Pauro Unoendeswa ku Roma

Rhwendo recitatu re kuparidzira ra Pauro, rakapedzesera ku Djerusarema. Ari ikona, iyena wakasungwa uye wakakandwa mu kadheya. Pa usiku umweni, Djesu akadzipangidza kuna Pauro ari muciono uye akabhuya kuti: ‘Enda ku Roma uye paridzira ikona.’ Pauro wakatorhwa ku Djerusarema kuti aende ku Sezareya, uye wakasungwa ke makore anokwana kuita mairi. Paainga ecitongwa no mutongi Festo, Pauro wakakumbira eciti: ‘Inini ndinoda kootongwa na Sezari ku Roma.’ Festo wakadaira eciti: “Sezvo wakumbira kutongwa na Sezari, ucatongwa na Sezari.” Pauro wakakandwa mu navhiyo yaienda ku Roma uye shamwari mbiri dza Pauro dzaizwi Ruka uye Aristarko akaenda naye.

Paainga eciita rhwendo, kakaitika dutu rakakura rakapedza mazuwa akawanda. Anhu ese ainga ari mu navhiyo airangarira kuti acafa. Asi Pauro wakabhuya kuti: ‘Anhumwi garai ne ushingi, isusu atifi. Ngirozi imweni yakandibvunza mu hope kuti: ‘Usathye hako Pauro. Iwewe ucaguma ku Roma uye anhu ese ari mu navhiyo newe acagumawo.’ Shingai! Isusu atizofi.’

Dutu rakarumbwa recivhuvhuta maningi ke mazuwa anokwana kuita 14. Anarume ainga ari mu navhiyo akakwanisa kuona citsuwa uye akasanangura kuenda ikona. Cainga ciri citsuwa ce Marta. Navhiyo yawo yakaguka, asi ese anokwana kuita 276 ainga ari imona akapona. Anganani awo akaenda ecisambirira dakara aguma ku citsuwa icona uye amweni akaguma ikona ngekubata cidimbu ce navhiyo. Ese paakaguma ikona, anhu e ku Marta akaatambira zvakanaka uye akabesera muriro kuti agote.

Mumasure me kudarika mwedzi mitatu, masurudado akatora Pauro kuti aende ku Roma eciseenzesa navhiyo imweni. Pauro paakaguma ku Roma, hama dzakaenda koosongana naye. Paakaona hama dzeciguma, Pauro wakatenda Djehovha uye wakatunhudzira kugara ne ushingi. Kunyazi hazvo Pauro wainga ari musungwa, iyena wakatenderhwa kugara mu nyumba ye ku arugari, asi ecirindwa no musurudado. Iyena wakagara ikona ke makore mairi. Anhu paaienda koovhakacira Pauro, iyena waireketa nawo ngezve Umambo wa Mwari uye ngezva Djesu. Pauro wakatarira tsamba ku ungano dzainga dziri ku Aziya Menori uye ku Djudhiya. Ngano ya Pauro inotifundisa kuti Djehovha akamuseenzesa kuti aparidzire anhu mu mbuto dzakawanda.