Djesu Akasanangura Sauro

Sauro wakabarhwa mu thaundi ro Tarso. Iyena wainga ari Mufarisi uye wainyasa kuziya Mitemo ye Adjudha. Asi waizonda Akristu. Iyena waipfupfurudza Akristu eciatora mu nyumba dzawo uye waiyakanda mu kadheya. Anhu paaiuraya mufundi Estevha no mapuwe, Sauro wakarumbwa akaima eciringira.

Sauro waizonda Akristu, zvekuti wakatokumbira citenderhwa ku mupristi mukuru kuti aende dakara ku Dhamasko kuti asunge Akristu airaramira ikona. Sauro paakaguma padhuze no Dhamasko, ciedza caibaka no simba, cakatanga kunyetuka pamberi pake uye iyena wakambwera pasi. Sauro wakazwa izwi reciti: ‘Sauro, ngei uri kunditeera?’ Sauro wakadaira eciti: ‘Muri ani?’ Djesu akadaira kuti: ‘Ndini Djesu. Ndinoda kuti uende ku Dhamasko, ikona ucaziya zvaunodika kuita.’ Pa nguwa iyona, Sauro wakagara bofu uye anarume ekuti aiita rhwendo naye akabata muoko wake uye akamutora kuenda naye ku Dhamasko.

Ku Dhamasko, kaigara Mukristu umweni wakagondeka waizwi Ananiya. Djesu akaenda kaari ari mu ciono uye akati: ‘Enda kumba ka Djudha, mugwanza rinozwi muoko kwawo uye psvaka Sauro.’ Ananiya wakabhuya kuti: ‘Asi tenzi inini ndakambozwa maningi ngezva Sauro! Iyena unoda kukanda mu kadheya afundi enyu ese!’ Djesu akadaira eciti: ‘Enda kaari. Inini ndakasanangura Sauro kuti aparidzire masoko akanaka ku mbuto dzakawanda.’

Ananiya wakaenda koosongana na Sauro uye wakati: ‘Djesu andituma kuti ndiporese madziso ako.’ Hino Sauro wakahwirirazve kuona. Iyena wakafunda ngezva Djesu uye wakagara mufundi wake. Mumasure me kubhabhatidzwa, Sauro wakatanga kuparidzira mumasinagoga pamwepo no Akristu amweni. Rangaridza kuti Adjudha aiona kudini Sauro paaireketa ngezva Djesu!

Ke makore matatu, Sauro wakagara ku Dhamasko eciparidzira. Asi Adjudha akanyangadzwa maningi zvekuti akaronga kuda kumuuraya. Hama dze mu ungano padzakaziya ngezve urongwa uu wakashata, awona akabetsera Sauro kuti atize. Akamukanda mukati me citengu cakakura, akasunga citenguco ne bote uye akacicitisa no pa boo ro pa muru we thaundi.

Sauro paakaguma ku Djerusarema, iyena wakaedza kudzibatanidza no Akristu amweni. Asi awona aimuthya. Hino, mufundi umweni unozwi Bharnabhee, wakazwira usisi Sauro. Iyena wakatora Sauro oenda naye kune aphostori amweni uye wakaapanganidzira kuti Sauro wainga acinja. Mumasure mazvo, Sauro wakatanga kuparidzira masoko akanaka no ungano ye ku Djerusarema. Nokuhamba ke nguwa, iyena wakatanga kudainzwa kuti Pauro.