Teedzerai Kushingaira ka Djesu mu Basa re Kuparidzira

1. Musiano upi uripo pakati pe anhu a Djehovha no aya anodziti Akristu?

KANA pene ciro cinosiyanisa Anhu a Djehovha no aya anodziti Akristu, i kushingairaa mu basa re kuparidzira. (Tito 2:14) Asi nguwa dzimweni zvingatishuphira kuzwa mupfaro kuti tiende mu basa re kuparidzira. Pamweni imwimwi munga dzienzanisira no masoko akarekethwa no mukuru umweni unonyasa kudzipira wakati: “Nguwa dzimweni ndinozwa ndisina cido ce kuenda mu basa re kuparidzira.”

2. Ngei nguwa dzimweni zvingatishuphira kuzwa mupfaro kuti tiende mu basa re kuparidzira?

² Zvingaita kuti imwimwi mugazwa mupfaro pakuita mabasa amweni a Djehovha kudarika basa re kuparidzira. Ngei izvona zveciitika? Ngo muezaniso, patinonga teciwaka uye kugadzirisa Nyumba dze Umambo, patinonga tecibetsera pa ajudha umanitariya kana kubambisa hama dzedu. Pamigariro iyona, tinokwanisa kuona migumisiro yakhona ciripo-ripoco uye zviri nyore kuzwa kuti kupeta masimba kataita kabudirira. Kusiya izvona, zviro mu mbuto iyona zvakanaka maningi; ikona tinozwa rudo uye runyararo re hama uye tinorugondo rekuti tinonyasa kukosheswa nge zviya zvatinoita. Nge dii rimweni, pamweni tinoparidzira mundima imweyo ke makore akawanda uye zvinoita hingana kuti azviripi kubudirira kana kuti anhu anoramba masoko atinoparidzira. Uye tinoziya kuti mugumo zvauri kukhwedera dhuze ticarumbwa tecibatana no kuphikiswa. (Mat. 10:22) Cinyi cicatibetsera kuti tirumbwe tecishingaira kana kuti titunhudzire kushingaira kedu mu basa re kuparidzira?

3. Tinofundei ngezve kushingaira ka Djesu pana Ruka 13:6-9?

³ Tingafundira ngezve kugara tecishingaira mu basa re kuparidzira nge kuona muezaniso wa Djesu. Paiita basa rake re kuparidzira, kushingaira kake akuzi kumbopunguka. Zvezvirokwazvo no kuhamba ke nguwa, iyena wakarumbwa ecitunhudzira kushingaira. (Erengai Ruka 13:6-9.) Pa muezaniso umweni, Djesu unoezanisa basa rake re kuparidzira ne mwanarume umweni unopeta masimba pa kurima muvhinyu. Mwanarumewo wakapedza makore matatu ecirima muvhinyu asi dzainga dzisikabari mucero. Nge mushobo umwewo, Djesu akapedza makore matatu eciparidzira Adjudha asi akawanda ainga asikatendi masoko ake. Kuita hingana mwanarume uyani usikazi kusiya kurima muvhinyu, Djesu aazi kumbosiya kana kuora mwoyo mu basa rake re kuparidzira. Pane kudaro, iyena akabatikana pa kubetsera anhu akawanda kuti atende masoko akanaka.

4. Zviro zvipi zvirongomuna zvaticafunda pa muezaniso wa Djesu?

⁴ Mufundo ino ticaona kuti Djesu akapangidza kudini kushingaira mu basa re kuparidzira, maka-maka pa nguwa yekupedzesera ye mwedzi 6 ari panyika pano. (Onai masoko e kufunda anoti “Mumasure me izvona” pana Ruka 10:1.) Kufundira ngezve zviro zvakafundiswa ndi Djesu Kristu uye kuteedze muezaniso wake kucatibetsera kuti tishingaire. Ticaona zviro zvirongomuna zvatingafunda pa muezaniso wa Djesu: (1) Iyena aikanda ndangariro dzake pakuita kuda ka Djehovha, (2) iyena ainyasa kuziya uphorofita we mu Bhaibheri, (3) iyena aigonda no rubetso ra Djehovha, uye (4) iyena ainga ano maonero akanaka panocokuita ne anhu.

IYENA AKAKANDA NDANGARIRO DZAKE PA KUITA KUDA KA DJEHOVHA

5. Djesu aipangidza kudini kuti aikanda ndangariro dzake pa kuita kuda ka Mwari?

⁵ Djesu akaparidzira no kushingaira “masoko akanaka e Umambo” ngekuti iyena aiziya kuti ndizvona zvaidiwa na Mwari kuti iyena aite. (Ruka 4:43) Kuna Djesu basa re kuparidzira rainga riri basa rinokosha maningi mu upenyu wake. Kunyazi mu mwedzi wekupedzesera, mubasa rake re kuparidzira iyena akarumbwa “ecihamba mu thaundi no thaundi uye mutanha no mutanha,” ecifundisa anhu. (Ruka 13:22) Djesu akafundisawo amweni kuti aparidzire masoko akanaka hingana iyena.—Ruka 10:1.

6. Basa re kuparidzira rakabatana kudini no basa rimweni ra Djehovha? (Onai mufanikiso.)

⁶ Nyamasi uno, kuparidzira masoko akanaka riciri basa rinokosha maningi rokuti Djehovha na Djesu anoda kuti tiriite. (Mat. 24:14; 28:19, 20) Zvezvirokwazvo, basa rese ratinoitira Djehovha rinobatanidzwa pa basa rekuparidzira. Nge muezaniso, tinowaka Nyumba dze Umambo kuitira kuti aya anopfarira aone pekuunganira kuti akwanise kunamata Djehovha. Kusiya izvona, zvese zvinoizwa ku Bheteri zvino cinangwa ce kubetsera mu basa re kuparidzira. Ajudha umanitariya aibetseriya basi pa zviro zvinodikanika zvekunyama zve hama asiwo inoabetsera kuti ahwirire mu mushobho wawo we kunamata uye kubatanidzawo mu basa re kuparidzira. Hino patinoedzurira kuti basa re kuparidzira i basa rinokosha maningi rekuti Djehovha anoda kuti tiriite, zvicatiitisa kuti tibatikane maningi mu basa irona. Yánosh mukuru umweni weku Hungria, unoti: “Inini nguwa dzese ndinoedza kuedzurira kuti akuna basa rimweni randingaitira Djehovha ringapinda basa re kuparidzira, irona i basa rinonyanya kukosha ratinodikana kuita.”

7. Ngei Djehovha anoda kuti isusu tirumbwe teciparidzira? (1 Timoti 2:3, 4)

⁷ Tingakwanisa kutunhudzira kushingaira katinoita mu basa re kuparidzira nge kugara ne maonero amwewo no a Djehovha ngezve anhu. Iyena unoda kuti anhu akawanda kana zvecibvira azwe uye atende masoko akanaka kuti aponeswe. (Erengai 1 Timoti 2:3, 4.) Ndiyo ndaa, iyena anotibetsera kuti tinyase kugadzirisa mushobo watinoparidzira nawo. Umwe we muezaniso iwona i bhurushura ra Idai Anhu—Kuti Muite Afundi rinotibetsera zvatinodikana kuita kuti titangise makani nocinangwa cekuitisa fundo ye Bhaibheri. Kunyazi anhu akasama kuseenzera Djehovha zvino, iwona pamweni angaona mukana wekuita izvona dambudziko guru risati rapera. Hino zvatinoabvunza zvino zvingakwanisa kuabetsera mune ramagwana kuti akwanise kuita cisananguro icona. Asi izvona zvicabvira kana tikarumbwa teciparidzira.

IYENA AINYASA KURANGARIRA NGEZVE UPHOROFITA WE MU BHAIBHERI

8. Kuziya ngezve uphorofita we Bhaibheri zvaibata-bata kudini Djesu pakuseenzesa nguwa yake?

⁸ Djesu aiziya kuti uphorofita we Bhaibheri waizodzadzika kudini. Ngo muezaniso, iyena aiziya kuti aizotora makore matatu no hafu eciita basa rake re kuparidzira. (Dha. 9:26, 27) Iyena aiziya kuti aizofa riini uye aizofa kudini. (Ruka 18:31-34) Ndiyo ndaa, iyena ainyasa ku seenzesa nguwa yake nge kuparidzira ecishingaira kuti akwanise kuita basa rake.

9. Ngei kuzwisisa uphorofita we mu Bhaibheri kecitiitisa kuti tiparidzire tecishingaira?

⁹ Kuzwisisa uphorofita we Mu Bhaibheri zvinoita kuti tiparidzire nokushingaira, ngokuti tinoziya kuti nokukasika nyika ino ya Sathani icapera. Ngokuti tiri kuona zviro zviri kuitika munyika ino uye muitiro we anhu uri kudzadzisa uphorofita we Bhaibheri wezve mazuwa ekupedzesera. Uyewo tiri kuona kupumhana ko Potência Mundial Anglo-Americana, Russia uye no ari kuatsigira, izvi zviri kudzadzisa uphorofita wekuti mambo we kakutsi uye no we katemaidumba waizorhwisana umwe na umwe wawo “mu mazuwa e kupedzesera.” (Dha. 11:40) Tiri kuzwisisa kuti tsoka dze mufanikiso we uphorofita wa Dhanyeri 2:43-45, unoimirira Potência Mundial Anglo-Americana. Tino rugondo rekuti, no kukasika—no kasika kamare—Umambo wa Mwari, ucatsakatisa utongi we anhu. Uphorofita uu unopangidza kuti tiri kumapeto uye kuti tinodikana kuparidza masoko akanaka no kukasika.

10. Nge mishobo ipi imweni yekuti uphorofita we mu Bhaibheri inotikohomedzesa kuti tirumbwe teciparidzira?

¹⁰ Uphorofita we mu Bhaibheri unoreketawo ngezwe kariro yatinoda maningi kuparidzira. Carrie hanzvadzi imweni inoseenza ku República Dominicana inoti: “Pandinoima ndonyasa kurangarira ngezve zviro zvakanakisisa zviri kutipikira Djehovha mune ramangwana, inini ndinogara no cido cakakura kuti ndirekete ngezvazvo ku amweni.” Anhu ari kubatana no zvinetso zvinoshupha maningi uye zvitori pamhene kamare kuti awona ari kuda kuziya ngezve zvipikirhwa zva Djehovha katiri. Kusiya izvona uphorofita we mu Bhaibheri uri kupangidza kuti Djehovha nguwa dzese anoda kutitsigira mu basa irona re kuparidzira. Leila unogara ku Hungria unoti: “Tsamba ya Isaya 11:6-9 inondiedzurira kuti, munhu wese ungakwanisa kucinja no rubetso ra Djehovha. Ndiyo ndaa, ndinoda kureketa masoko akanaka ku anhu ese kunyazi no aya anoita hingana kuti aazocinji.” Christopher hama imweni ye ku Zâmbia, inoti: “Marko 13:10 inobhuya kuti masoko akanaka aizoparidzwa mu nyika yese uye makomborero akakura maningi kandiri kubetsera kudzadzika ke uphorofita uu.” Hino zvakadini kamuri? Uphorofita upi we mu Bhaibheri unomukohomedzesai kuti murumbwe meciparidzira?

IYENA AIGONDA NO RUBETSO RA DJEHOVHA

11. Ngei Djesu aidikana kugonda Djehovha kuti arumbwe eciparidzira ecishingaira? (Ruka 12:49, 53)

¹¹ Djesu aigonda kuti Djehovha aizomubetsera kuti arumbwe ecishingaira mu basa re kuparidzira. Kunyazi Djesu ecireketa no rureremedzo uye ecinyasa kusanangura masoko ake, iyena aiziya kuti masoko akanaka aizobara kureketedzana kakakura uye kuphikiswa kakakura. (Erengai Ruka 12:49, 53.) Nge ndaa ye kuparidzira kake, atungamiriri e magereja akaedza kuda kumuuraya kakawanda. (Juau 8:59; 10:31, 39) Kunyazi zvakadaro, Djesu akarumbwa eciparidzira masoko akanaka ngokuti aiziya kuti Djehovha ainga ari naye. Djesu akati: “Andiripi ndega, asi Baba akandituma aneni. . . . Aazi kumbondisiya ndiri ndega, ngokuti ndinoita nguwa dzese zvinomupfadza.”—Juau 8:16, 29.

12. Djesu akagadzirira kudini afundi ake kuti arumbwe eciparidzira paanonga ecibatana no kuteererhwa?

¹² Djesu, akaedzurira afundi ake kuti awonawo aidikana kugonda rubetso ra Djehovha. Kakawanda kakhona, iyena wakaagondesa kuti Djehovha aizoabetsera kunyazi ecisongana ne kuteererhwa. (Mat. 10:18-20; Ruka 12:11, 12) Uyewo Djesu akaakumbira kuti awona agare akangwarira. (Mat. 10:16; Ruka 10:3) Iyena akaafundisa kuti ainga asikadikani kubambidzira munhu kuti atendere masoko e Umambo. (Ruka 10:10, 11) Uyewo akaabvunza kuti aidikana kutiza kana zvecidikanika. (Mat. 10:23) Kunyazi Djesu ainga ecishingaira uye ecigonda Djehovha, iyena ainga asikadzikandi pa muedzo pasina cikonzero.—Juau 11:53, 54.

13. Ngei imwimwi mungagara no rugondo rokuti Djehovha acamubetserai?

¹³ Nyamasi uno tinoda rubetso ra Djehovha kuti tishingaire pakuparidzira kunyazi tecibatana no kuteererhwa. (Zvak. 12:17) Ngei imwimwi mungagara no rugondo rekuti Djehovha acamubetserai? Nge ndaa ye zvakakumbirhwa na Djesu pa munamato uri pana Juau kapituro 17. Ipona Djesu akakumbira Djehovha kuti acengete aphostori ake uye Djehovha akadaira. Bhuku ra Zviito rinopangidza kuti Djehovha akabetsera kudini aphostori kuti ashingaire pa basa re kuparidzira kunyazi no kuphikiswa. Pa munamato iwona Djesu akakumbirawo Djehovha kuti abetserewo aya aizotendera masoko akanaka e aphostori. Uye izvona zvinobatanidzawo imwimwi. Djehovha ari kurumbwa ecidaira munamato iwona dakara nyamasi uno; Iyena acamubetserai hingana kubetsera kaakaita aphostori.—Juau 17:11, 15, 20.

14. Ngei isusu ticakwanisa kuparidzira kunyazi mu nguwa inoshupha? (Onaiwo mufanikiso.)

¹⁴ Sezvo mugumo uri kukhwedera zvingashupha maningi kuti tiparidzire masoko akanaka tecishingaira, asi Djesu akatigondesa kuti ticagara no rubetso rese ratinoda. (Ruka 21:12-15) Kuita hingana Djesu no afundi ake, isusu tinosiya kuti anhu asanangure kuti anoda kutizwira kana kuti haiwa, uye atireketedzani nawo. Kunyazi mu mbuto mekuti basa redu rakarambidzwa, hama dzedu dzinokwanisa kuparidzira masoko akanaka ngokuti dzinogonda Djehovha haiwa simba rawo kamare. Ngo mushobo wakabambisa Djehovha aseenzi ake ekare, iyena anotipasawo simba nyamasi uno kuti “panyase kuizwa basa re kuparidzira” maererano no kuda kake. (2 Ti. 4:17) Hino, gondai Djehovha uye iyena acamubetserai kuti murumbwe mecishingaira pa kuparidzira.

IYENA AINGA ANO MAONERO AKANAKA

15. Tinozviziya kudini kuti Djesu ainga ano maonero akanaka ngezve kuparidzira?

¹⁵ Djesu ainga ano maonero akanaka pano cokuita no basa re kuparidzira. Izvona zvakamubetsera kuti asaruze mupfaro wake uye kurumbwa ecipasa zvakanakisisa zvake. Ngo muezaniso, mumasure me gore rimwe eciparidza, Djesu akazwisisa kuti anhu akawanda ainga akagadzirira kupurutana masoko akanaka, iyena akatoezanisa anhuwo ne minda ino zvirimwa zvainga zvaibva kuti zvikororhwe. (Juau 4:35) Paapadarika gore, iyena akati ku afundi ake: “Basa re kukorora i guru.” (Mat. 9:37, 38) Paapadarika nguwa iyena wakatizve: “Basa re kukorora i guru . . . Kumbirai Muridzi we munda kuti atumire aseenzi amweni kuzokorora munda wake.” (Ruka 10:2) Djesu aazi kumbosiya kutende kuti anhu aizotendera masoko akanaka uye iyena aipfara maningi izvona pa zvaiitika.—Ruka 10:21.

16. Miezaniso ya Djesu yakabetsera kudini afundi kuti agare ne maonero akanaka ngezve kuparidzira? (Ruka 13:18-21) (Onaiwo mufanikiso.)

¹⁶ Kuti abetsere afundi ake kuti arumbwe ecishingaira, Djesu akaapangidza kuti masoko aaiparidzira aizogara no mugumisiro wakanaka. Nge muezaniso, onai miezaniso miiri yaakapasa. (Erengai Ruka 13:18-21.) Pa muezaniso umwe wakhona, Djesu akaseenzesa citsangu cidoko ce mostardha kuti afundise kuti masoko e Umambo aizokura nge mushobo unoshamisa uye kuti apana caizokwanisa kupingaidza kukura uku. Pa muezaniso umweni wakhona, iyena akaseenzesa mbiriso kuti apangidze kuti masoko e Umambo aizobararika kudini uye kuitisa cinjo ku aya aizoatambira kunyazi aizotora nguwa yakareba kuti anyase kuazwisisa. Nge kudaro, Djesu akapangidza afundi ake kuti masoko aaizoparidzira aizobetsera anhu akawanda.

17. Ngei tingarumbwa tino maonero akanaka ngezve kuparidzira?

¹⁷ Ciro cinotiitisa kuti tirumbwe tecishingaira mu basa re kuparidzira i kurangarira kuti basa re kuparidzira riri kubetsera anhu akawanda mu nyika yese. Makore ese, mamirionji e anhu anopfarira anopinda Cirangaridzo uye anofunda Bhaibheri na isusu. Uye anhu akawanda anobhabhatidzwa obatana na isusu pa kuparidza masoko akanaka. Atizvizii kuti anganazve acatendera masoko edu, zvatinoziya ngezve kuti Djehovha ari kuunganidza anhu akawanda acazopona pa dambudziko guru. (Zvak. 7:9, 14) Djehovha Muridzi we kukorora anoziya kuti akawanda acatendera masoko akanaka. Ngekudaro, tino zvikonzero zvakanaka zve kuti tirumbwe teci paridzira.

18. Zvinyi zvatinoda kuti anhu azwisise nge zvedu?

¹⁸ Ciro caipangidza kuti aya ndi afundi a Djesu i kushingaira kaainga anako mu basa re kuparidzira. Nge muezaniso, aphostori akaparidza no ushingi uye no mupfaro zvekuti anhu, “akaziya kuti awona ainga akambohamba na Djesu.” (Zviito 4:13) Nyamasi uno, anhu paanotiona teciparidzira masoko akanaka, tinoda kuti awona agare no rugondo rekuti isusu tiri kuteedzera kushingaira ka Djesu pakuziisa masoko akanaka.