Mutungamiriri Mupsva uye Anakadzi Airi Ano Ushingi

Djoshuwa wakatungamirira anhu a Djehovha ke makore akawanda uye wakafa paainga ano makore 110. Djoshuwa paainga ari mupenyu, Aisraeri ainamata Djehovha. Asi mumasure mekuti Djoshuwa afa, Aisraeri akatanga kuteedzera Akanani uye akanamata madzimwari e kunyepa. Ndiyo ndaa, Djehovha akasiya Mambo we Kanani unodainzwa Jabhini kuti abate Aisraeri ngo mushobo wakashata maningi. Pedzepo, Aisraeri akatanga kukumbira rubetso Djehovha. Ngokudaro, Djehovha akasanangura mwanarume unozwi Bharaki kuti acengete Aisraeri uye aabetsere kuita zvakanaka.

Bharaki waidikana kuziya zvaaizoita. Ndiyo ndaa, Djehovha akatuma Muphorofitakadzi unozwi Dhebhora kuti arekete naye. Dhebhora wakabvunza Bharaki kuti: ‘Sanangurai anarume anokwana 10 000 uye kwira Dunhu re Tabhori. Pedzepo, cita uye irhwa no anyahondo a Mambo Jabhini ku Murambo we Kishoni. Ku mbuto iyona, ndikona kaucakunda Sizera uye no mutungamiriri we anyahondo a Jabhini.’ Bharaki wakabvunza Dhebhora kuti: ‘Inini ndicaenda kana imwimwi mukaenda na inini.’ Dhebhora wakadaira kuti: ‘Honde, inini ndicaenda. Asi Djehovha akabhuya kuti imwimwi amuzourai Sizera. Mwanakadzi umweni ndiye acazviita.’

Hino Dhebhora, Bharaki uye no anarume 10 000 akakwira Dunhu re Tabhori kuti agadzirire kuti arhwe. Sizera paakaziya izvona, wakatora anyahondo ano simba uye ne karu dze hondo. Pedzepo, wakaenda koosongana no Aisreri ku Murambo we Kishoni. Dhebhora wakabvunza Bharaki kuti: ‘Nyamasi mucawina hondo ii, Djehovha ana imwimwi.’ Bharaki uye no anarume 10 000 akacita ecigogoma ecibuda mu dunhu uye akaenda koorhwa na Sizera no anyahondo ake.

Hino, Djehovha akaita kuti Murambo we Kishoni udzare ne mvura. Makaru e anyahondo a Sizera akandondomera mu mataka. Bharaki ne anyahondo ake akakunda anyahondo a Sizera, asi Sizera wakacita mu karu yake otiza! Iyena wakafindara mu tenda re mwanakadzi unozwi Jaeri. Jaeri wakapasa Sizera mukaka kuti amwe uye wakatora ciro cekufuka womufukidza. Iyena wainga wakaremba maningi zvekuti wakatowata. Jaeri wakanyangwira Sizera, omubaya no muti mu musoro uye wakafirepo.

Bharaki wakaenda koopsvaka Sizera. Hino Jaeri wakabuda mu tenda rake uye wakabvunza Bharaki kuti: ‘Mwanarume wamurikupvsaka uri pano.’ Bharaki wakapinda mu tenda ra Jaeri uye wakaona Sizera akafa. Pari zvino Aisraeri ainga akunda azondi awo. Hino Bharaki na Dhebhora akatanga kuemba ngoma kuti atende Djehovha no rubetso raainga apaswa. Ngokudaro Aisraeri akararama mu runyararo ke makore anokwana 40.