Rumbwai “Mecibambisana”

1. Maererano na 1 Atesaronika 5:11, ibasa ripi rinokosha ratingakwanisa kuita?

IMWIMWI makambopinda musangano mu Nyumba ye Umambo here mumasure mekugadzirhwa kana kugadziriswa? Zvezvirokwazvo imwimwi munonyasa kuedzurira zuwa irona. Mwoyo wenyu wainyasa kutenda Djehovha. Zvingatoita kuti mainga musikatokwanisi kuemba ngekupfara kamainga meciita. Zvezvirokwazvo, basa rese rinobatanidzwa pakuwaka Nyumba ye Umambo rinokudza Djehovha. Asi kuno basa rimweni rinonyasa kukudza Djehovha. Basa iri rinobatanidza ciro cinonyanya kukosha kupinda kuwaka Nyumba ye Umambo. Irona rinobatanidza anhu anopinda mu Nyumba ye Umambo kuti anamate Djehovha. Uye basa iri ndirona rairekethwa ndi muphostori Pauro paakatara masoko atinogumira pana 1 Atesaronika 5:11, tsamba yakawakirhwa fundo yedu.—Erengai.

2. Ticaonei mu fundo ino?

² Muphostori Pauro imuezaniso wakanaka we munhu waikwanisa kubambisa hama dzake. Iyena waipangidza usisi ngekudzikanda pa mbuto ye amweni. Mu fundo ino, ticawona kuti iyena wakabetsera kudini hama no hanzvadzi dzake (1) kuti ashingirire zvinetso, (2) kuti agare mu runyararo no amweni, uye (3) kuti abambise kutenda kawo kuna Djehovha. Ngatiwone kuti tingateedzera kudini muphostori Pauro kuti tibambisewo hama no hanzvadzi dzedu nyamasi uno.—1 Ako. 11:1.

MUPHOSTORI PAURO WAKABETSERA KUDINI HAMA DZAKE KUTI DZISHINGIRIRE ZVINETSO

3. Pauro waiita kudini kuti agare no maonero ari pakati no pakati pakuseenzera Djehovha uye pakudziriritira?

³ Pauro waida maningi hama dzake. Iyena wakambobatanawo no zvinetso zvakawanda, ndiyo ndaa waikwanisa kudzikanda pa mbuto dze hama dzake dzaibatana no zvinetso. Zuwa rimweni, Pauro wakagara asina mare, ndiyo ndaa iyena wakadikana kupsvaka basa kuti akwanise kudziriritira uye kuriritirawo adoni ake e rhwendo. (Zvii. 20:34) Pakutanga iyena wakaseenza na Akira uye Prisira, anhu aikwanisa kuitawo basa rimwero. Kunyazi zvakadaro, muma “Sabudu ese” iyena waiparidzira ku Adjudha uye ku Agrego. Hino Sira na Tomoti paakaguma ikona, “Pauro wakatanga kubatikana basi mu basa rekuparidzira.” (Zvii. 18:2-5) Pauro aambozi kusiya ciro cinonyanya kukosha, kuseenzera Djehovha. Ngekuseenza no simba pakudziriritira uye mu basa rekuparidzira, Pauro wainyasa kubambisa hama dzake. Pauro wakaaedzurira kuti awona ainga asikadikani kusiya kuti basa rekudziriritira uye zviro zvinoitika mu upenyu zviapingaidze kuita zviro zvinonyanya kukosha kana kuti—zvese zvinobatanidzwa pakuseenzera Djehovha.—Afi. 1:10.

4. Pauro na Timoti akabetsera kudini hama dzawo pakurhwisana nokuphikiswa?

⁴ Mumasure me nguwa doko yekuti ugano yeku Tesaronika yaumbwa, hama dzeyo dzakabatana nokuphikiswa kakakura. Zuwa rimweni, cikwata ce aphikisi cinoita zvecisimba caipsvaka Pauro na Sira. Asi ngekuti aazi kuagumira, cikwata icona cakakhwekhweredza “hama dzinganani dzeciaendesa ku anyautongi e thaundi irona,” ecikhuwa eciti: “Anarume aya anoita zviro zvisikaenderani no mitemo ya Sezari.” (Zvii. 17:6, 7) Munokwanisa kurangarira mushobo wakathya Akristu aya ainga ari apsva mu cokwadi paakaona kuti anarume ese e muthaundi ainga asiripi kudii rawo? Awona aikwanisa kusiya kuseenza no simba mu basa ra Djehovha, asi andizvopi zvaidiwa na Pauro. Kunyazi Pauro na Sira akazobuda ikona, awona ainetseka nge ndaa ye ungano ii ipsva. Pauro wakareketa zvinoteera ku Atesaronika: “Tamutumirai Timoti, hama yedu . . . , kuti amubambisei nokumunyaradzai pakutenda kenyu, kuitira kuti pasaoneke unozungunuswa no matambudziko aya.” (1 Ate. 3:2, 3) Zvingatoitawo kuti Timoti wakabatanawo nokutambudzwa ku thaundi rake reku Rista. Iyena wakaona mabambisire akaita Pauro hama dzekweneyo. Zviri pamhene kuti kuona mushobo waitungamirira Djehovha zviro, zvakabetsera Timoti kuti akwanise kubambisa hama no hanzvadzi dzake kuti dzigare no rugondo rekuti zvese zvaizobudirira zvakanaka.—Zvii. 14:8, 19-22; Aheb. 12:2.

5. Hama inozwi Bryant yakabetserhwa kudini no mukuru we ungano?

⁵ Pauro wakaiteizve kuti abambise hama dzake? Pauro na Bharnabhee paakahwirira kuti avhakacire hama dzawo dze Rista, Ikoniyo uye Atiyokiya, awona “akagadza akuru e mu ungano ku ungano imwe na imwe.” (Zvii. 14:21-23) Kuita hingana zvinoitika mu ungano dze mazuwa ano, akuru aya akabetsera maningi ungano dzekweneyo. Onai zvakarekethwa no hama imweni inozwi Bryant. Iyona inoti: “Pandainga ndino makore 15 mai angu akadzingwa. Ndakazwa hingana kuti ndasiiwa ndega uye ndakaora mwoyo.” Cinyi cakabetsera Bryant kuti arhwisane no mugariro uu unoshupha? Iyena unoti: “Mukuru umweni we mu ungano unozwi Tony, waigara ecicedza na inini ku misangano uye ku mbuto dzimweni. Iyena wakareketa nge zve anhu akawanda aipfara kunyazi ecibatana no zvinetso. Imwe ye tsamba yaakandierengera ngeya Pisarema 27:10 uye iyena waigara ecireketa nge zve muezaniso wa Ezekiya. Kunyazi baba ake ainga asiripi muezaniso wakanaka, Ezekiya wainga akagondeka kuna Djehovha.” Zvese izvi zvakabetsera kudini Bryant? Iyena unoti: “Kubetserhwa kandakaizwa no hama kakaita kuti nditange kuseenza mu nguwa yakadzara.” Akuru, garai makagadzirira kubetsera hama dzinoda kubetserhwa no “masoko akanaka” dzakaita hingana Bryant.—Zvie. 12:25.

6. Pauro wakaseenzesei kuti abetsere hama no hanzvadzi dzake?

⁶ Muphostori Pauro wakabetsera hama dzake kuedzurira kuti no rubetso ra Djehovha, “gore guru re apupuri” akakwanisa kukunda zvinetso zvakawanda zve upenyu. (Aheb. 12:1) Pauro waizviziya kuti izvona zvaizobetsera hama dzake kuti dzitunhudzire ushingi, uye dzikande ndangariro dzawo ku zviro zvinonyanya kukosha “thaundi ra Mwari mupenyu.” (Aheb. 12:22) Ndizvona zvirikuitikawo na isusu nyamasi uno. Zviro zvakawanda zvakaitika no anhu e kare zvinotibambisawo nyamasi uno hingana muezaniso wa Gidhiyoni, Bharaki, Dhavhidhi, Samueri no amweniwo. (Aheb. 11:32-35) Muezaniso wekutenda we mazuwa ano ungakwanisawo kutibetsera. Sedhe mundiyari inosotumidza tsamba dze hama no hazvadzi dzecireketa mushobo wadziri kubambiswa mumasure mekuerenga zvakaitika mu upenyu we aseenzi a Djehovha e mazuwa ano.

PAURO WAKAPASA MUEZANISO HAMA DZAKE WEKUGARA MURUNYARARO NA UMWE NA UMWE WAWO

7. Mafundei no zano ra Pauro riri pana Aroma 14:19-21?

⁷ Isusu tinobambisa hama no hanzvadzi dzedu patinoreketa uye kuita zviro zvinounzisa runyararo mu ungano. Asi atidikani kusiya kuti maonero edu akasiyana no maonero e amweni atiparadzanise. Atidikani kubambidzira kuti zviro zviizwe maererano no maonero edu nepoo maonero e amweni aapesani no Bhaibheri. Onai muezaniso unoteera. Mu nguwa ya Pauro ungano dzakawanda dzaiubwa no anhu akasiyana-siyana. Padzainga dzisati dzabhabhatidzwa, hama dzinganani dzaiteerera Mutemo wa Mozesi. Asi Mutemo wa Mozesi pawakapera, mitemo minganani yainga yakaringana no zvekurhya yakapera pamwepo no Mutemo wa Mozesi. (Mark. 7:19) Nge ndaa yazvo, Akristu anganani aiteerera mutemo uu aiwona kuti zvainga zvisina ndaa kurhya ciro cipi haco. Asi kuita izvona zvaishuphira Akristu amweni. Uye nge ndaa yazvo ungano yakaparadzana. Asi masoko a Pauro akapangidza kuti kugara murunyararo kunokosha maningi. Iyena wakati: “Zvirinani kusiya kurhya nyama, kumwa vhinyu kana kuita ciro cipi haco cinoita kuti hama yako ikuhunyike.” (Erengai Aroma 14:19-21.) No masoko aya, Pauro wakabetsera ungano kuona kuti kureketedzana kainga kusikabetseri, asi kaiakuwadza uye kaikuwadzawo ungano yese. Pauro wainga akagadzirirawo kusiya zvitenderhwa zvake kuitira kuti amweni asakuhunyike. (1 Ako. 9:19-22) Nge mushobo umwewo, isusu tinobambisana uye tinorumbwa tiri murunyararo kana tikatama kureketedzana nge ndaa ye nyaya ye hana.

8. Pauro wakaitei pa nguwa yekuti kusapindirana kaibata-bata ungano?

⁸ Pauro wakapasa muezaniso wakanaka wekurumbwa tiri murunyararo panguya yekusama kupindirana nge zve zviro zvinokosha. Mu nguwa ye aphostori, hama dzinganani dzaireketa kuti Akristu ese aidikana kuita ucekeri. Pamweni awona aida kuita izvona kuitira kuti asashorhwe no Adjudha. (Aga. 6:12) Pauro wainga asikatopindirani nazvo. Asi pane kubambidzira kuti zviro zviizwe nge mushobo wake, iyena wakadzidodosa uye wakakumbira rubetso ku aphostori uye ku akuru amweni e mu ungano kuti aite cisananguro. (Zvii. 15:1, 2) Zviro izvi zvakaizwa na Pauro zvakabetsera ungano kuti irumbwe yakapfara uye iri murunyararo.—Zvii. 15:30, 31.

9. Tingateedzera kudini muezaniso wa Pauro?

⁹ Kana pakaoneka cinetso cikuru, isusu tingaita kuti parumbwe norunyararo ngekuteerera nhungamiriro dzatinopaswa na Djehovha peciseenzeswa sangano. Pano nhungamiriro dzakawanda dzinoseenza pamigariro yakasiyana-siyana dzatinogumira mu mabhuku edu, uye mu nhungamiriro dzatinopaswa no sangano. Kana tikapeta masimba kuti titeerere nhungamiriro idzi, haiwa kuedza kukanda zvimitemo zvedu kana kuda kuti zviro zviizwe nge mishobo yedu kucabetsera kuti paoneke runyararo mu ungano.

10. Pauro wakaitei kuti paoneke runyararo mu ungano?

¹⁰ Pauro waiita kuti paoneke runyararo ngekuda nzero dzake pamawara akanaka e hama no hanzvadzi dzake, haiwa pa zvishaishi zvawo. Ngo muezaniso, paaipedzesa kutara tsamba ku Aroma, Pauro wakatara mazina e hama dzakawanda uye kakawanda kakhona iyena waireketa zvakanaka nge zvawo. Isusuwo tingateedzera muezaniso wa Pauro ngekusimba hama no hanzvadzi dzedu nge mawara akanaka aanopangidza. Kuita izvona, zvicabetsera kuti hama no hanzvadzi dzigare no ushamwari wakabamba uye dzitunhudzire kudanana.

11. Kana pakaoneka kusama kupindirana, tinodikana kuitei kuti parumbwe norunyararo?

¹¹ Nguwa dzimweni, akuru akakura pakunamata angasamawo kupindirana. Ndizvona zvakaitika na Pauro uye shamwari yake Bharnabhee. Cakaita kuti anarume airi aya areketedzane ngecekuti aidikana kutora Marko here kuenda naye kurhwendo rawo re umisiyonario. Awona “akareketedzana maningi” uye mumasure mazvo, umwe na umwe wakateera gwanza rake. (Zvii. 15:37-39) Asi Pauro na Bharnabhee uye Marko akazogarazve ari murunyararo ngekuti aiwona kuti runyararo iciro cinokosha maningi mu ungano. Uye nokuhamba ke nguwa, Pauro wakareketa zvakanaka nge zva Marko na Bharnabhee mu tsamba dzake. (1 Ako. 9:6; Ako. 4:10) Isusu tinodikanawo kupeta masimba kuti tigadzirise kusama kupindirana kupi hako kungaoneka mu ungano, uye topetawo masimba kuti tiwone mawara akanaka e hama no hazvadzi dzedu. Kana tikadaro, ticaita kuti paoneke runyararo uye rubatano mu ungano.—Aef. 4:3.

PAURO WAKABAMBISA KUTENDA KE HAMA NO HANZVADZI DZAKE

12. Zvinetso zvipi zvinganani zvirikubatana no hama dzedu nyamasi uno?

¹² Tingabambisa hama dzedu dze mu ungano ngekudzibetsera kuti dzigare nokutenda kakabamba kuna Djehovha. Hama dzinganani dziri kusingirirhwa no anyaukama awo, adoni ekucikora uye ekubasa. Amweni arikurhwisana no nhenda yakakura, uye amweni arikubatana no cinetso cekukonerhwa kurekerera uya wamushaishira. Akristu amweni aano makore akawanda eciseenzera Djehovha uye ecietsera kuti mugumo ugume. Migariro yese ii ingakwanisa kuedza kutenda kedu. Asi zvinoshamisa kuona kuti Akristu e mu nguwa yakadarika akabatanawo no zvitsinzwa zvimwezvo. Asi muphostori Pauro wakaitei kuti abambise kutenda ke hama no hanzvadzi idzi?

13. Pauro wakabetsera kudini hama dzaisekwa nge zviya zvaaitenda?

¹³ Pauro wakaseenzesa Matarhwa kuti abambise kutenda ke hama no hanzvadzi dzake. Ngo muezaniso, Adjudha anganani aikonerhwa kudaira mibvunzo dzaaipaswa nge anyaukama awo ngekuti airangarira kuti fundiso dze ci Djudha dzainga dze pamusoro-soro kupinda dze Cikristu. Zvingaita kuti hama dzakabambiswa maningi nge tsamba yakatumira Pauro ku Ahebheru. (Aheb. 1:5, 6; 2:2, 3; 9:24, 25) Awona aikwanisa kuseenzesa zvakarekethwa na Pauro kuti adaire aya anonga eciaphikisa. Isusu tingaitawo zvimwezvo nyamasi uno. Hama dzakawanda dzinososekwa nge zvaanotenda, asi isusu tingabetsera hama idzi kuti dziziye kupanganidza zvaanotenda. Kana mu ungano muno mudjaha urikusekwa nge zvaanotenda, isusu tingamubetsera kuti agumire masoko akadzara mu mabhuroshura anozwi A Vida — Teve um Criador? uye A Origem da Vida — Cinco Perguntas Que Merecem Resposta.

14. Pauro waiitei kuti abetsere hama no hanzvadzi dzake kunyazi ecibatikana mu basa rekuparidzira?

¹⁴ Pauro wakabambisa hama no hanzvadzi dzake kuti dzipangidze rudo nge “mabasa akanaka.” (Aheb. 10:24) Iyena wakabambisa hama dzake haiwa no masoko basi, asi nge zviya zvaaiita. Ngo muezaniso, hama dzeku Djudha padzaibatana no nzara, Pauro wakabetsera hama idzi ngekudzipasa zvekurhya no zvimweniwo. (Zvii. 11:27-30) Kunyazi ecibatikana mu basa rekuparidzira, Pauro waipsvaka mishobo ye kubetsera hama no hanzvadzi dzake dzaibatana no zvinetso. (Aga. 2:10) Ngekuita kudaro, iyena wakabetsera hama dzake kuti dziwone kuti Djehovha aizowariritira nguwa dzese. Ngo mushobo umwewo, patinoseenzesa nguwa yedu, simba redu uye zvatinokwanisa kuita kuti tibetsere hama dzinonga dzabatana no tsaona dzinoitika dzega, tinonga tecibambisa kutenda kawo. Tingabetserawo ngekupasa mipiro yedu ku basa re nyika yese. Patinoita zviro zvakadaro, tinonga tecibetsera hama no hanzvadzi dzedu kuti dzigonde kuti Djehovha aazombodzisii.

15-16. Tingabetsera kudini hama dzedu dzakaremba pakunamata?

¹⁵ Pauro aambozi kuima kubetsera aya ainga nokutenda kakaremba. Pauro waizwira usisi hama idzi uye waireketa nadzo nge mushobo wakanaka uye unopangidza rudo. (Aheb. 6:9; 10:39) Ngo muezaniso, mu mbuto dzakawanda pa tsamba yaakatarira Ahebheru iyena “waidzibatanidzawo” zvecipangidza kuti iyena waidikanawo kuita zviya zvainga zviri mu tsamba iyona. (Aheb. 2:1, 3) Kuita hingana Pauro, isusu atirembi kubambisa hama dzinokutenda kakaremba. Asi tinopeta masimba kuti tiabambise ngekuapangidza kuti tinoada. Uye zvinokosha kuedzurira kuti patinoreketa no hama dzedu takaterama uye no rudo zvingaabambisa maningi.

¹⁶ Pauro wakagondesa hama no hanzvadzi dzake kuti Djehovha anoona zviro zvese zvakanaka zvatinoita. (Aheb. 10:32-34) Isusuwo tingateedzera muezaniso wake ngekubambisa hama dzakaremba pakunamata. Tingakumbira hameyo kuti itipanganidzire mushobo waakaziya cokwadi, kana eshiperiyensiya yaakabatana nawo inopangidza mushobo yayakabetserhwa na Djehovha. Pedzepo, tingakhorovhera mukana uwona kuti tigondese hama ii kuti Djehovha aazombokanganwi rudo rayakapangidzira Djehovha mu nguwa yakadarika, uye kuti Ayena aazombomusii mune ramangwana. (Aheb. 6:10; 13:5, 6) Makani akadai anobambisa hama dzedu kuti dzirumbwe dzeciseenzera Djehovha.

“RUMBWAI MECIBAMBISANA”

17. Tingaitei kuti tirumbwe tecibambisa hama dzedu?

¹⁷ Kuita hingana munhu unoita basa rekuwaka, unonyasa kudjairana naro nokuhama ke nguwa, isusu tingakwanisawo kugadzirisa mushobo watinobambisa hama dzedu. Isusu tingabetsera hama dzedu kuti dzikunde zvinetso ngekuwapanganidzira maeshiperiyesiya e hama dzakakwanisa kukunda zvinetso zvimwezvo. Tingaita kuti pakati pe hama dzedu paoneke runyararo ngekureketa zvakanaka nge zvawo, ngekupeta masimba kuti runyararo rirumbwe riripo patinobatana no migariro inoita kuti pasaoneke runyararo mu ungano, uye ngekugara murunyararo no hama dzedu pese patinosama kupindirana. Uye tingabambisa kutenda ke hama dzedu ngekuapanganidzira fundo dzinokosha dze mu Bhaibheri, ngekuabetsera pazviro zvekunyama uye ngekubetsera aya akaremba pakunamata.

18. Munodikana kushinga kuitei?

¹⁸ Hama dzinobetsera mu basa rekuwaka dzinopfara maningi nge basa radzinoita. Patinobetsera ungano pa nyaya dzekunamata isusu tingapfarawo. Asi kusiyana no zviwakwa zvisikagari nokusikaperi, mubairo watinoona ngekubambisa hama dzedu unogara nokusikaperi! Ndiyo ndaa tinodikana kurumbwa “tecibambisana uye kubetserana.”—1 Ate. 5:11.