Tsamba Inobva ku Dare Rinotungamirira

Hama no hanzvadzi dzinodiwa:

Kuda katinoita Mwari uye anhu kunoita kuti “tiende . . . uye toita afundi kune anhu e madzinza ese, teciabhabhatidza.” (Mat. 28:19, 20; Mark. 12:28-31) Rudo re cokwadi rino simba. Irona rinokwanisa kubaya mwoyo ye anhu ese ano “cido cakanaka ce kuona upenyu usikaperi.”—Zvii. 13:48.

Mu nguwa yadarika, tainyanya kukanda ndangariro dzedu pakubata no musoro zvataida kubhuya mu basa re kuparidzira uye kusiya mabhuku. Zvinoku, taakudikana kutunhudzira mushobo wedu wekucedza no anhu. Tinoda kupangidza rudo ku anhu nge kureketa zviro zvaanopfarira. Izvi zvinoreya kuti tinodikana kucinja-cinja no kukasika, toedza kurangarira zviri kuanetsa uye zvinopfarirhwa no munhu umwe na umwe. Bhurushura rino ricatibetsera kudini kuita izvona?

Bhurushura iri, rino fundo 12 dzinopangidza mawara atinodikana kusakurira kuti tipangidze rudo uye kuita afundi. Fundo imwe na imwe inobva mu Bhaibheri inopangidza unhu wa Djesu kana kuti unhu wakapangidzwa no Akristu e kutanga paaita basa re kuparidzira. Cinangwa cedu akubatapi no musoro zvaticabhuya, asi cinangwa cedu ngecekupsvaka kupangidza rudo kuno anhu ese. I zvirokwazvo kuti mawara 12 aya anodikana kupangidzwa patinonga teciita basa re kuparidzira, asi ngationei kuti ngei zvecikosha kupangidza mawara aya maka-maka pakutangisa makani uye kuhwirira ku munhu wapfarira kana kuti kuitisa fundo ye Bhaibheri.

Pamunonga mecifunda fundo imwe na imwe, nyasai kurangarira kuti mungapangidza kudini mawara awona pamunonga mecireketa no anhu ari ku mbuto yamunogara. Psvakai kutunhudzira rudo renyu kuna Djehovha uye ku anhu. Kunyazi no uzii upi hawo wamunawo, rudo irona ndirona ricamubetserai kudzadzisa cinangwa cenyu cekuita afundi.

Makomborero akakura maningi katiri, kuseenza pamwepo na imwimwi. (Zef. 3:9) Tinoita munamato kuti Djehovha arumbwe ecikomborera kupeta masimba kamunoita pa kuda anhu uye kuita afundi!