gore re ci 601, mu mwedzi wekutanga, pa zuwa rokutanga re mwedzi uwona, mvura yainga yaphwa pa nyika; uye Nowa wakabvisa denga ro areka uye wakaona kuti pasi painga paakuoma. 14 Mu mwedzi wecipiri, pa zuwa 27 re mwedzi uwona, nyika yainga yanyasa kuoma.

15 Hino Mwari akabvunza Nowa kuti: 16 “Buda mu areka, iwewe, mukadzi wako, ana ako, no akadzi e ana ako. 17 Buda no zvisikwa zvese zvipenyu zve mushobo wese, zvisikwa zvinomburuka, zvinyama uye zvinyama zvinopsveremenda* zve pa nyika, kuti zvibarane uye zviwande pa nyika.”

18 Hino Nowa wakabuda no ana ake, no mukadzi wake, uye no akadzi e ana ake. 19 Zvisikwa zvese zvipenyu, zvese zvinopsveremenda uye zvisikwa zvese zvinomburuka, zvese zvinohamba pa nyika, zvakabuda mu areka maererano no mishobo yazvo. 20 Hino Nowa wakawakira Djehovha artari uye wakatora zvinyama zvimweni pa zvinyama zvese zvakacena no zvinyama zvese zvinomburuka zvakacena uye wakapisira zvibairo pa artari iyona. 21 Uye Djehovha akatanga kuzwa kunuhwirira kakanaka.* Hino Djehovha akati mu mwoyo make: “Andicatukizve* mataka nge ndaa ye munhu, ngokuti zviri mu mwoyo me munhu zvakashata kubvira aciri mwana mudoko; uye andicazotsakatisizve zviro zvese zvipenyu hinga zvandaita. 22 Kubvira zvino kuenda mberi, nyika icagara no nguwa ye kusima mbeu no kukorora, kutonhora no kupisa, nguwa ye cirimo no nguwa ye mhepo,* uye usiku no masikati.

9 Mwari akakomborera Nowa no ana ake uye akati kaari: “Baranai muwande uye mudzadze nyika. 2 Zvisikwa zvese zvipenyu zve pa nyika no zvisikwa zvese zvinomburuka zve kudenga, zvese zvinohamba pa nyika no howe dze mu bahari, zvicarumbwa zvecimuthyai no kutetemera. Izvona zvaazvenyu.* 3 Mungarhya henyu zvinyama zvese zvinohamba uye zvipenyu. Ndinomupasai zvese, hinga kumupasai kandakaita zvinomera zvakasvipirira. 4 Asi musarhye nyama pamwepo no upenyu* wayo, kureya ngazi yayo. 5 Kusiya izvona, ndicaita kuti mudaire ngezve ngazi*, yekuti inoimirira upenyu wenyu. Ndicaita kuti muzodaire ngezve ngazi ye cinyama; uye ndicaita kuti munhu umwe na umwe azodaire ngezve upenyu we hama yake. 6 Uya unodurura ngazi yo munhu, ngazi yake icadururhwawo no munhu, ngokuti Mwari akaita munhu no mufanikiso Wake. 7 Asi kamuri imwimwi, baranai muwande mudzadze nyika, uye mugare akawanda maningi.”

8 Hino Mwari akabvunza Nowa no ana ake aainga anawo kuti: 9 “Ndiri kuita citenderano na imwimwi pamwepo no ana enyu amucazobara, 10 uye no zvisikwa* zvese zvipenyu zvamunazvo, shiri, zvinyama, no zvisikwa zvese zvipenyu zve pa nyika zvamunazvo, zvese zvakabuda mu areka, zvisikwa zvese zvipenyu zve pa nyika. 11 Honde, citenderano candiri kuita na imwimwi ndi ici: Zvisikwa zvese zvipenyu azvizotsakatiswizve* no mvura yo ndambi huru, uye nyika aizotsakatiswizve no ndambi huru.”

12 Uye Mwari akatunhudzira eciti: “Ici ndico cipangidzo ce citenderano candiri kuita na imwimwi uye no zvisikwa* zvese zvipenyu zvamunazvo, ke mibarirhwana yese inozoteera. 13 Ndakanda muraraungu* wangu pa makuta, uye ucagara cipangidzo ce citenderano candiri kuita na imwimwi uye no nyika. 14 Pese pandicaunza makuta pamusoro pe nyika, muraraungu ucaoneka pa makuta. 15 Uye zvezvirokwazvo ndicaedzurira citenderano cangu candakaita na imwimwi no zvisikwa zvipenyu zve mushobo wese;* uye mvura aizoitizve ndambi huru kuti itsakatise zvisikwa zvese. 16 Uye muraraungu ucaoneka pa makuta, uye inini zvezvirokwazvo pandicauona ndicaedzurira citenderano cisikaperi ca Mwari no zvisikwa zvese zvipenyu zve mushobo wese zviri pa nyika.”

17 Mwari akaphindazve kuna Nowa kuti: “Ici ndico cipangidzo ce citenderano candiri kuita no zvisikwa* zvese zviri pa nyika.”

18 Ana a Nowa akabuda mu areka ndi aya: Semi, Kami, uye na Djafeti. Nokuhamba ke nguwa, Kami wakabara Kanani. 19 Atatu aya ainga ari ana a Nowa, uye anhu ese e pa nyika akabva kaari.

20 Uye Nowa wakatanga kuita zve kurima, uye wakasima muuvha. 21 Iyena wakamwa vhinyu woraradza, uye wakakhumura macira ake ari mu tenda. 22 Kami baba a Kanani, akaona umitu wa baba ake, uye wakapanganidzira hama dzake mbiri dzainga dziri ngo kunza. 23 Semi na Djafeti akatora djira ro kunza orikanda pa maphewa uye akapinda mu tenda ecihamba ngo sure. Ngokudaro, akafukidza baba awo asikazi kuaringira kuti asaaone mitu, uye awona aazi kuona umitu wa baba awo.

24 Nowa paakazomuka, kuraradza kuya kapera uye woziya zvainga zvaizwa no mwana wake wecigumaura, 25 iyena wakati:

“Kanani ngaatukwe.

Pakati pe aranda e hama dzake, iyena ngaagare mudoko.”

26 Uye iyena wakatunhudzira eciti:

Kanani ngaagarewo muranda wake.”

28 Mumasure me Ndambi Huru, Nowa wakararamazve makore 350. 29 Hino, mazuwa ese e upenyu wa Nowa akaguma makore 950, pedzepo wakafa.

10 Ii ndiyo ngano inoreketa ngezve upenyu we ana a Nowa, Semi, Kami, na Djafeti.

Awona akabara ana mumasure me Ndambi Huru. 2 Ana a Djafeti ainga ari aya: Gomeri, Magogi, Madai, Djavhani, Tubhari, Mashesi, na Tira.

3 Ana a Gomeri ainga ari aya: Askenaji, Rifati, na Togarma.

4 Ana a Djavhani ainga ari aya: Erisha, Tarsisi, Kitimu, uye Dhodhanimu.

5 Zvecibva ku anhu aya, agari e mu zvitsuwa akabararika mu nyika dzawo, maererano no mireketero yawo, mhuri dzawo uye madzinza awo.

6 Ana a Kami ainga ari aya: Kushi, Miziraimu, Puti, uye Kanani.

7 Ana a Kushi ainga ari aya: Sebha, Avhira, Sabhita, Raama, uye Sabhite.

Ana a Raama ainga ari aya: Sebha uye Dhedhani.

8 Kushi wakabara Nirodhi. Nirodhi ndiye munhu wekutanga kugara no simba pa nyika. 9 Iyena wakagara muvhimi ano simba ecipesana na Djehovha. Ndiyo ndaa zvecirekethwa kuti: “Kuita hinga Nirodhi, muvhimi ano simba unopesana na Djehovha.” 10 Umambo wake wakatangira ku* Bhabheri, Ereki, Akadhi, uye Karine, mu nyika ye Sinari. 11 Paakabva mu nyika ii, wakaenda ku Asiriya uye wakawaka Ninivhi, Reobhoti-iri, Kara, 12 uye Reseni, thaundi rainga riri pakati po Ninivhi no Kara: Iri ndiro thaundi guru.*

13 Miziraimu wakabara Rudhi, Anamimu, Rehabhimu, Napuimu, 14 Patrosimu, Kasaruimu (wakabara dzinza re Afiristiya), uye Kafitori.

15 Kanani wakabara Sidhoni, mwana wake we dangwe, uye Hete, 16 kutobatanidzawo Ajebhusi, Aamori, AJirgazi, 17 Ahivhi, Aarekite, Aasiniti, 18 Aarivhadhi, Aazemariti, uye Aamati. Mumasure mazvo, mhuri ye Akanani yakabararika. 19 Ngokudaro, nyika yo Akanani yainga yakakura kubva ku Sidhoni dakara ku Gerari, dhuze no Gaza, dakara ku Sodhoma, Gomora, Adhima, uye Zebhoimu, dhuze no Rasha. 20 Aya ndiwo ana a Kami maererano no mhuri dzawo uye mireketero yawo, maererano no nyika dzawo uye madzinza awo.

21 Semi tsekuru e ana ese a Ebheri uye hama ya Djafeti, mukuru pa ese,* wakabarawo ana. 22 Ana a Semi ainga ari Erami, Ashuri, Arpashadhi, Rudhi, uye Aramu.

23 Ana a Aramu ainga ari Uzi, Uri, Jeteri, uye Masi.

24 Arpashadhi wakabara Shera, uye Shera wakabara Ebheri.

25 Ebheri wakabara ana airi e anarume. Umwe wainga ari Peregi,* ngokuti mu nguwa yake nyika yakaparadzaniswa.* Hama yake yaizwi Jokitani.

26 Jokitani wakabara Arimodhadhi, Serefi, Azarimavheti, Jera, 27 Adhorami, Uzari, Dhikra, 28 Obhari, Abhimaeri, Sebha, 29 Ofiri, Avhira, uye Jobhabhi; ese aya ainga ari ana a Jokitani.

30 Mbuto yaaigara yaitangira ku Mesha dakara ku Sefari, mutanha we matunhu e Kumabvazuwa.

31 Aya ndiwo ainga ari ana a Semi maererano no mhuri dzawo uye mireketero yawo, maererano no nyika dzawo uye madzinza awo.

32 Idzi ndidzo dzainga dziri mhuri dze ana a Nowa maererano no mibarirhwana yawo uye maererano no madzinza awo. Kubvira kaari, madzinza akabararika pa nyika mumasure me Ndambi Huru.

11 Nyika yese yainga ino mureketero umwe basi uye no masoko akaezana.* 2 Anhu paaihamba ecienda kumabvazuwa, akaona muterero* we nyika yo Sineari, uye akatanga kugara ikona. 3 Hino awona akati ku umwe na umwe wawo: “Uyai! Ngatiite* mabhuroko uye toapisa no muriro.” Ngokudaro, aiseenzesa mabhuroko pane kuseenzesa mapuwe, uye aiseenzesa thara pa kuwaka. 4 Awona akati: “Uyai! Ngatidziwakire thaundi uye nyumba yakakura maningi* inoguma kudenga kuti tigare no zina guru rino mbiri, kuti tisabararike pa nyika yese.”

5 Djehovha akacita kuti aone thaundi uye nyumba yakakura maningi* yainga yawakwa no anhu. 6 Uye Djehovha akati: “Awona ndi anhu amwe basi no mureketero umwe basi, uye onai zvaari kuita. Zvese zvaari kurangarira kuita zvinozobudirira, ngokuti ari kureketa mureketero umwewo. 7 Uyai! Ngaticite, tiende koosiyanisa mureketero wawo, kuti asazwirane zvaari kureketa.” 8 Ngokudaro, Djehovha akaabararisa pa nyika yese, uye awona akasiya kuwaka thaundi irona. 9 Ndiyo ndaa, thaundi irona rakapaswa zina rokuti Bhabheri,* ngokuti Djehovha akasiyanisa mureketero we nyika yese, uye Djehovha akaabararisa mu nyika yese ecibva ipona.

10 Ii ndiyo ngano inoreketa ngezve upenyu wa Semi.

Semi wainga ano makore 100 paakabara Arpashadhi, mumasure me makore mairi Ndambi Huru yaa yaitika. 11 Mumasure me kubara Arpashadhi, Semi wakararamazve makore 500. Uye iyena wakazobara ana e anarume no e anakadzi.

12 Arpashadhi wakararama makore 35 uye wakabara Sera. 13 Mumasure me kubara Sera, Arpashadhi wakararamazve makore 403. Uye iyena wakazobara ana e anarume no e anakadzi.

14 Sera wakararama makore 30 uye wakabara Ebheri. 15 Mumasure me kubara Ebheri, Sera wakararamazve makore 403. Uye iyena wakazobara ana e anarume no e anakadzi.

16 Ebheri wakararama makore 34, pedzepo wakabara Peregi. 17 Mumasure me kubara Peregi, Ebheri wakararamazve makore 430. Uye iyena wakazobara ana e anarume no e anakadzi.

18 Peregi wakararama makore 30, pedzepo wakabara Reu. 19 Mumasure me kubara Reu, Peregi wakararamazve makore 209. Uye iyena wakazobara ana e anarume no e anakadzi.

20 Reu wakararama makore 32, pedzepo wakabara Serugi. 21 Mumasure me kubara Serugi, Reu wakararamazve makore 207. Uye iyena wakazobara ana e anarume no e anakadzi.

22 Serugi wakararama makore 30, pedzepo wakabara Naori. 23 Mumasure me kubara Naori, Serugi wakararamazve makore 200. Uye iyena wakazobara ana e anarume no e anakadzi.

24 Naori wakararama makore 29, pedzepo wakabara Tera. 25 Mumasure me kubara Tera, Naori wakararamazve makore 119. Uye iyena wakazobara ana e anarume no e anakadzi.

26 Tera wakararama makore 70, pedzepo wakabara Abramu, Naori, na Harani.

27 Ii ndiyo ngano inoreketa ngezve upenyu wa Tera.

Tera wakabara Abramu, Naori, na Harani; uye Harani wakabara Roti. 28 Harani wakafira mu nyika yaakabarirhwa ye ku Uri mu thaundi re Akardheu, pa nguwa yekuti Tera baba ake ainga aciri mupenyu. 29 Abramu na Naori akawaka akadzi. Mukadzi wa Abramu waizwi Sarai, uye mukadzi wa Naori waizwi Mirka; Mirka wainga ari mwana wa Harani, uye Harani wainga ari baba a Isika. 30 Sarai wainga asikabari; wainga asina ana.

31 Tera wakatora mwana wake Abramu no muzukuru wake Roti mwana wa Harani, uye murora wake* Sarai, mukadzi we mwana wake Abramu, uye awona akabuda ese ku Uri mu nyika yo Akardheu kuti aende ku nyika yo ku Kanani. Nokuhamba ke nguwa, akaguma ku Harani, uye akatanga kuraramira ikona. 32 Tera wakararama makore 205. Hino Tera wakazofira ku Harani.

12 Djehovha akabvunza Abramu kuti: “Buda mu nyika yako usiye hama dzako no nyumba ya baba ako, uende ku nyika yandicakupangidza. 2 Ndicaita kuti ugare dzinza guru, ndicakukomborera, uye ndicakudza zina rako, uyezve iwewe ucagara makomborero. 3 Ndicakomborera aya anokukomborera, uye ndicatuka uya anokutuka, uyezve mhuri dzese dze pa nyika dzicakomborerhwa* nge ndaa yako.”

4 Hino Abramu wakaenda hinga zvaakabvunzwa na Djehovha, uye Roti wakaendawo naye. Abramu wainga ano makore 75 paakabuda ku Harani. 5 Abramu wakatora Sarai mukadzi wake, Roti mwana we hama yake, no zvese zvaainga anazvo no anhu* aakagara nawo ku Harani, uye awona akaenda ku nyika yo Kanani. Paakaguma ku nyika yo Kanani, 6 Abramu wakadarika ngo mu nyika iyona woenda ku mbuto inozwi Sikemu, dhuze no miti yakakura ye ku More. Pa nguwa iyona, Akanani aigara ku nyika iyona. 7 Djehovha akadzipangidza kuna Abramu uye akati: “Ndicapasa nyika ii ana* ako.” Uye iyena wakawaka artari ya Djehovha ipona, uya akadzipangidza kaari. 8 Nokuhamba ke nguwa, awona akathutha oenda koogara ku mutanha we matunhu, kumabvazuwa ke Bheteri. Akawakira Djehovha artari ipona, akatanga kudainza zina ra Djehovha. 9 Pedzepo, Abramu wakathuthisa musasa wake woita rhwendo ecienda ku Negebhe, ecindothuthisa tenda rake kubva ku mbuto imwe ecienda ku mbuto imweni.

10 Makaitika nzara mu nyika iyona, uye Abramu wakaenda koogara ku Edjipitu ke cinguwa,* ngokuti nzara yainga yakura maningi. 11 Paainga ooda kupinda mu Edjipitu, iyena wakabvunza Sarai mukadzi wake kuti: “Ndapota, ndipurutane! Inini ndinozviziya kuti iwewe uri mwanakadzi wakarungama maningi. 12 Ngokudaro, Aedjipitu paacakuona, zvezvirokwazvo acabhuya kuti: ‘Uu ndiye mukadzi wake.’ Hino awona acandiuraya, asi acakusiya uri mupenyu. 13 Ndapota, abvunze kuti iwewe uri yaya angu, kuitira kuti andibate zvakanaka nge ndaa yako, uye kuti asandiuraye.”*

14 Abramu paakaguma ku Edjipitu, Aedjipitu akaona kuti Sarai wainga ari mwanakadzi wakarungama maningi. 15 Macinda a Faraoo akamuona, uye akatanga kumusimba pamberi pa Faraoo, zvekuti iyena wakatorhwa oendeswa ku nyumba ya Faraoo. 16 Faraoo wakabata zvakanaka Abramu nge ndaa ye mukadzi wake, uye Abramu wakapaswa mabira, n’ombe, madhongi, aseenzi e anarume no e anakadzi, uye makamero. 17 Hino Djehovha akaita kuti Faraoo no e pa nyumba pake abatane no matambudziko akakura nge ndaa ya Sarai, mukadzi wa Abramu. 18 Ngokudaro, Faraoo wakadainza Abramu, omubvunza kuti: “Zvinyi izvi zvawandiitira? Ngei usikazi kundibvunza kuti Sarai ndi mukadzi wako? 19 Ngei wandibvunza kuti: ‘Iyena ndi yaya angu?’ ndainga ndooda kumutora kuti agare mukadzi wangu! Uri pano mukadzi wako. Mutore uye enda naye!” 20 Hino Faraoo wakabvunza anhu ake kuti aendese Abramu uye awona akamuendesa no mukadzi wake no zvese zvaainga anazvo.

13 Abramu wakabva ku Edjipitu woenda ku Negebhe, iyena no mukadzi wake, uye no zvese zvaainga anazvo, pamwepo na Roti. 2 Abramu wainga akapfuma maningi, ngokuti wainga ano zvipfuyo, prata, uye oro. 3 Paaita rhwendo ecibva ku Negebhe ecienda ku Bheteri, iyena waindothuthisa musasa wake kubva pa mbuto imweni ecienda ku mbuto imweni, dakara aguma kainga kuno tenda rake pakati po Bheteri no Ai, 4 paya paainga ambowakira artari yake. Abramu wakadainza zina ra Djehovha ipona.

5 Roti, uwo waiitawo rhwendo na Abramu, waingawo ano mabira, n’ombe, uye matenda. 6 Hino, nyika yaaigara yainga isikacakwani kuti agare ese pa mbuto imweyo; zviro zvawo zvainga zvawandisa, zvekuti ainga asikacakwanisi kugara ese pamwepo. 7 Ngokudaro, izvi zvakaita kuti aushi e zvipfuyo zva Abramu no aushi e zvipfuyo zva Roti areketedzane. (Pa nguwa iyona Akanani no Aperezi aigara mu nyika iyona.) 8 Ngokudaro, Abramu wakabvunza Roti kuti: “Ndapota, ngapasaoneke kureketedzana pakati pedu, kunyazi pakati pe aushi e mabira ako no aushi e mabira angu, ngokuti isusu tiri hama no hama. 9 Nyika yese airipi pamberi pako here? Ndapota, ngatiparadzane. Kana ukaenda ku dii re moko boshwe, inini ndicaenda ku dii re moko kwawo; asi kana ukaenda ku dii re moko kwawo, inini ndicaenda ku dii re moko boshwe.” 10 Hino Roti wakaringira uye wakaona kuti nharaunda yese ye* Djorodhani dakara ku Zoari, yainga iri mbuto yakadzara nge mutota (Djehovha ainga asati atsakatisa Sodhoma no Gomora), hinga munda wa Djehovha uye nyika yo Edjipitu. 11 Hino Roti wakasanangura nharaunda yese ye Djorodhani, uye iyena wakathuthisa musasa wake woenda kumabvazuwa. Ngokudaro, awona akaparadzana. 12 Abramu waigara mu nyika yo Kanani, asi Roti waigara pakati pe mathaundi e nharaunda iyona. Uye pakupedzesera, iyena wakazokanda tenda rake padhuze no Sodhoma. 13 Asi, anarume e ku Sodhoma aiita zvakashata maningi; aishaishira maningi Djehovha.

14 Mumasure mekuti Abramu na Roti aparadzana, Djehovha akabvunza Abramu kuti: “Ndapota, mutsa musoro wako, uringire kakutsi no katemaidumba, kumabvazuwa no kumadokera, 15 ngokuti nyika yese yauri kuona, ndicapasa iwewe no mwana* wako kuti igare yako nokusikaperi. 16 Uye ndicaita kuti ana* ako aite hingana bukuta re nyika, zvokuti kana pano waizokwanisa kuerenga bukuta re nyika, ana* ako aizokwanisikawo kuerengwa. 17 Hamba nyika yese, weciona kureba no kupamhama kayakaita, ngokuti ndicakupasa.” 18 Abramu wakarumbwa ecigara mu matenda. Nokuhamba ke nguwa, wakaenda koogara pakati pe miti mikuru dzo Mamere, dziri ku Hebroni, uye ikona wakawakira Djehovha artari.

14 Mu mazuwa awona, Araferi wainga ari mambo we Sineari, Arioshi wainga ari mambo we Erazari, Kedhoraomeri wainga ari mambo we Erami, uye Tidhari wainga ari mambo we Goimu, 2 madzimambo aya akarhwisana na Bhera mambo we Sodhoma, Bhirisha mambo we Gomora, Sinabhi mambo we Adhima, Semebheri mambo we Zebhoimu, uye mambo we Bhera, kureya Zoari. 3 Ese aya akabatana mu Bani ro Sidhimu, kureya, Bahari ro Munyu.*

4 Awona ainga akamboseenzera Kedhoraomeri ke makore 12, asi pa gore reci 13 akamupandukira. 5 Hino mu gore reci 14, Kedhoraomeri no madzimambo aakabatana nawo akarhwisa okunda Arefaimu, ku Astaroti-karnaimu, Azuzimu ku Kami, Aemimu ku Savhe-kiriataimu, 6 uye Aorite ku dunhu re Seiri dakara ku Eri-parani, iri ku renje.* 7 Pedzepo awona akazohwirira uye akaguma ku Eni-mishapati, kureya ku Kadhesi, uye akanyisa nharaunda dzese dzo Aamareki uye akanyisawo Aamori, aigara ku Azazoni-tamari.

8 Pa nguwa iyona, mambo we Sodhoma, mambo we Gomora, mambo we Adhima, mambo we Zebhoimu, na mambo we Bhera, kureya Zoari, akabatana mu Bani ro Sidhimu, 9 kuti arhwisane na Kedhoraomeri mambo we Arami, Tidhari mambo we Goimu, Araferi mambo we Sinai, uye Arioshi mambo we Erazari; madzimambo marongomuna kuti arhwisane no ashanu. 10 Bani re Sidhimu rainga rakadzara nge zvimbo zvakagadzirhwa no thara; madzimambo e Sodhoma no Gomora akaedza kutiza, uye akambwerera imona, asi aya akasara akatizira ku mutanha we matunhu. 11 Hino aya akawina akatora zviro zvese zve Sodhoma no Gomora no zvokurhya zvawo zvese uye akaenda. 12 Akatorawo Roti, mwana we hama ya Abramu, waigara ku Sodhoma no zviro zvawo zvese, uye akaenda.

13 Mumasure mazvo, mwanarume umweni wainga apukunyuka, wakaenda koopanganidzira izvi Abramu, Muhebheru. Pa nguwa iyona, iyena waigara* pakati pe miti mikuru ye Mamere, Muamori, hama ya Eshikori na Aneri. Anarume aya ainga akabatana na Abramu. 14 Hino Abramu wakazwa kuti mwana we hama yake wainga watorhwa kooizwa muranda. Paakazwa izvi, wakaunganidza anarume akanyasa kurowedzwa pa kurhwa, aseenzi 318 akabarhwa pa nyumba pake, woteera azondiwo dakara ku Dhani. 15 Waa usiku, akaita zvikwata zve anyahondo, uye iyena no aseenzi ake akaarhwisa uye akaakunda. Iyena wakaateera dakara ku Obha, iri kakutsi ke Dhamasko. 16 Iyena wakatora zvese zvainga zvatorhwa, wakatorawo Roti nyaukama wake, zviro zvake, anakadzi, uye no anhu amweni.

17 Mumasure mekuti Abramu wahwirira kubva kookunda Kedhoraomeri uye no madzimambo aainga anawo, mambo we Sodhoma wakaenda koosongana na Abramu ku Bani re Savhe, kureya Bani ra Mambo. 18 Uye Merikizedheki, mambo we ku Saremi wakaunzisa pau no vhinyu; iyena wainga ari mupristi wa Mwari we Kumusoro-Soro.

19 Hino akamukomborera uye akati:

Uye Abramu wakamupasa cegumi ce zviro zvese.

21 Mumasure mazvo, mambo we Sodhoma wakati kuna Abramu: “Ndipase anhu,* asi iwewe tora zviro zvese.” 22 Asi Abramu wakati kuna mambo we Sodhoma: “Ndinomutsa nyara yangu ndecipika kuna Djehovha, Mwari we Kumusoro-Soro, Uya akasika denga no nyika, 23 kuti andizotori ciro cipi haco pa zviro zvako, kubvira ku ciusaru dakara pa cibote ce sandariya, kuitira kuti usabhuye kuti: ‘Inini ndapfumisa Abramu.’ 24 Apana candicazotora kunza ke zvakarhyiwa no madjaha angu. Asi panocokuita no anarume andakaenda nawo, Aneri, Eshikori, na Mamere, ngaatore hawo zviro zvawo.”

15 Mumasure mazvo, Abramu wakagara no ciono uye wakazwa soko ra Djehovha, reciti: “Usathye Abramu. Inini ndiri cidziiriro kauri. Mubairo wako ucagara mukuru maningi.” 2 Abramu wakadaira kuti: “Cangamire Tenzi Djehovha, cinyi camucandipasa, sezvo andisati ndagara no ana uye mugari we nhaka ye pa nyumba pangu ndi Eriezeri, mwanarume we ku Dhamasko?” 3 Abramu wakatizve: “Imwimwi amuzi kundipasa mwana,* uye museenzi we pa nyumba pangu ndiye acagara nhaka yangu.” 4 Asi Djehovha akamudaira kuti: “Mwanarume uu aazogari nhaka yako; mwana wako kamare* ndiye anozogara nhaka yako.”

5 Pedzepo iyena akabvunza Abramu kuti abude kunza uye akati: “Ndapota, ringira kudenga uye erenga nyeredzi kana wecikwanisa.” Hino akatunhudzira eciti: “Ndizvo zvicaitawo ana* ako.” 6 Uye Abramu wakatenda muna Djehovha, uye zvakaita kuti azwi munhu munatsi. 7 Iyena akatizve: “Inini ndini Djehovha, akakubudisa mu nyika yo Uri ye Akardheu kuti ndikupase nyika ii, kuti igare yako.” 8 Ngokudaro, iyena wakati: “Cangamire Tenzi Djehovha, ndinoziya kudini kuti nyika ii icagara yangu?” 9 Iyena akamudaira kuti: “Nditorere n’ombe ye kadzi ino makore matatu, mbudzi ye kadzi ino makore matatu, bira re kono rino makore matatu, gora, uye njiwa.”* 10 Hino Abramu wakatora zvinyama zvese uye wakazvigura nge pakati, uye wakakanda dimbu rimwe na rimwe nge mberi ko rimweni;* asi aazi kugura-gura cigora no cinjiwa. 11 Hino shiri dzinorhya nyama dzakatanga kucita pa zvinyama zvakafa, asi Abramu waidzidzingira.

12 Zuwa parainga raakuda kudoka, Abramu wakabathwa no hope huru uye cidima cakakura uye cinothyisa cakamuira. 13 Uye Iyena akati kuna Abramu: “Ziya kuti ana* ako acagara anhu e nyika imweni mu nyika isiripi yawo, uye anhu e ikona acaaita aranda uye acaatambudza ke makore 400. 14 Asi inini ndicatonga dzinza ricaaita aranda, uye mumasure mazvo awona anozobuda no zviro zvakawanda maningi. 15 Asi iwewe, ucafa mu runyararo wanyasa kucembera, wokotswa. 16 Asi ana ako, pa mibarirhwana yecirongomuna acahwirira kuno, ngokuti cishaishi co Aamori acisati canyasa kushatisisa.”

17 Zuwa parainga radoka uye kanyasa kusvipa, pakaoneka coto ce muriro cainga cino cutsi no cidimbu co muti caibaka, uye icona cakapinda ngo pakati painga pano matimbu e zvinyama. 18 Pa zuwa irona, Djehovha akaita citenderano na Abramu, eciti: “Ndicapasa ana* ako nyika ino, kubvira ku murambo we Edjipitu dakara ku murambo mukuru, murambo we Eufrate: 19 Nyika yo Akenite, yo Akenizi, yo Akadhimonite, 20 yo Ahiti, yo Aperezi, yo Arefaimu, 21 yo Aamori, yo Akanani, yo Ajirgazi, uye yo Ajebhuzi.”

16 Sarai mukadzi wa Abramu wainga asina ana, asi wainga ano museenzikadzi we Ciedjipitu waizwi Agari. 2 Hino Sarai wakabvunza Abramu kuti: “Ndapota, ndipurutanei: Djehovha aita kuti ndisagare no ana. Ndapota, watai no museenzikadzi wangu. Pamweni ucandibarira ana.” Uye Abramu wakaita zvaakabvunzwa na Sarai. 3 Mumasure mekuti Abramu wagara makore gumi mu nyika yo Kanani, Sarai mukadzi wa Abramu, wakapasa Agari museenzikadzi wake we Ciedjipitu kuna Abramu mwamuna wake, kuti agare mukadzi wake. 4 Ngokudaro, iyena wakawata na Agari, uye wakabata pamwiri. Agari paakaziya kuti wainga aano pamwiri, wakatanga kushora tenzikadzi wake.

5 Sarai wakati kuna Abramu: “Zvakashata zvandiri kuizirhwa i ndaa yenyu. Ndini ndakamupasai museenzikadzi wangu, asi paakazoziya kuti wabata pamwiri, wakatanga kundishora. Djehovha ngaatonge pakati pangu na imwimwi.” 6 Ngokudaro, Abramu wakabvunza Sarai kuti: “Ona! Museenzikadzi wako uri pasi pako.* Ita naye zvaunoda.” Hino Sarai wakatanga kumushora, uye Agari wakatiza.

7 Nokuhamba ke nguwa, ngirozi ya Djehovha yakamuona pa mbuto inobuda mvura ku renje, mbuto ii iri mu gwanza rinoenda ku Suri. 8 Uye iyona* yakamubvunzisa kuti: “Agari, museenzikadzi wa Sarai, uri kubvepi uye uri kuendepi?” Iyena wakaidaira kuti: “Ndiri kutiza Sarai, tenzikadzi wangu.” 9 Hino ngirozi ya Djehovha yakamubvunza kuti: “Hwirira kuna tenzikadzi wako uye dzikande pasi pake.”* 10 Ngirozi ya Djehovha yakatizve: “Ndicaita kuti ana ako awandisise, uye acawanda maningi zvokuti aazoerengeki.” 11 Ngirozi ya Djehovha yakatunhudzira yeciti: “Izwa, iwewe zvino uno pamwiri, uye ucabara mwana, unodikana kumududza zina rokuti Ismaeri,* ngokuti Djehovha azwa kucema kako. 12 Iyena acagara hinga dhongi ro mushango.* Acarhwisana no anhu ese, uye anhu ese acarhwisana naye, uye iyena acagara ku dii rake ega, hama dzake dzogarawo ku dii rimweni.”*

13 Iyena wakadainza zina ra Djehovha, uwo ainga ecireketa naye, uye wakati: “Imwimwi muri Mwari anoona,” ngokuti wainga ati: “Izvirokwazvo here kuti inini ndaona uya anondiona?” 14 Ndiyo ndaa, cimbo icona cakapaswa zina rokuti Bheeri-raai-roi.* (Icona ciri pakati po Kadhesi no Bheredhi.) 15 Hino Agari wakabarira mwana Abramu, uye Abramu wakadudza mwana waakabarirhwa na Agari zina rokuti Ismaeri. 16 Abramu wainga aano makore 86 Agari paakamubarira Ismaeri.

17 Abramu paainga ano makore 99, Djehovha akadzipangidza kuna Abramu uye akati kaari: “Ndini Mwari we Masimba Ese. Hamba pamberi pangu uye pangidza kuti uri munhu usina ndaa.* 2 Ndicaita citenderano na iwewe uye ndicaita kuti ana ako awandisise.”

3 Nge ndaa yazvo, Abramu wakahwarara, uye Mwari akaenderera mberi ecireketa naye, eciti: 4 “Ona, citenderano cangu inini na iwewe, ndi ici: Zvezvirokwazvo iwewe ucazogara baba e madzinza akawanda. 5 Aucadainzwizve kuti Abramu;* ucazwi Abrahamu,* ngokuti ndicakuita kuti ugare baba e madzinza akawanda. 6 Ndicaita kuti ana ako awande maningi, uye ndicaita kuti iwewe ugare baba e madzinza, uye madzimambo acabva pauri.

7 “Ndicacengeta citenderano candakaita na iwewe uye no mwana* wako, ku mibarirhwana yese, hinga citenderano nokusikaperi, kuti ndigare Mwari kauri uye ku mwana* wako. 8 Ndicapasa iwewe uye no mwana* wako nyika ino yauri kurarama hinga munhu we nyika imweni, nyika yese yo Kanani, kuti igare nyika yako nokusikaperi, uye ndicagara Mwari wawo.”

9 Mwari akabvunzazve Abrahamu kuti: “Unodikana kucengeta citenderano cangu, iwewe no ana* ako, ke mibarirhwana yako yese. 10 Citenderano candiri kuita na iwewe pamwepo no ana* ako, camunodikana kucengeta mwese imwimwi ndi ici: Anarume ese anodikana kuizwa ucekeri. 11 Munodikana kuita ucekeri ganda ro mberi ro nhengo dzenyu, uye icona cicazogara cipangidzo ce citenderano candakaita inini na imwimwi. 12 Ke mibarirhwana yenyu yese, ana ese e anarume ari pakati penyu anodikana kuizwa ucekeri paanogumisa mazuwa masere, ese akabarhwa pa nyumba pako uye no ese aya asikabatanidzwi pa ana* ako, anodikana kuizwawo ucekeri. 13 Anarume ese anobarhwa pa nyumba pako uye anarume ese anotengwa no mare yako, anodikana kuizwa ucekeri, uye citenderano cangu ciri pa nyama yenyu, cicagara citenderano nokusikaperi. 14 Kana mwanarume upi hake asikazi kuizwa ucekeri, oramba kuizwa ucekeri ganda ro mberi ro nhengo yake, iyena unodikana kuuraiwa* pakati pe anhu ake. Unonga asikazi kutondowedza citenderano cangu.”

15 Pedzepo Mwari akati kuna Abrahamu: “Mukadzi wako Sarai, usamudainzezve kuti Sarai,* ngokuti zina rake ricazwi Sara.* 16 Ndicamukomborera uye ndicaita kuti akubarire mwana; ndicamukomborera uye ndicaita kuti agare madzinza; madzimambo e anhu acabva kaari.” 17 Nge ndaa yazvo, Abrahamu wakahwarara uye wakatanga kuseka, eciti mu mwoyo make: “Zvingaita here mwanarume uno makore 100 obara mwana, uye Sara, mwanakadzi uno makore 90, ungabara mwana here?”

18 Hino Abrahamu wakati kuna Mwari we zvirokwazvo: “Zvaizonga zvakanaka kuti mukomborere Ismaeri!” 19 Ngokudaro, Mwari akati: “Sara, mukadzi wako, zvezvirokwazvo ucabara mwana, uye iwewe unodikana kumududza zina rokuti Izaki.* Ndicaita citenderano na iyena, citenderano cisikazoperi ku ana* ake. 20 Asi panocokuita no zvawareketa ngezva Ismaeri, ndazvizwa. Ndicakomborera Ismaeri, ndicamupasa ana, uye ndicamuita kuti awande. Iyena ucabara atungamiriri e anhu 12, uye inini ndicamuita kuti iyena agare dzinza rakakura. 21 Asi ndicaita citenderano na Izaki, mwana waucabarirhwa na Sara pa nguwa ino, mu gore rinoteera.”

22 Mwari paakapedza kureketa na Abrahamu, akaenda. 23 Abrahamu wakatora Ismaeri mwana wake, ese aya ainga abarhwa pa nyumba pake, uye no ese ainga atengwa no mare, anarume ese e pa nyumba pake, akaaita ucekeri we ganda ro mberi re nhengo dzawo pa zuwa irona kamare, hinga zvaainga abvunzwa na Mwari. 24 Abrahamu wainga ano makore 99 paakaizwa ucekeri. 25 Uye Ismaeri mwana wake, wainga ano makore 13 paakaizwa ucekeri. 26 Pa zuwa irona kamare, Abrahamu no mwana wake Ismaeri, akaizwa ucekeri. 27 Anarume ese e pa nyumba pake, ese akabarhwa pa nyumba pake, uye ese e nyika imweni akatengwa no mare, akaizwa ucekeri pamwepo naye.

18 Mumasure mazvo, Djehovha akadzipangidza kuna Abrahamu paainga akagara pakati pe miti mikuru ye Mamere, paainga akagara pa musuwo we tenda comasikati pa nguwa yaipisa maningi. 2 Paakamutsa musoro, iyena wakaona anarume atatu akaima nge cekure. Paakaaona, wakabuda pa musuwo we tenda ecigogoma kuti aende koosongana nawo, uye wakahwarara. 3 Hino iyena wakati: “Djehovha, kana mandizwira usisi, ndapota, musadarike musikazi kuima pano museenzi wenyu. 4 Ndapota, tenderai kuti ndiunzise zvimvura padoko kuti musukwe tsoka dzenyu; pedzepo mogara pasi pe muti. 5 Sezvo madarika no pano pa museenzi wenyu, ndapota, nditenderei kuti ndimuunzisirei zvokurhya padoko kuti mugare no simba.* Pedzepo mungaenda henyu.” Awona akadaira kuti: “Zvakanaka. Ungaita hako zvawabhuya.”

6 Ngokudaro, Abrahamu wakagogoma ecienda mu tenda mainga muna Sara uye wakati kaari: “Kasika! Pima zvitani zvitatu* zve ufu wakanyasa kumotsa, ukanye uye ubike pau.” 7 Pedzepo, Abrahamu wakagogoma ecienda kainga kuno zvipfuyo uye wakasanangura cin’ombe cakanuna uye cino nyama yakapfawa. Iyena wakacipasa mubetseri wake, uye iyena wakacigadzirira nokukasika. 8 Abrahamu wakatora maintega, mukaka uye no cin’ombe caainga agadzirira, wakazvikanda pamberi pawo. Uye iyena wakagara padhuze nawo, awona paainga ecirhya.

9 Awona akamubvunzisa kuti: “Mukadzi wako Sara, uripi?” Iyena wakaadaira kuti: “Uri mu tenda.” 10 Umwe wawo wakaenderera mberi eciti: “Zvezvirokwazvo, pa nguwa yakaita hingana ii yo gore rinoteera ndicahwirira kauri, uye Sara mukadzi wako, unonga waano mwana.” Sara wainga ecipurutana ari pa musuwo we tenda rainga riri sure ke mwanarumewo. 11 Abrahamu na Sara ainga acembera maningi. Sara wainga adarika thunga re kubara ana.* 12 Ndiyo ndaa, Sara wakatanga kuseka ega, eciti: “Zvandacembera kudai uye tenzi wangu wacemberawo, ndingagaradi kamare no mupfaro uwona?” 13 Djehovha akati kuna Abrahamu: “Ngei Sara waseka, eciti: ‘Zvandacembera kudai, ndingabaradi mwana here?’ 14 Pano ciro cisikakwanisi kuizwa na Djehovha here? Ndicahwirira kauri pa gore rinoteera pa nguwa yakasisira, uye Sara unonga waano mwana.” 15 Asi ngokuti Sara wainga ecithya, wakarambira eciti: “Inini andizi kuseka!” Asi Mwari akati: “Honde! Iwewe waseka.”

16 Anarume aya paakamuka kuti aende, akaringira kumuterero ke Sodhoma, uye Abrahamu wakaaperekedza kuti aenekane nawo. 17 Djehovha akati: “Ndicafisira Abrahamu zviro zvandiri kuda kuita here? 18 Ngokuti zvezvirokwazvo, Abrahamu ucagara dzinza rakakura uye rino simba, uye madzinza ese e pa nyika acakomborerhwa* nge ndaa yake. 19 Ngokuti inini ndaakunyasa kuziya Abrahamu, kuitira kuti iyena aziise ana ake uye anhu e pa nyumba pake kuti acengete makwanza a Djehovha nge kuita zviro zvakanaka uye zve unatsi, kuitira kuti Djehovha adzadzise zvaakagondesa Abrahamu.”

20 Ngokudaro, Djehovha akati: “Kucema ke anhu nge ndaa ye Sodhoma no Gomora kakakura, uye citema cawo cakura maningi. 21 Ndicacita kuti ndione kuti zvezvirokwazvo awona ari kuita zviro maererano no kucema kandiri kuzwa here. Asi kana zvisiripi izvona, ndicazviziya.”

22 Hino anarume awona akabuda ipona uye akaenda ku Sodhoma, asi Djehovha akasara na Abrahamu. 23 Abrahamu wakakhwedera padhuze uye wakati: “Mucatsakatisadi kamare anatsi pamwepo no anhu anoita zviro zvakashata here? 24 Ngatimboti mu thaundiro muno anhu anatsi anokwana 50. Pa mugariro uwona, mucaatsakatisa uye motama kurekerera thaundiro nge ndaa yo anatsi 50 arimo here? 25 Amuzoiti izvona nge mushobo uwona, kuuraya anhu anatsi pamwepo no anoita zviro zvakashata, zvekuti zviro zvinoitika ku anhu anatsi zvoitikawo ku anhu anoita zviro zvakashata! Amuzoiti izvona. Kodi Mutongi we nyika yese aaiti zve unatsi here?” 26 Hino Djehovha akati: “Kana ndikagumira mu thaundi ro Sodhoma anhu anatsi anokwana 50, ndicarekerera thaundi rese nge ndaa yawo.” 27 Asi Abrahamu wakatizve: “Ndapota, ndirekererei nge kuda kubhuya na imwimwi Djehovha, kunyazi ndiri bukuta uye marota. 28 Ngatimboti pari kushota ashanu kuti pagume anhu anatsi 50. Mucatsakatisa thaundi rese here nge ndaa ye anhu ashanu?” Iyena akadaira kuti: “Andizoritsakatisi nge ndaa ye anatsi 45.”

29 Asi Abrahamu wakareketazve naye, eciti: “Ngatimboti magumira anhu anatsi 40 imona.” Iyena akadaira kuti: “Andizoritsakatisi nge ndaa ye anatsi 40.” 30 Asi Abrahamu wakaenderera mberi eciti: “Ndapota Djehovha, musanditsamwire, ndisiyei kuti ndirumbwe ndecireketa: Ngatimboti magumira anatsi 30 basi imona.” Iyena akati: “Andizoritsakatisi nge ndaa ye anatsi 30.” 31 Asi Abrahamu wakarumbwa eciti: “Ndapota, ndirekererei nge kuda kureketa na imwimwi Djehovha: Ngatimboti magumira anatsi 20 basi imona.” Iyena akadaira kuti: “Andizoritsakatisi nge ndaa ye anatsi 20.” 32 Pakupedzesera, Abrahamu wakati: “Ndapota Djehovha, musanditsamwire, ndisiyei kuti ndireketezve kamwe basi: Ngatimboti magumira anatsi gumi basi imona.” Iyena akadaira kuti: “Andizoritsakatisi nge ndaa ye anatsi gumi.” 33 Djehovha paakapedza kureketa na Abrahamu, akaenda, uye Abrahamu wakahwirira mu tenda rake.

19 Ngirozi mbiri dzakaguma ku Sodhoma pakainga koodoka, uye Roti wainga wakagara pa musuwo mukuru we Sodhoma. Paakadziona, Roti wakaenda koosongana nadzo uye wakahwarara. 2 Iyena wakati: “Ndapota, madzitenzi angu, uyai kumba ke museenzi wenyu uye kana mukaguma munozosukwa tsoka dzenyu, pedzepo mowata. Mozofumira mangwana macibesi uye mozoenda.” Idzona dzakamudaira kuti: “Azviiti, isusu ticawatira pa mbuto yakadzara anhu.” 3 Asi iyena wakadzideketerera zvekuti dzakazoenda naye kumba kake. Hino wakadzigadzirira zvokurhya zvakawanda, uye pedzepo wakabika pau dzisina mbiriso, uye dzakarhya.

4 Asati awata, anarume e thaundi, kureya anarume e Sodhoma, kubvira ku mudjaha dakara ku akuru, akatenderedza nyumba akawanda maningi. 5 Aidainza Roti eciti: “Ari kupi anarume auya pa nyumba pako usiku uno? Aunzise kuno kuti tiwate nawo.”

6 Hino Roti wakaenda kooreketa nawo kunza uye iyena wakafunga musuwo. 7 Iyena wakati: “Ndapota hama dzangu, musaite zviro zvakashata kudaro. 8 Ndapota, ndino ana airi e anakadzi asati akambowata no mwanarume. Ndapota, ndisiyei ndiaunzise kunza kuno kuti muite nawo zvamunoda. Asi musaite ciro cipi haco no anarume aya, ngokuti awona auya koozorora pa nyumba pangu.”* 9 Ngokudaro, awona akati: “Buda mberi kedu!” Uye akatunhudzira eciti: “Iwewe uri we nyika imweni uye wakauya koogara kuno, uye kunyazi zvakadaro waakuda kutitonga! Zvino tiri kuda kukuitira zvakashata maningi kudarika zvataizoitira awona.” Uye ese akabatana otenderedza Roti* kuti aphwanye musuwo. 10 Hino anarume ainga ari mumba akatambanudza nyara dzawo, okweera Roti mumba uye ofunga musuwo. 11 Uye akaita kuti anarume ainga ari pa musuwo agare mapofu, kubvira ku mudoko dakara ku mukuru, zvekuti akaremba eciedza kupsvaka painga pano musuwo.

12 Hino, anarume ainga ana Roti mukati akamubvunzisa kuti: “Uno hama dzimwenizve here muno? Akwambo, ana e anarume no e anakadzi, no anyaukama ako ese ari mu thaundi rino, abudise muno! 13 Tiri kuda kutsakatisa thaundi iri, ngokuti kucema ke anhu nge ndaa ye thaundi iri kakura maningi pamberi pa Djehovha, ndiyo ndaa Djehovha atituma kuti titsakatise thaundi iri.” 14 Hino Roti wakatanga kureketa no akwambo ake, aya aida kuzowaka ana ake, eciti: “Kasikai! Budai mu mbuto ino, ngokuti Djehovha ari kuda kutsakatisa thaundi rino!” Asi akwambo ake aimuona hingana kuti uri kutamba.

15 Pakainga kooedza, ngirozi dzakarumbwa dzecideketerera Roti, dzeciti: “Kasika! Tora mukadzi wako, no ana ako airi e anakadzi aunawo, kuti musatsakatiswe pacatsakatiswa thaundi rino nge ndaa ye zvishaishi zvaro!” 16 Ngokuti ainonoka, anarume akabata nyara yake, yo mukadzi wake, no yo ana ake e anakadzi airi, uye awona akaabvisa imona oakanda kunza ke thaundi, ngokuti Djehovha ainga aazwira usisi. 17 Paainga aabvisa aa kumuceto ke thaundi, umwe wawo* wakati: “Tiza kuti uponese upenyu* wako! Usaringire sure uye usaime mu mbuto ipi hayo yo nharaunda!* Tizira ku mutanha we matunhu kuitira kuti usatsakatiswe!”

18 Hino Roti wakadzibvunza kuti: “Ndapota Djehovha, musandiendese ikona! 19 Mapangidzira usisi ku museenzi wenyu, uye mandipangidzira nyasha dzakakura* ngo kundisiya kuti ndirumbwe ndecirarama,* asi andikwanisi kutizira ku mutanha we matunhu, ngokuti ndiri kuthya kusongana no dambudziko uye ndofa. 20 Ndapota, thaundi iri riri padhuze, ndingatizira ikona; irona i thaundi doko. Ndapota, ndingatizira ikona here? Irona i thaundi doko. Kana ndikadaro, ndinopona.”* 21 Hino iyona yakati: “Zvakanaka, ndicareremedza cikumbiro cako, nge kusama kutsakatisa thaundi rawareketa. 22 Kasika! Tizira ikona, ngokuti andidikani kuita ciro dakara waguma ikona!” Ndiyo ndaa, thaundiro rakazodainzwa zina rokuti Zoari.*

23 Zuwa rainga rabuda Roti paakaguma ku Zoari. 24 Hino Djehovha akaita kuti muriro no enshofre zvinaire Sodhoma no Gomora, izvona zvaibva kudenga kuna Djehovha. 25 Ngokudaro, akatsakatisa mathaundi awona, nharaunda yese no agari ese e mu mathaundi awona uye no zvinomera. 26 Asi mukadzi wa Roti wainga ari sure kake, wakaringira sure, uye wakaphinduka wogara curu* ce munyu.

27 Abrahamu wakafumira woenda pa mbuto yaainga akamboreketa na Djehovha. 28 Paakaringisa kumuterero, ku Sodhoma no Gomora, uye no nharaunda yese yo Djorodhani, wakaona zviro zvinothyisa. Wakaona cutsi cakasvipa maningi cakaita hinga cutsi cinobuda pa forno! 29 Hino Mwari paakatsakatisa mathaundi e nharaunda, Mwari akaedzurira ngezva Abrahamu, uye akabvisa Roti mu mathaundi aakatsakatisa, mathaundi aigara Roti.

30 Nokuhamba ke nguwa, Roti wakabva ku Zoari no ana ake e anakadzi airi woenda koogara ku mutanha we matunhu, ngokuti wakathya kugara ku Zoari. Ngokudaro, iyena wakaenda koorarama mu bako no ana ake e anakadzi airi. 31 Uye dangwe rakati ku munukuna wake: “Baba edu acembera, uye mu nyika ino amuna anarume angawata na isusu hinga zvinoizwa no anhu e nyika yese. 32 Uya timwise baba edu vhinyu, uye tiwate nawo, kana tikadaro tinozocengetedza mubarirhwana wa baba edu.”

33 Hino pa usiku uwona, awona akararadzisa baba awo no vhinyu; pedzepo dangwe rakapinda uye rakawata na baba ake, asi babewo aazi kuzviziya paakawata naye kunyazi mwanewo paakamuka. 34 Pa zuwa rakazoteera, dangwe rakati ku munukuna wake: “Inini ndakawata na baba zuro usiku. Ngatiapasezve vhinyu usiku uno. Mumasure mazvo pinda uwate nawo, tikadaro tinozocengetedza mubarirhwana wa baba edu.” 35 Hino pa usiku uwona, awona akararadzisazve baba awo no vhinyu; pedzepo munukuna wake wakaenda koowata na baba ake, asi babewo aazi kuzviziya paakawata naye kunyazi mwanewo paakamuka. 36 Ngokudaro, ana a Roti airi e anakadzi akabata pamwiri pa baba awo. 37 Dangwe rakabara mwana we mwanarume uye rakamududza zina rokuti Moabhi. Iyena ndiye baba we Amoabhi e mazuwa ano. 38 Munukuna wake wakabarawo mwana we mwanarume uye wakamududza zina rokuti Bheni-ami. Iyena ndiye baba we Aamoni e mazuwa ano.

20 Abrahamu wakathuthisa musasa wake woenda koogara ku nyika yo Negebhe uye wakatanga kugara pakati po Kadhesi no Suri. Paainga ecigara* ku Gerari, 2 Abrahamu wakaphindazve kureketa zvimwezvo panocokuita na Sara mukadzi wake eciti: “Iyena ndi yaya angu.” Hino Abhimereki mambo we Gerari wakatuma anhu kuti aende kootora Sara kuti auye naye. 3 Mumasure mazvo, Mwari akauira Abhimereki mu hope cousiku uye akati kaari: “Kubhuya zvazviri, iwewe wakaezana no munhu wakafa nge ndaa ye mukadzi uu wawatora, ngokuti iyena wakawakwa, ndi mukadzi we munhu.” 4 Asi Abhimereki wainga asati awata naye.* Hino iyena wakati: “Djehovha munozourayadi kamare dzinza risina ndaa* here? 5 Kodi Abrahamu aazi here kundibvunza kuti: ‘Iyena ndi yaya angu,’ uye Sara aazi kundibvunza kuti: ‘Iyena ndi mukoma angu? Inini ndazviita no mwoyo wakanaka uye ndainga ndisikazvizii kuti ndiri kushaisha.” 6 Hino, Mwari we zvirokwazvo akamubvunza mu hope kuti: “Ndinozviziya kuti iwewe wazviita no mwoyo wakanaka, ndiyo ndaa ndakurambidza kuti utame kundishaishira. Uye andizi kukutendera kuti uwate naye. 7 Hino muhwirinzire mukadzi wake, ngokuti mwanarumewo ndi muphorofita uye ucakuitira munamato we kudeketera, uye iwewe ucarumbwa uri mupenyu. Asi kana ukatama kumuhwirinzira, ziya kuti zvezvirokwazvo iwewe ucafa, pamwepo no anhu ese e pa nyumba pako.”

8 Abhimereki wakafumira comacibesi-besi, wakadainza aseenzi ake ese uye wakaabvunza zviro zvese izvi, uye awona akathya maningi. 9 Pedzepo, Abhimereki wakadainza Abrahamu uye wakamubvunza kuti: “Zvinyi izvi zvawatiitira? Ndakakushaishirei kuti uunzise cishaishi cakakura kudai pandiri no pa umambo wangu? Zvawandiitira, azvizi kunaka.” 10 Uye Abhimereki wakaenderera mberi ecibvunzisa Abrahamu kuti: “Ndi cipi cainga ciri cinangwa cako pawakaita izvi?” 11 Abrahamu wakadaira kuti: “Ndakazviita ngokuti ndakarangarira kuti: ‘Zvezvirokwazvo, mu mbuto ino amuna munhu unothya Mwari, uye acandiuraya nge ndaa ye mukadzi wangu.’ 12 Uyezve, iyena zvezvirokwazvo ndi yaya angu, mwana wa baba angu asi mai akasiyana; uye iyena wakagara mukadzi wangu. 13 Hino Mwari paakandiita kuti ndibude pa nyumba ya baba angu kuti ndiherereke pa nyika, inini ndakati kaari: ‘Iwewe ucandipangidzira rudo rakagondeka nge mushobo uu: Kwese katinoenda, bhuya kuti: “Iyena ndi mukoma angu.”’”

14 Pedzepo, Abhimereki wakatora mabira, n’ombe, aseenzi e anarume no e anakadzi uye wakazvipasa Abrahamu, uye wakamuhwirinzirawo Sara mukadzi wake. 15 Kusiya izvona, Abhimereki wakati kuna Abrahamu: “Nyika yangu iri mu nyara dzako. Gara kaunoda.” 16 Uye iyena akati kuna Sara: “Ndiri kupasa hama yako mare yo prata inokwana kuita 1000. Mare ii inopangidza pamhene ku anhu aunawo no ku anhu ese kuti iwewe auna ndaa,* uye apana anozokupsverusa.” 17 Uye Abrahamu wakatanga kuita munamato we kudeketera kuna Mwari we zvirokwazvo, uye Mwari akaporesa Abhimereki, mukadzi wake no aranda ake e anakadzi, uye akatanga kubara ana; 18 ngokuti Djehovha ainga aita kuti anakadzi ese e pa nyumba pa Abhimereki asabare* nge ndaa ya Sara, mukadzi wa Abrahamu.

21 Djehovha akarangarira Sara hinga zvaainga areketa, uye Djehovha akaitira Sara zviya zvaainga agondesa. 2 Hino Sara wakabata pamwiri uye wakabarira Abrahamu mwana paainga acembera, pa nguwa yaainga agondeswa na Mwari. 3 Abrahamu wakadudza mwana wake waainga abva kubarirhwa na Sara zina rokuti Izaki. 4 Uye Abrahamu wakaita ucekeri mwana wake Izaki paainga ano mazuwa masere, hinga zvaainga abvunzwa na Mwari. 5 Abrahamu wainga ano makore 100 paakabara Izaki mwana wake. 6 Hino Sara wakati: “Mwari andipasa cikonzero cekuti ndiseke; munhu wese uya unozozviziya, ucaseka pamwepo na inini.”* 7 Uye iyena wakatunhudzira eciti: “Ndiani waizokwanisa kubvunza Abrahamu kuti: ‘Zvezvirokwazvo, Sara ucaamwisa ana’? Asi inini ndamubarira mwana kunyazi iyena wacembera.”

8 Mwanewo wakazokura, worumurhwa, uye Abrahamu wakagadzirira mabiko akakura pa zuwa rakarumurhwa Izaki. 9 Asi Sara waiona kuti mwana wa Agari Muedjipitu, waainga abarira Abrahamu, waisingirira Izaki. 10 Ndiyo ndaa, Sara wakabvunza Abrahamu kuti: “Dzingira murandakadzi uu uye mwana wake, ngokuti mwana we murandakadzi uu aazogari nhaka pamwepo no mwana wangu, Izaki!” 11 Asi zvaakareketa ngezva Ismaeri azvizi kupfadza Abrahamu. 12 Hino Mwari akabvunza Abrahamu kuti: “Usanyangadzwe nge ndaa ye zviro zvawabvunzwa na Sara zvinocokuita no mwana uu uye ngezve murandakadzi wako. Purutana zvaari kukubvunza,* ngokuti uya ucazwi mwana wako* ucauya nge kuna Izaki. 13 Panocokuita no mwana we murandakadzi, ndicaitawo kuti agare dzinza, ngokuti iyena ndi mwana wako.”*

14 Hino Abrahamu wakafumira comacibesi-besi, wakatora pau no mvura yainga iri mu cigubu co dehwe uye wakazvipasa Agari. Iyena wakazvikanda pa phewa rake, womuendesa no mwana wake. Ngokudaro, iyena wakaenda uye wakatanga kuherereka ku renje ro Bheeri-shebha. 15 Mvura yainga iri mu cigubu co dehwe payakapera, Agari wakasiya mwana wake pasi pe pfiba. 16 Iyena wakaenda kure padoko koogara kake ega, pa mukuwo unoguma mupasha paunonga wakhandirhwa, ngokuti iyena waiti: “Andidi kuona mwana wangu ecifa.” Hino iyena wakaenda koogara kure, wotanga kucema no izwi guru.

17 Mwari akazwa izwi re murumbwanewo, uye ngirozi ya Mwari yakadainzira Agari iri kudenga yeciti: “Uri kucemei, Agari? Usathye, ngokuti Mwari azwa izwi re murumbwana ari pa mbuto yaari. 18 Muka, enda koobata nyara murumbwana uu kuti akwanise kuhamba, ngokuti ndicamuita kuti agare dzinza guru.” 19 Hino Mwari akafunungura madziso a Agari uye iyena wakaona cimbo cino mvura; ngokudaro, iyena wakaenda ikona uye wakadzadza cigubu co dehwe no mvura, uye wakaipasa murumbwanewo. 20 Uye Mwari akarumbwa ano murumbwana uu paainga ecikura. Iyena waigara ku renje uye waiita basa ro kuvhima eciseenzesa uta no mupasha. 21 Iyena wakazogara ku renje ro Parani, uye mai akhona akazomuwakira mukadzi we ku Edjipitu.

22 Pa nguwa iyona, Abhimereki pamwepo na Fikori, mukuru-mukuru we anyahondo ake, akati kuna Abrahamu: “Mwari anewe pa zvese zvaunoita. 23 Hino ndipikire pamberi pa Mwari kuti auzocengedzi inini kunyazi ana angu no azukuru angu, uye ucandibata zvakanaka no nyika yauri kugara, wecipangidzira rudo rimwero rakagondeka hinga randiri kukupangidzira.” 24 Ngokudaro, Abrahamu wakati: “Inini ndinopika.”

25 Asi Abrahamu wakagurungutira Abhimereki nge ndaa ye cimbo ce mvura cekuti aseenzi a Abhimereki ainga acitora no simba. 26 Abhimereki wakadaira eciti: “Andimuzii wakaita izvona; iwewe auzi kumbondibvunza nge zvazvo, uye andisati ndakambozwa anhu ecireketa nge zvazvo dakara nyamasi uno.” 27 Abrahamu wakatora mabira no n’ombe wakazvipasa Abhimereki uye ari airi akaita citenderano. 28 Abrahamu paakakanda pa dii mabira manomwe ekadzi kubva painga pano mabira amweni, 29 Abhimereki wakabvunzisa Abrahamu kuti: “Ngei wakanda pa dii mabira manomwe ekadzi aya?” 30 Iyena wakadaira kuti: “Imwimwi munodikana kutenda mabira manomwe aya ekadzi hinga upupuri wekuti inini ndini ndakacera cimbo ici.” 31 Ndiyo ndaa akadainza mbuto iyona kuti Bheeri-shebha,* ngokuti ari airi akaita mhiko ipona. 32 Ngokudaro, awona akaita citenderano ku Bheeri-shebha, uye mumasure mazvo Abhimereki na Fikori, mutungamiriri we anyahondo ake akahwirira ku nyika yo Afiristiya. 33 Mumasure mazvo, Abrahamu wakasima mutamargi ku Bheeri-shebha, uye akadainza ikona zina ra Djehovha, Mwari asina mugumo. 34 Uye Abrahamu wakagara* ku nyika yo Afiristiya ke nguwa yakareba.*

22 Mumasure mazvo, Mwari we zvirokwazvo akaedza Abrahamu, uye akati kaari: “Abrahamu!” Iyena wakadaira kuti: “Ndiri pano!” 2 Hino iyena akati: “Ndapota, tora mwana wako, mwana wako umwe ega waunodisisa, Izaki, uende naye ku nyika yo Moriya uye mupase ikona hinga cibairo cinopiswa mu dunhu randicakupangidza.”

3 Ngokudaro, Abrahamu wakafumira comacibesi-besi, wakasunga dhongi rake uye wakatora aseenzi ake airi no mwana wake Izaki. Wakawadza huni kuti aite nadzo cibairo cinopiswa, uye wakaenda ku mbuto yaakapangidzwa na Mwari we zvirokwazvo. 4 Pa zuwa recitatu, Abrahamu wakaona mbuto yakhona ngece kure. 5 Hino Abrahamu wakati ku aseenzi ake: “Sarai pano no dhongi iri, inini no murumbwana tiri kumboenda iyo koonamata uye ticahwirira kamuri.”

6 Abrahamu wakatora huni dze kupisa cibairo uye wakathwarisa Izaki mwana wake. Mumasure mazvo, wakatora muriro no banga, uye ari airi akaenda. 7 Hino Izaki wakabvunza Abrahamu baba ake kuti: “Baba!” Awona akadaira kuti: “Bhuya mwana wangu!” Izaki wakaenderera eciti: “Tino muriro no huni, asi bira rakhona re kuita cibairo cinopiswa riripi?” 8 Abrahamu wakadaira kuti: “Mwana wangu, Mwari acatipasa bira raticaita cibairo cinopiswa.” Uye ari airi akarumbwa ecienda.

9 Pakupedzesera, akazoguma pa mbuto yaainga apangidzwa na Mwari we zvirokwazvo, uye Abrahamu wakagadzirira ipona artari uye wakakanda huni pamusoro payo. Wakasunga nyara no mirenje dza Izaki mwana wake, uye wakamukanda pa artari pamusoro pe huni. 10 Pedzepo Abrahamu wakatambanudza nyara yake uye wakatora banga kuti auraye mwana wake. 11 Asi ngirozi ya Djehovha yakadainzira iri kudenga yeciti: “Abrahamu, Abrahamu!” Iyena wakadaira kuti: “Ndiri pano!” 12 Hino ngiroziyo yakati: “Usakuwadze murumbwanewo, uye usamuite ciro cipi haco ngokuti zvino ndaakuzviziya kuti iwewe unothya Mwari, ngokuti auzi kundinyima mwana wako, umwe ega.” 13 Abrahamu wakaringira mberi kake, uye wakaona bira rokono rakasungika nyanga dzaro pa pfiba. Hino Abrahamu wakaenda wotora birero, woripasa hinga cibairo cinopiswa pa mbuto po mwana wake. 14 Uye Abrahamu wakapasa mbuto iyona zina rokuti Djehovha-jiree.* Ndiyo ndaa dakara nyamasi uno zvecizwi: “Pa dunhu ra Djehovha, iyena acapasa zvinonga zvecidiwa.”

15 Uye ngirozi ya Djehovha yakadainzazve Abrahamu kecipiri iri kudenga, 16 yeciti: “‘Ndinopika na inini kamare,’ anodaro Djehovha, ‘ngokuti waita izvi uye auzi kundinyima mwana wako, mwana wako umwe ega, 17 zvezvirokwazvo ndicakukomborera uye ndicaita kuti ana ako* awande hingana nyeredzi dze kudenga uye hingana madjeca e mu muceto me bahari, uye mwana wako* acatora musuwo we* azondi ake. 18 Uye madzinza ese e pa nyika anozokomborerhwa nge ndaa ye mwana wako,* ngokuti wapurutana izwi rangu.’”

19 Hino Abrahamu wakahwirira kainga kuno aseenzi ake, uye akaenda ese ku Bheeri-shebha; uye Abrahamu wakarumbwa ecigara ku Bheeri-shebha.

20 Mumasure mazvo, Abrahamu wakatambira masoko okuti: “Mirka wabarirawo hama yako Naori ana: 21 Dangwe rake ndi Uzi, wecipiri ndi Bhuzi munukuna wake, wecitatu ndi Kemueri baba a Aramu, 22 Kesedhi, Azo, Piridhasi, Djidharafi, uye Bhetueri.” 23 Bhetueri wakabara Rabheka. Mirka wakabarira Naori hama ya Abrahamu ana asere. 24 Mukadzi wake we pa dii, waizwi Reumaa, wakabarawo ana: Tebhaa, Gaamu, Tahashi, uye Maaka.

23 Aya ndiwo makore akararama Sara; Sara wakararama makore 127. 2 Sara wakafira ku Kiriyati-arbha kureya ku Hebroni, ku nyika yo Kanani uye Abrahamu wakatsukwara uye wakacema nge nda ye kufirhwa na Sara. 3 Hino Abrahamu wakabuda painga pano mutumbi we mukadzi wake uye wakabvunza ana a Hiti kuti: 4 “Ndiri we nyika imweni uye ndiri kugara pakati penyu. Ndipaseiwo mbuto ye makuwa mu nyika menyu kuti ndikotsere mukadzi wangu.” 5 Hino ana a Hiti akadaira Abrahamu eciti: 6 “Izwai tenzi wangu. Imwimwi muri munhu wa Mwari* pakati pedu. Mungakotsa mukadzi wenyu pa masiye edu akanakisisa. Apana umwe wedu acamunyimai masiye ecimurambidzai kuti musakotse mukadzi wenyu.”

7 Hino Abrahamu wakamuka uye wakahwarara pamberi pe anhu e nyika iyona, ana a Hiti, 8 uye wakaabvunza kuti: “Kana imwimwi mecitendera* kuti inini ndikotse mukadzi wangu, ndipurutanei: Kumbirai Efroni, mwana wa Zoari 9 kuti anditengesere bako rake re Makipera; riri kumuceto ke munda wake. Ngaanditengesere pamberi penyu ngo mutengo we mare yo prata yakasisira, kuti ndigare no mbuto yangu yandicaseenzesa hinga masiye.”

10 Efroni wainga akagara pakati pe ana a Hiti. Hino, Efroni Muhiti, wakadaira Abrahamu pamberi pe ana a Hiti, uye pamberi pe anhu ese aipinda nge pa musuwo mukuru we thaundi, kuti: 11 “Haiwa tenzi wangu! Ndipurutanei. Inini ndinomupasai munda pamwepo no bako riri mauri. Ndiri kumupasai pamberi pe ana e anhu angu. Kotsai mukadzi wenyu.” 12 Hino Abrahamu wakahwarara pamberi pe anhu e nyika iyona 13 uye wakabvunza Efroni pamberi pe anhu ese, eciti: “Ndapota ndipurutane! Inini ndicakupasa mutengo we mare yo prata wakasisira no mundewo. Ndapota, tenda kuti ndikotseremo mukadzi wangu.”

14 Hino Efroni wakadaira Abrahamu kuti: 15 “Tenzi wangu ndipurutanei. Mutengo we munda uu ndi mashekeri 400* e prata, asi izvona zvinoreyei pakati pangu na imwimwi? Kotsai mukadzi wenyu.” 16 Abrahamu wakapurutana Efroni, uye Abrahamu wakapimira Efroni mutengo we prata waainga areketa pamberi pe ana a Hiti, mashekeri 400* e prata, maererano no mutemo waiseenzeswa no atengesi. 17 Ngokudaro, munda wa Efroni we ku Makipera wainga uri mberi ke Mamere, bako rainga riri mu mundemo uye miti dzese dzainga dziri mukati me munda, zvese zvakaziiswa kuti 18 zvainga zvaa zva Abrahamu zvatengwa pamberi pe ana a Hiti, pamberi pe anhu ese aipinda nge pa musuwo mukuru we thaundi. 19 Mumasure mazvo, Abrahamu wakakotsa Sara mukadzi wake mu bako re munda we Makipera mberi ke Mamere, kureya Hebroni, mu nyika yo Kanani. 20 Ngokudaro, munda uye bako rainga riri mauri zvakapaswa Abrahamu nge ana a Hiti, hinga munda wake kuti aseenzese hinga masiye.

24 Abrahamu wainga wacembera maningi, uye Djehovha ainga amukomborera pa zviro zvese. 2 Abrahamu wakabvunza museenzi wake, mukuru we pa nyumba pake, uwo waionerera zviro zvese zvaainga anazvo, eciti: “Ndapota, kanda nyara yako pasi pe mutezu wangu, 3 uye ndicaita kuti upike na Djehovha, Mwari we denga no nyika, kuti auzopsvakiri mwana wangu mukadzi pakati pe asikana e Akanani, e nyika yandiri kugara. 4 Asi unodikana kuenda ku nyika yangu uye pakati pe anyaukama angu, kuti upsvakire mwana wangu Izaki mukadzi.”

5 Hino museenziwo wakabvunzisa kuti: “Ndinozoitei kana mwanakadziwo akaramba kuuya mu nyika ino? Ndinodikana kuuya kuzotora mwana wenyu kuti ndiende naye ku nyika yamakabveyo here? 6 Abrahamu wakamudaira eciti: “Usatomboendese hako mwana wangu ikona. 7 Djehovha Mwari we denga, uwo akandibudisa pa nyumba pa baba angu uye mu nyika ye anyaukama angu, akareketa na inini akandipikira eciti: ‘Ndicapasa mwana wako nyika ino,’ acatuma ngirozi yake kuti ikutungamirire, uye iwewe zvezvirokwazvo ucatorera mwana* wangu mukadzi ikona. 8 Asi kana mwanakadziwo asikadi kuuya na iwewe, hino iwewe unonga wasudzunurhwa pa mhiko ii. Asi usaende no mwana wangu ikona.” 9 Museenziwo wakakanda nyara yake pasi pe mutezu wa Abrahamu, tenzi wake, uye wakapika kuti waizoita zvaabvunzwa.

10 Ngokudaro, museenziwo wakatora makamero gumi a tenzi wake uye wakaenda no zviro zvakasiyana-siyana zvaakapaswa na tenzi wake. Iyena wakaita rhwendo ecienda ku Mezopotamiya, ku thaundi ro Naori. 11 Iyena wakaita kuti makamero agodame pa cimbo ce mvura kunza ke thaundiro. Kainga kaakuda kudoka, uye yainga yaa nguwa yekuti anakadzi anoenda koocera mvura. 12 Pedzepo, iyena wakati: “Djehovha, Mwari wa tenzi wangu Abrahamu, ndapota, itai kuti ndibudirire nyamasi, uye pangidzai rudo rakagondeka kuna tenzi wangu Abrahamu. 13 Zvino ndakaima pa cimbo ce mvura, uye asikana e thaundi ari kuuya koocera mvura. 14 Ndinokumbira kuti zviitike kudai, musikana wandicabvunza kuti: ‘Ndapota, ndiri kukumbirawo kuti uthure jaro yako yo mvura kuti ndimwe,’ uye iyena wodaira kuti: ‘Imwai, uye ndicapasawo makamero enyu,’ ngaagare uya wamakasanangurira museenzi wenyu Izaki; ngokudaro, ndinozoziya kuti mapangidzira rudo rakagondeka kuna tenzi wangu.”

15 Paainga asati atopedza kureketa, Rabheka wakauya akathwara jaro yo mvura pa phewa. Iyena wainga ari mwana wa Bhetueri, Bhetueri wainga ari mwana wa Mirka, Mirka wainga ari mukadzi wa Naori, Naori wainga ari hama ya Abrahamu. 16 Musikanewo wainga akarungama maningi, iyena wainga ari mhandwe, uye apana mwanarume wainga akambowata naye. Iyena wakaterera kuenda ku cimbo ce mvura, wodzadza jaro yake, uye wohwirira. 17 Museenziwo wakagogoma ecienda koosongana naye uye wakati: “Ndapota, ndiri kukumbirawo kuti undipase zvimvura padoko zviri mu jaro yako.” 18 Rabheka wakati: “Imwai tenzi wangu.” Iyena wakakotamisa jaro yake yo mvura, woibatira mu nyara ecimupasa kuti amwe. 19 Mumasure me kumupasa mvura yekuti amwe, iyena wakati: “Ndicacererawo mvura makamero enyu dakara awona aguta.” 20 Nokukasika iyena wakadururira mvura mu mbuto inomwira zvipfuyo uye wakaenda kakawanda ku cimbo koocera mvura, uye wakarumbwa ecicerera mvura makamero ake ese. 21 Pa nguwa yese ii, mwanarumewo wainga eciona ecishamisika akanyarara, ecietsera kuona kuti Djehovha ainga aita kuti rhwendo rake ribudirire here kana kuti haiwa.

22 Makamero paakapedza kumwa mvura, mwanarumewo wakamupasa mhete ye oro ye pa miro, yairema hafu ye shekeri* uye no mapurusera mairi e oro airema mashekeri gumi,* 23 uye omubvunza kuti: “Ndapota, ndibvunze, uri mwana waani? Kumba ka baba ako kuno mbuto yekuti tiwatireyo usiku uno here?” 24 Iyena wakadaira eciti: “Ndiri mwana wa Bhetueri, mwana wa Naori waakabarirhwa no mukadzi wake Mirka.” 25 Uye wakatunhudzira eciti: “Tino uswa wakawanda no zvokurhya zve zvipfuyo zvakawanda uye no mbuto yekuti muwatire usiku uno.” 26 Hino mwanarumewo wakagodama uye wakahwarara pamberi pa Djehovha 27 uye wakati: “Ngaakudzwe Djehovha, Mwari wa tenzi wangu Abrahamu, ngokuti aazi kusiya kupangidzira tenzi wangu rudo rake rakagondeka uye kutendeka. Djehovha anditungamirira ku nyumba dze anyaukama a tenzi wangu.”

28 Uye musikanewo wakagogoma koopanganidzira mai ake no e pa nyumba pake zvese zvainga zvaitika. 29 Rabheka wainga ano hama yake yaizwi Rabhani. Uye Rabhani wakagogoma ecienda ku cimbo kainga kuno mwanarumewo. 30 Iyena paakaona hama yake ino mhete dzo pa miro uye mapurusera aainga akapfeka uye paakazwa zvecirekethwa na Rabheka yaya ake kuti: “Mwanarumewo wandibvunza izvi na izvi,” Rabhani wakaenda koosongana no mwanarumewo, wainga acakaima no makamero pa cimbo. 31 Rabhani wakati: “Ambai, imwimwi makakomborerhwa na Djehovha. Ngei muri kurumbwa makaima kuno? Inini ndamugadzirirai nyumba no mbuto ye makamero.” 32 Hino mwanarumewo wakapinda mumba, uye makamero ainga akasungwa akasudzunurhwa opaswa uswa no zvokurhya zve zvipfuyo; pedzepo mwanarumewo wakapaswa mvura kuti asuke tsoka dzake no dzo anhu amweni aainga anawo. 33 Asi paakapaswa zvekurhya, iyena wakati: “Andizorhyi dakara ndareketa zvandahambira.” Ngokudaro, Rabhani wakati: “Reketa hako!”

34 Hino iyena wakati: “Ndiri museenzi wa Abrahamu. 35 Uye Djehovha ari kukomborera maningi tenzi wangu, uye akaita kuti apfume maningi, ngokuti akamupasa mabira no n’ombe, prata no oro, aseenzi e anarume no aseenzi e anakadzi, uye makamero no madhongi. 36 Uyezve, Sara mukadzi wa tenzi wangu wakabarira tenzi wangu mwana paainga acembera, uye tenzi wangu acamupasa zvese zvaanazvo. 37 Ngokudaro, tenzi wangu wakandiitisa mhiko, eciti: ‘Usawakire mwana wangu mukadzi pakati pe asikana e Akanani, mu nyika ino yandiri kurarama. 38 Pane kudaro, enda ku nyumba ya baba angu no ku anyaukama angu, utorere ikona mukadzi we mwana wangu.’ 39 Asi ndakabvunzisa tenzi wangu kuti: ‘Ndinozoitei kana mwanakadziwo akaramba kuuya na inini?’ 40 Iyena wakati: ‘Djehovha, uya wandinohamba pamberi pake, anozotuma ngirozi yake kuti ikutungamirire, uye acaita kuti rhwendo rako ribudirire. Unodikana kutorera mwana wangu mukadzi pakati pe anyaukama angu uye pa nyumba ya baba angu. 41 Iwewe ucasudzunurhwa pa mhiko yawakandiitira kana ukaenda ku anyaukama angu uye awona otama kukupasa mwanakadziwo. Ngokudaro, iwewe unozosudzunurhwa pa mhiko yako.’

42 “Pandaguma pa cimbo nyamasi, inini ndati: ‘Djehovha, Mwari wa tenzi wangu Abrahamu, kana kuri kuda kenyu itai kuti rhwendo rangu ribudirire, 43 ngazviitike kudai: Ndakaima pano pa cimbo; kana pakauya musikana koocera mvura, uye inini ndoti: “Ndapota, ndiri kukumbirawo mvura iri mu jaro yako padoko,” 44 uye iyena wondidaira kuti: “Imwai, uye ndicacererawo mvura makamero enyu.” Mwanakadzi iyena ngaagare mukadzi wakasanangurhwa na Djehovha ku mwana wa tenzi wangu.’

45 “Ndisati ndapedza kureketa mu mwoyo mangu, Rabheka wakauya wakathwara jaro yake pa phewa; iyena wakauya pa cimbo uye wakatanga kucera mvura. Hino inini ndakamuti: ‘Ndapota, ndipasewo mvura kuti ndimwe.’ 46 Nokukasika, iyena wakathura jaro yake uye wakati: ‘Imwai, uye ndicapasawo makamero mvura.’ Inini ndakamwa uye iyena wakapasawo makamero mvura. 47 Mumasure mazvo, inini ndakamubvunzisa kuti: ‘Iwewe uri mwana waani?’ iyena wakadaira kuti: ‘Ndiri mwana wa Bhetueri; baba angu ndi mwana wa Mirka na Naori.’ Ngokudaro, ndakamukanda mhete pa miro yake uye mapurusera mu moko dzake.* 48 Inini ndakagodama, ndohwarara pamberi pa Djehovha uye ndakakudza Djehovha Mwari wa tenzi wangu Abrahamu, uya ainga anditungamirira mu gwanza rakanaka, kuitira kuti nditore mwana we hama ya tenzi wangu kuti agare mukadzi we mwana wake. 49 Hino ndibvunzei kana mecida kupangidzira rudo rakagondeka uye kutendeka kuna tenzi wangu; asi kana musikadi, ndibvunzei kuti ndiziye zve kuita.”*

50 Hino Rabhani na Bhetueri akadaira eciti: “Izvi zviri kubva kuna Djehovha. Isusu atingakwanisi kuzvitendera kana kuzvirambira.* 51 Rabheka wakhona ndiyena uu uri pamberi pako. Mutore uye enda naye, kuti iyena agare mukadzi we mwana wa tenzi wako, hinga zvabhuiwa na Djehovha.” 52 Museenzi wa Abrahamu paakazwa masoko awo, iyena wakahwarara nokukasika pamberi pa Djehovha. 53 Uye museenziwo wakatanga kubvisa zviro zve prata, zve oro no macira uye wakazvipasa Rabheka, uye wakapasawo zviro zvinokosha mukoma ake uye mai ake. 54 Mumasure mazvo, iyena pamwepo no anarume aainga anawo akarhya, akamwa, uye akawatirepo usiku uwona.

Paakamuka comacibesi-besi, wakati: “Ndisiyei ndihwirire kuna tenzi wangu.” 55 Paakabhuya izvi, mukoma ake uye na mai ake akati: “Siyai kuti musikana agare na isusu ke mazuwa gumi basi. Mumasure mazvo, angaenda hake.” 56 Asi iyena akati kaari: “Musandinonotse, ngokuti Djehovha aita kuti rhwendo rangu ribudirire. Ndisiyei ndiende, kuti ndihwirire kuna tenzi wangu.” 57 Hino akati kaari: “Ngatidainze musikanewo kuti tizwe naye.” 58 Akadainza Rabheka uye akamubvunzisa kuti: “Unoda here kuenda no mwanarume uu?” Iyena wakadaira kuti: “Ndakagadzirira kuenda.”

59 Ngokudaro, awona akasiya Rabheka hama yawo yecienda no museenzikadzi wake* uye no museenzi wa Abrahamu pamwepo no anarume aainga anawo. 60 Awona akakomborera Rabheka uye akati kaari: “Iwewe hama yedu, gara zviuru zve makumi e zviuru* uye ana ako* ngaagare aridzi e misuwo mikuru* ye azondi awo.” 61 Pedzepo Rabheka pamwepo no aseenzikadzi ake akagadzirira, akapakira makamero, uye akateera mwanarumewo. Ngokudaro, museenzi wa Abrahamu wakatora Rabheka woenda naye.

62 Hino Izaki wainga ecibva nge ku Bheeri-raai-roi, ngokuti iyena waigara ku nyika ye Negebhe. 63 Izaki wainga ecibva koohamba-hamba mu shango pa nguwa ye kainga koodoka, kuitira kuti anyase kurangarira. Paakaringira mberi, wakaona makamero eciuya! 64 Uye Rabheka paakaringira mberi, wakaona Izaki, uye wakacita pa kamero nokukasika. 65 Hino iyena wakabvunzisa museenziwo kuti: “Ndiani mwanarume uwo ari kuuya mberi kedu kuti asongane na isusu?” Museenziwo wakamudaira kuti: “Ndi tenzi wangu.” Hino iyena wakabata djira rake re musoro odzifukidza ku hope. 66 Uye museenziwo wakabvunza Izaki zvese zvaainga aita. 67 Mumasure mazvo, Izaki wakamutora woenda naye mu tenda ra Sara, mai ake. Wakatora Rabheka kuti agare mukadzi wake; uye Izaki wakamuda maningi, uye wakagumira nyaradzo mumasure me kufirhwa na mai ake.

25 Hino Abrahamu wakazowakazve mukadzi umweni waizwi Ketura. 2 Nokuhamba ke nguwa, Ketura wakabara Zimirani, Jokisani, Medhani, Midhiyani, Ishibhaki, uye Suwaa.

3 Jokisani wakabara Sebha na Dhedhani.

Dhedhani wakabara Asurimu, Retusimu, na Reumimu.

4 Midhiyani wakabara Efaa, Eferi, Anoki, Abhidha, na Eridhaa.

Ese aya ainga ari ana a Ketura.

5 Mumasure mazvo, Abrahamu wakazopasa Izaki zviro zvese zvaainga anazvo, 6 asi Abrahamu wakapasa zvipo ana ake aakabara no akadzi ake o pa dii. Asi paainga aciri mupenyu, wakaaendesa Kumabvazuwa, kure na Izaki mwana wake, kuti awona araramire ikona. 7 Abrahamu wakararama makore anokwana 175. 8 Hino Abrahamu wakafa acembera maningi, agutsikana, uye wakakotswa hinga makotserhwe aiizwa anhu e kumba kake. 9 Ana ake, Izaki na Ismaeri akamukotsa mu bako ro Makipera, mu munda wa Efroni, mwana wa Zoari Muhiti, wakaringisana no Mamere, 10 munda wakatenga Abrahamu no ana a Hiti. Imona ndimo makakotserhwa Abrahamu, pamwepo no mukadzi wake Sara. 11 Mumasure me kufa ka Abrahamu, Mwari akarumbwa ecikomborera Izaki mwana wa Abrahamu, uye Izaki waigara padhuze no Bheeri-raai-roi.

12 Ii ndiyo ngano inoreketa ngezve upenyu wa Ismaeri, mwana wa Abrahamu, waakabarirhwa na Agari Muedjipitu, museenzikadzi wa Sara.

13 Aya ndiwo mazina e ana a Ismaeri, akatarhwa maererano no madzinza awo: Nebhayoti dangwe ra Ismaeri, wozoteera Kedhari, Abdheeri, Mibhisamu, 14 Misima, Dhuma, Masa, 15 Adhadhi, Tema, Jeturi, Nafisi, uye na Kedhema. 16 Aya ndiwo ana a Ismaeri, uye aya ndiwo mazina awo maererano no nyumba dzawo uye maererano no misasa yawo,* atungamiriri 12 maererano no madzinza awo. 17 Uye Ismaeri wakararama makore 137. Iyena wakafa, uye wakakotswa hinga makotserhwe aiizwa anhu e kumba kake. 18 Ana ake akagara ku nharaunda inotangira ku Avhira, dhuze no Suri, iri padhuze no Edjipitu, dakara ku Asiriya. Iyena wakagara dhuze no hama dzake dzese.*

19 Ii ndiyo ngano inoreketa ngezve upenyu wa Izaki, mwana wa Abrahamu.

Abrahamu wakabara Izaki. 20 Izaki wainga waano makore 40 paakawaka Rabheka, mwana wa Bhetueri, Muarami we ku Padhani-arami, hama ya Rabhani Muarami. 21 Izaki waiita munamato we kudeketera kuna Djehovha nge ndaa ye mukadzi wake, ngokuti iyena wainga asikabari; ngokudaro, Djehovha akadaira munamato wake we kudeketera, uye Rabheka mukadzi wake wakabata pamwiri. 22 Uye ana ainga ari mu ndani make akatanga kurhwisana, zvekuti iyena wakati: “Kana zviri izvona zvazvinoita, zvinobetserei kurumbwa ndecirarama?” Hino iyena wakabvunzisa Djehovha nge zvazvo. 23 Uye Djehovha akamudaira kuti: “Muno madzinza mairi mu ndani mako, uye madzinza mairi acabuda mu ndani mako acaparadzana; dzinza rimwe ricagara rino simba maningi kudarika rimweni, uye mukuru ucaseenzera mudoko.”

24 Payakaguma nguwa yekuti abare, ndipona paakaona kuti zvezvirokwazvo wainga ano manyambiri mu ndani make. 25 Wekutanga wakabuda wakapsvuka mwiri wese uye wainga wakaita hinga djira rino ukuse, ndiyo ndaa wakamududza zina rokuti Izau.* 26 Mumasure mazvo, hama yake yakabuda uye nyara yake yainga yakabatirira cisisino ca Izau, ndiyo ndaa wakamududza kuti Djakobo.* Izaki wainga waano makore 60 Rabheka paakaabara.

27 Anewo akakura, uye Izau wakagara muvhimi ano uzii, mwanarume waipfarira mushango, asi Djakobo wainga ari mwanarume asina caanopumhwa waigara mu matenda. 28 Izaki waida Izau ngokuti waimuvhimira nyama, asi Rabheka waida Djakobo. 29 Zuwa rimweni Djakobo wainga ecibika zvokurhya pakaguma Izau ecibva mushango, iyena wainga wakaremba maningi. 30 Hino Izau wakati kuna Djakobo: “Kasika, ndapota, ndipasewo padoko zvokurhya zvako zvakapsvukirira* zvaunazvo, ndafa ngo nzara!”* Ndiyo ndaa wakazopaswa zina rokuti Edhomi.* 31 Hino Djakobo wakati: “Tanga wanditengesera citenderhwa cako ce udangwe!” 32 Izau wakaenderera mberi eciti: “Ndaakuda kufa! Citenderhwa ce udangwe cinobetserei kandiri?” 33 Djakobo wakatunhudzira kuti: “Tanga wapika!” Uye iyena wakapika uye wakatengesera Djakobo citenderhwa cake ce udangwe. 34 Hino Djakobo wakapasa Izau pau no nyemba, uye iyena wakarhya, wakamwa, pedzepo wakamuka woenda. Nge kuita izvona, Izau aazi kureremedza citenderhwa cake ce udangwe.

26 Mu nyika iyona makaitika nzara, kusiya nzara iya yakaitika mu mazuwa a Abrahamu, zvekuti Izaki wakaenda kuna Abhimereki, mambo we Afiristiya ku Gerari. 2 Hino Djehovha akadzipangidza kaari uye akati: “Usaende ku Edjipitu. Gara mu nyika yandicakupangidza. 3 Gara mu nyika ino hinga munhu we nyika imweni, uye inini ndicarumbwa ndinewe, ndicakukomborera, ngokuti ndicapasa nyika dzese idzi iwewe no mwana* wako, uye ndicadzadzisa mhiko yandakaita kuna Abrahamu baba ako, yokuti: 4 ‘Ndicaita kuti ana* ako awande hinga nyeredzi dze kudenga; uye ndicapasa nyika dzese idzi mwana* wako, madzinza ese e pa nyika acakomborerhwa nge ndaa ye mwana* wako,’ 5 ngokuti Abrahamu wakapurutana izwi rangu, wakarumbwa eciita zvandinoda, eciteerera nhungamiriro dzangu, mipango dzangu, uye mitemo dzangu.” 6 Ngokudaro, Izaki wakarumbwa ecigara ku Gerari.

7 Anarume e mbuto iyona paakamubvunzisa ngezve mukadzi wake, iyena wakadaira eciti: “I hama yangu.” Iyena waithya kubhuya kuti: “Ndi mukadzi wangu,” ngokuti wairangarira kuti: “Anarume e mbuto ii anozondiuraya nge ndaa ya Rabheka,” ngokuti wainga akarungama maningi. 8 Mumasure me kanguwa, Abhimereki mambo we Afiristiya paakaringira nge pa janera, wakaona Izaki ecipangidzira rudo* kuna Rabheka, mukadzi wake. 9 Abhimereki wakadainza Izaki nokukasika uye wakati: “Zvezvirokwazvo, uu ndi mukadzi wako! Hino ngei iwewe wabhuya kuti: ‘I hama yangu’?” Izaki wakamudaira kuti: “Inini ndabhuya izvona kuti ndisauraiwe nge ndaa yake.” 10 Asi Abhimereki wakaenderera mberi eciti: “Zvinyi zvawatiitira? Izvi zvaizoita kuti umwe wedu awate no mukadzi wako, uye izvona zvaizotiunzisira matambudziko!” 11 Hino Abhimereki wakabvunza anhu ese kuti: “Munhu unobata mwanarume uu uye mukadzi wake, zvezvirokwazvo ucauraiwa!”

12 Izaki wakatanga kusima mbeu mu nyika iyona, uye mu gore irona wakakorora zvakapethwa ka 100 pa zviya zvaainga asima, ngokuti Djehovha aimukomborera. 13 Izaki wakagara mupfumi, uye iyena wakarumbwa ecibudirira dakara pa kugara munhu wakapfuma maningi. 14 Iyena wakagara no mabira, no n’ombe dzakawanda uye no cikwata cikuru ce aseenzi, uye Afiristiya akatanga kumuzonda.

15 Ngokudaro, Afiristiya akafushira zvimbo zvainga zvacerhwa no aseenzi a baba ake, mu nguwa ya Abrahamu. 16 Abhimereki wakabvunza Izaki kuti: “Buda mu nharaunda yedu, ngokuti wagara no simba rakakura maningi kudarika isusu.” 17 Ngokudaro, Izaki wakafuruka imona uye wakawaka musasa wake mu bani ro Gerari, uye wakatanga kugara imona. 18 Izaki wakaceresazve zvimbo zvainga zvakacerehwa mu mazuwa a Abrahamu baba ake, asi zvainga zvafushirhwa no Afiristiya mumasure me kufa ka Abrahamu, uye iyena akazvipasazve mazina ainga apaswa na baba ake.

19 Aseenzi a Izaki paaicera mu bani, akaona cimbo caibuda mvura yakanaka. 20 Asi aushi a Gerari akatanga kureketedzana no aushi a Izaki, eciti: “Mvura ii nge yedu!” Ngokudaro, Izaki wakapasa cimboco zina rokuti Ezeki,* ngokuti awona ainga areketedzana na Izaki. 21 Pedzepo akacerazve cimbo cimweni, uye awona akatangazve kureketedzana nge ndaa yaco. Hino wakacipasa zina rokuti Sitina. 22 Nokuhamba ke nguwa, akafuruka imona uye akacerazve cimbo cimweni, asi awona aazi kureketedzana naye nge ndaa yaco. Ndiyo ndaa, wakacipasa zina rokuti Reobhoti uye wakati: “Nge ndaa yekuti zvino Djehovha atipasa mbuto yakakura uye atiita kuti tiwande mu nyika ino.”

23 Hino wakabuda imona woenda koogara ku Bheeri-sebha. 24 Pa usiku uwona, Djehovha akadzipangidza kaari uye akati: “Inini ndiri Mwari wa Abrahamu baba ako. Usathye, ngokuti ndinewe, ndicakukomborera, uye ndicaita kuti mwana wako agare dzinza rakakura nge ndaa ya Abrahamu, museenzi wangu.” 25 Ngokudaro, iyena wakagadzira artari ipona uye wakadainza zina ra Djehovha. Uye Izaki wakawaka tenda rake ipona, uye aseenzi ake akacerazve cimbo ipona.

26 Nokuhamba ke nguwa, Abhimereki wakaenda kaari ecibva ku Gerari pamwepo na Auzata cipangamazano wake, uye na Fikori mukuru we anyahondo ake. 27 Hino Izaki wakaabvunzisa kuti: “Ngei mauya kandiri, andimwipi maindizonda uye makandigogomera mu mutanha menyu here?” 28 Awona akamudaira kuti: “Tanyasa kuona pamhene kuti Djehovha anewe. Ndiyo ndaa takati: ‘Ngatiite mhiko pakati pedu na iwewe, uye titendere kuti tiite citenderano na iwewe cekuti: 29 Auzotiitiri zvakashata hingana isusu tisikazi kukuitirawo zvakashata, ngokuti takakuitira basi zvakanaka, nge kuita kuti ubude mu runyararo. Parizvino iwewe uri munhu wakakomborerhwa na Djehovha.’” 30 Hino iyena wakaaitira mabiko; awona akarhya uye akamwa. 31 Pa zuwa rakazoteera, akamuka comacibesi-besi uye akaitirana mhiko. Mumasure mazvo, Izaki wakaaeneka, uye awona akaenda mu runyaro.

32 Pa zuwa irona, aseenzi a Izaki akaenda koomubvunza ngezve cimbo caainga acera, uye akati: “Taona mvura!” 33 Ngokudaro, iyena wakapasa cimbo icona zina rokuti Sibha. Ndiyo ndaa thaundiro rinozwi Bheeri-sebha dakara nyamasi uno.

34 Izau paainga aano makore 40, wakawaka akadzi airi; umwe waizwi Judhiti, mwana wa Bheeri, Muhiti, uye umweni waizwi Bhazemati, mwana wa Eroni, Muhiti. 35 Awona airhwadzisa maningi mwoyo wa Izaki na Rabheka.

27 Izaki paainga acembera uye madziso ake paainga asikacanyasi kuona zvakanaka, wakadainza Izau, mwana wake we dangwe, uye wakati kaari: “Mwana wangu!” Iyena wakadaira kuti: “Ndiri pano!” 2 Izaki wakati: “Inini ndacembera. Andizii zuwa randicafa. 3 Hino ndapota, tora mipasha yako no uta, uende mushango koondivhimira nyama. 4 Kana ukauya zviya, ndibikire hinga mushobo wandinopfarira, wondiunzisira kuno. Ngokudaro ndinozoirhya, pedzepo ndinozokukomborera* ndisati ndafa.”

5 Asi Rabheka wainga ecipurutana Izaki paaireketa no mwana wake Izau. Izau paakaenda mushango koovhima kuti auye no nyama, 6 Rabheka wakabvunza Djakobo mwana wake kuti: “Ndazwa baba ako ecibvunza Izau, mukoma ako kuti: 7 ‘Ndiunzisire nyama, unyase kuibika zvakanaka hinga mushobo wandinopfarira. Pedzepo ndinozoirhya uye ndinozokukomborera pamberi pa Djehovha ndisati ndafa.’ 8 Parizvino mwana wangu, nyasa kupurutana uye ita zvandicakubvunza. 9 Ndapota, enda ku zvipfuyo unditorere mbudzi mbiri doko dzakanaka kuti ndinyase kudzibikira zvakanaka baba ako, hinga mushobo waanopfarira. 10 Pedzepo woenda koopasa baba ako kuti arhye, kuti akukomborere asati afa.”

11 Djakobo wakabvunza Rabheka mai ake, kuti: “Izau ndi munhu uno ukuse wakawanda, asi inini andina ukuse. 12 Uye kana baba angu akabata-bata mwiri wangu ke? Zvicaita hingana kuti ndiri kuaungwisa, uye izvona zvicaita kuti nditukwe pane kukomborerhwa.” 13 Mai ake akamudaira kuti: “Kutukwa ikona kaizouya kauri, ngakuuye kandiri mwana wangu. Ita basi zvandiri kukubvunza, enda udziunzise kuno.” 14 Ngokudaro, iyena wakaenda koodzitora uye wakadzipasa mai ake, uye mai ake akanyasa kudzibika zvakanaka, hinga mushobo unopfarira baba ake. 15 Mumasure mazvo, Rabheka wakatora macira akanakisisa maningi e mwana wake we dangwe, Izau, ainga ari mumba, uye wosimidza mwana wake mudoko, Djakobo. 16 Iyena wakakandawo dehwe re mbudzi dziya mu moko dzake no mu mutsipa make mainga musina ukuse. 17 Iyena wakapasa Djakobo, mwana wake, nyama yakanyasa kubikwa zvakanaka uye pau yaainga abika.

18 Hino Djakobo wakapinda mainga muna baba ake uye wakati: “Baba!” Uye Izaki wakati: “Ndiri pano! Ndiwe ani, mwana wangu?” 19 Djakobo wakadaira baba ake kuti: “Ndini Izau, dangwe renyu. Ndaita kamare zvamandibvunza kuti ndiite. Ndapota, mukai mugare, kuti murhye nyama yandauya nayo kuti mundikomborere.”* 20 Ngokudaro, Izaki wakabvunzisa mwana wake kuti: “Waita kudini kuti uione nokukasika, mwana wangu?” Iyena wakadaira kuti: “Djehovha, Mwari wenyu, ndiye andibetsera kuti ndiione nokukasika.” 21 Pedzepo Izaki wakabvunza Djakobo kuti: “Ndapota, khwedera kuno kuti ndikubate-bate mwana wangu, kuti ndiziye kuti zvezvirokwazvo uri mwana wangu Izau, kana kuti haiwa.” 22 Hino Djakobo wakakhwedera dhuze na Izaki, baba ake, awona akamubata-bata, pedzepo akati: “Izwi iri ngera Djakobo, asi moko ngo dza Izau.” 23 Asi iyena aazi kumuziya ngokuti moko dzake dzainga dzino ukuse hinga moko dza Izau, mukoma ake. Ngokudaro iyena wakamukomborera.

24 Pedzepo Izaki wakabvunzisa kuti: “Iwewe zvezvirokwazvo ndiwedi kamare mwana wangu Izau?” Iyena wakadaira kuti: “Honde, ndini.” 25 Izaki wakamubvunza kuti: “Unzisa nyama yakhona kuti ndirhye mwana wangu, uye ndicakukomborera.”* Uye Djakobo wakaapasa uye awona akarhya; wakaapasa vhinyu uye awona akamwa. 26 Hino Izaki, baba ake, akamubvunza kuti: “Ndapota, khwedera dhuze mwana wangu, uye ndipsvode.” 27 Iyena wakaakhwederera uye wakaapsvoda, uye baba ake akazwa munuhwi we macira ake. Hino akamukomborera eciti:

“Munuhwi we mwana wangu wakaita hingana munuhwi we munda wakakomborerhwa na Djehovha. 28 Mwari we zvirokwazvo ngaakupase mhute ye kudenga, mataka ano ndimo e pa nyika, zvirimwa zvakawanda, uye vhinyu ipsva. 29 Anhu ngaakuseenzere, uye madzinza ngaakuhwararire. Gara tenzi we hama dzako, uye ana a mai ako ngaakuhwararire. Ngaatukwe munhu wese uya anokutuka, uye ngaakomborerhwe munhu wese uya anokukomborera.”

30 Izaki paakandopedza kukomborera Djakobo, uye Djakobo paakandobuda pamberi pa baba ake, Izau mukoma ake akaguma ecibva koovhima. 31 Iyena wakabikawo zvinonaka ozviendesera baba ake, uye wakati: “Mukai baba, murhye nyama yauya no mwana wenyu, kuti mundikomborere.”* 32 Ngokudaro, Izaki baba ake akati: “Ndiwe ani?” Izau wakadaira kuti: “Ndini mwana wenyu, dangwe renyu Izau.” 33 Uye Izaki wakatanga kutetemera maningi eciti: “Hino ndiani waenda koovhima nyama uye wondiunzisira? Inini ndatoirhya iwewe usati waguma, ndatomukomborera uye iyena zvezvirokwazvo ucagara munhu akakomborerhwa!”

34 Paakazwa masoko a baba ake, Izau wakatanga kukhuwa maningi ecipangidza kurhwadziwa uye wakabvunza baba ake kuti: “Ndikomborerei, ndikomborereiwo, baba angu!” 35 Asi Izaki wakati: “Hama yako yauya uye yandicengedzera kuti itambire makomborero ainga ari ako.” 36 Ngokudaro, Izau wakati: “Ndiyo ndaa zina rake rinozwi Djakobo,* ngokuti iyena wakandicengedzera kairi kese! Pakutanga wakanditorera udangwe wangu, pari zvino wanditorera makomborero angu!” Iyena wakaenderera eciti: “Baba, amuzi kundicengeterawo here makomborero amweni?” 37 Asi Izaki wakadaira Izau kuti: “Inini ndamugadza kuti agare tenzi wako, ndamupasa hama dzake dzese kuti dzigare aseenzi ake, ndamupasa zvirimwa zvakawanda uye no vhinyu ipsva. Pano zvimweni here, mwana wangu, zvandingakuitira?”

38 Izau wakabvunza baba ake kuti: “Baba, amucinazve makomborero amweni kuti mundipasewo? Ndikomborereiwo, ndikomborereiwo baba angu!” Paakareketa izvi, Izau wakatanga kucema no izwi guru. 39 Hino Izaki baba ake akamudaira kuti:

“Ona, ucagara kure no mataka ano ndimo ye pa nyika uye ucagara kure no mhute ye kudenga kumusoro. 40 Uye iwewe unozorarama no supada, uye ucaseenzera hama yako. Asi kana iwewe ukakonerhwa kushingirira,* zvezvirokwazvo unozogurira djoki rake mu mutsipa mako.”

41 Ngokudaro, Izau wakacengetera Djakobo bundu, nge ndaa ye makomborero aakapaswa na baba ake, uye Izau waiti mu mwoyo make: “Mazuwa e kufa ka baba angu aadhuze. Mumasure mazvo ndicazouraya Djakobo hama yangu.” 42 Rabheka paakabvunzwa masoko a Izau, mwana wake we dangwe, nokukasika wakadainzisa Djakobo, mwana wake mudoko, uye wakamubvunza kuti: “Izwa basi, hama yako Izau uri kuda kukuuraya kuti akuhwirinzire zvawakamuitira.* 43 Hino mwana wangu, ita zvandiri kukubvunza. Muka nokukasika utizire kumba ka Rabhani hama yangu, ku Arani. 44 Gara nawo ke cinguwa dakara kutsamwa ka mukoma ako kathurudzika, 45 dakara shungu dza mukoma ako dzathurudzika uye akanganwa zvawakamuitira. Hino inini ndinozokutumira masoko kuti uhwirire. Ndingafirhwadi kamare nemwi mwese muri airi pa zuwa rimwe basi?”

46 Mumasure mazvo, Rabheka wakabvunza Izaki kuti: “Inini ndiri kuzonda upenyu wangu nge ndaa ye ana e anakadzi a Hiti. Kana Djakobo akawaka mukadzi pakati pe ana e anakadzi a Hiti, hinga ana e nyika ino, zviri nani kuti ndife.”

28 Hino Izaki wakadainza Djakobo, wakamukomborera, uye wakamubvunza kuti: “Usawake mukadzi pakati pe ana e anakadzi e Kanani. 2 Enda ku Padhani-arami, kumba ka Bhetueri baba a mai ako, uye waka mukadzi pakati pe ana a Rabhani, mukoma a mai ako. 3 Mwari we Masimba Ese acakukomborera, acakupasa ana, acakuita kuti ugare no ana akawanda, uye iwewe zvezvirokwazvo ucagara ungano ye anhu akawanda. 4 Iyena acapasa makomborero a Abrahamu kauri no mwana* wako, kuitira kuti utore nyika ii yauri kugara hinga munhu we nyika imweni, nyika yakapaswa Abrahamu na Mwari.”

5 Hino Izaki wakaendesa Djakobo, uye iyena wakaenda ku Padhani-arami, kuti aende kumba ka Rabhani mwana wa Bhetueri, Muarami awo ainga ari mukoma a Rabheka, mai a Djakobo na Izau.

6 Izau wakaona kuti Izaki wainga akomborera Djakobo uye wainga amuendesa ku Padhani-arami kuti awake mukadzi ikona, uye kuti paakamukomborera wakamubvunza kuti: “Usawake mukadzi pakati pe ana e anakadzi e Kanani,” 7 wakaonawo kuti Djakobo wakazwira baba ake na mai ake uye wakaenda ku Padhani-arami. 8 Izau wakazwisisawo kuti Izaki baba ake, ainga asikapfariri ana e anakadzi e Kanani; 9 ndiyo ndaa Izau wakaenda koowaka Maarati, muzukuru wa Abrahamu, mwana wa Ismaeri, hama yake Nebhayoti, kuti atunhudzire mukadzi umweni pa akadzi aainga anawo.

10 Djakobo wakabuda ku Bheeri-sebha uye wakaenda ku Harani. 11 Paakaguma pa mbuto imweni, wakagadzirira kuti awate ipona ngokuti zuwa rainga radoka. Hino wakatora buwe rimwe pa mbuto iyona, wakaritsamirira no musoro wake, pedzepo wakawata. 12 Uye iyena wakarota hope: Wakaona sikada yakaima pa nyika, uye yaipsvasa kudenga; ngirozi dza Mwari dzaikwira dzecicita ndiyona. 13 Pamusoro pe sikadeyo painga pana Djehovha, uye iyena akati:

“Inini ndini Djehovha, Mwari wa Abrahamu baba ako uye Mwari wa Izaki. Ndicapasa iwewe no mwana* wako nyika ii yawakawatira. 14 Uye ana* ako zvezvirokwazvo acawanda hinga bukuta re pa nyika, uye acabararika kumabvazuwa no kumadokera, kakutsi no katemaidumba, uye mhuri dzese dze pa nyika dzicakomborerhwa* nge ndaa yako uye nge ndaa ye mwana* wako. 15 Inini ndinewe, ndicakucengeta kwese kaunoenda, uye ndicakuhwirinza mu nyika ino. Andizokusii dakara ndaita zvandakugondesa.”

16 Hino Djakobo wakamuka mu hope uye wakati: “Zvezvirokwazvo Djehovha ari mu mbuto ino, uye inini ndainga ndisikazvizii.” 17 Iyena wakathya, wotunhudzira eciti: “Mbuto ii inothyisa maningi! Ii ingagara basi nyumba ya Mwari, uye uu ndiwona musuwo we kudenga.” 18 Ngokudaro, Djakobo wakamuka comacibesi-besi, wakatora buwe riya raainga akatsamirira, wakariimisa hinga buwe re ciedzuriro, uye wakadururira mafuta pamusoro paro. 19 Hino wakapasa mbuto iyona zina rokuti Bheteri,* asi kareko thaundi irona raizwi Ruzi.

20 Uye Djakobo wakaita mhiko, eciti: “Kana Mwari akarumbwa aneni ondicengetedza pa rhwendo rangu uye ondipasa zvokurhya kuti ndirhye no macira e kupfeka 21 uye ndohwirira mu runyararo kumba ka baba angu, zvezvirokwazvo Djehovha anonga apangidza kuti ndi Mwari wangu. 22 Buwe iri randaimisa hinga ciedzuriro ricagara nyumba ya Mwari, uye inini zvezvirokwazvo ndinozomupasai cegumi ce zviro zvese zvamunozondipasa.”

29 Mumasure mazvo, Djakobo wakaenderera mberi no rhwendo rake uye wakaenda ku nyika ye anhu e Kumabvazuwa.* 2 Hino iyena wakaona cimbo mu shango uye no zvikwata zvitatu zve mabira zviri padhuze no cimbo icona, ngokuti pacimboco paiuya koopaswa* mvura zvipfuyo. Cimboco caifungwa no buwe rakakura. 3 Zvipfuyo zvese pazvaiunganidzwa ipona, aushi aibvisa buwe pa cimboco, uye aipasa mvura zvipfuyo; mumasure mazvo, aihwirinzazve buwero pa cimboco.

4 Djakobo wakaabvunzisa kuti: “Hama dzangu, muri kubva kupi?” Awona akamudaira kuti: “Tiri kubva ku Harani.” 5 Iyena wakaabvunzisa kuti: “Munomuziya Rabhani, muzukuru wa Naori?” Awona akamudaira kuti: “Tinomuziya.” 6 Ngokudaro, iyena wakaabvunzisazve kuti: “Iyena unotamba here?” Awona akamudaira kuti: “Unotamba. Uye mwana wake we mwanakadzi Rakeri, ndiye uwo uri kuuya no mabira!” 7 Hino iyena wakati kaari: “Aciri masikati. Ii ainguwapi ye kuunganidza zvipfuyo. Pasai mabira mvura, uye pedzepo hwiriraizve koausha.” 8 Nge ndaa yazvo, awona akati: “Atitenderhwi kuita izvona dakara zvikwata zvese zve zvipfuyo zvaunganidzwa pamwepo, tozobvisa buwe pa cimbo. Ndipona patinozopasa mvura mabira.”

9 Paainga aciri kureketa nawo, Rakeri wakaguma no mabira a baba ake, ngokuti iyena wainga ari muushi. 10 Djakobo paakaona Rakeri mwana wa Rabhani, hama ya mai ake, uye mabira a Rabhani, nokukasika iyena wakakhwedera, wobvisa buwe rainga riri pa cimbo, uye wakapasa mvura mabira a Rabhani, hama ya mai ake. 11 Hino Djakobo wakapsvoda Rakeri uye wakatanga kucema no izwi guru. 12 Djakobo wakabvunza Rakeri kuti iyena wainga ari nyaukama* wa baba ake uye mwana wa Rabheka. Rakeri wakagogoma koobvunza baba ake.

13 Rabhani paakazwa masoko ngezva Djakobo mwana wa yaya ake, wakagogoma koosongana naye. Iyena wakamukhumbatira, womupsvoda uye wakamutora woenda naye kumba kake. Uye Djakobo wakapanganidzira Rabhani zvese zvainga zvaitika kaari. 14 Rabhani wakati kaari: “Zvezvirokwazvo, isusu tiri e ngazi imweyo.”* Ngokudaro, Djakobo wakagara naye ke mwedzi wese.

15 Hino Rabhani wakati kuna Djakobo: “Audikani kundiseenzera nyore nge ndaa yekuti uri nyaukama* wangu. Ndibvunze, unoda kuti ndikutambirise marei?” 16 Rabhani wainga uno ana airi e anakadzi. Mukuru waizwi Reiya, uye mudoko waizwi Rakeri. 17 Reiya wainga ano madziso asikanyetukiri, asi Rakeri wainga ano ciimo cakanaka uye wakarungama maningi. 18 Djakobo wainga apfarira maningi Rakeri, zvekuti wakati: “Ndakagadzirira kumuseenzerai ke makore manomwe kuti mundipase Rakeri, mwana wenyu mudoko.” 19 Hino Rabhani wakati: “Zviri nani kandiri kuti ndipase iwewe pane kupasa mwanarume umweni. Rumbwa wecigara na inini.” 20 Djakobo wakaseenza ke makore manomwe kuti apaswe Rakeri, asi makore aya waiaona hingana mazuwa manganani, ngokuti waimuda maningi.

21 Pedzepo Djakobo wakati kuna Rabhani: “Ndipasei mukadzi wangu kuti ndiwate naye, ngokuti makore manomwe apera.” 22 Ngokudaro, Rabhani wakaunganidza anarume ese e mu mbuto iyona uye wakaita mabiko. 23 Asi cousiku, wakatora Reiya, mwana wake we mwanakadzi uye wakamupasa Djakobo kuti awate naye. 24 Uyewo Rabhani wakatora museenzikadzi wake Zirpa, wakamupasa Reiya, mwana wake we mwanakadzi kuti agare museenzikadzi wake. 25 Comacibesi, Djakobo wakaona kuti wainga ari Reiya! Hino iyena wakati kuna Rabhani: “Zvinyi zvamandiitira? Andizi kumuseenzerai kuti mundipase Rakeri here? Ngei mandicengedza?” 26 Rabhani wakadaira kuti: “Kuno, azvitenderhwi kuwakisa mwana we mwanakadzi mudoko dangwe risati rawakwa. 27 Pfara no mukadzi uu ke sumana ino yese. Mumasure mazvo ucatambirazve mukadzi umweni, asi ucadikanazve kundiseenzera makore manomwe.” 28 Djakobo wakaita izvona kamare uye wakapfara ke sumana yese no mukadzi uu, mumasure mazvo Rabhani wakazomupasa Rakeri, mwana wake we mwanakadzi, kuti agare mukadzi wake. 29 Uyewo, Rabhani wakatora museenzikadzi wake Bhira womupasa Rakeri, mwana wake we mwanakadzi kuti agare museenzikadzi wake.

30 Hino Djakobo wakawatawo na Rakeri; iyena waida maningi Rakeri kupinda Reiya, uye wakaseenzerazve Rabhani ke makore amweni manomwe. 31 Djehovha paakaona kuti Reiya wainga asikadiwi,* akaita kuti iyena abate pamwiri,* asi Rakeri wainga asikabari. 32 Ngokudaro, Reiya wakabata pamwiri uye wakabara mwana we mwanarume, wakamududza zina rokuti Rubheni,* ngokuti iyena wakati: “Izvi zvaitika ngokuti Djehovha aona kutambudzika kangu, ngokuti kubvira zvino mwamuna wangu ucatanga kundida.” 33 Iyena wakabatazve pamwiri uye wakabara mwana we mwanarume; iyena wakati: “Izvi zvaitika, ngokuti Djehovha andipurutana, sezvo inini ndainga ndisikadiwi; hino wandipasazve uu.” Ndiyo ndaa wakamududza zina rokuti Simiyoni.* 34 Uye iyena wakabatazve pamwiri uye wakabara mwana we mwanarume; iyena wakati: “Parizvino, mwamuna wangu ucabatana na inini, ngokuti ndamubarira ana atatu.” Ngokudaro, iyena wakamududza zina rokuti Revhi.* 35 Uye wakabatazve pamwiri uye wakabara mwana we mwanarume; iyena wakati: “Parizvino, ndicakudza Djehovha.” Ngokudaro, wakamududza zina rokuti Djudha.* Mumasure mazvo, iyena wakaima kubara.

30 Rakeri paakaona kuti wainga asikazi kubarira Djakobo ana, wakaitira shanje yaya ake uye wakatanga kubvunza Djakobo kuti: “Ndipasewo ana, kana ukatama kudaro ndicafa.” 2 Ngokudaro, Djakobo wakanyangadzwira maningi Rakeri, uye wakati kaari: “Kodi ndiri Mwari here akuita kuti usagare no ana?” 3 Hino iyena wakati: “Uri pano museenzikadzi wangu Bhira. Wata naye, kuti iyena andibarire ana;* nge ndaa yake ndicagarawo no ana.” 4 Ngokudaro, iyena wakamupasa museenzikadzi wake Bira hinga mukadzi, uye Djakobo wakawata naye. 5 Bhira wakabata pamwiri uye wakabarira mwana Djakobo. 6 Pedzepo Rakeri wakati: “Mwari agara mutongi wangu uye apurutana izwi rangu, zvekuti andipasa mwana.” Ndiyo ndaa, wakamududza zina rokuti Dhani.* 7 Bhira, museenzikadzi wa Rakeri, wakabatazve pamwiri uye wakabarira Djakobo mwana wecipiri. 8 Hino Rakeri wakati: “Inini ndarhwa hondo huru na yaya angu uye ndawina!” Ngokudaro wakamududza zina rokuti Nafitari.*

9 Reiya paakaona kuti wainga asikacabari, wakatora Zirpa museenzikadzi wake uye wakamupasa Djakobo hinga mukadzi. 10 Uye Zirpa, museenzikadzi wa Reiya wakabarira Djakobo mwana. 11 Hino Reiya wakati: “Makorokoto!” Ngokudaro, wakamududza zina rokuti Gadhi.* 12 Mumasure mazvo, Zirpa museenzikadzi wa Reiya, wakabarira Djakobo mwana wecipiri. 13 Reiya wakati: “Ndiri kupfara maningi! Zvezvirokwazvo, anakadzi* acanditi ndiri munhu unopfara.” Zvekuti wakamududza zina rokuti Azeri.*

14 Mumazuwa e kuunganidzwa ke trigu, Rubheni wainga ecihamba mu shango paakaona mandragora. Wakaatora woenda koopasa Reiya mai ake. Ngokudaro, Rakeri wakati kuna Reiya: “Ndapota, ndipasewo mandragora e mwana wako.” 15 Asi Reiya wakamudaira kuti: “Kunditorera kawaita mwamuna wangu, azvizi kukwana here? Parizvino waakuda kutorawo mandragora e mwana wangu?” Rakeri wakati: “Zvakanaka, kana ukandipasa mandragora e mwana wako, iyena ucawata na iwewe usiku uno.”

16 Djakobo paainga ecibuda ku munda cemadekoni, Reiya wakagogoma koosongana naye uye wakati kaari: “Nyamasi ucawata na inini, ngokuti ndatenga citenderhwa icona no mandragora e mwana wangu.” Ngokudaro Djakobo wakawata naye usiku uwona. 17 Mwari akazwa, uye akadaira Reiya: Iyena wakabata pamwiri uye wakabarira Djakobo mwana wecishanu. 18 Hino Reiya wakati: “Mwari andipasa mubairo, ngokuti ndapasa mwamuna wangu museenzikadzi wangu.” Ngokudaro, wakamududza zina rokuti Isakari.* 19 Reiya wakabatazve pamwiri uye wakabarira Djakobo mwana wecitanhatu. 20 Pedzepo Reiya wakati: “Mwari andipasa cipo, zvezvirokwazvo andipasa cipo cakanaka. Parizvino, mwamuna wangu ucandidawo maningi, ngokuti ndamupasa ana atanhatu.” Ngokudaro, wakamududza zina rokuti Zebhuroni.* 21 Mumasure mazvo, iyena wakabara mwana we mwanakadzi uye wakamududza zina rokuti Dhinaa.

22 Pakupedzesera, Mwari akaedzurira Rakeri; Mwari akazwa munamato wake uye akamudaira oita kuti iyena abate pamwiri.* 23 Iyena wakabata pamwiri uye wakabara mwana we mwanarume. Pedzepo wakati: “Mwari abvisa kupsverudzwa kangu!” 24 Ngokudaro, wakamududza zina rokuti Zuzee, eciti: “Djehovha anditunhudzira mwana umweni.”

25 Mumasure mekuti Rakeri wabara Zuzee,* Djakobo wakati kuna Rabhani: “Ndisiyei ndiende kuti ndihwirire kumba kangu uye ku nyika yangu. 26 Ndipasei akadzi angu uye no ana angu, andakaseenzera kuti ndiende, ngokuti imwimwi munonyasa kuziya mushobo wandakamuseenzerai.” 27 Hino Rabhani wakati kaari: “Kana ndazwirhwa usisi pamberi pako, ndapota gara na inini, gokuti zviri kuitika zvinonyasa kupangidza* kuti Djehovha ari kundikomborera nge ndaa yako.” 28 Uye wakatunhudzira eciti: “Ndibvunze kuti unoda kutambira mutengoi,* kuti ndikupase.” 29 Hino Djakobo wakati: “Imwimwi munonyasa kuziya mushobo wandakamuseenzerai uye kuti zvipfuyo zvenyu zvakawanda kudini pandakatanga kumuseenzerai; 30 zvipfuyo zvenyu zvainga zviri padoko pandainga ndisati ndauya, asi pari zvino zvipfuyo zvenyu zvatunhudzirika uye zvawanda, uye Djehovha ari kumukomborerai kubvira pandakaguma. Hino ndinozoseenzerawo rini mhuri yangu?”

31 Iyena wakamubvunzisa kuti: “Ndinodikana kukupasei?” Djakobo wakamudaira kuti: “Amudikani kundipasa ciro! Ndicahwirirazve koousha mabira enyu no kuacengeta, kana imwimwi mukandiitira izvi: 32 Ndicapinda nyamasi pakati pe zvipfuyo zvenyu. Kandai pa dii mabira enyu ese ano maara-maara no makhamba-makhamba uye mabira enyu ese madoko akapsvukirira no akasvipirira, uye no mbudzi dzese dzino maara-maara no makhamba-makhamba. Kubvira zvino kuenda mberi, izvi ndizvona zvicagara muripo wangu. 33 Unatsi wangu ucanyasa* kuoneka pa zuwa ramucauya koona muripo wangu; kana mukaona mbudzi ipi hayo isina maara-maara kana kuti makhamba-makhamba uye bira ripi haro doko risikazi kupsvukirira no kusvipirira, ziyai kuti ndinonga ndaba.”

34 Nge ndaa yazvo, Rabhani wakati: “Izvi zvakanaka! Ngazviitike maererano no zvawabhuya.” 35 Pa zuwa irona, Rabhani wakakanda pamuceto makoto-koto ese ainga ano maara-maara no mbudzi dzokadzi dzese dzainga dzino makhamba-makhamba no mabira ese madoko ainga ano ciwara cakacena no ainga akapsvukirira no kusvipirira, akazvipasa ana ake kuti azvionerere. 36 Mumasure mazvo, Rabhani wakaendesa zvipfuyo kure ke mukuwo unohambwa mazuwa matatu no painga pano Djakobo. Asi Djakobo wakarumbwa eciusha zvipfuyo zva Rabhani.

37 Djakobo wakatema zvimuti zvidoko zve muastoreki, muamendowa, no zve mupurani; iyena wakabvisa zvimapande mu matii amweni e zvimutizvo uye wakaita kuti dii rokucena ro zvimutizvo rioneke. 38 Mumasure mazvo, aikanda zvitimbu zve zvimutizvo zvainga zvabviswa mapande padoko mairhyirhwa no kumwirhwa mvura, kuitira kuti zvipfuyo pazvaiuya koomwa mvura zvigare no cido ce kumemedza pamberi po zvitimbu zve zvimutizvo.

39 Ngokudaro, zvipfuyo zvaimemedzana pamberi po zvitimbu zve zvimuti zvainga zvabviswa mapande, uye zvipfuyo zvaibara zviana zvino mutaro-mutaro, maara-maara uye makhamba-makhamba. 40 Hino Djakobo wakakanda pamuceto mabira madoko ekono uye wakaita kuti zvipfuyo zviringire kainga kuno zvipfuyo zvainga zvino mutaro-mutaro uye no zvese zvakapsvukirira no kusvipirira zvainga zviri pakati pe zvipfuyo zva Rabhani. Pedzepo wakakanda pamuceto zvipfuyo zvake uye aazi kuzvibatanidza no zvipfuyo zva Rabhani. 41 Uye pese paaiona kuti zvinyama zvino simba zvaida kumemedzana, Djakobo waikanda zvitimbu zve zvimuti zvainga zvabviswa mapande padoko mu mbuto dze kumwira pamberi po zvipfuyo, kuitira kuti zvimemedzane padhuze no zvimutizvo. 42 Asi wainga asikakandi zvitimbu zve zvimutizvo pamberi pe zvinyama zvisina simba. Ngokudaro zvinyama zvisina simba zvaindorumbwa zviri zva Rabhani, asi zvino simba zva Djakobo.

43 Ngokudaro, Djakobo wakabudirira maningi, uye wakagara no zvipfuyo zvakawanda, aseenzi e anakadzi no aseenzi e anarume uye makamero no madhongi.

31 Nokuhamba ke nguwa, Djakobo wakazoziya kuti ana a Rabhani aiti: “Djakobo watora zvese zvainga zviri zva baba edu, uye upfumi wese waaunganidza wakabva pa zviro zvainga zviri zva baba edu.” 2 Uye Djakobo paairingira hope ya Rabhani, waiona kuti Rabhani wainga asikacamupfariri hinga zvaaiita kare. 3 Pakupedzesera, Djehovha akabvunza Djakobo kuti: “Hwirira ku nyika ye madzibaba ako no anyaukama ako, uye inini ndicarumbwa ndinewe.” 4 Hino Djakobo wakadainzisa Rakeri na Reiya kuti aende mushango maainga eciushira zvipfuyo zvake, 5 uye wakati kaari:

“Ndiri kuona kuti baba enyu aacandipfariri hinga zvaaiita kare, asi Mwari wa baba angu aneni nguwa dzese. 6 Imwimwi munonyasa kuziya kuti ndakaseenzera baba enyu no simba rangu rese. 7 Baba enyu akaedza kundicengedza uye akacinja muripo wangu kagumi kese; asi Mwari aazi kutendera kuti andikuwadze. 8 Paaibhuya kuti: ‘Zvinyama zvino maara-maara zvicagara muripo wako,’ zvipfuyo zvese zvaibara zvino maara-maara; asi paaibhuya kuti: ‘Zvino mutaro-mutaro zvicagara muripo wako,’ zvipfuyo zvese zvaibara zvino mutaro-mutaro. 9 Ngokudaro, Mwari aindorumbwa ecitora zvipfuyo zva baba enyu ecindipasa. 10 Zuwa rimweni, zvipfuyo pazvaida kumemedzana, ndakarota mu hope ndoona kuti makoto-koto aimemedza zvipfuyo ainga ano mutaro-mutaro, maara-maara, uye makhamba-makhamba. 11 Pedzepo, ngirozi ya Mwari we zvirokwazvo yakandibvunza mu hope kuti: ‘Djakobo!’ Inini ndakadaira kuti: ‘Ndiri pano.’ 12 Iyona yakaenderera yeciti: ‘Ndapota, ringira uye ona kuti makoto-koto ari kumemedza zvipfuyo zvino mutaro-mutaro, maara-maara, uye makhamba-makhamba, ngokuti ndiri kuona zvese zvauri kuizirhwa na Rabhani. 13 Inini ndiri Mwari we zvirokwazvo we Bheteri, kuya kawakadzodza buwe rawakaimisa hinga ciedzuriro uye kawakandiitira mhiko. Parizvino, buda nokukasika mu nyika ino, uye hwirira ku nyika yawakabarirhwa.’”

14 Paakazwa izvi, Rakeri na Reiya akati: “Ticino nhaka here pa nyumba pa baba edu? 15 Aaripi kutiona hinga anhu e nyika imweni here? Ngokuti akatitengesa uye akapedza mare yese yaakatitengesa nayo. 16 Upfumi wese wakatorerhwa baba edu na Mwari nge wedu uye ngewe ana edu. Hino, itai zvese zvamabvunzwa na Mwari.”

17 Djakobo nokukasika wakapakidza ana ake no akadzi ake pa makamero, 18 uye wakaenda no zvipfuyo zvese, zvipfuyo zvainga zviri zvake no zvaainga aunganidza ku Padhani-arani, uye no upfumi wese waainga aunganidza, wakaenda kumba ka Izaki baba ake, ku nyika yo Kanani.

19 Rabhani paainga aenda koocinga ukuse we mabira, Rakeri wakaba zvidhori* zva baba ake. 20 Kusiya izvona, Djakobo wakacengedza Rabhani Muaramu, ngokuti wakaenda asikazi kumueneka. 21 Wakatiza no zviro zvaainga anazvo uye wakabira murambo we Eufrati.* Pedzepo wakaenda ku mutanha we matunhu we Giriyadhi. 22 Pa zuwa rocitatu, Rabhani wakabvunzwa kuti Djakobo wakatiza. 23 Hino, iyena wakatora hama dzake,* oteera Djakobo, uye mumasure me rhwendo re mazuwa manomwe, akamubata ku mutanha we matunhu we Giriyadhi. 24 Hino Mwari akadzipangidza mu hope cousiku kuna Rabhani Muaramu, omubvunza kuti: “Ngwarira zvaucabvunza Djakobo, azvinei kuti zvakanaka kana kuti zvakashata.”*

25 Ngokudaro, Rabhani wakakhwederera Djakobo, ngokuti Djakobo wainga agadzira tenda rake pa dunhu, uye Rabhani no hama dzake ainga awaka musasa wawo pa mutanha we matunhu we Giriyadhi. 26 Hino Rabhani wakabvunza Djakobo, eciti: “Zvinyi izvi zvawaita? Ngei wandicengedzera uye wotora ana angu hinga asungwa akatorhwa ku hondo? 27 Ngei watiza mucifise-fise, wondicengedza nge kutama kundieneka? Kudai wakandibvunza, inini ndaida kukueneka no mupfaro, teciemba ngoma, teciridza ngoma uye marudimbwa.* 28 Asi iwewe auzi kundipasa mukana we kupsvoda azukuru* angu uye ana angu. Iwewe waita zve upenzi. 29 Ndino simba re kukukuwadza, asi Mwari wa baba ako akandibvunza zuro cousiku, kuti: ‘Ngwarira zvaucabvunza Djakobo, azvinei kuti zvakanaka kana kuti zvakashata.’ 30 Inini ndinozviziya kuti waenda ngokuti wainga waano cisuwo ce nyumba ya baba ako, asi ngei waba anamwari angu?”

31 Djakobo wakadaira Rabhani kuti: “Ndaenda mucifise-fise ngokuti ndaithya, ndecirangarira kuti maizonditorera ana enyu nge cisimba.’ 32 Uya wamunoona ano anamwari enyu, ngaauraiwe. Nyasai kupsvaka pa zviro zvandinazvo hama dzedu dzecizviona, kana mukaona zviro zvenyu zvitorei.” Asi Djakobo wainga asikazvizii kuti Rakeri ndiye wainga aba zvidhorizvo. 33 Ngokudaro, Rabhani wakapinda mu tenda ra Djakobo, ra Reiya uye mu tenda re arandakadzi airi, asi aazi kuzviona. Hino wakabuda mu tenda ra Reiya uye wopinda mu tenda ra Rakeri. 34 Pa nguwa doko ii, Rakeri wainga atora zvidhori* zviya ozvikanda mu sesto ye anakadzi inosungirhwa pa kamero uye ozvigarira. Ngokudaro, Rabhani wakapsvaka mu tenda rese, asi aazi kuzviona. 35 Hino Rakeri wakabvunza baba ake kuti: “Musanditsamwire tenzi wangu, andikwanisi kumuka pamberi penyu ngokuti ndiri kumwedzi.” Ngokudaro, iyena wakarumbwa ecinyasa kupsvaka, asi aazi kuona zvidhorizvo.*

36 Ngokudaro, Djakobo wakanyangadzwa maningi uye wakatanga kureketera Rabhani. Djakobo wakabvunza Rabhani kuti: “Cinyi candakashaisha, uye citema cipi candakamuitirai kuti munditeere makanyangadzwa kudai? 37 Zvamapedza kupsvaka zviro zvenyu pakati pe zviro zvangu, cinyi camaona ce kumba kenyu? Cikandei apa pamberi pe hama dzangu no hama dzenyu, kuti awona atonge pakati pedu tiri airi. 38 Pa makore 20 ese aya andainga ndinemwi, mabira enyu no mbudzi dzenyu azvizi kumbosvodza uye andizi kumborhya ana e mabira pa zvipfuyo zvenyu. 39 Andizi kumbomuunzisirai cipfuyo cakarumwa no zvikara. Pacairumwa, inini ndini ndaiciripa. Kunyazi cipfuyo pacaibiwa usiku kana masikati, imwimwi maindiripisa. 40 Comasikati, ndaipiswa no zuwa, uye cousiku ndaitonhorhwa no mhepo; uye hope dzainditiza. 41 Ndakagara makore 20 pa nyumba penyu. Ndakamuseenzerai ke makore 14 kuti mundipase ana enyu airi, uye makore matanhatu kuti mundipase zvipfuyo zvenyu, asi makacinja muripo wangu kanokwana ka gumi. 42 Kudai Mwari wa baba angu, Mwari wa Abrahamu uye Mwari uya unothyiwa na Izaki wainga asiripi ku dii rangu, imwimwi maizondiendesa ndisina ciro. Mwari aona kutambudzika kangu uye kuseenza no simba ke nyara dzangu, ndiyo ndaa iyena akamungwadzai zuro cousiku.”

43 Hino Rabhani wakadaira Djakobo eciti: “Aya ndi ana angu, aya ndi azukuru angu, izvi i zvipfuyo zvangu, uye zvese zvauri kuona nge zvangu uye ngezve ana angu. Zvinyi zvakashata zvandingaaitira nyamasi no ku ana awo aakabara? 44 Parizvino, ngatiite citenderano inini na iwewe, citenderano ici cicagara upupuri pakati pangu newe.” 45 Ngokudaro, Djakobo wakatora buwe oriimisa kuti rigare ciedzuriro. 46 Hino Djakobo wakabvunza hama dzake kuti: “Nongerai mapuwe!” Awona akanongera mapuwe uye akaaunganidza. Mumasure mazvo, akarhyira pamusoro pe murhwi we mapuwewo. 47 Rabhani wakadainza murhwiwo kuti Jegari-sahadhuta,* asi Djakobo wakaudainza kuti Garedhi.*

48 Hino Rabhani wakati: “Murhwi uu we mapuwe wagara nyamasi upupuri kandiri newe.” Ndiyo ndaa wakadainzwa kuti Garedhi, 49 uye Mbuto ye Murindi, ngokuti iyena wakati: “Djehovha ngaarinde inini na iwewe patinonga tisikaonani. 50 Kana iwewe ukatanga kubata zvakashata ana angu, wowaka akadzi amweni kunza ke ana angu, kunyazi pasina anonga ecikuona, edzurira kuti Mwari ndiye mupupuri kandiri newe.” 51 Rabhani wakaenderera mberi ecibvunza Djakobo kuti: “Uri pano murhwi we mapuwe, uye buwe randaimisa hinga ciedzuriro pakati pangu newe. 52 Murhwi uu we mapuwe ndi upupuri, uye buwe iri re kuedzurira rinopasa upupuri wekuti andizodariki murhwi we mapuwe aya kuti ndikukuwadze uye kuti iwewe auzodariki murhwi we mapuwe aya, uye buwe iri re kuedzurira kuti undikuwadze. 53 Mwari wa Abrahamu uye Mwari wa Naori, Mwari wa baba awo, ngaatonge pakati pedu.” Djakobo wakapika na Mwari uya anothyiwa na Izaki baba ake.

54 Mumasure mazvo, Djakobo wakapasa cibairo pa dunhu uye wakapika hama dzake kuti arhye ari pamwepo. Hino awona akarhya uye akawata mu dunhu irona. 55 Asi Rabhani wakamuka comacibesi-besi, wopsvoda azukuru* ake no ana ake uye wakaakomborera. Pedzepo, Rabhani wakahwirira kumba kake.

32 Djakobo wakaenda, uye ngirozi dza Mwari dzakasongana naye. 2 Djakobo paakadziona, iyena wakati: “Uu ndi musasa wa Mwari!” Ndiyo ndaa, wakapasa mbuto iyona zina rokuti Maanaimu*.

3 Pedzepo Djakobo wakatuma atumwa ake kuti aende kuna mukoma wake Izau, ku nyika ye Seiri, mu mutanha* we Edhomi; 4 iyena wakaabvunza kudai: “Munodikana kubvunza tenzi wangu Izau kuti: ‘Museenzi wenyu Djakobo wabhuya kudai: “Ndakagara* na Rabhani ke nguwa yese ii. 5 Uye ndaano n’ombe, madhongi, mabira, aseenzi e anarume no aseenzi e anakadzi, uye ndiri kutumira masoko aya kamuri imwimwi tenzi wangu, kuti ndizwirhwe nyasha pamberi penyu.”’”

6 Nokuhamba ke nguwa, atumwa akahwirira kuna Djakobo, eciti: “Takaona mukoma enyu Izau; zvino iyena ari kuuya koosongana nemwi no anarume 400.” 7 Djakobo wakatsukwara uye wakathya maningi, zvekuti wakaparadzanisa zvikwata zviiri pa anhu aainga anawo, kutobatanidzawo mabira, mbudzi, n’ombe no makamero. 8 Iyena wakati: “Kana Izau akarhwisa cikwata cimwe, cikwata cimweni cinozokwanisa kutiza.”

9 Mumasure mazvo, Djakobo wakati: “Mwari wa baba angu Abrahamu uye Mwari wa baba angu Izaki, Tenzi Djehovha, ndimwi muri kundibvunza kuti: ‘Hwirira ku nyika yako no anyaukama ako, uye inini ndicakubata zvakanaka,’ 10 andizi kusisira rudo rese rakagondeka uye kutendeka zvamunopangidza ku museenzi wenyu, ngokuti pandakabira murambo we Djorodhani, ndainga ndino ndonga yangu basi, asi parizvino ndaa zvikwata zviiri. 11 Ndinomudeketererai kuti mundinunurewo mu nyara dza mukoma angu Izau, ngokuti ndiri kuthya kuti ungauya koorhwisa inini, akadzi angu no ana angu. 12 Ndimwi makati: ‘Zvezvirokwazvo, ndicakuitira zvakanaka, uye ndicaita kuti ana* ako awande hinga madjeca e mu bahari asikaerengeki, nge ndaa ye kuwanda kawo.’”

13 Iyena wakawata ipona. Pedzepo, pa zviya zvaainga anazvo wakakanda pa dii zvinganani kuti zvipaswe Izau mukoma ake hinga cipo: 14 Mbudzi dzo kadzi 200, makoto-koto 20, mabira e kadzi 200, mabira e kono 20, 15 makamero 30 aiamwisa no ana awo, n’ombe dzo kadzi 40, n’ombe dzo kono gumi, madhongi okadzi 20 uye madhongi okono gumi.

16 Iyena wakazvipasa aseenzi ake, cikwata cimwe ce zvipfuyo ceciteerana no cikwata cimweni, uye wakati ku aseenzi ake: “Tungamirai ndimwi mberi, uye munodikana kusiya mukana pakati po cikwata ce zvipfuyo zviri mberi no cikwata ce zvipfuyo zviri sure.” 17 Iyena wakabvunzawo museenzi wekutanga kuti: “Kana Izau mukoma angu akasongana newe uye okubvunzisa kuti: ‘Uri museenzi waani, uri kuenda kupi, uye zvipfuyo zviri mberi kako nge zvaani?’ 18 Iwewe unodikana kumubvunza kuti: ‘Ndiri museenzi we museenzi wenyu Djakobo. Ici i cipo caari kutumira kamuri imwimwi tenzi wangu Izau, uye iyena kamare ari kuuyawo sure kedu.’” 19 Wakabvunzawo wecipiri, wecitatu, uye no ese aya ainga atungamira no zvipfuyo kuti: “Kana mukasongana na Izau, munodikana kumubvunza masoko aya. 20 Munodikanawo kumubvunza kuti: ‘Museenzi wenyu Djakobo uri kuteera sure kedu.’” Ngokuti wairangarira kuti: ‘Kana inini ndikapfawisa mwoyo wake nge kumupasa cipo inini ndisati ndasongana naye, pamweni iyena unganditambira zvakanaka pandicasongana naye.’ 21 Ngokudaro, zvipo izvona zvakatungamira, asi iyena wakawata pa musasa usiku uwona.

22 Nokuhamba ke nguwa, iyena wakamuka mu usiku uwona wotora akadzi ake airi, aseenzikadzi ake airi uye no ana ake 11, akabira murambo unozwi Djabhoki. 23 Ngokudaro, iyena wakaatora oabidza muramboo no zvese zvaainga anazvo.

24 Pakupedzesera Djakobo wakasara ega. Hino mwanarume umweni wakatanga kupondana naye dakara kooedza. 25 Paakaona kuti aazi kukwanisa kunyisa Djakobo, wakamubata mu cihunu make; uye cihunu ca Djakobo cakagudumuka paaipondana naye. 26 Mumasure mazvo, iyena wakati: “Ndisiye ndiende, ngokuti kaakuedza.” Hino Djakobo wakati: “Andizokusii kuti uende dakara wandikomborera.” 27 Hino iyena wakamubvunzisa kuti: “Unozwi ani?” Iyena wakadaira kuti: “Djakobo.” 28 Uye iyena wakati: “Zina rako aricazwizve Djakobo, asi Israeri,* ngokuti wapondana na Mwari no anhu uye wawina.” 29 Djakobo wakati: “Ndapota, imwimwi munozwi ani.” Asi iyena wakati: “Ngei uri kuda kuziya zina rangu?” Pedzepo wakamukomborera ipona. 30 Ndiyo ndaa, Djakobo wakapasa mbuto iyona zina rokuti Penueri,* ngokuti wakati: “Inini ndaonana na Mwari hope no hope, kunyazi zvakadaro ndiciri mupenyu.”*

31 Zuwa rakazobuda paainga ecibva ku Penueri,* asi iyena waikhabinya ngokuti cihunu cake cairhwadza. 32 Ndiyo ndaa dakara na nyamasi uno ana a Israeri asikarhyi mudzira dziri mu cihunu, ngokuti ndipona pakaremadzwa Djakobo.

33 Djakobo wakamutsa musoro uye wakaona Izau eciguma no anhu 400. Ngokudaro, Djakobo wakaparadzanisa ana ake, amweni ogara na Reiya, amweni na Rakeri, uye amweni no aseenzikadzi ake airi. 2 Iyena wakakanda aseenzikadzi no ana awo mberi, pedzepo wakakanda pakati Reiya no ana ake, pakupedzesera wakakanda Rakeri na Zuzee sure. 3 Hino iyena wakaenda mberi kawo, wogodama uye wokotamisa musoro wake kanokwana kanomwe dakara aguma dhuze no hama yake.

4 Asi Izau wakagogoma koosongana naye, wakamukhumbatira no kumupsvoda, uye awona akacema maningi. 5 Izau paakamutsa musoro wake, wakaona anakadzi no ana uye wakati: “Ndiani aya aunawoya?” Djakobo wakamudaira kuti: “Ana akapaswa muranda wenyu na Mwari.” 6 Aseenzikadzi no ana awo akakhwedera dhuze, uye akahwarara, 7 uye Reiya no ana ake akakhwederawo, uye akahwarara. Pedzepo Zuzee na Rakeri akakhwedera, uye akahwarara.

8 Izau wakamubvunzisa kuti: “Ngacipi cainga ciri cinangwa cako pawatuma zvikwata zvese zve anhu aya andasongana nawo?” Iyena wakamudaira kuti: “Kuti ndizwirhwe nyasha pamberi pa tenzi wangu.” 9 Asi Izau wakamubvunza kuti: “Hama yangu, inini ndino zviro zvakawanda. Gara hako no zviro zvako.” 10 Asi Djakobo wakati: “Ndapota, musarambe. Kana mandizwira nyasha, tendai cipo candiri kumupasai, ngokuti ndaciunzisa kuti ndikwanise kuona hope yenyu. Uye inini pandaona hope yenyu, zvaita hingana ndiri kuona hope ya Mwari, ngokuti manditambira no mupfaro. 11 Ndapota, tambirai cipo ici candamuunzisirai,* ngokuti Mwari akandizwira nyasha uye inini ndino zviro zvese zvandinoda.” Uye iyena akarumbwa ecimudeketerera, dakara atenda.

12 Nokuhamba ke nguwa, Izau wakati: “Ngatiende, uye ndisiye ndipinde mberi.” 13 Asi iyena wakati: “Tenzi wangu imwimwi munozviziya kuti ana aya aciri adoko maningi uye cimweni nge cekuti ndino mabira no n’ombe zviri kuamwisa. Kana zvikabambidzirhwa kuhamba nokukasika pa zuwa rimwe basi, zvese zvinopera kufa. 14 Ndapota tenzi wangu, mungatungamira henyu mberi ke museenzi wenyu, asi inini ndicarumbwa ndecihamba padoko-padoko, ndecisesedza zvipfuyo zvangu uye ana angu, dakara ndaguma kamuri tenzi wangu ku Seiri.” 15 Hino Izau wakati: “Ndapota, nditendere kuti ndikusiire anhu anganani angu.” Asi iyena wakamudaira kuti: “Haiwa! Kuzwirhwa usisi pamberi pa tenzi wangu zvinokwana maningi.” 16 Ngokudaro, pa zuwa irona, Izau wakahwirira ku Seiri.

17 Djakobo wakaita rhwendo ecienda ku Sukoti; kweneyo, iyena wakadziwakira nyumba uye wakawakira zvipfuyo zvake madanga. Ndiyo ndaa, wakapasa mbuto iyona zina rokuti Sukoti.*

18 Mumasure me kubva ku Padhani-arani, Djakobo wakaguma akacengeteka ku thaundi ro Sikemu, ku nyika yo Kanani; uye iyena wakawaka musasa wake dhuze no thaundi. 19 Hino iyena wakatenga no ana a Amori, baba a Sikemu, mbuto doko ye munda, no mare yo mashekeri anokwana kuita 100, pa mbuto iya yaainga akanda tenda rake. 20 Wakagadzira pa mundepo artari uye wakaipasa zina rokuti Mwari, Mwari we Israeri.

34 Dhinaa mwana wa Djakobo waakabarirhwa na Reiya, wainga ano musambo we kuenda koovhakacira* asikana e mu nyika iyona. 2 Sikemu, mwana wa Amori Muhivhi, mukuru-mukuru we nyika iyona paakaona Dhinaa, wakamubata wowata naye eciita zve kumudzipa. 3 Uye iyena* wainga asikacadizve kusiyana na Dhinaa mwana wa Djakobo; iyena wakamuda maningi uye waiedza kumubvunzira.* 4 Pakupedzesera, Sikemu wakabvunza Amori baba ake kuti: “Ndiwakirei musikana uu kuti agare mukadzi wangu.”

5 Djakobo paakazwa kuti Sikemu wainga apsverudza Dhinaa mwana wake, ana ake e anarume ainga aenda koousha zvipfuyo. Hino Djakobo wakarumbwa akanyarara dakara anewo ahwirira. 6 Nokuhamba ke nguwa, Amori baba a Sikemu, akaenda kooreketa na Djakobo. 7 Asi ana a Djakobo akaziya zvainga zvaitika uye akahwirira nokukasika kaainga eciushira zvipfuyo. Awona akarhwadziwa no kunyangadzwa maningi, ngokuti Sikemu wainga apsverudza Israeri nge kuwata no mwana wa Djakobo, zviro zvekuti zvainga zvisikadikani kuizwa.

8 Amori wakaabvunza kuti: “Sikemu mwana wangu, uri kuda maningi* mwana wenyu. Ndapota, mupasei kuti agare mukadzi wake, 9 uye ngatiite citenderano ce kuwakirana. Tipasei ana enyu e anakadzi, uye imwimwi toraiwo ana edu e anakadzi. 10 Garai na isusu, mungasanangura henyu pamunoda kugara mu nyika muno. Garai muno, itai bhizi uye budirirai.” 11 Hino Sikemu wakabvunza baba no hama dza Dhinaa kuti: “Ndizwireiwo nyasha, uye inini ndinozomupasai ciro cipi haco camunozondikumbira. 12 Mungandicadja mutengo wakakura we kuroora uye no zvipo zvamunoda. Inini ndakagadzirira kumupasai ciro cipi haco camunondikumbira; asi candinoda basi nge cekuti mundipase musikana uu kuti agare mukadzi wangu.”

13 Asi ana a Djakobo akadaira Sikemu na Amori baba ake, nge mushobo we kucengedza, ngokuti iyena wainga apsverudza Dhinaa, yaya awo. 14 Awona akaabvunza kuti: “Atidikani kuita kudaro; atidikani kupasa yaya edu mwanarume usikazi kuizwa ucekeri,* ngokuti izvona zvinotipsverudza. 15 Isusu tinozomupasai kana imwimwi mukaita izvi: Munodikana kugara hingana isusu uye moita ucekeri anarume ese ari pakati penyu. 16 Kana mukaita kudaro, isusu tinozomupasai ana edu e anakadzi, uye isusu tinozotora ana enyu e anakadzi, tinozogara na imwimwi, togara anhu amwe basi. 17 Asi kana mukatama kutizwira uye motama kuizwa ucekeri, tinozotora mwana wedu uye toenda.”

18 Zvaakareketa zvakapfadza Amori uye Sikemu mwana wa Amori. 19 Sikemu aazi kunonoka kuita zvaakakumbirhwa nawo, ngokuti waida maningi mwana wa Djakobo, uye wainga ari mwana anokudzwa we pa nyumba pa baba ake.

20 Ngokudaro, Amori na Sikemu mwana wake, akaenda pa musuwo mukuru we thaundi uye akabvunza anarume e thaundi rawo kuti: 21 “Anhu aya ari kuda kugara mu runyararo na isusu. Ngatiasiye kuti agare mu nyika ino uye aite bhizi, ngokuti nyika ii yakakura uye inokwana kuti awona araramire muno. Tingatora ana awo e anakadzi kuti agare akadzi edu, uye toapasawo ana edu e anakadzi. 22 Anhu aya acatenda basi kugara na isusu kuti tigare anhu amwe basi, kana tikaita izvi: Anarume ese ari pakati pedu anodikana kuizwa ucekeri, ngokuti awona akaizwawo ucekeri. 23 Kana tikaita kudaro, zvipfuyo zvawo zvese, zviro zvawo zvese, uye upfumi wawo, azvizogari zvedu here? Hino ngatiite zvaanoda, kuti agare na isusu.” 24 Anhu ese aibuda no pa musuwo mukuru we thaundi rake akapurutana Amori na Sikemu mwana wake, uye anarume ese akaizwa ucekeri, ese aibuda nge pa musuwo mukuru we thaundi.

25 Asi pa zuwa rocitatu, paainga aciri kurhwadziwa, ana airi a Djakobo, Simioni na Revhi hama dza Dhinaa, akatora masupada awo uye akaenda ku thaundi irona risikazi kudziirirhwa ouraya anarume ese. 26 Awona akauraya Amori na Sikemu mwana wake, no supada; mumasure mazvo, akatora Dhinaa pa nyumba pa Sikemu, pedzepo akaenda. 27 Ana amweni a Djakobo akauya uye ogumira anarume ese apera kufa, akatora zviro zvese zve muthaundimo, ngokuti ainga apsverudza yaya awo. 28 Akatora mabira awo, n’ombe dzawo, madhongi awo, uye no zvese zvainga zviri mu thaundi no mu munda. 29 Awona akatorawo zviro zvawo zvese, ana awo ese, akadzi awo, uye no zvese zvainga zviri mu nyumba dzawo.

30 Nge ndaa yazvo, Djakobo wakabvunza Simioni na Revhi kuti: “Imwimwi mandiunzisira dambudziko rakakura maningi, mondiitisa kuti ndizondwe no agari e nyika ino, nge Akanani uye nge Aperezi. Isusu atizi kuwanda; awona zvezvirokwazvo acabatana kuti andirhwise, uye ndicatsakatiswa, inini pamwepo no nyumba yangu.” 31 Asi awona akati: “Pano munhu waidikana kubata hama yedu hinga hure here?”

35 Mumasure mazvo, Mwari akabvunza Djakobo kuti: “Muka, uende ku Bheteri, ugare ikona, uye wakira Mwari we zvirokwazvo artari, uwo akadzipangidza pawainga wecitiza Izau mukoma ako.”

2 Hino Djakobo wakabvunza o pa nyumba pake no ese aya aainga anawo kuti: “Psvetai anamwari e nyika imweni ari pakati penyu, dzicenesei mocinja macira enyu, 3 uye ngatimuke, ngatiende ku Bheteri. Ikona ndicagadzirira artari Mwari we zvirokwazvo, uya akandidaira pandainga ndecitambudzika uye akarumbwa aneni kwese kandainga ndecienda.”* 4 Hino awona akapasa Djakobo anamwari ese aainga anawo e nyika imweni no mhete dzaainga anadzo pa nzee dzawo, uye Djakobo wakazvifushira* pasi pe muti wakakura wainga uri padhuze no Sikemu.

5 Paainga ooenda, Mwari akaita kuti anhu e mathaundi ainga akaatenderedza athye, zvekuti aazi kuteera ana a Djakobo. 6 Pakupedzesera, Djakobo wakaguma ku Ruzi, kureya Bheteri, mu nyika yo Kanani, iyena pamwepo no anhu ese aainga anawo. 7 Ipona, iyena wakawaka artari uye wakaipasa zina rokuti Eri-bheteri,* ngokuti ipona Mwari we zvirokwazvo akadzipangidza kaari paainga ecitiza mukoma ake. 8 Nokuhamba ke nguwa, Dhebhora museenzikadzi wa Rabheka wakafa, wakakotswa padhuze no Bheteri pasi pe muti mukuru. Ndiyo ndaa, muti uwona wakapaswa zina rokuti Aroni-bhakuti.*

9 Mwari akadzipangidzazve kuna Djakobo paaibva ku Padhani-arani uye akamukomborera. 10 Mwari akamubvunza kuti: “Iwewe unozwi Djakobo. Asi iwewe aucazodainzwizve Djakobo, ucadainzwa kuti Israeri.” Uye akatanga kumudainza kuti Israeri. 11 Mwari akatizve kaari: “Ndini Mwari we Masimba Ese. Bara uwande. Iwewe ucagara baba e madzinza akawanda maningi, uye madzimambo acabva kauri.* 12 Panocokuita no nyika yandakapasa Abrahamu uye Izaki, inini ndicapasa iwewe no ana* ako.” 13 Pedzepo Mwari akaenda, ecibva pa mbuto iya yaainga areketa na Djakobo.

14 Ngokudaro, Djakobo wakaimisa buwe re ciedzuriro pa mbuto iya yaainga areketa naye, uye wakadurura mipiro ye zvinomwiwa uye no mafuta pariri. 15 Djakobo wakarumbwa ecidainza mbuto yaainga areketa na Mwari kuti Bheteri.

16 Mumasure mazvo, akafuruka ecibva ku Bheteri. Paainga aciri kure kuti agume ku Efrata, nyoka ya Rakeri yakatanga kuruma, asi iyena wakashuphika maningi kuti abare. 17 Asi paainga ecirhwadziwa maningi kuti abare, waimubetsera kuti abare wakamubvunza kuti: “Usathye, ngokuti ucagarazve no mwana umweni we mwanarume.” 18 Pa nguwa yekuti upenyu wake wainga wecipera (ngokuti wainga ecifa), iyena wakamududza zina rokuti Bheni-oni,* asi baba ake akamududza zina rokuti Bhenjamii.* 19 Ngokudaro, Rakeri wakafa uye wakakotswa mu gwanza rinoenda ku Efrata, kureya ku Bheterehema. 20 Djakobo wakaimisa buwe re ciedzuriro pa guwa rake; buwe irona ndiro ciedzuriro ce guwa ra Rakeri dakara na nyamasi uno.

21 Mumasure mazvo, Israeri wakaenda uye wakagadzira tenda rake mberi ke nyumba huru ya Edheri. 22 Pa zuwa rimweni, pa nguwa yekuti Israeri wairarama mu nyika iyona, Rubheni wakawata na Bhira mukadzi we pa dii wa baba ake, uye Israeri wakaziya nge zvazvo.

Djakobo wainga ano ana e anarume anokwana kuita 12. 23 Ana a Reiya ainga ari Rubheni dangwe ra Djakobo, wozoteera Simioni, Revhi, Djudha, Isakari, uye Zebhuroni. 24 Ana a Rakeri ainga ari Zuzee uye Bhenjamii. 25 Ana a Bhira, museenzikadzi wa Rakeri, ainga ari Dhani na Nafitari. 26 Uye ana a Zirpa, museenzikadzi wa Reiya, ainga ari Gadhi na Azeri. Aya ndiwo ana a Djakobo, aakabara ku Padhani-arani.

27 Pakupedzesera, Djakobo wakaguma ku Mamere kainga kuna Izaki baba ake, ku Kiriyati-arbha, kureya ku Hebroni, kainga kakambogarawo Abrahamu na Izaki hinga agari e nyika imweni. 28 Izaki wakararama makore 180. 29 Ngokudaro, Izaki wakafema kekupedzesera uye wakafa, uye wakakotswa hinga makotserhwe aiizwa anhu e kumba kake, mumasure me upenyu wakareba uye unogutsa;* uye ana ake Izau na Djakobo akamukotsa.

36 Ii ndiyo ngano inoreketa ngezve upenyu wa Izau, kureya Edhomi.

2 Izau wakawaka anakadzi pakati pe ana e Kanani: Adha mwana we mwanakadzi wa Eroni, Muhiti; Ooribhama mwana we mwanakadzi wa Anaa, muzukuru wa Zibhiyoni, Muhivhi; 3 uye Bhazemati mwana we mwanakadzi wa Ismaeri, yaya a Nebhayoti.

Aya ndiwo ana a Izau, aakabara mu nyika yo Kanani. 6 Mumasure mazvo, Izau wakatora akadzi ake, ana ake e anarume no e anakadzi, anhu ese* o pa nyumba pake, zvipfuyo zvake no zvinyama zvake zvimweni, uye no upfumi wese waainga aunganidza mu nyika yo Kanani uye akaenda ku nyika iri kure maningi kubva kainga kuno hama yake Djakobo. 7 Ngokuti upfumi wawo wainga wawanda maningi, zvekuti zvainga zvisikacaiti kuti awona ararame pamwepo, uye nyika yaairarama* yainga isikacakwani kaari, nge ndaa ye kuwanda ke zvipfuyo zvawo. 8 Ndiyo ndaa, Izau wakatanga kurarama mu mutanha we matunhu we Seiri. Izau unodainzwa kuti Edhomi.

9 Ii ndiyo ngano inoreketa ngezve upenyu wa Izau, baba a Edhomi, waigara ku mutanha we matunhu we Seiri.

10 Mazina e ana a Izau ndi aya: Erifaji, mwana wa Adha, mukadzi wa Izau; Reuweri, mwana wa Bhazemati, mukadzi wa Izau.

11 Ana a Erifaji ainga ari Temani, Omari, Zefo, Gatamu, uye Kenazi. 12 Timina wakagara mukadzi we pa dii wa Erifaji, mwana wa Izau; iyena wakabarira Erifaji mwana waizwi Amareki. Aya ndiwo ana a Adha, mukadzi wa Izau.

13 Mazina e ana a Reuweri ndi aya: Naati, Zera, Samaa na Miza. Aya ndiwo ana akabarhwa na Bhazemati, mukadzi wa Izau.

14 Mazina e ana a Ooribhama, mukadzi wa Izau, mwana wa Anaa uye muzukuru wa Zibhiyoni, aakabarira Izau ndi aya: Jeusi, Djarami, na Kora.

15 Aya ndiwo atungamiriri e madzinza* ari pakati pe ana a Izau: Ku ana a Erifaji, dangwe ra Izau, atungamiriri akhona ndi aya: Mutungamiriri Temani, Mutungamiriri Omari, Mutungamiriri Zefo, Mutungamiriri Kenazi, 16 Mutungamiriri Kora, Mutungamiriri Gatamu, uye Mutungamiriri Amareki. Aya ndiwo ainga ari atungamiriri pakati pe ana a Erifaji, mu nyika yo Edhomi. Aya ndiwo ana a Adha.

17 Mazina e ana a Reuweri mwana wa Izau, ndi aya: Mutungamiriri Naati, Mutungamiriri Zera, Mutungamiriri Samaa, uye Mutungamiriri Miza. Aya ndiwo atungamiriri e ana a Reuweri, mu nyika ye Edhomi. Aya ndiwo ana a Bhazemati, mukadzi wa Izau.

18 Pakupedzesera ana a Ooribhama, mukadzi wa Isau, ndi aya: Mutungamiriri Jeusi, Mutungamiriri Djarami, uye Mutungamiriri Kora. Aya ndiwo atungamiriri e ana a Ooribhama, mwana wa Anaa, mukadzi wa Izau.

19 Aya ndiwo ana a Izau, uye atungamiriri awo. Iyena ndiye Edhomi.

20 Ana a Seiri Muorite, agari e mu nyika iyona ndi aya: Rotani, Sobhari, Zibhiyoni, Anaa, 21 Dhisoni, Ezeri, na Dhisani. Aya ndiwo atungamiriri e ana a Ori, ana a Seiri, aigara mu nyika yo Edhomi.

22 Ana a Rotani ainga ari Ori na Emami, uye Rotani wainga ano hama yake yo mwanakadzi yaizwi Timina.

23 Ana a Sobhari ndi aya: Arivhani, Manati, Ebhari, Shefo, na Onami.

24 Ana a Zibhiyoni ndi aya: Aiya uye Anaa. Anaa uu ndiye wakaona mbuto inobuda mvura inopisa ku renje, paainga eciusha madhongi a Zibhiyoni, baba ake.

25 Ana a Anaa ndi aya: Dhisoni na Ooribhama; Ooribhama wainga ari mwana we mwanakadzi wa Anaa.

26 Ana a Dhisoni ndi aya: Edhani, Eshibhani, Itirani, na Kherani.

27 Ana a Ezeri ndi aya: Bhirihani, Zaavhaani, na Akani.

28 Ana a Dhisoni ndi aya: Uzi na Arani.

29 Atungamiriri e ana a Orite ndi aya: Mutungamiriri Rotani, Mutungamiriri Sobhari, Mutungamiriri Zibhiyoni, Mutungamiriri Anaa, 30 Mutungamiriri Dhisoni, Mutungamiriri Ezeri, uye Mutungamiriri Dhisani. Aya ndiwo atungamiriri e ana a Orite, maererano no atungamiriri awo, mu nyika yo Seiri.

31 Uye madzimambo akatonga mu nyika yo Edhomi pasati paoneka mambo upi hake we Aisraeri,* ndi aya: 32 Bhera, mwana wa Bheori, wakatonga ku Edhomi, uye zina ro thaundi rake raizwi Dhinabha. 33 Bhera paakafa, Djobhabhi, mwana wa Zera, we ku Bhozira, wakatanga kutonga pa mbuto yake. 34 Djobhabhi paakafa, Usani we nyika yo Atemani, wakatanga kutonga pa mbuto yake. 35 Usani paakafa, Adhadhi, mwana wa Bhedhadhi, uya wakakunda Amidhiyani, mu nharaunda* yo Amoabhi, wakatanga kutonga pa mbuto yake, uye zina ro thaundi rake raizwi Avhiti. 36 Adhadhi paakafa, Samira, we ku Masireka, wakatanga kutonga pa mbuto yake. 37 Samira paakafa, Shauri we ku Reobhoti, iri dhuze no Murambo, wakatanga kutonga pa mbuto yake. 38 Shauri paakafa, Bhaari-hanani, mwana wa Akibhori, wakatanga kutonga pa mbuto yake. 39 Bhaari-hanani, mwana wa Akibhori paakafa, Adhari wakatanga kutonga pa mbuto yake. Zina ro thaundi rake raizwi Pawu, uye mukadzi wake waizwi Meetabheri, mwana we mwanakadzi wa Matiredhi; Matiredhi wainga ari mwana we mwanakadzi wa Mezaabhi.

40 Mazina e atungamiriri e ana a Izau, maererano no mhuri dzawo uye mbuto dzawo, mazina awo ndi aya: Mutungamiriri Timina, Mutungamiriri Arivha, Mutungamiriri Jetete, 41 Mutungamiriri Ooribhama, Mutungamiriri Erai, Mutungamiriri Pinoni, 42 Mutungamiriri Kenazi, Mutungamiriri Temani, Mutungamiriri Mibhizari, 43 Mutungamiriri Magibhieri, uye Mutungamiriri Iramu. Aya ndiwo atungamiriri e ana a Edhomi, maererano no magarire aiita mu nyika yawo. Uu ndiye Izau, baba a Edhomi.

37 Djakobo wakarumbwa ecigara mu nyika yo Kanani, yakambogarhwa na baba ake hinga munhu we nyika imweni.

2 Ii ndiyo ngano inoreketa ngezve upenyu wa Djakobo.

Zuzee paainga ano makore 17, iyena waiusha mabira no ana a Bhira uye ana a Zirpa, akadzi a baba ake. Uye Zuzee wakabvunza baba ake zviro zvakashata zvaiizwa ngo hama dzake. 3 Israeri waida maningi Zuzee kupinda ana ake amweni, ngokuti wainga ari mwana waakabara paainga acembera, uye wakaita kuti agadzirirhwe djira rakareba rakanaka. 4 Hama dzake padzakaona kuti baba awo aida maningi iyena kudarika amweni, awona akatanga kumuzonda uye ainga asikacakwanisi kureketa naye zvakanaka.

5 Nokuhamba ke nguwa, Zuzee wakarota hope uye wakadzipanganidzira hama dzake, asi izvona zvakaita kuti awona anyanye kumuzonda. 6 Iyena wakaabvunza kuti: “Ndapota, purutanai hope dzandarota. 7 Ndarota tiri mu munda tecisunga misumbu dzo mbeu, musumbu wangu wakamuka woima uye misumbu dzenyu dzakatenderedza musumbu wangu dzoukotamira.” 8 Hama dzake dzakamubvunza kuti: “Iwewe zvezvirokwazvo uri kuda kudziita mambo wedu uye wotitonga here?” Ngokudaro, hama dzake dzakatunhudzira kumuzonda nge ndaa ye hope dzaakarota uye no zvaakareketa.

9 Mumasure mazvo, iyena wakarotazve hope dzimweni, uye wakadzibvunza hama dzake, eciti: “Ndarotazve hope dzimweni. Pari zvino, zuwa, mwedzi, uye nyeredzi 11 zvaindikotamira.” 10 Pedzepo wakadzipanganidzira kuna baba ake hama dzake dziripoo, asi baba ake akamusumurura eciti: “Hope dzawarota dzinoreyei? Izvirokwazvo here kuti inini pamwepo na mai ako uye no hama dzako ticauya kuzokukotamira?” 11 Uye hama dzake dzakamuitira shanje, asi baba ake akacengeta masoko aya mu mwoyo mawo.

12 Hama dzake dzakaenda koousha mabira a baba awo padhuze no Sikemu. 13 Mumasure mazvo, Israeri wakati kuna Zuzee: “Hama dzako adziripi kuusha zvipfuyo padhuze no Sikemu here? Uya ndikutume kuti uende kaari.” Iyena wakati: “Zvakanaka, ndinoenda!” 14 Hino akati kaari: “Ndapota, enda koona kuti hama dzako dzinotamba here uye zvipfuyo zvakacengeteka here; pedzepo wondiunzisira masoko. Ngokudaro, wakamutuma ecibva ku bani ro Hebroni, uye iyena wakaenda ku Sikemu. 15 Nokuhamba ke nguwa, mwanarume umweni wakamuona eciherereka mushango. Mwanarumewo wakamubvunzisa kuti: “Uri kupsvakei?” 16 Iyena wakadaira kuti: “Ndiri kupsvaka hama dzangu. Ndapota, ndibvunzeiwo, ari kuushira kupi zvipfuyo?” 17 Mwanarumewo wakamudaira kuti: “Awona abva pano; ndaazwa ecibhuya kuti: ‘Ambai ku Dhotani.’” Ngokudaro, Zuzee wakateera hama dzake uye wakaagumira ku Dhotani.

18 Awona paakamuona aciri kure asati aguma dhuze nawo, akatanga kupangana kuti amuuraye. 19 Hino awona akabvunzana eciti: “Onai! muroti uya uri kuuya. 20 Uu ndiwo mukana! Ngatimuurayei, timukhandire mu cimwe cimbo ce mvura, uye tozobhuya kuti warhyiwa ngo cinyama co mushango. Tione kuti cinyi cicaitika no hope dzake.” 21 Rubheni paakazwa izvi, wakaedza kumununura, eciti: “Anhumwi, ngatisamuuraye.”* 22 Rubheni wakatizve: “Musadurure ngazi. Mukhandirei mu cimbo ici ce mvura ciri ku renje rino, asi musamukuwadze.”* Cinangwa cake cainga ce kumupukunyusa mu nyara dzawo, kuti azomuhwirinze kuna baba ake.

23 Hino Zuzee paakandoguma, hama dzake dzakamukhumura djira rake rakareba, djira rakanaka raainga akapfeka, 24 uye awona akamubata omukhandira mu cimbo. Pa nguwa iyona, cimboco cainga cisina mvura.

25 Pedzepo, akagara pasi kuti arhye. Paakamutsa musoro, akaona cikwata ce Aismaeri cecibva ku Giriyadhi. Makamero awo ainga akathwara zvinonama zve miti inonuhwirira, mabharsamu, uye makwenzi anobudisa zvinonama ecienda ku Edjipitu. 26 Hino Djudha wakati ku hama dzake: “I mubairo upi waticaona nge kuuraya hama yedu uye tofushira ngazi yake? 27 Ngatimutengese no Aismaeri, pane kumukuwadza. Kupinda zvese, iyena i hama yedu, nyama yedu.” Hino awona akazwira hama yawo. 28 Uye atengesi e ku Midhiyani paainga ecipinda, akamubudisa mu cimbo uye akamutengesa ku Aismaeri ngo mutengo unokwana 20 we prata. Anhu aya akaenda na Zuzee ku Edjipitu.

29 Rubheni paakazohwirira pa cimbo, uye paakaona kuti mainga musisina Zuzee, wakamwesa macira ake. 30 Paakahwirira kuno hama dzake, wakati: “Mudjaha uya wangara-ngara! Hino inini ndicaitei?”

31 Ngokudaro, awona akatora djira rakareba ra Zuzee, ouraya goto-koto, pedzepo onyika djirero mu ngazi. 32 Pedzepo akatumira djira rakanaka kuna baba awo no masoko aya: “Taona djira iri. Tapota, onai kuti ngere mwana wenyu here kana kuti haiwa.” 33 Iyena wakariringisisa uye woti: “I djira ro mwana wangu! Pamweni warhyiwa nge cinyama ce mushango! Zvezvirokwazvo, Zuzee warhyiwadi kamare!” 34 Ngokudaro, Djakobo wakamwesa macira ake, wakasunga sakhu mu cihunu uye wakacema mwana wake ke mazuwa akawanda. 35 Ana ake ese e anarume no e anakadzi aiedza kumunyaradza, asi iyena wairamba kunyaradzwa uye waibhuya kuti: “Ndicaenda mu Guwa* ndecicema mwana wangu!” Uye iyena wairumbwa ecicema mwana wake.

36 Mumasure mazvo, Amidhiyani akatengesa Zuzee ku Edjipitu kuna Potifari, mutungamiriri we nyumba ya Faraoo uye mutungamiriri we arindi.

38 Mu mazuwa awona, Djudha wakasiya hama dzake, woenda koogara padhuze no mwanarume umweni unozwi Ira, Muadhuramu. 2 Ikona Djudha wakaona mwana we mwanakadzi we Mukanani unozwi Suwa. Ngokudaro, Djudha wakamutora owata naye, 3 uye iyena wakabata pamwiri. Nokuhamba ke nguwa, wakabara mwana we mwanarume, uye Djudha wakamududza zina rokuti Eri. 4 Iyena wakabatazve pamwiri, obara mwana we mwanarume uye wakamududza zina rokuti Onani. 5 Wakabarazve mwana we mwanarume uye wakamududza zina rokuti Shera. Djudha wainga ari ku Akizibhi mukadzi wake paakabara.

6 Nokuhamba ke nguwa, Djudha wakawakira Eri dangwe rake, mukadzi waizwi Tamari. 7 Asi Eri dangwe ra Djudha, wainga asikapfadzi Djehovha; ndiyo ndaa, Djehovha akamuuraya. 8 Ngokudaro, Djudha wakabvunza Onani kuti: “Waka mukadzi wa mukoma ako uye wata naye, kuitira kuti ubarire mukoma ako ana.” 9 Asi Onani waizviziya kuti ana aaizobara ainga asikazogari ake. Ndiyo ndaa, paaiita zvepamaponde no mukadzi wa mukoma ake, waipsvetera pasi mbeu yake, kuti asabarire ana mukoma ake. 10 Zvaaiita zvainga zvakashata pamberi pa Djehovha, ndiyo ndaa akamuurayawo. 11 Djudha wakabvunza Tamari murora wake,* kuti: “Enda koogara hinga mufirhwakadzi kumba ka baba ako dakara mwana wangu Shera akura.” Ngokuti iyena waiti mu mwoyo make: ‘Iyena ungafawo hinga hama dzake.’ Hino Tamari wakaenda koogara kumba ka baba ake.

12 Nokuhamba ke nguwa, mukadzi wa Djudha mwana wa Suwa, wakafa. Djudha wakatora nguwa yakareba ecicema mukadzi wake; mumasure mazvo, wakaenda ku Timina no shamwari yake Ira Muadhuramu, kuti aonane no anhu aipungura ukuse we mabira. 13 Tamari wakabvunzwa kuti: “Cezani ako ari kuenda ku Timina koocinga ukuse we mabira awo.” 14 Nge ndaa yazvo, wakacinja macira, wakakanda ku hope kake djira re kufukidza ku hope* uye odzifukidza ngo djira, wakagara pa musuwo mukuru we Enaimu, uri pa gwanza rinoenda ku Timina, ngokuti wakaona kuti Shera wainga akura, asi cezani ake aazi kumuita kuti agare mukadzi wake.

15 Asi Djudha paakamuona, wakatorangarira kuti wainga ari hure, ngokuti wainga afukidza hope yake. 16 Hino wakaenda kaainga ari kumuceto ke gwanza uye wakati: “Ndiri kuda kuwata na iwewe,” ngokuti wainga asikazvizii kuti wainga ari murora wake.* Ngokudaro, iyena wakamubvunza kuti: “Mucandipasei kana mukawata na inini?” 17 Hino Djudha wakamudaira kuti: “Ndicakutumira mbudzi yandicatora pa zvipfuyo zvangu.” Asi iyena wakadaira kuti: “Mucandipasa ciro cokuti ndibatire dakara manditumira here?” 18 Djudha wakabvunzisa kuti: “Ndinodikana kukupasei kuti ubatire?” Iyena wakamudaira kuti: “Aneri yenyu ye cidhindo, tambo yenyu* uye ndonga iri mu nyara yenyu.” Hino iyena wakamupasa, wowata naye, uye iyena wakabata pamwiri. 19 Mumasure mazvo, wakamuka uye wakaenda, wakabvisa djira raainga akadzifukidza naro uye wakapfekazve macira ake o mufirhwakadzi.

20 Asi Djudha wakatumira mbudzi eciseenzesa shamwari yake Muadhomi, kuti ahwirinzirhwe zviya zvaainga abatirisa mwanakadziwo, asi iyena aazi kumugumira. 21 Iyena wakabvunzisa anarume aigara mu nharaunda iyona kuti: “Riri kupi hure riya ro pa tempro raigara ku Enaimu mu muceto me gwanza?” Asi awona akamudaira kuti: “Mu nharaunda ino amusati makambooneka hure ro pa tempro.” 22 Pakupedzesera, iyena wakahwirira kuna Djudha uye wakamubvunza kuti: “Andizi kumugumira. Kusiya izvona, anarume e nharaunda iyona andibvunza kuti: ‘Mu nharaunda ino amusati makambooneka hure ro pa tempro.’” 23 Hino Djudha wakati: “Ngaagare hake nazvo, kuti tisashorhwe. Inini ndaita zviri zvese, ndakupasa mbudzi kuti uende koomupasa, asi auzi kumugumira.”

24 Asi mumasure me mwedzi mitatu, Djudha wakabvunzwa kuti: “Tamari, murora wako,* waita uhure, uye wabata pamwiri nge ndaa ye uhure waaita.” Hino Djudha wakati: “Mubudisei kuti apiswe.” 25 Paainga ecibudiswa kunza, iyena wakatumira masoko kuna cezani ake, eciti: “Inini ndino mimba ye mwanarume we zviro izvi.” Uye wakatunhudzira eciti: “Ndapota, onai kuti aneri ii yo cidhindo, tambo ii uye ndonga ii nge zvaani.” 26 Ngokudaro, Djudha wakazviongorora uye wakati: “Iyena ndi munatsi kupinda inini, ngokuti andizi kumupasa mwana wangu Shera.” Kubvira ipona, aazi kuzowatazve naye.

27 Payakaguma nguwa yekuti abare, iyena wainga ano manyambiri mu ndani make. 28 Paainga ecibara, umwe wakabvisa moko wake kunza, uye uya waimubetsera pa kubara, wakatora ciusaru cekupsvuka wosunga moko we mwanewo, eciti: “Uu ndiye watanga kubuda.” 29 Asi paakandohwirinza moko wake, hama yake yakabuda, uye uya waimubetsera pa kubara wakati: “Wadzifunungurira gwanza guru!” Ndiyo ndaa wakadudzwa zina rokuti Perezi.* 30 Mumasure mazvo, hama yake yainga yakasungirhwa ciusaru cokupsvuka pa moko yakabudawo, uye wakadudzwa zina rokuti Zera.

39 Zuzee wakaendeswa ku Edjipitu, uye Muedjipitu umweni unozwi Potifari, mutungamiriri we nyumba ya Faraoo uye mutungamiriri we arindi a mambo, wakamutenga kubva ku Aismaeri aya akamuendesa ikona. 2 Asi Djehovha ainga ana Zuzee, zvekuti iyena wakabudirira uye wakagara muonereri we nyumba ya tenzi wake, Muedjipitu. 3 Uye tenzi wake wakaona kuti Djehovha ainga ana Zuzee uye kuti Djehovha aiita kuti zvese zvaiizwa naye zvibudirire.

4 Zuzee wakarumbwa ecizwirhwa nyasha naye, uye wakarumbwa ecimuseenzera. Ngokudaro, tenzi wake wakamugadza kuti agare muonereri we nyumba yake, uye zviro zvake zvese wakazvisiya mu nyara dzake. 5 Kubvira pa nguwa yaakamuita muonereri we zviro zvake zvese, Djehovha akakomborera nyumba ye Muedjipitu nge ndaa ya Zuzee, uye makomborero a Djehovha akagara pa zvese zvaainga anazvo mu nyumba uye mu munda. 6 Pakupedzesera, Potifari wakazosiya zviro zvake zvese mu nyara ma Zuzee, zvekuti wainga asikathyiri ciro cipi haco, kunza ke zvekurhya zvake basi. Uyezve, Zuzee wakazorungama uye wakazogara no ciimo cakanaka.

7 Paa padarika nguwa, mukadzi wa tenzi wake wakatanga kusirira Zuzee uye wakati: “Wata na inini.” 8 Asi iyena wairamba uye waiti ku mukadzi wa tenzi wake: “Tenzi wangu aazii zvandinazvo pa nyumba pano, uye wakasiya zvese mu nyara dzangu. 9 Apana museenzi umweni mukuru kupinda inini pa nyumba pano, uye apana caakandinyima kunza ka imwimwi basi, ngokuti muri mukadzi wawo. Hino ngei ndingaita zvakashata kudai ndecishaishira Mwari kudaro?”

10 Hino, mazuwa ese iyena waindobvunzira Zuzee, asi iyena aazi kumbotendera kuwata naye kana kusara naye. 11 Asi zuwa rimweni, paakapinda mumba kuti aite basa rake, mumbemo mainga musina aseenzi amweni. 12 Hino mukadzi wa tenzi wake wakamubata ngo djira rake, woti: “Wata na inini kani!” Asi iyena wakasiya djira rake mu nyara make uye wakatizira kunza. 13 Mukadzi wa tenzi wake paakaona kuti wainga asiya djira rake mu nyara make uye kuti wainga atizira kunza, 14 wakatanga kukhuwa ecidainzira aseenzi e nyumba yake eciti: “Onai basi! Muhebheru uu watakaunzisirhwa no mwamuna wangu unoda kutipsverudza. Iyena wauya kandiri kuti awate na inini, asi inini ndatanga kukhuwa no izwi rangu rese. 15 Hino paandozwa ndecikhuwa, iyena wasiya djira rake padhuze na inini uye wotizira kunza.” 16 Mumasure mazvo, iyena wakakanda djira rake padhuze naye dakara tenzi wake aguma pa nyumba.

17 Iyena wakamubvunza zvimwezvo, eciti: “Museenzi Muhebheru wamakatiunzisira, wauya kandiri kuti andipsverudze. 18 Asi pandatanga kukhuwa, iyena wasiya djira rake padhuze na inini uye wotizira kunza.” 19 Tenzi wake paakazwa mukadzi wake ecireketa kuti: “Izvi ndizvo zvandaizirhwa no museenzi wenyu,” iyena wakanyangadzwa maningi. 20 Hino tenzi wa Zuzee wakamutora, omukanda mu kadheya, mbuto yaifungirhwa asungwa a mambo, uye wakarumbwa ari imona.

21 Asi Djehovha airumbwa ana Zuzee uye airumbwa ecimupangidzira rudo rakagondeka uye eciita kuti azwirhwe nyasha no mutungamiriri we kadheya. 22 Ngokudaro, mutungamiriri we kadheya wakagadza Zuzee hinga mutungamiriri we asungwa ese, uye zviro zvaiizwa imona zvaitungamirirhwa ndiye. 23 Mutungamiriri we kadheya, apana ciro cipi haco caaithyira pa zvese zvainga zviri mu nyara ma Zuzee, ngokuti Djehovha ainga ana Zuzee uye Djehovha aiita kuti zvese zvaiizwa ndiye zvibudirire.

40 Mumasure mazvo, mutungamiriri we aperekeri e zvekumwa zva mambo we Edjipitu uye no mutungamiriri we abiki e pau akashaishira tenzi wawo, mambo we Edjipitu. 2 Hino Faraoo wakanyangadzwira aseenzi ake aya airi, mutungamiriri we aperekeri e zvekumwa uye mutungamiriri we abiki e pau, 3 uye iyena wakaakanda mu kadheya yainga iri pa nyumba pe mutungamiriri we arindi, mu mbuto yainga yakafungirhwa Zuzee. 4 Mutungamiriri we arindi wakagadza Zuzee kuti aaonerere, uye awona akagara mu kadheya ke mazuwa manganani.

5 Usiku umweni, mutungamiriri we aperekeri e zvekumwa uyewo mutungamiriri we abiki e pau a mambo we Edjipitu, awo ainga akafungirhwa mu kadheya, akarota hope, uye hope dzakarothwa no umwe na umwe dzainga dzecireya zviro zvakasiyana. 6 Macibesi akazoteera, Zuzee paakaenda kooaona, wakaona kuti awona ainga akatsukwara. 7 Hino akabvunzisa aseenzi a Faraoo, ainga ari mu kadheya pamwepo na iyena pa nyumba ya tenzi wake, kuti: “Ngei nyamasi makatsukwara?” 8 Awona akamudaira kuti: “Tarota hope, asi apana munhu unokwanisa kudzidudzira.” Zuzee wakaabvunza kuti: “Mwari andiepi anodudzira hope here? Ndapota, ndibvunzei zvamarota.”

9 Hino mutungamiriri we aperekeri e zvekumwa wakabvunza Zuzee zvaarota; iyena wakati: “Ndarota pamberi pangu pano muuvha. 10 Uye muuvhewo wainga uno zvinhai zvitatu, asi pawainga wecipfipfitira, wakabuda maruwa, uye wakabara uvha dzakapsvuka. 11 Kopo ya Faraoo yainga iri mu nyara mangu, uye inini ndakabata uvha ndodzisvinira mu kopo ya Faraoo. Pedzepo ndakatora kopoyo ndoipasa Faraoo.” 12 Hino Zuzee wakamubvunza kuti: “Hope dzawarota dzinodudzirhwa kudai: Zvinhai zvitatu i mazuwa matatu. 13 Mumasure me mazuwa matatu, Faraoo ucakubudisa muno,* okuhwirinza pa basa rako, uye iwewe ucatangazve kupasa Faraoo zvekumwa hinga zvawaiita kare pawainga uri muperekeri wake we zvekumwa. 14 Asi wozondiedzurirawo kana zvikakuhambira zvakanaka. Ndapota, ndipangidzire rudo rakagondeka uye reketa nge zvangu kuna Faraoo, kuti andibvise muno. 15 Ciripo nge cekuti, ndakaita zvekubiwa mu nyika yo Ahebheru, uye kuno, apana candakaita cinoita kuti ndikandwe mu kadheya.”*

16 Hino mutungamiriri we abiki e pau paakaona kuti Zuzee wainga adudzira zvakanaka, wakati kaari: “Zvandarotawo ndi izvi: Ndaithwara zvitengu zvitatu zve pau dzokucena pamusoro pangu, 17 uye mu citengu candainga ndakathwara, mainga muno mishobo yese ye zvekurhya zvakabikirhwa mambo Faraoo, uye kainga kuno shiri dzakawanda dzairhya zvainga zviri mu citengu cainga ciri pa musoro pangu.” 18 Zuzee wakamudaira kuti: “Hope dzawarota dzinodudzirhwa kudai: Zvitengu zvitatu i mazuwa matatu. 19 Mumasure me mazuwa matatu, Faraoo ucakugura musoro,* okuturika pa danda, uye shiri dzicarhya nyama yako.”

20 Zuwa rocitatu, rainga riri zuwa rokubarhwa ka Faraoo, uye iyena wakaitira mabiko akakura aseenzi ake. Iyena wakabudisa mu kadheya* mutungamiriri we aperekeri e zvekumwa uye mutungamiriri we abiki e pau pamberi pe aseenzi ake. 21 Iyena wakahwirinza mutungamiriri we aperekeri e zvekumwa pa basa rake, uye iyena wakarumbwa eciperekera kopo kuna Faraoo. 22 Asi Faraoo wakaturika pa danda mutungamiriri we abiki e pau, hinga zvainga zvadudzirhwa na Zuzee. 23 Asi mutungamiriri we aperekeri e zvekumwa aazi kuedzurira Zuzee; wakatokanganwa nge zvake.

41 Padarika makore mairi, Faraoo wakarota hope akaima mu muceto we murambo we Niro. 2 Iyena wakaona n’ombe nomwe dzokadzi dzakapunda dzecibuda mu murambo we Niro, uye idzona dzainga dzecirhya zvishango zvainga zviri mu muceto me murambo we Niro. 3 Mu murambo we Niro, makabudazve n’ombe nomwe dzainga dzakashata uye dzakaonda, dzakakhwedera padhuze no n’ombe dzainga dzakapunda mu muceto me murambo we Niro. 4 Pedzepo, n’ombe dziya dzakashata uye dzakaonda, dzakatanga kurhya n’ombe dziya nomwe dzakanaka uye dzakapunda. Mumasure mazvo, Faraoo wakamuka.

5 Hino, iyena wakawatazve uye wakarotazve hope dzimweni. Pa gonje rimwe basi, pakabuda madzonzora manomwe akadzara ngo tsangu uye akanaka. 6 Mumasure mawo, pakabudazve madzonzora manomwe akatetepa uye akafota nge kuzunguzwa no mhepo ye kumabvazuwa. 7 Uye madzonzora akatetepa uye akafota akatanga kumedza madzonzora akadzara no tsangu uye akanaka. Pedzepo, Faraoo wakamuka uye wakaona kuti wainga ecirota.

8 Asi pakakaedza comacibesi, iyena wakatanga kunetseka mu mwoyo make. Hino iyena wakadainzisa apristi ese anoita zvemasarapita no azii ese e mu Edjipitu. Faraoo wakaapanganidzira hope dzake, asi apana wakakwanisa kudzidudzira.

9 Ngokudaro, mutungamiriri we aperekeri e zvekumwa, wakabvunza Faraoo kuti: “Nyamasi ndiri kupupura zvishaishi zvangu. 10 Imwimwi mambo Faraoo mainga makanyangadzwira aseenzi enyu. Ngokudaro, makaita kuti ndifungirhwe mu kadheya yo pa nyumba pe mutungamiriri we arindi, inini pamwepo no mutungamiriri we abiki e pau. 11 Mumasure mazvo, tese takarota hope usiku umwewo. Uye hope dzakarothwa no umwe na umwe dzainga dzecireya zvakasiyana. 12 Imona mainga muno mudjaha umweni Muhebheru, museenzi we mutungamiriri we arindi. Patakamupanganidzira zvatainga tarota, iyena wakadudzira zvainga zvarothwa no umwe na umwe wedu. 13 Uye izvona zvakaitika kamare hinga mushobo waainga adudzira. Inini ndakahwirinzwa pa basa rangu, asi umweni wakaturikwa pa mutanda.”

14 Hino Faraoo wakadainzisa Zuzee, uye wakamudusa mu kadheya* nokukasika. Zuzee wakacinga ndebvu dzake, ocinja macira ake, pedzepo wakaenda opinda mainga muna Faraoo. 15 Faraoo wakabvunza Zuzee kuti: “Ndarota hope, asi apana ari kukwanisa kudzidudzira. Ndazwa kuti kana iwewe ukabvunzwa hope dzarothwa, unokwanisa kudzidudzira.” 16 Zuzee wakadaira Faraoo kuti: “Ndini ani inini! Mwari ndiye anokwanisa kumubvunzai masoko akanaka.”

17 Faraoo wakabvunza Zuzee kuti: “Ndarota ndakaima mu muceto me Murambo we Niro. 18 Uye ndaona n’ombe nomwe dzakanaka uye dzakapunda dzecibuda mu murambo we Niro, uye idzona dzakatanga kurhya zvishango zviri mu muceto me murambo we Niro. 19 Pedzepo, pakabudawo n’ombe dzimweni nomwe dzakaonda uye dzakashata maningi. Andisati ndakamboona n’ombe dzakashata maningi hingana idzona mu nyika yese yo Edjipitu. 20 N’ombe dziya dzakaonda uye dzakashata, dzakatanga kurhya n’ombe nomwe dzekutanga dzakapunda. 21 Asi padzakapedza kurhya, apana waikwanisa kuziya kuti dzainga dzarhya, ngokuti ciimo cadzo cainga cakaita hinga co kare. Pedzepo ndakapatika.

22 “Mumasure mazvo, ndakarotazve, pa gonje rimwe basi paibuda madzonzora manomwe, akadzara ngo tsangu uye dzakanaka. 23 Mumasure mazvo, pakabudazve madzonzora manomwe akatetepa uye akafota ngo mhepo ye kumabvazuwa. 24 Asi madzonzora akatetepa uye akafota, akatanga kumedza madzonzora manomwe uye akanaka. Inini ndazvipanganidzira apristi anoita zvemasarapita, asi apana wakwanisa kundipanganidzira.”

25 Hino Zuzee wakabvunza Faraoo kuti: “Hope dza Faraoo dzinoreya ciro cimwe basi. Mwari wezvirokwazvo abvunza Faraoo zvaacaita. 26 N’ombe nomwe dzakanaka dzinoimirira makore manomwe. Ndizvonawo zvimwezvo no gonje re madzonzora manomwe e mbeu, rinoimirira makore manomwe. Hope idzona dzinoreya ciro cimwe basi. 27 N’ombe nomwe dzakaonda uye dzakashata maningi dzakabuda mu murambo mumasure me dzimweni, dzinoimirira makore manomwe, uye madzonzora manomwe akatetepa uye akafota nge ndaa ye mhepo ye kumabvazuwa, anoimirira makore manomwe o nzara. 28 Hinga zvandambomubvunzai mambo kuti: Mwari we zvirokwazvo aita kuti imwimwi muone zvaacaita.

29 “Kucaoneka makore manomwe ekuti nyika yo Edjipitu inonga yakadzara no zvokurhya. 30 Asi mumasure me makore awona, kucaoneka makore manomwe e nzara uye zvokurhya zvakawanda zviri mu nyika yo Edjipitu zvezvirokwazvo zvicakanganwika, uye nzara icakuwadza nyika. 31 Uye zvokurhya zvakawanda zve mu nyika azvizoedzurirhwi nge ndaa yo nzara icazoteera, ngokuti inonga yakakura maningi. 32 Imwimwi mambo Faraoo maroteswa kairi hope idzi, ngokuti zvanyasa kubambiswa na Mwari we zvirokwazvo, uye Mwari we zvirokwazvo acazviita nokukasika.

33 “Hino imwimwi mambo Faraoo, munodikana kupsvaka muno ano ungwaru uye uno uzii kuti aonerere nyika yese yo Edjipitu. 34 Mambo Faraoo itai ciito, gadzai aonereri mu nyika, uye anodikana kuunganidza murhwi umwe pa mirhwi mishanu ye zviro zvinorimwa mu Edjipitu, pa makore manomwe anoteera anonga ano zviro zvakawanda zvokurhya. 35 Uye awona ngaaunganidze zvokurhya zvese zvicarimwa pa makore aya akanaka anoteera, ngaaunganidze zvirimwa zvese ecitungamirirhwa ndimwi mambo Faraoo; awona anodikana kuunganidza zvirimwa izvi mu mathaundi ese. 36 Zvokurhya izvona, ndizvo zvicaseenzeswa mu nyika mu nguwa ye makore manomwe e nzara acauya mu nyika yo Edjipitu, kuitira kuti nyika isakuwadzwe no nzara.”

37 Faraoo no aseenzi ake ese akapfarira maningi zano iri. 38 Ngokudaro, Faraoo wakabvunza aseenzi ake kuti: “Pacaonekazve mwanarume wakaita hingana uu here, wekuti mwiya wa Mwari uri maari?” 39 Faraoo wakati kuna Zuzee: “Sezvo Mwari aita kuti uziye zvese izvi, apana umweni wakangwara uye uno uzii hingana iwewe. 40 Iwewe kamare ndiwe ucagara mutungamiriri we nyumba yangu, uye anhu angu ese acakuzwira no mwoyo wese. Inini ndicagara mukuru kauri, ngokuti ndiri mambo.”* 41 Faraoo wakatizve kuna Zuzee: “Ona, ndiri kukugadza kuti ugare mutungamiriri we nyika yese yo Edjipitu.” 42 Hino Faraoo wakabvisa aneri yo cidhindo yainga iri mu nyara make, wakaikanda mu nyara ma Zuzee, wakamupfekedza macira akanaka uye wakamukanda korari yo oro mu mutsipa make. 43 Kusiya izvona, iyena wakaita kuti ahambe mu ngoro yake inokudzwa, ecikhuwa mberi kake eciti: “Avrékh!”* Ngokudaro, wakagadzwa kuti agare mutungamiriri we nyika yese yo Edjipitu.

44 Faraoo wakatizve kuna Zuzee: “Inini ndini Faraoo, asi apana unodikana kuita ciro cipi haco* mu nyika yese yo Edjipitu asikazi kutenderhwa ndiwe.” 45 Mumasure mazvo, Faraoo wakapasa Zuzee zina rokuti Zafenati-Paneya uye wakamupasa Asenati kuti agare mukadzi wake, mwana wa Potifera, mupristi wa Oni.* Uye Zuzee wakatanga kutungamirira* nyika yese yo Edjipitu. 46 Zuzee wainga ano makore 30 paakaenda pamberi pa Faraoo,* mambo we Edjipitu.

Hino Zuzee wakabuda pamberi pa Faraoo uye wakatanga kuhamba nyika yese yo Edjipitu. 47 Uye, mukati me makore manomwe e zvokurhya zvakawanda, nyika yo Edjipitu yaibuda zvokurhya zvakawanda maningi. 48 Zuzee wairumbwa eciunganidza zvokurhya zvese zvairimwa mu nyika yo Edjipitu pa makore manomwe e zvokurhya zvakawanda, uye iyena waiunganidza zvokurhya mu mathaundi ese. Mu thaundi rimwe na rimwe, waiunganidza zvokurhya zvairimwa mu minda yainga yakatenderedza thaundi irona. 49 Iyena wakarumbwa eciunganidza zvokurhya zvakawanda maningi, hingana madjeca o mubahari, zvokuti pakupedzesera akasiya kuzvierenga, ngokuti zvainga zvisikacaerengeki.

50 Gore ro nzara risati raguma, Zuzee wakagara baba we ana airi aakabarirhwa na Asenati mwana wa Potifera, mupristi wa Oni.* 51 Zuzee wakadudza dangwe zina rokuti Manase,* ngokuti wakati: “Mwari aita kuti ndikanganwe matambudziko angu ese uye nyumba ya baba angu.” 52 Uye wecipiri wakamududza zina rokuti Efraimu,* ngokuti wakati: “Mwari andipasa ana mu nyika ye kutambudzika kangu.”

53 Hino, makore e zvokurhya zvakawanda mu nyika yo Edjipitu akazopera, 54 uye makore manomwe e nzara akatanga, hinga zvainga zvabhuiwa na Zuzee. Mainga muno nzara mu nyika yese, asi mu Edjipitu mainga muno zvokurhya.* 55 Pakupedzesera, nyika yese yo Edjipitu yakatanga kubatana no nzara, uye anhu akatanga kucemera Faraoo kuti apaswe zvokurhya. Hino Faraoo akati ku Aedjipitu ese: “Endai kuna Zuzee, uye itai zvaacamubvunzai.” 56 Nzara yakarumbwa yecienderera mberi mu nyika yese. Hino Zuzee wakatanga kufunungura miturika ye zvokurhya yaainga aunganidza pakati pawo uye akatanga kutengesera Aedjipitu, ngokuti nzara yainga yakakura maningi mu nyika yo Edjipitu. 57 Uyezve, anhu e nyika yese aienda ku Edjipitu kootenga zvokurhya na Zuzee, ngokuti nzara yainga yakura maningi mu nyika yese.

42 Djakobo paakazwa kuti ku Edjipitu kainga kuno zvokurhya, wakabvunza ana ake kuti: “Ngei muri kuringisana basi musikaiti ciro?” 2 Uye wakatunhudzira eciti: “Ndazwa kuti ku Edjipitu kuno zvokurhya. Endaiyo mutitengere zvokurhya, kuitira kuti tirumbwe tecirarama uye tisafe ngo nzara.” 3 Ngokudaro, madzikoma gumi a Zuzee akaenda ku Edjipitu kootenga zvokurhya. 4 Asi Djakobo aazi kutendera kuti Bhenjamii munukuna wa Zuzee, aende pamwepo no madzikoma ake, ngokuti wakati: “Pamweni unozobatana no tsaona uye wofa.”

5 Ana a Israeri akaendawo pamwepo no amweni aienda kootenga zvokurhya, ngokuti nzara yainga yaguma mu nyika yo Kanani. 6 Zuzee ndiyena waitungamirira nyika yo Edjipitu, uye ndiyena waitengesa zviro zvokurhya ku anhu ese e mu nyika. Hino madzikoma a Zuzee akaguma omuhwararira. 7 Zuzee paakaona madzikoma ake, wakatoaziya ciriporipoco, asi iyena wakaita kuti awona asamuziye. Hino wakareketa nawo eciabvunzisa ngo hasha eciti: “Muri kubva kupi?” Awona akamudaira kuti: “Tabva ku nyika yo Kanani uye tauya kootenga zvokurhya.”

8 Zuzee wakaziya hama dzake, asi idzona adzizi kumuziya. 9 Zuzee ciriporipoco wakaedzurira hope dzaainga akamborota nge zvawo, uye wakati kaari: “Imwimwi zvezvirokwazvo muri avhevhi! Mauya koona kuti i dii ripi re nyika risikazi kudziirirhwa!” 10 Hino awona akamudaira kuti: “Haiwa tenzi wangu, aseenzi enyu auya kootenga zvokurhya. 11 Tese tiri ana a baba umwe basi. Tiri anhu akatendeseka. Aseenzi enyu aazi kuuya koovhevha.” 12 Asi iyena wakaabvunza kuti: “Azvirokwazvopi! Imwimwi mauya koona kuti i dii ripi re nyika risikazi kudziirirhwa!” 13 Paakazwa izvi, awona akati: “Isusu aseenzi enyu tiri 12. Tiri ana a baba umwe basi mu nyika yo Kanani; cigumaura casara na baba edu, asi umweni akucina.”

14 Asi Zuzee wakaabvunza kuti: “Ndizvona zvandamubvunzai kuti: ‘Imwimwi muri avhevhi!’ 15 Kuti ndione kuti zvamuri kureketa izvirokwazvo, ngatiite kudai: Ndinopika na Faraoo mupenyu kuti, imwimwi amuzobudi pano dakara munukuna wenyu wekupedzesera wauya pano. 16 Tumai umwe wenyu kuti aende kootora munukuna wenyu, amweni osara akasungwa. Kana mukaita kudaro, ndinozoziya kuti zvamareketa izvirokwazvo. Kudai zvisiripi izvona, ndinopika na Faraoo mupenyu, imwimwi muri avhevhi.” 17 Ngokudaro, wakaita kuti afungirhwe ke mazuwa matatu.

18 Pa zuwa rocitatu, Zuzee wakaabvunza kuti: “Itai zvandiri kuda kumubvunzai kuti murarame, ngokuti inini ndinothya Mwari. 19 Kana imwimwi muri anarume akatendeseka, hama yenyu imwe ngaisare yakafungirhwa, asi amweni angaenda kootora zvokurhya oenda kooponesa anyaukama awo pa nzara. 20 Pedzepo, ndiunzisirei munukuna wenyu we cigumaura, kuitira kuti ndiziye kuti masoko amareketa ngee zvirokwazvo uye imwimwi amuzofi.” Ngokudaro, awona akaita izvona.

21 Awona akabvunzana pacawo eciti: “Zvezvirokwazvo tiri kuphanicwa nge ndaa ye zvatakaitira hama yedu, ngokuti takaona kunetseka kake* paaitideketerera kuti timuzwire usisi, asi atizi kumuzwira. Ndiyo ndaa tauirhwa no dambudziko iri.” 22 Asi Rubheni wakaabvunza kuti: “Andizi kumubvunzai kuti: ‘Ngatisaitire zvakashata murumbwana uu?’ Asi imwimwi amuzi kundipurutana. Ndiyo ndaa, tiri kushuphika nge ndaa yo ngazi yake.” 23 Asi awona ainga asikazvizii kuti Zuzee waizwa zvaaireketa, ngokuti Zuzee paaireketa nawo waiseenzesa muturikiri. 24 Ngokudaro, iyena wakabudepo wotanga kucema. Paakahwirira kuti areketezve nawo, wakatora Simioni omusunga pamberi pawo. 25 Zuzee wakabvunza anarume ake kuti adzadze masaku awo no zvokurhya,* ahwirinze mare yawo mu masaku awo ngece pamusoro uye aapase zvokurhya zvaaizorhya pa rhwendo rawo. Awona akaita izvona.

26 Ngokudaro, awona akathwarisa madhongi awo zvokurhya uye akaenda. 27 Umwe wawo paakafunungura saku rake kuti apase dongi rake zvokurhya pa mbuto yaaizowatira, wakaona kuti mare yake yainga iri pamusoro pe saku. 28 Paakaona izvi, iyena wakati ku hama dzake: “Mare yangu yahwirinzwa, uye iri mu saku rangu!” Ngokudaro, awona akapera simba, uye ecitetemera, akabvunzana eciti: “Zvinyi izvi zvataizirhwa na Mwari?”

29 Paakaguma ku nyika yo Kanani, awona akapanganidzira Djakobo baba awo zvese zvakaitika kaari, eciti: 30 “Mutungamiriri we nyikeyo wakareketa na isusu no hasha uye wakatipumha kuti taenda koovhevha nyika. 31 Asi isusu takamubvunza kuti: ‘Tiri anhu akatendeseka. Atiripi avhevhi. 32 Isusu tiri ana a baba umwe, baba edu ano ana anokwana kuita 12. Umweni akucina, asi cigumaura casara na baba edu ku nyika yo Kanani.’ 33 Asi mutungamiriri we nyikeyo watibvunza kuti: ‘Ndicaziya kuti imwimwi muri anhu akatendeseka kana mukaita kudai: Siyai na inini hama yenyu imwe. Pedzepo, torai zvokurhya kuti muende kooponesa anyaukama enyu pa nzara. 34 Uye ndiunzisirei hama yenyu ye cigumaura, kuitira kuti ndiziye kuti imwimwi amuripi avhevhi, asi muri anhu akatendeseka. Kana mukadaro, ndinozomuhwirinzirai hama yenyu, uye imwimwi munozorumbwa meciuya kootenga zviro mu nyika ino.’”

35 Paainga ecibvisa zviro zvainga zviri mu masaku awo, mare ye umwe na umwe wawo yainga iri mu saku rake. Awona na baba awo paakaona mare ii, akathya maningi. 36 Djakobo baba awo, akati: “Imwimwi mandisiya ndisina mwana! Zuzee akucina, Simioni akucina, uye pari zvino muri kuda kutorazve Bhenjamii! Zvese izvi zviri kurhwadzisa inini!” 37 Asi Rubheni wakati kuna baba ake: “Imwimwi mungauraya ana angu airi kana ndikatama kumuhwirinza kamuri. Ndipasei kuti ndimuonerere, uye ndicamuhwirinza kamuri.” 38 Kunyazi zvakadaro, iyena wakati: “Mwana wangu aaendi na imwimwi, ngokuti hama yake yakafa uye ndiye ega wasara. Kana akasongana no ngozi uye ofa pamunonga meciita rhwendo, zvezvirokwazvo imwimwi munozoita kuti ndiende mu Guwa* no tsitsi rangu rakacena, ndakatsukwara maningi.”

43 Nzara yainga yakakura maningi mu nyikemo. 2 Hino, zvokurhya zvaainga abva nazvo ku Edjipitu pazvakapera, babewo akaabvunza kuti: “Hwiriraizve kuti mutitengere zvokurhya padoko.” 3 Ngokudaro, Djudha wakaabvunza kuti: “Mwanarumewo wakanyasa kutidjekesera eciti: ‘Musauye pamberi pangu* kana musikazi kuuya no munukuna wenyu.’ 4 Kana imwimwi mukatitendera kuti tiende no munukuna wedu, isusu ticaenda koomutengerai zvokurhya. 5 Asi kana mukatama kutitendera kuti isusu tiende naye, isusu atiendi, ngokuti mwanarumewo wakatibvunza kuti: ‘Musauye pamberi pangu* kana musikazi kuuya no munukuna wenyu.’” 6 Asi Israeri wakabvunzisa kuti: “Ngei imwimwi mandiunzisira dambudziko iri nge kubvunza mwanarumewo kuti muno hama imwenizve?” 7 Awona akamudaira kuti: “Mwanarumewo watiita mibvunzo yakananga nge zvedu uye ngezve anyaukama edu, eciti: ‘Baba enyu aciri mupenyu here? Muno hama imweni here?’ Uye isusu tamubvunza zvese. Taida kuziya kudini kuti iyena waizotibvunza kuti: ‘Unzisai hama yenyu kuno’?”

8 Ngokudaro, Djudha wakarumbwa ecideketerera Israeri baba ake, eciti: “Ndipasei murumbwanewo kuti tiende naye, kuitira kuti isusu, imwimwi uye ana edu tirumbwe tiri apenyu uye tisafe no nzara. 9 Inini ndinozomudziirira.* Kana ciro cipi haco cakashata cikaitika kaari munozophanica inini. Kana ndikatama kuhwirira naye kamuri, ndinonga ndamushaishirai ke upenyu wangu wese. 10 Asi kudai tisikazi kunonoka, tingadai taenda no kuhwirira kairi kese.”

11 Ngokudaro, Israeri wakaabvunza kuti: “Hino kana zvecidikana kuizwa kudaro, itai izvi: Torai micero yakanakisisa ye nyika ino, moikanda mu masaku enyu,* mozopasa mwanarumewo hinga cipo. Torai bharsamu padoko, uci padoko, zvinonama zve miti inonuhwirira, mucero we muti unodainzwa kuti mupistasiyo, uye amendowa. 12 Endai no mare yakapethwa kairi; uye hwirirai no mare yakahwirinzwa mu masaku enyu. Pamweni akaikanda asikazvizii. 13 Torai munukuna wenyu muende naye, hwirirai ku mwanarumewo. 14 Mwari we Masimba Ese ngaaite kuti mwanarumewo amuzwirei usisi uye amutenderei kuti muhwirire no hama yenyu imweni pamwepo na Bhenjamii. Asi kana zvecidikanwa kuti inini ndigare ndisina ana, ndicagara ndisina ana angu!”

15 Hino ana a Djakobo akatora zvipo, mare yakapethwa kairi pamwepo na Bhenjamii, akaenda ku Edjipitu uye akaendazve pamberi pa Zuzee. 16 Zuzee paakaona Bhenjamii ari pamwepo nawo, wakabvunza ciriporipoco mukuru we aseenzi e pa nyumba pake kuti: “Tora anhu aya uende nawo kumba, uuraye zvinyama uye ugadzirire zvokurhya, ngokuti awona acarhya pamwepo na inini masikati ano.” 17 Ciriporipoco, iyena wakaita kamare zvaakabvunzwa na Zuzee, uye wakaatora woenda nawo kumba ka Zuzee. 18 Asi awona paakaendeswa kumba ka Zuzee, akathya maningi uye akatanga kubvunzana eciti: “Taunziswa kuno nge ndaa ye mare iya yatahwirinzirhwa mu masaku edu. Hino awona acatirhwisa, otiita aranda uye acatitorera madhongi edu!”

19 Ndiyo ndaa, awona akakhwederera mukuru we aseenzi e pa nyumba ya Zuzee uye akareketa naye ari pa musuwo. 20 Awona akati: “Tirekerereiwo tenzi wangu! Isusu takambouyazve kuno kekutanga kootenga zvokurhya. 21 Asi patakaguma pa mbuto yataizowatira, takafunungura masaku edu uye takaona kuti pa muromo pe saku re umwe na umwe wedu, painga pano mare yakakwana. Hino tiri kuda kuihwirinza. 22 Uye taunzisazve mare kuti titenge zvokurhya. Atizii kuti ndiani wakakanda mare yedu mu masaku edu.” 23 Hino iyena wakaabvunza kuti: “Musanetseke. Musathye henyu. Mwari wenyu na Mwari wa baba enyu akanda upfumi mu masaku enyu. Mare yenyu ndakaitambira.” Mumasure mazvo, iyena wakaabudisira Simioni.

24 Mwanarumewo wakapinda mumba ma Zuzee, oapasa mvura ye kusuka tsoka dzawo, oapasa zvokurhya kuti apase madhongi awo. 25 Uye awona akagadzirira zvipo kuti azopase Zuzee kana akauya comasikati, ngokuti akaziya kuti aizorhya pamwepo naye. 26 Zuzee paakapinda mumba, akamupasa zvipo zvaainga anazvo uye omuhwararira. 27 Mumasure mazvo, iyena wakaabvunzisa kuti: “Munotamba here? Baba enyu amakabhuya aya kuti acembera, anotamba here? Awona aciri apenyu here?” 28 Awona akamudaira kuti: “Museenzi wenyu, baba edu, anotamba. Awona aciri mupenyu.” Pedzepo akagodama ohwarara.

29 Paakaona Bhenjamii munukuna wake, mwana wa mai ake, wakati: “Uu ndiye here munukuna wenyu wamakandibvunza nge zvake?” Uye wakatunhudzira eciti: “Mwari ngaakuzwire nyasha, mwana wangu.” 30 Hino Zuzee wakabudepo nokukasika ecipsvaka mbuto ye kucema, ngokuti wakakonerhwa kudzibata nge ndaa ye munukuna wake. Ndiyo ndaa, wakaenda mu nyumba yainga isina anhu uye wakatanga kucema. 31 Pedzepo wakakarawa hope uye ohwirirazve, ngokuti wainga wookwanisa kudzibata, uye wakati: “Burai zvokurhya.” 32 Akaburira Zuzee pake ega, hama dzake padzo dzoga, uye Aedjipitu aainga anaye akaburirhwawo pawo oga, ngokuti Aedjipitu ainga asikadikani kurhya pamwepo no Ahebheru, ngokuti izvona zvainga zviri zviro zvinonyanyasa ku Aedjipitu.

33 Wakaita kuti hama dzake* dzigare pamberi pake, kubvira ku dangwe maererano no citenderhwa cake ce udangwe dakara ku cigumaura, uye awona airingisana ecishamisika. 34 Iyena waiendesa zvokurhya pa meza yawo zvecibva pa meza yake, asi aipasa Bhenjamii zvakapethwa kashanu kudarika zvaipaswa amweni ese. Ngokudaro, akarhya uye akamwa naye dakara aguta.

44 Nokuhamba ke nguwa, iyena wakabvunza mwanarume waitungamirira aseenzi e pa nyumba pake kuti: “Dzadza saku ro umwe na umwe wawo maererano no zvaanokwanisa kuthwara, uye kanda mare yo umwe na umwe mu saku rake. 2 Asi kanda kopo yangu yo prata mu saku ra Bhenjamii, pamwepo no mare yaatenga ndiyo.” Hino iyena wakaita izvona kamare zvaainga abvunzwa na Zuzee.

3 Pakainga kooedza comacibesi, anarumewo akaenda no madhongi awo. 4 Ainga asati aguma kure Zuzee paakabvunza mutungamiriri we aseenzi e pa nyumba pake kuti: “Kasika! Teera anarume aya! Kana ukaabata, abvunze kuti: ‘Ngei maita zvakashata nepoo maizirhwa zvakanaka? 5 Kopo ii andiyopi inoseenzeswa here na tenzi wangu kuti amwe nayo uye adudzire zvakanaka zvicaitika?* Zvamaita zvakashata maningi.’”

6 Hino iyena wakaateera oabata, oabvunza masoko aainga abvunzwa na Zuzee. 7 Asi awona akamudaira kuti: “Ngei tenzi wangu muri kubhuya zviro zvakadaro? Azvingaiti kuti isusu aseenzi enyu tiite izvona. 8 Mare yatakaona mu masaku edu patainga tiri ku nyika yo Kanani takamuhwirinzirai. Hino tingazoba kudini prata no oro mumba ma tenzi wenyu?* 9 Kana kopo iyona ikaoneka na umwe wedu, munhuwo ngaauraiwe, uye tese isusu ticagara aranda a tenzi wenyu.” 10 Hino iyena wakabhuya kuti: “Ngazviitike hinga mushobo wamareketa: Uya unonga waoneka no kopoyo, ndiye ucagara muranda wangu, asi amweni ese anonga asina ndaa.” 11 Ngokudaro, umwe na umwe wawo wakakanda saku rake pasi nokukasika uye wakarifunungura. 12 Wakanyasa kupsvaka, wakatangira ku saku ro mukuru wozopedzesera ku saku ro mudoko. Pakupedzesera, kopo iya yakaoneka mu saku ra Bhenjamii.

13 Ngokudaro, awona akamwesa macira awo, uye umwe na umwe wawo wakakwidzazve mutoro wake pa dhongi rake, ohwirirazve ku thaundi. 14 Djudha uye no hama dzake paakapinda mumba ma Zuzee, iyena wainga aciri imona; uye awona akahwarara pamberi pake. 15 Zuzee wakaabvunza kuti: “Zvinyi izvi zvamaita? Mainga musikazvizii here kuti munhu wakaita hinga inini unonyasa kududzira zvicaitika?”* 16 Djudha wakadaira kuti: “Zvinyi zvatingamubvunzai tenzi wangu? Tingareketei? Uye tingapangidza kudini kuti isusu tiri anatsi? Mwari wezvirokwazvo abudisa pamhene zvishaishi zvedu. Parizvino isusu no uya waoneka no kopo tiri aranda enyu, tenzi wangu!” 17 Iyena wakadaira kuti: “Andimboiti zvakadaro! Uya wakatora kopo yangu ndiye ucagara muranda wangu. Asi mwese imwimwi endai henyu kuna baba enyu mu runyararo.”

18 Djudha wakakhwedera padhuze naye uye wakati: “Ndinomudeketererai, tenzi wangu, ndapota siyai kuti muranda wenyu arekete na imwimwi, uye musanyangadzwe nge ndaa ye muranda wenyu, ngokuti imwimwi tenzi wangu makaita hingana Faraoo. 19 Tenzi wangu makabvunzisa aranda enyu kuti: ‘Muna baba here kana kuti hama?’ 20 Isusu takabvunza tenzi wangu kuti: ‘Tino baba acembera no hama imwe ye cigumaura, wakabarhwa pa ucemberi wawo. Asi mukoma ake akashaika, uye iyena ndiye ega wasara pa ana e mu ndani ma mai ake, uye baba ake anomuda maningi.’ 21 Mumasure mazvo, imwimwi makati ku aranda enyu: ‘Muunzisei kuno kuti ndimuone.’ 22 Asi takabvunza tenzi wangu kuti: ‘Azviiti kuti murumbwanewo asiye baba ake. Kana iyena akaasiya, zvezvirokwazvo baba ake angafa.’ 23 Asi imwimwi makabvunza aranda enyu kuti: ‘Kana mukasama kuuya no munukuna wenyu, musauye kuzoimazve pamberi pangu.’*

24 “Hino takaenda kuno muranda wenyu baba angu, uye takaapanganidzira masoko a tenzi wangu. 25 Nokuhamba ke nguwa, baba edu akati: ‘Hwirirai muende kootenga zvokurhya padoko.’ 26 Asi isusu takabhuya kuti: ‘Atikwanisi kuhwirira.* Kana munukuna wedu akaenda na isusu, ticahwirira, ngokuti atikwanisi kuenda pamberi pe mwanarumewo tisina munukuna wedu wecigumaura.’ 27 Hino muranda wenyu, baba angu, akatibvunza kuti: ‘Imwimwi munonyasa kuzviziya kuti mukadzi wangu wakandibarira ana airi basi e anarume. 28 Asi umwe wawo apacina uye ndakati: “Pamweni wakarhyiwa ngo cinyama!” Uye andizi kuzomuonazve dakara nyamasi. 29 Kana mukanditorerazve mwana uu uye moenda naye kure na inini obatana no tsaona uye ofa, zvezvirokwazvo maizoita kuti ndiende mu Guwa* no tsisi rangu rakacena ndakatsukwara maningi.’

30 “Parizvino, kana inini ndikahwirira ku muranda wenyu, baba angu, tisina murumbwana uu, murumbwana waanodisisa, hinga madire aanoita upenyu wawo, 31 asi paacandoona kuti murumbwanewo aaripi na isusu, iyena acafa, uye aranda enyu acaita kuti muranda wenyu, baba edu, aende mu Guwa* no tsitsi rakacena akatsukwara maningi. 32 Inini muranda wenyu ndakagondesa baba angu ngezve murumbwana uu, ndeciti: ‘Kana ndikakonerhwa kumuhwirinza kamuri, ndinonga ndamushaishirai nokusikaperi.’ 33 Parizvino, ndapota, siyai kuti muranda wenyu agare pa mbuto ye murumbwana uu hinga muranda wa tenzi wangu, kuitira kuti murumbwana uu ahwirire no madzikoma ake. 34 Hino ndingahwirira kudini kuna baba angu ndisina murumbwana uu? Andizokwanisi kuona baba angu ecibatana no dambudziko iri!”

45 Nge ndaa yazvo, Zuzee wainga asikacakwanisi kudzibata pamberi pe aseenzi ake ese. Ngokudaro, iyena wakakhuwa eciti: “Anhu ese ngaabude kunza!” Apana munhu wainga aripo Zuzee paakaita kuti hama dzake dzimuziye.

2 Iyena wakatanga kucema no izwi guru zvekuti Aedjipitu akazwa uye anhu e pa nyumba pa Faraoo akazwawo. 3 Pakupedzesera, Zuzee wakati ku hama dzake: “Inini ndini Zuzee. Baba angu aciri mupenyu here?” Asi hama dzake adzizi kukwanisa kumudaira kunyazi ciro cimwe, ngokuti dzainga dzapererhwa pamberi pake. 4 Hino Zuzee wakati ku hama dzake: “Khwederai padhuze na inini, ndapota.” Uye awona akakhwedera padhuze naye.

Iyena wakati: “Ndini Zuzee, hama yenyu yamakatengesera Aedjipitu. 5 Asi zvino musanetseke uye musapasane ndaa* ngokuti makanditengesera Aedjipitu; ngokuti Mwari akandituma mberi kenyu kuti ndicengetedze upenyu ye anhu. 6 Iri i gore recipiri ro nzara mu nyika, uye kucino makore mashanu kusikazorimwi kana kukororhwa. 7 Asi Mwari akandituma mberi kenyu kuti musare pa nyika uye kuti amucengetei kuti murumbwe muri apenyu nge mushobo unoshamisa. 8 Hino, andimwipi makandituma kuno, asi ndi Mwari we zvirokwazvo, kuti andiite mupangiri* mukuru wa Faraoo, tenzi we nyumba yake yese uye mutongi we nyika yese ye Edjipitu.

9 “Hwirirai kuna baba angu nokukasika, uye moti kaari: ‘Zvazwi na Zuzee mwana wenyu: “Mwari akandigadza kuti ndigare tenzi we Edjipitu yese. Uyai kandiri kuno. Musanonoke. 10 Munozogara mu nyika ye Gozeni, kuitira kuti mugare dhuze na inini. Imwimwi, ana enyu, azukuru enyu, mabira enyu, n’ombe dzenyu, no zvese zvamunazvo. 11 Ndicamupasai zvokurhya ikona, ngokuti kucino makore mashanu e nzara. Kana mukatama kudaro, imwimwi pamwepo no e pa nyumba penyu, no zvese zvamunazvo, mucagara arombo.”’ 12 Imwimwi no munukuna wangu Bhenjamii, muri kukwanisa kuona mwega no madziso enyu kamare kuti ndini ndiri kureketa na imwimwi. 13 Hino munodikana kubvunza baba angu ngezve kukudzwa kese kandinako mu Edjipitu muno, no zvese zvamaona. Zvino kasikai muuye na baba angu kuno.”

14 Ngokudaro, iyena wakakhumbatira* Bhenjamii hama yake uye wakatanga kucema, uye Bhenjamii wakacemawo akakhumbatira mukoma ake.* 15 Iyena wakapsvoda madzikoma ake ese uye wakacema wakaakhumbatira. Mumasure mazvo, hama dzake dzakareketa naye.

16 Anhu e pa nyumba pa Faraoo akazwa masoko ekuti: “Hama dza Zuzee dzaguma!” Izvona zvakapfadza maningi Faraoo no aseenzi ake. 17 Ngokudaro, Faraoo wakati kuna Zuzee: “Bvunza hama dzako kuti: ‘Thwarisai zvinyama zvenyu zvokurhya muende ku nyika yo Kanani, 18 uye torai baba enyu no mhuri dzenyu muuye nawo kuno kandiri. Inini ndicamupasai zviro zvakanaka zve nyika ino yo Edjipitu, uye imwimwi mucarhya* zviro zvinobuda mu mbuto yakanaka* ye nyika ino.’ 19 Uye abvunzezve kuti: ‘Torai ngoro dzo Edjipitu kuitira kuti muthware ndidzona ana enyu uye akadzi enyu, kwidzai baba enyu mu imwe ye ngoro idzona muuye nawo kuno. 20 Musanetseke nge ndaa ye zviro zvenyu, ngokuti zviro zvese zvakanakisisa zve nyika yo Edjipitu nge zvenyu.’”

21 Ana a Israeri akaita izvona, uye Zuzee wakaapasa ngoro maererano no zvainga zvabhuiwa na Faraoo, uye wakaapasa zvokurhya zvaaizorhya pa rhwendo rawo. 22 Umwe na umwe wawo wakapaswa macira okucinja, asi Bhenjamii wakapaswa maprata 300 no macira mashanu okucinja. 23 Uye akatumira baba ake zviro izvi: Madhongi gumi akathwariswa zviro zvakanaka zvo nyika yo Edjipitu uye madhongi gumi akathwara trigu, pau no zvokurhya zvimweni zvaizoseenzeswa na baba ake pa rhwendo. 24 Ngokudaro, iyena wakaeneka hama dzake, uye padzainga dzecienda, iyena wakati: “Musareketedzane mu gwanza.”

25 Awona akabva ku Edjipitu oenda ku nyika yo Kanani kuna Djakobo baba awo. 26 Awona akaabvunza kuti: “Zuzee aciri mupenyu, uye iyena ndi mutungamiriri we nyika yese yo Edjipitu!” Asi hana ya Djakobo aizi kupatika ndizvo, ngokuti aazi kutenda kuti awona aireketa zvirokwazvo. 27 Paakamupanganidzira masoko ainga arekethwa na Zuzee uye paakaona ngoro dzese dzainga dzatumwa na Zuzee kuti dzimuthware, Djakobo baba ake akagarazve no simba. 28 Israeri wakabhuya kuti: “Zvakwana! Mwana wangu Zuzee aciri mupenyu! Ndinodikana kuenda koomuona ndisati ndafa!”

46 Ngokudaro, Israeri wakaenda no zvese zvaainga anazvo.* Paakaguma ku Bheeri-sebha, wakapasa zvibairo kuna Mwari wa baba ake Izaki. 2 Hino Mwari akareketa na Israeri mu hope cousiku, eciti: “Djakobo, Djakobo!” Iyena wakadaira kuti: “Ndiri pano!” 3 Iyena akati: “Ndini Mwari we zvirokwazvo, Mwari wa baba ako. Usathye kuenda ku Edjipitu, ngokuti ikona ndicakuita kuti ugare dzinza rakakura. 4 Inini kamare ndicaenda na iwewe ku Edjipitu, uye ndicakuhwirinza kubva ikona, uye paunozofa Zuzee ndiye acafunga madziso ako.”*

5 Mumasure mazvo, Djakobo wakabva ku Bheeri-shebha, uye ana a Israeri akathwara baba awo Djakobo, no ana awo uye no akadzi awo eciseenzesa ngoro dzainga dzatumirhwa na Faraoo kuti dziathware. 6 Akatorawo zvipfuyo zvawo no zviro zvawo zvaainga aunganidza ku nyika yo Kanani. Ngokudaro, Djakobo wakaenda ku Edjipitu no mhuri yake yese. 7 Iyena wakaenda ku Edjipitu no ana ake e anarume no e anakadzi uye no azukuru ake e anarume no e anakadzi; mhuri yake yese.

8 Mazina e ana a Israeri, kureya ana a Djakobo akaenda ku nyika yo Edjipitu, ndi aya: Dangwe ra Djakobo wainga ari Rubheni.

9 Ana a Rubheni ainga ari Anoki, Paru, Ezroni, na Kami.

10 Ana a Simioni ainga ari Jemueri, Djamini, Ohadhi, Jakini, Zoari, na Shauri mwana we mukadzi we ku Kanani.

11 Ana a Revi ainga ari Jersoni, Kowati, na Merari.

12 Ana a Djudha ainga ari Eri, Onani, Shera, Perezi, na Zera. Asi Eri na Onani akafira mu nyika yo Kanani.

Ana a Perezi ainga ari Ezroni na Amuri.

13 Ana a Isakari ainga ari Tora, Puvha, Iyobhi, na Simironi.

14 Ana a Zebhuroni ainga ari Seredhi, Eroni, na Djareeri.

15 Aya ndiwo ana a Reiya aakabarira Djakobo ku Padhani-arani, kutobatanidzawo no mwana wake we mwanakadzi Dhinaa. Ana ake e anarume no e anakadzi ainga ari 33.*

16 Ana a Gadhi ainga ari Zifi, Aji, Suni, Ezibhoni, Erai, Arodhi, na Areri.

17 Ana a Azeri ainga ari Iminaa, Ishivha, Ishivhi, na Bheriya, uye yaya awo ainga ari Sera.

Ana a Bheriya ainga ari Ebheri na Markieri.

18 Aya ndiwo ana a Zirpa, Zirpa uu wainga ari museenzikadzi wa Rabhani waakazopasa mwana wake we mwanakadzi Reiya. Iyena wakabarira ana aya Djakobo: Ese aikwana kuita 16.*

19 Ana a Rakeri mukadzi wa Djakobo ainga ari Zuzee na Bhenjamii.

20 Zuzee no mukadzi wake Asenati mwana we mwanakadzi wa Potifera mupristi wa Oni,* akabara Manase na Efraimu mu nyika ye Edjipitu.

21 Ana a Bhenjamii ainga ari Bhera, Bhekeri, Asibheri, Jera, Naamani, Ehi, Rosi, Mupimi, Upimi, na Ardhi.

22 Aya ndiwo ana akabarirhwa Djakobo na Rakeri: Ese aikwana kuita 14.*

23 Mwana* wa Dhani wainga ari Usimi.

24 Ana a Nafitari ainga ari Djazeeri, Guni, Jezeri, na Sire.

25 Aya ndiwo ana a Bhira, Bhira uu ndiye wainga ari museenzikadzi wa Rabhani waakazopasa mwana wake we mwanakadzi Rakeri. Iyena wakazobarira Djakobo ana: Ese aikwana kuita* anomwe.

26 Ana ese* a Djakobo aakaenda nawo ku Edjipitu tisikabatanidzi akadzi e ana a Djakobo, aikwana kuita 66. 27 Uye ana a Zuzee akabarirhwa ku Edjipitu ainga ari airi.* Anhu ese* e nyumba ya Djakobo akaenda ku Edjipitu aikwana kuita 70.

28 Djakobo wakatuma Djudha kuti aende koobvunza Zuzee kuti iyena waienda ku nyika yo Gozeni. Paakaguma ku nyika yo Gozeni, 29 Zuzee wakaita kuti ngoro yake igadzirirhwe uye wakaenda koosongana na baba ake Israeri, ku Gozeni. Paakasongana nawo, ciriporipoco wakaakhumbatira* uye wakacema ke nguwa yakareba.* 30 Hino Israeri wakabvunza Zuzee kuti: “Zvino ndagadzirira kufa. Ndaona hope yako uye ndaziya kuti iwewe uciri mupenyu.”

31 Zuzee wakabvunza hama dzake no e pa nyumba pa baba ake kuti: “Ndisiyei ndiende koobvunza Faraoo kuti: ‘Hama dzangu, no e pa nyumba pa baba angu ainga ari ku nyika yo Kanani auya kandiri. 32 Anhu awona ndi aushi e mabira uye anopfuya zvipfuyo. Awona aunzisa mabira awo, n’ombe dzawo, no zvese zvaanazvo.’ 33 Kana Faraoo akamudainzai omubvunzisai kuti: ‘Munoita basa rei?’ 34 munodikana kumudaira kuti: ‘Isusu aseenzi enyu tinopfuya zvipfuyo kubvira ticiri ana adoko dakara zvino, hingana zvaiizwa no madzitsekuru edu,’ kuitira kuti mukwanise kugara mu nyika yo Gozeni, ngokuti aushi ese e mabira anonyanyasa ku Aedjipitu.”

47 Ngokudaro, Zuzee wakaenda koobvunza Faraoo kuti: “Baba angu no hama dzangu, auya no mabira awo, n’ombe dzawo uye zvese zvaanazvo ecibva ku nyika yo Kanani, uye parizvino ari ku nyika yo Gozeni.” 2 Iyena wakasanangura hama dzake shanu uye wakaenda koodzipangidza kuna Faraoo.

3 Faraoo wakabvunzisa hama dza Zuzee kuti: “Munoita basa rei?” Awona akadaira Faraoo eciti: “Isusu aseenzi enyu tiri aushi e mabira, hinga zvaiizwa no madzitsekuru edu.” 4 Akatizve kuna Faraoo: “Tauya koorarama mu nyika ino hinga anhu e nyika imweni, ngokuti ku Kanani akuna shango rokuti aseenzi enyu aushe mabira awo, ngokuti nzara ikona yakakura maningi. Hino tapota, siyai kuti isusu aseenzi enyu tigare mu nyika yo Gozeni.” 5 Faraoo wakati kuna Zuzee: “Baba ako uye hama dzako auya kuno kuti agare na iwewe. 6 Nyika yo Edjipitu iri mu nyara menyu. Ita kuti baba ako uye hama dzako dzirarame mu mbuto yakanaka ye nyika ino. Ngaagare mu nyika yo Gozeni; uye kana weciziya kuti pakati pawo pano anarume anokwanisa basa, agadze kuti agare aonereri e zvipfuyo zvangu.”

7 Hino Zuzee wakatora Djakobo baba ake, wakapinda nawo mainga muna Faraoo, uye Djakobo wakakomborera Faraoo. 8 Faraoo wakabvunzisa Djakobo kuti: “Muno makore mangana?” 9 Djakobo wakadaira Faraoo kuti: “Makore angu anokwana kuita 130 ndeciherereka pa nyika.* Makore aya i padoko maningi uye akadzara no matambudziko; aazi kuwanda hinga makore e upenyu we madzitsekuru angu aiherereka pa nyika.”* 10 Mumasure mazvo, Djakobo wakakomborera Faraoo uye wakabuda pamberi pake.

11 Ngokudaro, Zuzee wakapasa baba ake uye hama dzake mbuto ye kugara mu nyika yo Edjipitu, mbuto yakanaka ye mu nyikemo, mu nyika yo Ramisesi, hinga zvainga zvabhuiwa na Faraoo. 12 Uye Zuzee waipasa zvokurhya* baba ake, hama dzake uye ese e pa nyumba pa baba ake maererano no kuwanda ke ana awo.

13 Mainga musina zvokurhya* mu nyika yese, ngokuti nzara yainga yakakura maningi; nyika yo Edjipitu pamwepo no nyika yo Kanani dzakagara dzisina zvokurhya nge ndaa yo nzara. 14 Zuzee waitora mare yese yainga iri mu nyika yo Edjipitu pamwepo no nyika yo Kanani yaiuya no anhu kootenga zvokurhya, uye Zuzee waiendesa mare iyona ku nyumba ya Faraoo. 15 Nokuhamba ke nguwa, mare yese ye mu nyika yo Edjipitu pamwepo no mu nyika yo Kanani yakapera, uye Aedjipitu ese akatanga kuenda kuna Zuzee, eciti: “Tipasei zvokurhya! Mungatisiyadi kamare tecifa no nzara nge ndaa yekuti mare yedu yapera?” 16 Hino Zuzee wakaabvunza kuti: “Kana mare yenyu yapera, ndipasei zvipfuyo zvenyu, uye inini ndicamupasai zvokurhya tecicinjana no zvipfuyo zvenyu.” 17 Hino awona akatanga kuunzisa zvipfuyo zvawo kuna Zuzee, uye Zuzee wakarumbwa eciapasa zvokurhya, awona ecimupasa makavharo, mabira, n’ombe, no madhongi, uye iyena wakarumbwa eciapasa zvokurhya ecicinjana no zvipfuyo zvawo zvese mu gore irona.

18 Gore iri parakapera, akatanga kuenda kaari mu gore rakazoteera eciti: “Atingamufisirii tenzi wangu kuti mare no zvipfuyo zvataimupasai zvapera. Aticinazve ciro cimweni kunza ke mwiri yedu no minda dzedu basi. 19 Kodi mucatisiya tecifa pamwepo no minda dzedu here? Titengei pamwepo no minda dzedu kuti mutipase zvokurhya, uye isusu pamwepo no minda dzedu tinozogara aranda a Faraoo. Tipasei zvokurhya kuti tirarame uye tisafe, kuitira kuti nyika yedu isagare isina anhu.” 20 Zuzee wakatengera Faraoo nyika yese yo Edjipitu, ngokuti Aedjipitu akatengesa minda dzawo, ngokuti nzara yainga yakakura maningi; uye nyika yese yakazogara ya Faraoo.

21 Pedzepo wakathuthisa anhu ese woaendesa mu mathaundi, kubva mu nharaunda dzese dzo Edjipitu. 22 Asi aazi kutenga minda yo apristi, ngokuti zvokurhya zve apristi zvaibva kuna Faraoo uye awona airarama no zvokurhya zvaaipaswa na Faraoo. Ndiyo ndaa aazi kutengesa minda dzawo. 23 Hino Zuzee wakabvunza anhu kuti: “Onai, imwimwi pamwepo no minda dzenyu ndamutengai kuti mugare a Faraoo. Torai mbeu kuti muende koosima mu minda. 24 Pamunokorora mu mindemo, munodikana kupasa Faraoo murhwi umwe pa mirhwi mishanu, asi mirongomuna nge yenyu kuitira kuti igare mbeu uye igare zvokurhya kamuri, ku ana enyu, uye ku anhu e pa nyumba penyu.” 25 Ngokudaro, awona akamubvunza kuti: “Imwimwi macengetedza upenyu wedu. Ngatizwirhwe nyasha pamberi penyu tenzi wangu, uye isusu ticagara aranda a Faraoo.” 26 Ngokudaro, Zuzee wakagadza mutemo mu nyika yese yo Edjipitu, zvekuti uciri kuseenza dakara nyamasi uno, wekuti: Murhwi umwe pa mirhwi mishanu ye zviro zvamucakorora, unodikana kupaswa Faraoo. Asi minda yo apristi basi ndiyo isikazi kugara ya Faraoo.

27 Aisraeri akarumbwa ecirarama mu nyika yo Edjipitu, nyika yo Gozeni, uye awona akagara no zviro zvakawanda maningi, akabara ana uye awona akawanda maningi. 28 Djakobo wakararama mu nyika yo Edjipitu ke makore 17, zvekuti mazuwa ese e upenyu wa Djakobo akaguma makore 147.

29 Israeri paakaziya kuti wainga wooda kufa, wakadainza mwana wake Zuzee uye wakati kaari: “Kana ndazwirhwa nyasha pamberi pako, ndapota, ndiri kukumbirawo kuti ukande nyara yako pasi pe mutezu wangu, uye unodikana kundipangidzira rudo rakagondeka uye risikacinji. Ndapota, usandikotse mu nyika yo Edjipitu. 30 Kana ndikafa,* ndibvise mu Edjipitu, woenda koondikotsa mu guwa re madzitsekuru angu.” Ngokudaro, Zuzee wakati: “Ndicaita zvamandikumbira.” 31 Hino iyena wakamubvunza kuti: “Pika.” Zuzee wakapika. Ngokudaro, Israeri wakakotamisa musoro wake pa mutsago we kama yake.

48 Mumasure me zviro izvi, Zuzee wakaziiswa kuti: “Baba ako ari kupera simba.” Nge ndaa yazvo, iyena wakaenda kooaona uye wakatora ana ake airi Manase na Efraimu. 2 Ngokudaro, Djakobo wakaziiswa kuti: “Mwana wenyu Zuzee wauya koomuonai.” Hino Israeri wakapeta masimba, ogara pa kama yake. 3 Djakobo wakabvunza Zuzee kuti:

“Mwari we Masimba Ese akadzipangidza kandiri ku Ruzi ku nyika yo Kanani uye akandikomborera. 4 Iyena akati kandiri: ‘Ndicakuita kuti ubare ana, ndicakuita kuti uwande, ndicakuita kuti ugare baba we madzinza, uye ndicapasa nyika ino ana* ako kuti igare nyika yawo nokusikaperi.’ 5 Parizvino, ana ako airi e anarume awakabara mu nyika yo Edjipitu ndisati ndauya mu nyika yo Edjipitu, nge angu. Efraimu na Manase acagara ana angu, hingana Rubheni na Simioni. 6 Asi ana aucabara mumasure me aya, acagara ako, uye awona acatambira nhaka peciseenzeswa zina re hama dzawo. 7 Pandainga ndecibva ku Padhani, Rakeri wakafa pa dii rangu mu nyika yo Kanani, painga pacino mukuwo wakareba kuti tigume ku Efrati. Hino ndakamukotsa ikona mu gwanza rinoenda ku Efrati, kureya Bheterehema.”

8 Hino Israeri wakaona ana a Zuzee uye wakamubvunzisa kuti: “Aya ndiani?” 9 Zuzee wakadaira baba ake kuti: “Ndi ana angu andakapaswa na Mwari mu nyika ino.” Hino iyena wakati: “Ndapota, aunzise pano kuti ndiakomborere.” 10 Madziso a Israeri ainga asikacakwanisi kuona zvakanaka, ngokuti wainga acembera. Ngokudaro, Zuzee wakatora ana ake oaendesa padhuze naye, Israeri wakaapsvoda uye oakhumbatira. 11 Israeri wakati kuna Zuzee: “Ndainga ndisikarangariri kuti ndaizoonazve hope yako, asi Mwari andiita kuti ndionewo ana* ako.” 12 Hino Zuzee wakaabvisa pa mabvi a Israeri, uye wakahwarara.

13 Pedzepo, Zuzee wakatora ana ake airi: Wakabata Efraimu no moko kwawo wake, kuti agare ku moko boshwe wa Israeri, uye Manase wakamubata no moko boshwe kuti agare ku moko kwawo wa Israeri, pedzepo wakaaendesa pamberi pa baba ake. 14 Asi kunyazi Efraimu ndiye wainga ari mudoko, Israeri wakatambaradza moko kwawo wake outsanzika pamusoro wake, uye moko boshwe wake wakautsanzika pamusoro wa Manase. Wakatsanzika moko dzake kudaro ecizviziya, kunyazi hazvo Manase ndiye wainga ari dangwe. 15 Hino Djakobo wakakomborera Zuzee uye wakati:

17 Zuzee paakaona kuti moko kwawo wa baba ake wairumbwa uri pamusoro pa Efraimu, iyena aazi kuzvipfarira, ndiyo ndaa, wakaedza kubata nyara ya baba ake, kuti aibvise pamusoro pa Efraimu uye aitsanzike pamusoro pa Manase. 18 Zuzee wakati kuna baba ake: “Musaite kudaro baba angu, ngokuti dangwe ndi iri. Tsanzikai moko kwawo wenyu pamusoro pake.” 19 Asi baba ake airamba kuita izvona uye aiti: “Ndinozviziya mwana wangu, ndinozviziya. Iyenawo ucagara dzinza uye ucagara mukuru. Asi mudoko wake ucagara mukuru maningi kupinda iyena, uye ana* a Efraimu acawanda oezana no madzinza akawanda.” 20 Ngokudaro, wakarumbwa eciakomborera pa zuwa irona, eciti:

Ngokudaro, iyena wakarumbwa ecikanda Efraimu mberi ka Manase.

21 Mumasure mazvo, Israeri wakati kuna Zuzee: “Inini ndiri kufa, asi zvezvirokwazvo Mwari acarumbwa anemwi uye acamuhwirinzai ku nyika yo madzitsekuru enyu. 22 Asi inini, ndinozokupasa nyika yakakura kudarika hama dzako, iyo yandakatorera Aamori ndeciseenzesa supada yangu uye uta wangu.”

49 Djakobo wakadainza ana ake uye oabvunza kuti: “Unganai kuti ndimubvunzei zvicaitika kamuri mu mazuwa e kupedzesera. 2 Unganai muzwe, imwimwi ana a Djakobo, purutanai Israeri baba enyu.

3 “Rubheni, iwewe ndiwe dangwe rangu, simba rangu uye wekutanga ke simba rangu re kubara, iwewe uri mukuru pa kukudzwa, uye mukuru pa kugara no simba. 4 Nge kutama kako kugara no ungwaru, hinga mvura ino simba isikazi kugadzikana, wakakwira pa kama ya baba ako, ndiyo ndaa auzobudiriri. Pa zuwa irona, iwewe wakasvipisa kama yangu. Zvezvirokwazvo, iyena wakakwiradi kamare!

5 “Simioni na Revhi i hama no hama. Awona ndi anarume anoita zvecisimba, anoseenzesa masupada awo kuti auraye. 6 Andizopindi mu cikwata cawo. Uye andizobatanidzwi nawo, ngokuti paainga akatsamwa, akauraya anhu uye akagura midzira dzo murenje yo n’ombe yo kono nge kudziwaraidza. 7 Ngakutukwe kutsamwa kawo, ngokuti kakashata, uye shungu dzawo, ngokuti dzinoita kuti aite zviro no hasha. Inini ndicaabararisa mu nharaunda ya Djakobo, uye ndicaabararisa mu Israeri.

8 “Asi kauri iwewe Djudha, hama dzako dzicakukudza. Nyara yako icagara pa mutsipa pe azondi ako. Ana a baba ako acahwarara pamberi pako. 9 Djudha ndi kamwana ke mhondoro. Mwana wangu, iwewe unozoenda mumasure me kurhya cinyama cawaruma. Iyena unogodama uye unodzidamura hinga zvinoita mhondoro, uye kuita hingana mhondoro, ndiani unozogara no ushingi we kumumutsa? 10 Ndonga ye umambo aizobviswi pana Djudha, kunyazi ndonga ye utongi aizobviswi pakati pe tsoka dzake, dakara Shiro* auya, uye anhu ese acamuzwira. 11 Iyena ucasungira dhongi rake pa muuvha, uye mwana we dhongi pa muuvha wakanaka maningi, iyena ucaphadzira macira ake mu vhinyu uye mu ngazi yo uvha. 12 Madziso ake akapsvukirira no kusvipirira nge ndaa yo vhinyu, uye mazino ake akacena nge ndaa ye kumwa mukaka.

13 “Zebhuroni ucagara mu muceto me bahari, mu muceto munoimiswa manavhiyo, uye mugano wake unozoenda dakara ku Sidhoni.

14 “Isakari i dhongi rino makodo akabamba, rinowata rakathwara mitoro miiri pa musana paro. 15 Iyena ucaona kuti mbuto yaakawata yakanaka uye nyikeyo inopfadza. Iyena ucakotamisa phewa rake kuti athware mutoro uye ucatendera kuita basa re kubambidzirhwa.

16 “Dhani ucatonga anhu ake hinga rimwe re madzinza a Israeri. 17 Dhani unozoita hingana nyoka iri mu muceto me gwanza, hingana nyoka ino nyanga iri mu muceto me gwanza, iyo inoruma cisisino ce kavharo, zvekuti muhambisi we kavharo unombwera nge gotsi. 18 Ndicaetsera kununurhwa kunobva kamuri, imwimwi Djehovha.

19 “Asi panocokuita na Gadhi, cikwata ce apambi cicamurhwisa, asi iyena ucateera oarhwisa nge cesure.

20 “Zvekurhya* zva Azeri zvicawanda maningi,* uye iyena ucapasa anhu zvekurhya zvakasisira kupaswa mambo.

21 “Nafitari i dzoma rinomhuka maningi. Iyena unobhuya masoko akanaka maningi.

22 “Zuzee i nhai yo muti unobara micero, muti unobara micero uri padhuze no mvura, zvekuti nhai dzawo dzinokura dakara pamusoro pe muru. 23 Asi akhandiri e mupasha aimunetsa, akamukhandirira mipasha uye akamucengetera bundu. 24 Kunyazi zvakadaro, mupasha wake wakarumbwa uri mu mbuto mawo, uye nyara dzake dzakarumbwa dzakabamba. Izvona zvaibva kuna Mwari wa Djakobo, ano simba, muushi, uye buwe ra Israeri. 25 Iyena* unobva kuna Mwari wa baba ake, Mwari acamubetsera, iyena ano we Masimba Ese, uye Mwari acakukomborera no makomborero e kumusoro kudenga, makomborero e pasi pakadzika, makomborero e kugara no ana akawanda uye no makomborero e kugara no zvipfuyo zvakawanda. 26 Makomborero a baba ako acagara akakura kudarika makomborero e mu matunhu o kuenda no kuenda, kudarika zviro zvakanaka zviri mu matunhu o kuenda no kuenda. Makomborero awona acarumbwa ari pamusoro pa Zuzee, pamusoro pe wakasanangurhwa pakati pe hama dzake.

27 “Bhenjamii ucarumbwa ecibvaura hinga mhumhi. Comacibesi ucarhya caanonga abata, uye cousiku ucakoanisa zvaanonga apamba.”

28 Aya ndiwo madzinza 12 e Israeri, uye izvi ndizvo zvaakabvunzwa na baba awo paainga eciakomborera. Iyena wakapasa makomborero umwe na umwe maererano no zvaakasisira.

29 Mumasure mazvo, iyena wakaabvunza kuti: “Inini ndicafa mbai-mbai pano. Ndikotsei pamwepo no madzibaba angu mu bako riri mu munda wa Efroni Muhiti, 30 bako riri mu munda we ku Makipera pamberi pe Mamere, mu nyika yo Kanani, wakatengwa na Abrahamu kuna Efroni Muhiti, kuti ugare mbuto yake yaaizoseenzesa hinga masiye. 31 Imona akakotseremo Abrahamu no mukadzi wake Sara. Imona akakotseremo Izaki no mukadzi wake Rabheka, uye imona ndakakotseremo Reiya. 32 Munda no bako zviri mauri zvakatengwa kubva ku ana a Hiti.”

33 Ngokudaro, Djakobo wakapedza kupasa nhungamiriro ana ake. Hino iyena wakakwidza mirenje dzake pa kama, wakafema kekupedzesera, uye wakakotswa hinga makotserhwe aiizwa anhu e kumba kake.

50 Pedzepo Zuzee wakawira baba ake, wakacema akaakhumbatira uye wakaapsvoda. 2 Mumasure mazvo, Zuzee wakabvunza aseenzi ake no arapi kuti aomese mutumbi wa baba ake kuti usaore. Ngokudaro, arapi akagadzirira mutumbi wa Israeri, 3 uye akatora mazuwa 40 kuti aite izvona, ngokuti ii ndiyo nguwa yaaipedza ecigadzirira mutumbi kuti utame kuora uye Aedjipitu akarumbwa ecimucema* ke mazuwa 70.

4 Mazuwa e mariro paakapera, Zuzee wakabvunza macinda a* Faraoo kuti: “Kana ndazwirhwa nyasha pamberi penyu, ndiri kukumbirawo kuti muende koobvunza mambo Faraoo masoko aya: 5 ‘Baba angu akaita kuti ndipike, awona akati: “Inini ndiri kufa. Iwewe unodikana kuenda koondikotsa mu bako rangu, randakacera mu nyika yo Kanani.” Ndapota, ndiri kukumbirawo kuti ndiende kookotsa baba angu, uye mumasure mazvo ndicahwirira.’” 6 Faraoo wakadaira eciti: “Enda kookotsa baba ako hinga zvawakaapikira.”

7 Ngokudaro, Zuzee wakaenda kookotsa baba ake, uye aseenzi ese a Faraoo akaenda pamwepo naye, kutobatanidzawo no akuru e umambo wake uye akuru e nyika yese yo Edjipitu, 8 uyewo no ese e pa nyumba pa Zuzee, hama dzake uye no ese e pa nyumba pa baba ake. Asi akasiya basi ana awo, mabira awo uye n’ombe dzawo mu nyika yo Gozeni. 9 Ngoro uye ahambisi e makavharo, akaenda pamwepo naye; cikwata ici ce anhu cainga cakakura maningi. 10 Akazoguma pa mbuto ye kupurira ye Atadhi, iri ku mutanha we Djorodhani, uye ipona akaita mariro akakura maningi;* Zuzee wakacema baba ake ke mazuwa manomwe. 11 Agari e nyika iyona, Akanani, akaona kucema kawo pa mbuto ye kupurira ye Atadhi, uye akakhuwa* eciti: “Aya i mariro akakura maningi ku Aedjipitu!” Ndiyo ndaa mbuto iyona iri mu mutanha we Djorodhani, yakapaswa zina rokuti Abheri-miziraimu.*

12 Ngokudaro, ana ake akaita hinga zvaainga abvunzwa. 13 Ana ake akamuthwara oenda naye ku nyika yo Kanani uye akamukotsa mu bako riri mu munda we Makipera, munda uri mberi ke Mamere, wakatengwa na Abrahamu kuna Efroni Muhiti, kuti ugare mbuto yaizoseenzeswa hinga masiye. 14 Mumasure me kukotsa baba ake, Zuzee wakahwirira ku Edjipitu no hama dzake uye no ese ainga aenda naye kookotsa baba ake.

15 Paakaona kuti baba awo ainga afa, hama dza Zuzee dzakabvunzana kuti: “Zvingaita kuti Zuzee acakaticengetera bundu uye iyena ucatihwirinzira zvakashata zvese zvatakamuitira.” 16 Ndiyo ndaa, awona akatumira masoko kuna Zuzee eciti: “Baba ako asati afa akabhuya kudai: 17 ‘Munodikana kubvunza Zuzee kudai: “Ndinokudeketerera: Ndapota, rekerera kushaisha ke hama dzako uye citema caakaita nge kukuitira zvakashata.”’ Parizvino tapota, rekererai kushaisha ke aseenzi a Mwari wa baba enyu.” Uye Zuzee wakacema paakabvunzwa masoko aya. 18 Mumasure mazvo, hama dzake dzakauyawo uye dzakahwarara pamberi pake uye dzakati: “Tiri pano hingana aranda enyu!” 19 Zuzee wakaabvunza kuti: “Musathye. Kodi inini ndiri Mwari here kuti ndimutongei? 20 Kunyazi hazvo maida kundiitira zvakashata, Mwari aita kuti zvihambe zvakanaka uye kuti upenyu we anhu akawanda ucengetedzwe, uye izvona ndizvo zviri kuitika dakara nyamasi uno. 21 Hino musathye. Inini ndicarumbwa ndecimupasai zvekurhya, imwimwi pamwepo no ana enyu.” Ngokudaro, iyena wakaanyaradza uye ngo masoko awona wakaagondesa kuti apana zviro zvakashata zvaizoitika.

22 Zuzee wakarumbwa ecirarama mu Edjipitu, iyena pamwepo no nyumba ya baba ake, uye Zuzee wakararama makore anokwana 110. 23 Zuzee wakaona mubarirhwana wecitatu we ana a Efraimu, uyewo we ana a Makiri mwana wa Manase. Zuzee waiaona hinga ana ake kamare.* 24 Pakupedzesera, Zuzee wakati ku hama dzake: “Inini ndaakuda kufa, asi zvezvirokwazvo Mwari acamurangarirai, uye zvezvirokwazvo acamubvisai mu nyika ino omuendesai ku nyika yaakapikira kupasa Abrahamu, Izaki, uye Djakobo.” 25 Ndiyo ndaa, Zuzee wakati ku ana a Israeri: “Zvezvirokwazvo Mwari acamurangarirai. Pamucabuda mu nyika ino, munodikana kubuda no makodo angu. Ngokudaro, Zuzee wakaita kuti awona apike kuti aizoita izvona.” 26 Uye Zuzee wakafa ano makore anokwana 110; hino awona akaita kuti uomeswe mutumbi wake kuti usaore, uye akaukanda mu kashau ku Edjipitu.