MUSORO WE KUFUNDA 10
NGOMA 31 Hambai na Mwari!
Teedzerai Mushobo we Kurangarira wa Djehovha na Djesu
“Ngokuti Kristu akatambudzika pa nyama, pfekaiwo marangariro amwewo e kudzipira.”—1 PED. 4:1.
CINANGWA
Kuona kuti Pedru wakafundei ngo mushobo wekurangarira wa Djesu uye kuti izvona zvinotifundisei.
1-2. Zvinyi zvinobatanidza kuda Djehovha uye Djesu akapangidza kudini rudo irona?
DJESU akapanganidza kuti ngaupi mutemo unonyanaya kukosha pa Mitemo yese ya Mozesi paakati: “Ida Djehovha Mwari wako no mwoyo wako wese, no upenyu wako wese, no simba rako rese uye no ndangariro dzako dzese.” (Ruka 10:27) Rudo redu kuna Djehovha rinobatanidza mwoyo wedu, izvona zvinobatanidza zvido zvedu, mazwiro edu uye zviro zvinotibata-bata. Zvinobatanidzawo kudzipira kedu kaari no mwoyo wese uye no simba rese. Kusiya izvona, rudo redu kuna Djehovha rinocokuitawo no ndangariro dzedu, izvo zvinobatanidzawo mushobo wedu we kurangarira. Izvirokwazvo, kuti atizogumi pakunyasa kuzwisisa mushobo wese we kurangarira wa Djehovha, asi isusu tingakwanisa kuzwisisa mushobo wake we kurangarira nge kufunda mushobo we “kurangarira wa Djesu,” ngokuti Djesu akateedzera zvakakwana mushobo wekurangarira wa Baba ake.—1 Ako. 2:16 uye masoko ekufunda “isusu tino ndangariro dza Djesu.”
2 Djesu aida Djehovha no ndangariro dzake dzese. Iyena aiziya zvaida Djehovha kuti iyena aite uye ainga akasanangura kuita izvona kunyazi ecibatana no matambudziko. Djesu ainga akakanda ndangariro dzake pakuita kuda ka Baba ake. Hino iyena aazi kusiya kuti ciro cipi haco cigare cinokosha kudarika izvona.
3. Pedru wakagara no makomborero api uye iyena wakakohomedzesa Akristu kuti aitei? (1 Pedru 4:1)
3 Pedru no aphostori amweni akagara no makomborero e kugara na Djesu uye kuona mushobo waairangarira. Pedru paakatara tsamba yake ye kutanga, iyena akakohomedzesa Akristu kuti apfekewo marangariro amwewo e kudzipira a Djesu kana kuti mushobo wake we kurangarira.a (Erengai 1 Pedru 4:1.) Soko rakabhuya Pedru rokuti “pfekaiwo,” rainyanya kuseenzeswa nge anyahondo. Hino tingakwanisa kubhuya kuti mushobo we kurangarira wa Djesu, i ciro cinonyasa kukosha pakurhwisana kedu no cido cokuita citema mu nyika ino ya Shathani.—2 Ako. 10:3-5; Aef 6:12.
4. Ticaonei mu fundo ino?
4 Mu fundo ino ticaona kuti (1) tingaitei kuti tirangarire hingana Djehovha, zvekuti zvicatibetsera kuti tigare takabatana mundangariro, (2) tigare tecidzidodosa (3) tigare no ndangariro dzakanaka nge kugonda Djehovha uye kuita munamato. Kuti tifunde izvona ngatione mushobo wairangarira Djesu uye kuti tingamuteedzera kudini.
RANGARIRAI HINGANA DJEHOVHA
5. Migariro ipi yekuti Pedru aazi kurangarira hingana Djehovha?
5 Pa nguwa imweni, Pedru aazi kurangarira hingana Djehovha. Djesu akabvunza aphostori ake kuti aizoenda ku Djerusarema uye ikona aizosungwa no atungamiriri e magereja, aizotambudzwa uye kuuraiwa. (Mat. 16:21) Pedru waizviziya kuti Djesu ainga ari Mesiya akapikirhwa aizoponesa anhu a Mwari. Ndiyo ndaa, zvakamushuphira kutendera kuti Djehovha aizosiya kuti mwana wake atambudzike kudaro. (Mat. 16:16) Hino Pedru wakadainza Djesu uye akati: “Dzizwirei usisi Tenzi; izvi azvizomboitiki kamuri.” (Mat. 16:22) Djesu aazi kutenderana nazvo ngokuti Pedru wainga asina maonero a Djehovha.
6. Djesu akapangidza kuti aiteedzera mushobo we kurangarira wa Djehovha nge mushobo upi?
6 Djesu aiteedzera zvakakwana mushobo wekurangari wa Baba ake. Ndiyo ndaa, iyena akabhuya kuti kuna Pedru: “Enda sure kangu, Sathani! Iwewe uri buwe rinokuhunyisa kandiri, ngokuti auna marangariro a Mwari, asi uno marangariro e anhu.” (Mat. 16:23) Zvingaita kuti zvikonzero zva Pedru zvainga zvakanaka asi Djesu akaramba zano rake. Djesu aizviziya kuti Djehovha ainga asikadi kuti iyena adzirangarire pacake. Pamugariro uwona, Pedru wakafunda kukosha ke kurangarira hingana Djehovha uye isusu tingakwanisawo kufunda no zvakaitika na Pedru.
7. Pedru wakagadzirisa kudini mushobo wake we kurangarira kuti arangarire hingana Djehovha? (Onai we pa kapa.)
7 Nokuhamba ke nguwa, Pedru wakapangidza kuti wainga ano marangariro amwewo no a Djehovha. Izvona zvakagara pamhene peyakaguma nguwa yekuti anhu ekuti ainga asiripi Adjudha agare dii re anhu a Mwari. Djehovha akagadza Pedru kuti aparidzire Korneriyo umwe we anhu wainga asiripi Adjudha wakatanga kugara Mukristu. Adjudha ainga asikashamwaridzani no anhu asiripi Adjudha. Hino, zvainga zvisikashamisi kuti Pedru waidikana kucinja mushobo wake we kurangarira. Mumasure mekuti Djehovha abetsera Pedru kuti azwisise kuda kake, iyana wakacinja maonero ake ngezve anhu ainga asiripi Adjudha uye wakaenda koovhakacira Korneriyo “asikakani-kani.” (Zviito 10:28, 29) Mugumisiro wakhona ngewe kuti wakaparidzira Korneriyo no ese e pa nyumba pake uye awona ese akabhabhatidzwa.—Zviito 10:21-23, 34, 35, 44-48.
Pedru ecipinda mumba ma Korneriyo (Onai ndima 7)
8. Tingapangidza kudini kuti tinorangarira hingana Djehovha? (1 Pedru 3:8 uye masoko e pasi)
8 Paapadarika nguwa, Pedru wakakohomedzesa Akristu kuti agare akabatana mu marangariro awo kana kuti “kurangarira nge mushobo umwewo.” (Erengai 1 Pedru 3:8 uye masoko e pasi.) Tingaita izvona kana tikafunda mu Bhaibheri mushobo unorangarirhwa na Djehovha uye kumuteedzera. Ngo muezaniso, Djesu akakohomedzesa ateereri ake kuti akande Umambo wa Mwari pa mbhuto yokutanga mu upenyu. (Mat. 6:33) Nge kurangarira izvona, pamweni hama ye mu ungano medu ingasanangura kuseenza hinga mupiyonero kana kuti basa rimweni re mu nguwa yakadzara. Atidi kureketa zviro zvokuti zvingaarembesa kana kuti kuita kuti awona adzirangarire pacawo. Pane kudaro, tinodikana kureketa nge mushobo unoabambisa pa zvinangwa zvowo zvekunamata uye kuapasa rubetso raanoda.
GARAI MUNHU UNODZIDODOSA
9-10. Djesu akapangidza muezaniso upi wakakura we kudzidodosa?
9 Pa usiku asati afa, Djesu akafundisa Pedru no aphostori amweni ngezve kukosha ke kudzidodosa. Djesu ainga akumbira Pedru na Juau kuti aite gadziriro kuitira kurarira kake ke kupedzesera iyena asati afa. Ciro cekuti pamweni ainga agadzirira i cibasiya no tuwariya kuitira kuti umwe wawo asuke tsoka dze aya ainga apikwa asati ararira. Asi ndiani waizonyasa kudzidodosa kuti aite basa irona?
10 Asikarangariri kairi, Djesu akapasa muezaniso wakakura we kudzidodosa. Iyena wakaita ciro cokuti kakawanda caiithwa no muranda uye izvona zvakasiya aphostori akashamisika maningi. Bhaibheri rinobhuya kuti Djesu akadusa djira rake osungira tuwariya mu cihunu uye akakanda mvura mu bhasiya uye akatanga kusuka tsoka dzawo. (Juau 13:4, 5) Djesu akasuka tsoka dze aphostori anokwana kuita 12 kutobatanidzawo no dza Djudha wekuti waizomutengesa. Zvinoita hingana kuti zvakatora nguwa yakareba, asi Djesu akadzidodosa uye akapedza basa rake. Mumasure mazvo iyena akanyasa kuzvipanganidza eciti: “Mazwisisa here zvandamuitirai? Imwimwi munondidainza kuti ‘Mufundisi’ uye ‘Tenzi’, uye muri mu gwanza, ngokuti ndizvo zvandiri. Hino, kana inini, Tenzi uye Mufundisi, ndasuka tsoka dzenyu, imwimwi munodikanawo kusuka tsoka dze umwe na umwe wenyu.”—Juau 13:12-14.
Kudzidodosa ke zvirokwazvo kunobatanidza marangariro edu ecemukati-kati
11. Pedru wakapangidza kudini kuti wainga afundira wara ro kudzidodosa? (1 Pedru 5:5) (Onaiwo mufanikiso.)
11 Pedru wakafundira no kudzidodosa ka Djesu. Mumasure mekuti Djesu ahwirira kudenga, Pedru wakaita cishamiso. Iyena wakarapa mwanarume wakabarhwa akaremara. (Zviito 1:8, 9; 3:2, 6-8) Anhu akawanda akaona cishamiso icona uye akagara dhuze naye. (Zviito 3:11) Kodi Pedru waizokhorovhera mukana uwona kuti adzionese here, sezvo mu tsika yake kugara no ubaba zvaikosha maningi? Haiwa. Pedru wakadzidodosa uye aazi kudzionesa. Wakapasa rukudzo rese kuna Djehovha uye kuna Djesu. Eciti: “Peciseenzeswa zina ra [Djesu] no kutenda kedu mu zina rake, ndizvo zvaita kuti mwanarume uu wamuri kuona uye wamunoziya apore.” (Zviito 3:12-16) Mu tsamba yake ku Akristu, Pedru wakaakohomedzesa kuti apfeke kudzidodosa. Soko iri rinotiedzurira Djesu paakasunga tuwariya mu cihunu kuti asuke tsoka dze aphostori.—Erengai 1 Pedru 5:5.
Mumasure me kuita cishamiso Pedru wakadzidodosa uye wakapasa rukudzo rese kuna Djehovha na Djesu. Isusuwo tingadzidodosa nge kuita zviro zvakanaka tisikaetseri kutendwa kana kupaswa mubairo (Onai mandima 11-12)
12. Kuita hingana Pedru tingarumbwa kudini tecisakurira wara ro kudzidodosa?
12 Tingakwanisa kuteedzera muezaniso wa Pedru nge kurumbwa tecisakurira wara ro kudzidodosa. Asi edzurirai kuti azvikwani basi kureketa nge mushobo unoita hingana kuti muri kudzidodosa. Pedru wakaseenzesa Soko rokuti kudzidodosa mundangariro, izvona zvinopangidza kuti kudzidodosa ke zviro kwazvo zvinobatanidza marangariro e mukati-kati—“kudzidodosa ke mu mwiya.” Tinoita zviro zvakanaka ku anhu amweni ngekuti tinoda Djehovha uye anhu haiwa kuti tidzionese. Isusu tinopangidza kudzidodosa ke zvirokwazvo nge kuseenzera Djehovha uye hama dzedu no mupfaro kunyazi anhu amweni asikazvioni.—Mat. 6:1-4.
GARAI NO “NDANGARIRO DZAKANAKA”
13. Cinyi cinobatanidzwa pakugara no “ndangariro dzakanaka”?
13 Cinyi cinobatanidzwa pakugara no “ndangariro dzakanaka”? (1 Ped. 4:7) Mukristu uno ndangariro dzakanaka, unoita zviri zvese kuti aite zvisananguro zvinoenderana no marangariro a Djehovha. Iyena unozwisisa kuti apana ciro cinokosha mu upenyu kudarika ushamwari wake na Djehovha. Kusiya izvona, iyena uno maonero ari pakati no pakati uye unotendera kuti aazii zvese. Uya uno ndangariro dzakanaka unopangidza kuti unogonda Djehovha nge kuita munamato nguwa dzese ecikumbira nhungamiriro dzake.b
14. Migariro ipi yokuti Pedru aazi kugonda Djehovha?
14 Pa usiku asati afa, Djesu akabvunza afundi ake kuti: “Usiku uno, mwese mucanditiza.” Ecinyanya kudzigonda, Pedru wakamudaira eciti: “Kunyazi anhu ese akamutizai nge ndaa yo zvicaitika kamuri, inini andimutizii!” Pa usiku uwona kamare Djesu akaapasa zano eciti: “Rumbwai makarinda uye rumbwai mecinamata.” (Mat. 26:31, 33, 41) Kudai Pedru wakateerera zano irona, pamweni iyena waida kugara no ushingi we kubhuya kuti wainga ari mufundi wa Djesu. Asi iyena wakaramba Tenzi wake uye mumasure mazvo wakatsukwara maningi nge zviya zvaakaita.—Mat. 26:69-75.
15. Cinyi cakabetsera Djesu kuti arumbwe ano ndangariro dzakanaka pa usiku asati afa?
15 Djesu ainyasa kugonda Djehovha. Kunyazi iyena ainga ari munhu akakwana, iyena akanamata kakawanda pa usiku asati afa. Izvona zvakamupasa ushingi kuti iyena aite zviya zvaidiwa na Djehovha kuti iyena aite. (Mat. 26:39, 42, 44; Juau 18:4, 5) Pedru wakaona kuti Djesu akanamata maningi pa mugariro uya waishupha uye izvona zvakabata-bata maningi upenyu wake.
16. Tinozviziya kudini kuti Pedru wakagara no ndangariro dzakanaka? (1 Pedru 4:7)
16 No kuhamba ke nguwa, Pedru wakatanga kunyasa kugonda Djehovha uye kuita munamato ecikumbira nhungamiriro dzake. Mumasure mekuti Djesu amutswa, iyena akagondesa Pedru uye no aphostori amweni kuti awona aizotambira mwiya mucena kuti akwanise kuparidzira masoko akanaka. Asi Djesu akaakumbira kuti awona aetsere ku Djerusarema dakara izvona zvaitika. (Ruka 24:49; Zviito 1:4, 5) Paainga ecietsera, Pedru waiitei? Iyena no hama dzimweni, “airumbwa ecinamata.” (Zviito 1:13, 14) Paapadarika nguwa, mu tsamba yake yekutanga, iyena wakakohomedzesa Akristu kuti agare no ndangariro dzakanaka uye nguwa dzese kuita munamato ecikumbira nhungamiriro dza Djehovha. (Erengai 1 Pedru 4:7.) Pedru wakafundira kugonda Djehovha uye wakagara tsigiro inokosha maningi mu ungano.—Aga. 2:9.
17. Zvinyi zvatinodikana kurumbwa teciita azvinei no uzii watinawo? (Onaiwo mufanikiso.)
17 Kuti tigare anhu ano ndangariro dzakanaka tinodikana kurumbwa teciita munamato kuna Djehovha azvinei no uzii watinawo. Patinonga tecida kuita zvisananguro zvinokosha, tinonamata kuna Djehovha tecikumbira nhungamiriro dzake tecigonda kuti iyena anozviziya kuti ndi zvipi zvakatinakira.
Pedru wafundira kugonda Djehovha uye kuita munamato kaari. Kana tecida kugara no ndangariro dzakanaka, isusuwo tinodika kuita munamato tecikumbira nhungamiriro dza Djehovha maka-maka paya patinoda kuita zvisananguro zvinokosha maningi (Onai ndima 17)c
18. Tinganyasa kuteedzera kudini Djehovha?
18 Zvinopfadza maningi kuziya kuti Djehovha akatisika no uzii we kuteedzera mawara ake. (Gen. 1:26) Icokwadi kuti atikwanisi kuteedzera Djehovha nge mushobo wakakwana. (Isa. 55:9) Asi, kuita hingana Pedru, tinoda kurumbwa tecirangarira hingana Djehovha uye kugara anhu anodzidodosa uyewo kugara no ndangariro dzakanaka.
NGOMA 30 Baba Angu Mwari Wangu Uye Shamwari Yangu
a Soko rokuti “kudzipira,” pana 1 Pedru 4:1, ringaturikirhwawo hingana “marangariro, muitiro uye mushobo we kurangarira.”
b Kuti muziye zvakawanda zvinoda kureya ndangariro dzakanaka, onai mu jw.org kana kuti mu JW Library® app musoro wakazwi “Pfungwa dzakanaka.” Mu fundo “2 Timoti 1:7 —‘Mwari Haana Kutipa Mweya Wokutya,’” pa dii rakazwi “Kutsanangurwa Kwemavhesi.” Mu ciShona.
c KUPANGANIDZWA KE MUFANIKISO WE PA: Hanzvadzi yeciita munamato nge ce mukati painonga yecietsera kuita intrevhista ye basa.