Djonatani Wakagara Shamwari Ino Ushingi uye Yakangondeka

Mwana wekutanga wa Sauri waizwi Djonatani, wainga ari musurudado ano ushingi wakakura. Dhavhidhi wakatoguma pakubhuya kuti Djonatani waigogoma kutodarika cikodzi uye wainga ano simba kudarika mhondoro. Zuwa rimweni, Djonatani no mubetseri wake wakaona Afiristiya anganani ainga ari mu dunhu. Djonatani wakabvunza mubetseri wake kuti: ‘Kana Afiristiya akatidainza kuti tikwire kuenda ku dunhu koorhwa nawo, ici cipangidzo cekuti Djehovha acatibetsera kuti tikunde.’ Uye ndizvona zvakazoitika. Afiristiya akadainza Djonatani pamwepo no mubetseri wake kuti akwira mu dunhu. Ari airi akakwira kuenda koorhwa uye akakunda Afiristiya anokwana kuita 20.

Ngokuti Djonatani wainga ari mwana wekutanga wa Sauri, iyena wainga ano citenderhwa cekugara mambo. Asi iyena waizviziya kuti Djehovha ainga akasanangura Dhavhidhi kuti agare mambo anoteera mumasure ma Sauri. Kunyazi zvakadaro, Djonatani wainga asikaitiri Dhavhidhi shanje. Kusiya izvona, iyena wakatogara shamwari ye padhuze ya Dhavhidhi. Djonatani na Dhavhidhi akagondesana kuti aizodziirirana. Djonatani wakapasa Dhavhidhi bhaci, supada, uta uye sintu rake hinga cipangidzo ce ushamwari.

Dhavhidhi paaitiza Sauri, Djonatani wakaenda koonana naye uye wakamubvunza kuti: ‘Bamba uye shinga. Djehovha akusanangura kuti ugare mambo. Uye baba angu anotozviziya izvona.’ Zvainga zvakanaka kugara no shamwari yakaita hinga Djonatani, andizvopi?

Djonatani wakakanda upenyu wake pa ngozi kuti abetsere shamwari yake. Paakazviziya kuti Sauri waida kuuraya Dhavhidhi, Djonatani wakaita zviri zvese kuti Sauri acinje marangariro ake. Asi Sauri wakatonyangadzirhwa maningi Djonatani. Mumasure me kacinguwa, Djonatani wakafa pamwepo na Sauri ku hondo.

Hino Dhavhidhi wakapsvaka Mefibhozeti mwana wa Djonatani uye wakati kaari: ‘Baba ako akagara shamwari ye zvirokwazvo kandiri, ndiyo ndaa inini ndicakucengeta dakara ke upenyu wako wese. Iwewe ucagara mu nyumba yangu uye ucarhya zvakanakisisa zve pameza yangu.’ Dhavhidhi aazi kumbokanganwa shamwari yake Djonatani.