Nyara ya Djehovha Aizi Kumbofupika

1. Mozesi wakapangidza kudini kuti waigonda Djehovha paaitungamirira Aisraeri kubva ku Edjipitu?

BHUKU ra Ahebheru, rinoreketa ngezve anhu akawanda ainga ano kutenda muna Djehovha. Umwe we anhu aya, ndi Mozesi, wekuti wainga ano kutenda kuno shamisa. (Aheb. 3:2-5; 11:23-25) Iyena, wakapangidzira kuti wainga ano kutenda kakakura paainga ecitungamirira Aisraeri kuti abude mu Edjipitu, asikathyi Faraoo kunyazi anyahondo ake. Iyena wakanyasa kugonda Djehovha paaitungamirira anhu pa Bahari ro Kupsvuka uye kurenje. (Aheb. 11:27-29) Mozesi wakagonda Mwari wake kunyazi Aisraeri akawanda paakatanga kukana-kana kuti Djehovha aizoacengeta here. Uye Mozesi aazi kunyangadzwa ngekuti Djehovha akapasa Aisraeri zvokurhya uye no mvura nge mushobo unoshamisa. Ngekudaro, iwona akakwanisa kurarama ku renje kuya kekuti kainga kusina kunyazi ciro.a—Eki. 15:22-25; Pis. 78:23-25.

2. Ngei Djehovha akabvunzisa Mozesi kuti: “Kodi nyara ya Djehovha yakafupika here”? (Numero 11:21-23)

² Nguwa imweni, mumasure me gore rimwe Aisraeri abuda ku Edjipitu, Djehovha akaagondesa kuapasa nyama. Kunyazi no kutenda kakabamba kaainga anako, Mozesi wakatanga kudzibvunzisa kuti Djehovha aizokwanisa kudzadzisa zvaainga agondesadi kamare. Kainga kuno mamirionji e Aisraeri uye kainga kusina zvokurhya ku renje. Hino, Djehovha aizokwanisa kudini kupasa nyama anhu ese? Kuti adaire Mozesi Djehovha akamubvunzisa kuti: “Kodi nyara ya Djehovha yakafupika here?” (Erengai Numero 11:21-23.) Pa vhersikuro ii, masoko okuti “nyara ya Djehovha” anoda kureya mwiya mucena kana kuti simba raanoseenzesa pakuita ciro. Nge masoko amweni, Djehovha ainga ecibvunzisa Mozesi kuti: ‘Imwimwi munorangarira kuti andikwanisi kuita zvandagondesa here?’

3. Ngei zvinokosha kunyasa kurangarira ngezve esperiensiya ya Mozesi no yo Aisraeri?

³ Nguwa dzimweni imwimwi munozwa kunetseka mecirangarira kuti Djehovha acamucengetai pamwepo ne mhuri yenyu pa zviro zvo kunyama here? Kana imwimwi makambodzibvunzisa kana kuti haiwa, mubvunzo wakaita Djehovha kuna Mozesi ungakwanisa kumubetserai. Mu fundo ino ticada kuona kuti ngei Mozesi no Aisraeri aikana-kana ngo zviya zvaaida kuizirhwa na Djehovha. Uyewo ticaona zvokwadi zvisikacinji zve Bhaibheri zvinganani zvingatunhudzira rugondo redu rokuti nyara ya Djehovha aizi kufupika.

FUNDAI NGO ZVIYA ZVAKAITIKA KUNA MOZESI UYE NO AISRAERI

4. Cinyi cakaitika no Aisraeri paainga ari kurenje?

⁴ Izvona zvakatanga kudini? Dzinza re Aisraeri uye no amweni ainga aano nguwa yakareba eciita rhwendo ku renje kubvira paakabuda ku Edjipitu ecienda ku Nyika Yakapikirhwa. (Eki. 12:38; Dhe. 8:15) Akawanda ainga asiripi Aisraeri akaremba ngo kurhya manaa uye akatanga kugurunguta. Pakupedzesera, Aisraeri akawanda akaitawo zvimwezvo. (Num. 11:4-6) Anhu akatanga kuedzurira nyama uye no zvokurhya zvimweni zvaainga anazvo ku Edjipitu. Mozesi wakazwa kubambidzirhwa nge ndaa ye kugurunguta uku uye wakarangarira kuti iyena kamare ndiyena waidikana kupsvaka nyama, asi wainga asikazvizii kuti waizozviita kudini.—Num. 11:13, 14.

5-6. Zvinyi zvatingafunda no mushobo wakapfuridzirhwa Aisraeri akawanda no amweni?

⁵ Zvinoita hingana kuti Aisraeri akapfuridzirhwa no anhu aya ainga asikatendi no zvaaipaswa. Zvimwe-zvimwezvo zvingakwanisawo kuitika na isusu nyamasi. Kana tikagara no anhu anomusambo we kutama kutenda zviya zvaanopaswa, tingakwanisa kugurunguta uye kutama kupfara no zviya zvatinopaswa na Djehovha. Tingatanga kuzwa kushoterhwa no zviya zvatainga tinazvo kare uye totanga kusirira zviya zvino amweni. Asi, tingakwanisa kupfara kana tikafundira kugutsikana no zviya zvatinazvo azvinei no mugariro watinawo.

⁶ Aisraeri aidikana kuedzuria gondeso yaakapaswa na Djehovha yokuti kana aa aguma ku mbuto kaaienda, awona aizogara no zviya zvaaida uye no zvimweni zvakawanda. Izvona zvaizodzadzika basi ku Nyika Yaakapikirhwa, haiwa kurenje paaita rhwendo. Nge mushobo umwewo, pane kukanda ndangariro dzedu pa zviya zvatisina nyamasi, tinodikana kukanda ndangariro dzedu pa zviya zvakapikira Djehovha kuti acazotipasa mu Nyika Ipsva. Kusiya izvona, zvinokosha maningi kurangarira ngezve tsamba dze mu Bhaibheri dzinotunhudzira rugondo redu kuna Djehovha.

7. Ngei tinodika kugara no rugondo rokuti nyara ya Djehovha aizi kumbofupika?

⁷ Asi ngei Djehovha akanyasa kureketa kuti “nyara yake aizi kufupika?” Pamweni Djehovha aida kubetsera Mozesi kuti arangarire haiwa basi pa simba rakakura re nyara yake, asiwo kuti iyona yaizoguma dakara kupi. Kana kuti, kunyazi Aisraeri ainga ari pakati pe renje mainga musina ciro, Djehovha aikwanisa kuapasa nyama kudari zvaairangarira. “No nyara inosimba uye no moko wakatambaradzwa,” Djehovhva akapangidza simba rake. (Pis. 136:11, 12) Hino, tingagara no rugondo rokuti nyara ya Djehovha inokwanisa kubetsera umwe na umwe wedu pasinei nokuti tiri kupi uye no zvinetso zvatiri kusongana nazvo.—Pis. 138:6, 7.

8. Cishaishi cipi cakaizwa no akawanda ku renje uye zvinyi zvatingafunda nazvo? (Onai mufanikiso.)

⁸ Djehovha akaita izvona kamare zvaainga akaagondesa uye akaapasa zvikambuma (codornizes). Asi Aisraeri aazi kutenda Djehovha nge cishamiso icona. Pane kudaro, akawanda awo akagara no makaro uye akatora zuwa rimwe ne hafu eciunganidza zvikambuma zvakawanda. Djehovha akanyangadzirhwa maningi “aya akaita umbau uwona” uye akaaphanica. (Num. 11:31-34) Muezaniso uu unotifundisa kuti tinodikana kungwarira kuti tisawire pa murau we kugara no makaro. Azvinei nokuti tiri apfumi kana kuti tiri arombo, cinangwa cedu ngece “kuunganidza upfumi kudenga.” Tingaita kudaro nge kugara no ushamwari wakabamba na Djehovha uye na Djesu. (Mat. 6:19, 20; Ruka 16:9) Ngokudaro, tingagara no rugondo rokuti Djehovha acatipasa zvese zvatinoda.

9. Tingagara no rugondo rei?

⁹ Mazuwa ano, Djehovha anotambaradza nyara yake kuti abetsere anhu ake. Izvona azvirei kuti atizogari tisina mare kana kuti atizobatani no nzara.b Asi tingagara no rugondo rokuti Djehovha aazombotisii. Iyena acatipasa simba ratinoda kuti tibatane no cinetso cipi haco. Tinodikana kugonda kuti Djehovha acatambaradza nyara yake uye otipasa zvekurarama nazvo. Ngationei migariro miiri yatingaita izvona: (1) Patinobatana no cinetso co kutama mare uye (2) patinogadzirira ramangwana redu.

ZVINETSO ZVO KUTAMA MARE

10. Zvinetso zvipi zvekutama mare zvekuti pamweni tingabatana nazvo?

¹⁰ Mugumo zvaauri kukhwedera dhuze, tinoetsera kubatana no zvinetso zvakawanda. Nyika iri kutunhudzira kushata padoko no padoko ngo ndaa ye zvematongerhwe e nyika, hondo, tsawana dzinoitika dzoga uye nhenda dzakawanda. Zviro izvi zvinokwanisa kutunhudzira urombo wedu, tingakwanisa kuruza basa, kuruza zviro zvakawanda uye kutosiya nyumba dzedu kuti tiende koogara ku mbuto imweni. Kuti imwimwi murumbwe meciriritira mhuri yenyu, cinyi cingamubetserai kuti muite zvisananguro zvakanaka uye kugonda no nyara ya Djehovha?

11. Zvinyi zvingatibetsera kubatana no zvinetso zve kutama mare? (Ruka 12:29-31)

¹¹ Ciro cokutanga camunodika kuita uye cinonyasa kubudirira, i kubvunza Djehovha zvinetso zvenyu zvese. (Zvie. 16:3) Kumbirai ungwaru kuti muite zvisananguro zvakanaka uye mugare no mwoyo wakaterama kuti “musanyanye kunetseka.” (Erengai Ruka 12:29-31.) Rumbwai meciita munamato kuti mukwanise kugutsikana no zviro zvamunazvo. (1 Ti. 6:7, 8) Psvakisisai mu mabhuku edu kuti muziye kuti mungakwanisa kudini kubatana no cinetso co kutama mare. Mu saiti jw.org makadzara mafundo anoreketa ngezve nyaya iyona uye zvakabetsera anhu akawanda.

12. Mibvunzo dzipi dzingabetsera munhu kuita zvisananguro zvakanaka panecokuita no mhuri yake?

¹² Kuti akwanise kugumira basa, anganani akacinja oenda koogara kure no mhuri yawo, asi akawanda awo akaona kuti akaita cisananguro cakashata. Musati matendera basa, musarangarire basi ngezve mare yamucagara nayo asi rangariraiwo kuti izvona zvicamubata-bata kudini panocokuita no zvokunamata. (Ruka 14:28) Rangarirai ngezve mibvunzo dzinoteera: ‘Cinyi cicazoitika no mucato wangu kana inini ndikagara ndiri kure? Kodi inini ndicaona nguwa ye kupinda misangano yese, kubuda mu basa re kuparidzira uye kugara no hama?’ Kana imwimwi muno ana, zvinokosha maningi kudzibvunzisa kuti: ‘Ndingarera kudini ana angu ‘ndeciapangira uye ndeciafundisa maererano no zvinodiwa na Djehovha’ kana inini ndikagara kure nawo?’ (Aef. 6:4) Itai zvisananguro zvinoenderana maererano no zvinorangarirhwa na Djehovha haiwa zvinorangarirhwa no anyaukama kunyazi shamwari dzisikareremedzi Bhaibheri.c Tony unogara ku Asia, wakatambira mipiko dzakawanda dze mabasa dzaizomupasa mare yakawanda. Asi mumasure me kuita munamato ngezve nyaya iyona uye kucedza no mukadzi wake, iyena wakasanangura kuramba basero uye kuita cinjo kuti ararame asina zvakawanda. Nyamasi uno, iyena unotendera eciti: “Inini ndakagara no makomborero ekubetsera anhu akawanda kuziya Djehovha uye ana edu anoda maningi cokwadi. Mhuri yedu yakafundira kuti kana tikarumbwa teciteerera masoko ari pana Mateu 6:33, Djehovha acarumbwa eciticengeta.”

KUGADZIRIRA RAMANGWANA

13. Zviro zvipi zvinganani zvatingaita zvino kuti tizogare no zviro zvingatiriritira kana taa takura?

¹³ Rugondo redu kuna Djehovha ringakwanisa kuedzwa patinorangarira kuti cinyi cicaitika no upenyu wedu patinonga tacembera. Bhaibheri rinotikohomedzesa kuti tiseenze kuti tizogare no zviro zvinozotiriritira mune ramangwana. (Zvie. 6:6-11) Kana zvecibvira tingakwanisa kuiga mare ngekuti iyona ingakwanisa kutidziirira. (Mup. 7:12) Asi atidikani kuita kuti mare igare ciro cinokosha maningi mu upenyu wedu.

14. Ahebheru 13:5 ingatibetsera kudini kuti tisanyanye kunetseka no ramangwana?

¹⁴ Djesu akabhuya ngezve muezaniso we kupusa kupsvaka mare pane kugara “apfumi kuna Mwari.” (Ruka 12:16-21) Apana munhu unoziya kuti ramangwana rinonga rakadini. (Zvie. 23:4, 5; Tig. 4:13-15) Hingana ateereri Akristu, tino ubaba waakatipasa. Iyena akabhuya kuti tinodikana kugara tagadzirira “kusiya” zvatinazvo kuti tigare afundi ake. (Ruka 14:33, masoko e pasi) Ndizvona kamare zvakaitika no Akristu e pakutanga ku Djudhiya. Awona akarumbwa ecipfara kunyazi eciruza zviro zvawo. (Aheb. 10:34) Nyamasi uno, hama dzakawanda dzinoruza basa uye zviro zvawo nge kugara akaperera asina dii raanotsigira pa zvematongerhwe e nyika. (Zvak. 13:16, 17) Cinyi cakaabetsera kuita izvona? Awona akapangidza kuti anonyasa kugonda masoko ari pana Ahebheru anoti: “Inini andizomusii, uye andizomutizii.” (Erengai Ahebheru 13:5.) Hino, tinoita zviri zvese kuti tizogare no zviro zvicazotiriritira mune ramangwana. Asi tino rugondo rakakura rokuti Djehovha acaticengeta kana pakaitica ciro catisikakariri.

15. Abereke Ecikristu anodikana kugara no maonero api panocokuita no ana awo? (Onaiwo mufanikiso.)

¹⁵ Mu mbuto dzimweni, abereki anoda ana kuitira maka-maka kuti awona azoacengete kana awona akazocembera. Zvinoita hingana kuti awona anoona ana hingana “urongwa we kusiya basa.” Asi Bhaibheri rinofundisa kuti abereki ndiwo ano ubaba we kuriritira ana awo. (2 Ako. 12:14) Zviri pamhene kuti abereki pamweni angada rubetso kana aa akura uye ana awo anopfara maningi nge kuapasa rubetso irona. (1 Ti. 5:4) Asi abereki anogonda Djehovha anozviziya kuti mupfaro wakakura auuyi nge kupaswa mare no ana awo, asi nge kuriritira ana awo kuti aseenzere Djehovha.—3 Juau 4.

16. Abereki angagadzirira kudini ana awo kuitira ramangwana? (Aefeso 4:28)

¹⁶ Pamunonga mecifundisa mwana wenyu kuti ungakwanisa kudini kudziriritira, pasai muezaniso uye pangidzai kuti imwimwi wene munogonda Djehovha. Kubvira aciri mudoko, mupangidzei kuti ngei zvecikosha kugara munhu unoseenza. (Zvie. 29:21; erengai Aefeso 4:28.) Kusiya izvona, mukohomedzesei kuti apete masimba ku cikora. Zvakanaka kukwarakwatisa kuti muone zvokwadi zvisikacinji zvo Bhaibheri uye mubetsere mwana wenyu kuti aite zvisananguro zvakanaka zvinocokuita no cikora. Cinangwa cenyu cinodikana kugara co kubetsera mwana wenyu kuti akwanise kudziriritira uye akwanise kubuda mu basa re kuparidzira kana kutogara mupiyonero.

17. Rugondo ripi ratingagara naro?

¹⁷ Aseenzi a Djehovha akagondeka akagara no rugondo rokuti Djehovha ano simba uye cido cokuapasa zvokudziriritira nazvo pane zvo kunyama. Mugumo we nyika ino yakashata zvauri kukhwedera kudai, tinodikana kurumbwa takagondeka kuna Djehovha. Azvinei no zvicaitika tinodikana kunyasa kugonda kuti Djehovha acaseenzesa simba rake kuti aticengete. Atina mubvunzo wekuti nyara ya Djehovha ino simba uye moko wake wakatambaradzwa auzombogari wakafupika kuti utibetsere.