“Sanangurai . . . Wamucaseenzera”

1. Kuti tipfare zvezvirokwazvo tinodikana kuitei uye ngei? (Isaya 48:17, 18)

BABA edu okudenga Djehovha anotida maningi, iyena anoda kuti isusu tigare no upenyu wakanaka nyamasi uno uye mune ramangwana. (Mup. 3:12, 13) Djehovha akatisika tino uzii wokukwanisa kuita zviro zvakawanda, asi iyena aazi kutipasa uzii wekudzitongera isusu pacedu, kana kuti kusanangura cakanaka no cakashata. (Mup. 8:9; Djer. 10:23) Iyena anoziya kuti: Kuti tipfare zvezvirokwazvo tinodikana kumuseenzera uye kuzwira zvaanobhuya.—Erengai Isaya 48:17, 18.

2. Sathani unoda kuti titendei uye Djehovha ari kuitei ngezvazvo?

² Sathani unoda kuti titendere kuti tingakwanisa kupfara pasina Djehovha, uye kuti anhu angakwanisa kubudirira ecidzitongera ega. (Gen. 3:4, 5) Kuti apangidze kuti Sathani munyepi, Djehovha ari kutendera kuti anhu aite izvona ke kacinguwa. Uye patinoona mugariro wakashata we nyika ino, zvinoita kuti tigare ne mhinduro yakadjeka. Nge dii rimweni, Bhaibheri rinobhuya ngezve anarume no anakadzi akawanda akapfara nge kusanangura kuseenzera Djehovha. Muezaniso wakanaka pa dzese ngewa Djesu. Mufundo ino, ticaona kuti ngei Djesu akasanangura kuseenzera Djehovha uye kuti ngei Djehovha akasisira kuti timunamate. Pakupedzesera ticaedzurira zvikonzero zvinganani zvakatiitisa kuti tisanangure kuseenzera Djehovha.

NGEI DJESU AKASANANGURA KUSEENZERA DJEHOVHA

3. Sathani wakapasei Djesu uye Djesu akasanangura kuitei?

³ Djesu paainga ari panyika, iyena aidikana kusanangura kuti aizoseenzera ani. Paapadarika nguwa doko Djesu aabhabhatidzwa, Sathani wakamupasa umambo wese we pasi pano kuti Djesu amunamate. Djesu akati: “Buda pano, Sathani! Ngokuti zvakatarhwa kuti: ‘Djehovha Mwari wako ndiye waunodikana kunamata, uye ndiye ega waunodikana kuitira basa rakacena.’” (Mat. 4:8-10) Ngei Djesu akaita cisananguro icona? Ngationei zvikonzero zvinganani.

4-5. Zvikonzero zvipi zvinganani zvakaitisa kuti Djesu asanangure kuseenzera Djehovha?

⁴ Cikonzero cikuru cakaita kuti Djesu asanangure kuseenzera Djehovha i rudo—rudo rukuru uye rakabamba kuna Baba ake. (Juau 14:31) Kusiya izvona, Djesu aiseenzera Djehovha ngekuti cainga ciri ciro cakanaka cokuita. (Juau 8:28, 29; Zvak. 4:11) Iyena, anoziya kuti Djehovha i Manyuko e upenyu uye kuti akagondeka uye ano rupo. (Pis. 33:4; 36:9; Tig. 1:17) Djehovha nguwa dzese akabhuya cokwadi kuna Djesu uye zvese zvainga zvina Djesu zvaibva kuna Djehovha. (Juau 1:14) Asi Sathani wakasiyana maningi na Djehovha, Sathani ndiye wakaita kuti paoneke citema no rufu. Iyena munyepi uye zvese zvaanoita zvinokonzerhwa no makaro uye umbau. (Juau 8:44) Djesu ainyasa kuziya Djehovha uye Sathani. Ndiyo ndaa, aazi kumborangarira kugara hingana Sathani uye kupandukira Djehovha.—Afi. 2:5-8.

⁵ Cikonzero cimweni cakaita kuti Djesu asanangure kuseenzera Djehovha, ngece kuti iyena aiziya kuti kugondeka kake kaizoita kuti kugare no zviro zvakawanda zvakanaka. (Aheb. 12:2) Iyena aiziya kuti kana akarumbwa akatendeka, iyena aizocenesa zina ra Baba ake uye kuita kuti matambudziko ese akakonzerhwa ndi Dhiabhurosi asaonekepozve.

NGEI DJEHOVHA AKASISIRA KUTI TIMUNAMATE

6-7. Ngei nyamasi akawanda aaseenzeri Djehovha, asi ngei Djehovha akasisira kuti timunamate?

⁶ Akawanda aaseenzeri Djehovha ngekuti aazii mawara ake akanaka uye aazwisisi zvese zvaanoizirhwa naye. Mugariro uu wakatodzana ne mugariro we anhu akaparidzirhwa ndi Pauro eku Atena, ekutiwo ainga asikazii Mwari.—Zviito 17:19, 20, 30, 34.

⁷ Pauro wakapanganidzirawo anhu eku Atena kuti Mwari we cokwadi “anopasa anhu ese upenyu, mwiya we kufema uye zviro zvese.” Iyena wakatizve: “Ngokuti ndiye akaita kuti tigare no upenyu, tihambe uye tioneke tiri pano.” Mwari ndi Musiki uye “iyena akaita madzinza ese no munhu umwe basi,” ndiyo ndaa, iyena ano citenderhwa cekunamathwa.—Zviito 17:25, 26, 28.

8. Djehovha aazomboiti ciro cipi, uye iyena anopangidza kudini kuti anotida maningi?

⁸ Ngokuti Djehovha Musiki uye Cangamire we pasi rese, angadai atibambidzira kuti timuseenzere. Asi iyena aaiti izvona. Pane kudaro, Djehovha anotipasa zvikonzero zvokuti iyena ariyo uye anoda umwe na umwe wedu. Iyena, unoda kuti anhu akawanda agare shamwari dzake nokusikaperi. (1 Ti. 2:3, 4) Ndiyo ndaa, Djehovha anotirowedza kuti tifundise amweni ngezve zvinangwa zvake uye zviro zvakanaka zvaacazoita ku anhu. (Mat. 10:11-13; 28:19, 20) Iyena akarongazve ungano matingakwanisa kumunamata uye kutambira rubetso rinobva ku akuru ano rudo.—Zviito 20:28.

9. Djehovha akapangidza rudo rake ku anhu ese nge mushobo upi?

⁹ Tingakwanisa kuona rudo rinoshamisa ra Djehovha nge mushobo waanobata anhu anosanangura kutama kumuzwira kana kutenda kuti iyena ariyo. Nge muezaniso: Ke mamiriyonji e makore, anhu akawanda akasanangura kurarama maererano no zvaanorangarira kuti zvakanaka uye zvakashata pane kuzwira Djehovha. Kunyazi zvakadaro, Djehovha anoabata no unaki uye anoapasa zviya zvaanoda kuti ararame uye kuti apfadzwe no upenyu. (Mat. 5:44, 45; Zviito 14:16, 17) Awona anokwanisa kugara no mhuri uye shamwari dzino rudo, kugara no ana uye kukhorovhera mugumisiro we basa rawo. (Pis. 127:3; Mup. 2:24) Zviri pamhene kuti Baba edu okudenga anoda anhu. (Eki. 34:6) Pari zvino, ticada kuona zvinangwa zvinganani zvinoita kuti isusu tisanangure kuseenzera Djehovha uye ticada kuona kuti iyena anotikomborera kudini paya patinoita izvona.

NGEI TAKASANANGURA KUSEENZERA DJEHOVHA

10. (a) Cikonzero cipi cakakura cinotiitisa kuti tiseenzere Djehovha? (Mateu 22:37) (b) Munozwa kudini nge kuziya kuti Djehovha ano mwoyo unononoka kutsamwa uye kuti ano unatsi? (Pisarema 103:13, 14)

¹⁰ Kuita hingana Djesu, tinoseenzera Djehovha maka-maka nge ndaa ye rudo rakakura Kaari. (Erengai Mateu 22:37.) Patinofunda ngezve mawara a Djehovha, tinotunhudzira kugara shamwari dzake. Ngo muezaniso, rangarirai mwoyo unononoka kutsamwa uye no usisi wa Djehovha. Aisraeri paakasanangura kusama kumuteerera, Djehovha akadeketera eciti: “Ndapota, siyai makwanza eyu akashata.” (Djer. 18:11) Izvona zvinopangidza kuti Djehovha ano edzurira kuti isusu tiri anhu asikazi kukwana uye takaizwa nge mataka. (Erengai Pisarema 103:13, 14.) Pamunoima morangarira mwoyo unononoka kutsamwa, usisi uye mawara amweni anokosha a Djehovha, imwimwi amugari no cidaka-daka cekuda kumuseenzera nokusikaperi here?

11. Zvikonzero zvipi zvimweni zvatinazvo kuti tiseenzere Djehovha?

¹¹ Ciro cimweni cinotiitisa kuti tiseenzere Djehovha, ngece kuti izvona ndizvona zvinodikana kuizwa. (Mat. 4:10) Tinozviziyawo kuti kugondeka kedu kuna Djehovha, kucaunza mugumisiro we zviro zvakawanda zvakanaka. Ticabetsera kucenesa zina ra Djehovha kupangidza kuti Dhiyabhurosi munyepi uye kupfadza mwoyo wa Baba edu. Uye kana tikasanangura kuseenzera Djehovha nyamasi, ticagara ne mukana we kumuseenzera nokusikaperi!—Juau 17:3.

12-13. Zvinyi zvatinofunda no zvakaitika na Jane uye Pamela?

¹² Kunyazi mwana kana mudjaha, ungakwanisa kusakurira rudo rakabamba kuna Djehovha; rudo irona, ringarumbwa recitunhudzirika no kuhamba ke nguwa. Onai zvakaitika na Jane uye Pamela.a Ekuti akatanga kufunda Bhaibheri, Jane paainga ano makore 11 uye Pamela ano 10. Abereki awo ainga asina basa nazvo, awona akasiya Jane uye Pamela ecifunda Bhaibheri asi mukupera ke sumana, aidikana kuenda ese ku gereja. Jane unoti: “Zvandakafunda kubva mu Bhaibheri no Apupuri a Djehovha, zvakandibetsera kuti ndisaite zvaiizwa no adoni angu ekucikora, zvakaita hingana kuseenzesa mitombo inoraradzisa uye kuita uhure.”

¹³ Makore manganani adarika, mukupera ke udjaha wawo, Jane na Pamela akagara aparidzi. No kuhamba ke nguwa, awona akagara mapioneiro uye pa nguwa imweyo ainga ecicengeta abereki awo ainga acembera. Ecirangarira zvese zvaakaizirhwa ndi Djehovha, Jane wakati: “Inini ndakakwanisa kuona nge madziso angu kamare kuti Djehovha anocengeta shamwari dzake uye ‘Djehovha anoziya aya anomuda hinga zvinorekethwa pana 2 Timoti 2:19.’” Atidikani hedu kukana-kana kuti Djehovha nguwa dzese anocengeta aya anosanangura kumuda uye kumuseenzera!

14. Tinodziirira kudini zina ra Djehovha? (Onaiwo mafoto.)

¹⁴ Isusuwo tinoda kucenesa zina ra Djehovha pa manyepo ese anorekethwa nge zvake. Rangaridzai kuti muno shamwari yenyu ye padhuze ino unaki, ino rupo uye inorekerera. Zuwa rimweni, imwimwi mozwa munhu umweni ecireketa kuti iyena, munhu unoita zvakashata uye aazi kutendeka. Imwimwi maizoitei? Zvezvirokwazvo imwimwi maizomudziirira. Nge mushobho umwewo, Sathani no aya anomutsigira anoreketa manyepo ecida kusvipisa zina ra Djehovha, asi isusu tinoita zviri zvese kuti tidziirire zina ra Djehovha uye kureketa cokwadi nge zvake. (Pis. 34:1; Isa. 43:10) Nge ndaa ye masoko edu uye zviito, tinopangidza kuti tinoda kuseenzera Djehovha no mwiya wedu wese.

15. Ngei cinjo dzakaita Pauro mu upenyu dzainga dzakamunakira? (Afiripi 3:7, 8)

¹⁵ Kusiya izvona, tinopfara nge kuita cinjo mu upenyu wedu kuti tipfadze Djehovha kana kuti tinyase kumuseenzera. Nge muezaniso, muphostori Pauro wainga ano ubaba unokosha pakati pe Adjudha, asi iyena wakasiya kuti agare mufundi wa Djesu uye aseenzere Djehovha. (Aga. 1:14) Nge ndaa yazvo, iyena wakararama nguwa dzaishupha eciseenzera Djehovha uye wakatambira makomborero ekutonga na Djesu kudenga. Pauro aazi kumbotsumba nge cisananguro cake ce kuseenzera Djehovha uye isusuwo atimbotsumbi.—Erengai Afiripi 3:7, 8.

16. Zvinyi zvatinofunda no muezaniso wa Julia? (Onaiwo mafoto.)

¹⁶ Kana tikakanda kuseenzera Djehovha pambuto yekutanga mu upenyu wedu, iyena acatipasa mubairo zvino uye mune ramangwana. Onai muezaniso we hanzvadzi imweni inodainzwa kuti Julia. Kubvira paainga aciri mwana, iyena wakatanga kuemba kugereja uye wakanyasa kuziikanwa nge kuemba kake. Julia wakatanga kurowedzwa kuti agare muembi uno mbiri kana kuti muembi we basa. Iyena wakagara eciziikanwa hinga muembi unoemba zvakanaka aciri djaha uye wakaita matii akasiyana-siyana kumbuto dzinokosha. Paainga ecifunda pacikora cekuemba cino mbiri, shamwari yake yaaifunda nayo yakatanga kureketa ngezva Mwari uye yakapanganidza kuti Mwari ainga ano zina rokuti Djehovha. Padarika nguwa, Julia wakatanga kufunda Bhaibheri kairi pa sumana. Iyena wakasanangura kuseenzesa nguwa yake uye simba kuti aseenzere Djehovha pane kugara muembi uno mbiri. Cisananguro icona cainga cisiripi nyore. Julia unoti: “Anhu akawanda aindibvunza kuti ndainga ndisikabatisisi cipo cangu. Asi inini ndaida kuseenzera Djehovha ke upenyu wangu wese.” Kodi Julia uri kuzwa kudini mumasure memakore 30 aita cisananguro ici? Iyena unoti: “Inini ndinozwa mupfaro uye runyararo nge kusanangura kandakaita kuseenzera Djehovha uye ndino cokwadi cokuti Djehovha acadzadzisa zvido zve mwoyo wangu.”—Pis. 145:16.

RUMBWAI MECISEENZERA DJEHOVHA

17. Ngei zvinokosha kuzwisisa nguwa yatiri kurarama?

¹⁷ Isusu tiri padhuze no mugumo we nyika ino yakashata. Muphostori Pauro wakatara kuti: “Ngokuti ‘kasara nguwa doko,’ kuti uya anouya agume uye aazononoki.’” (Aheb. 10:37) Izvona zvinoda kureyei? Kasara nguwa doko kuti anhu asanangure kuti acaseenzera Djehovha here kana kuti haiwa, awona anodikana kuita ciito nokukasika. (1 Ako. 7:29) Uye kana tasanangura kuseenzera Djehovha, tingagonda kuti zvitsinzwa zvaticasongana nazvo ngezve “nguwa doko basi.”

18. Djehovha na Djesu anoda kuti tiitei?

¹⁸ Djesu akakohomedzesa afundi ake kuti asamuteere basi, asiwo kuti arumbwe eciita izvona. (Mat. 16:24) Kana imwimwi muri kuseenzera Djehovha ke makore akawanda, rumbwai makashinga kuti musamusiye. Isusu tese tinoda kupeta masimba kuti tirumbwe tino cisananguro cekurumbwa teciseenzera Djehovha. Pamweni izvona azvingaiti nyore, asi cisananguro icona cingaunza mupfaro uye makomborero akawanda uye izvona zvingatoitika zvino!—Pis. 35:27.

19. Mafundei no zvakaitika na Jim?

¹⁹ Anhu anganani anorangarira kuti kuseenzera Djehovha kunoita kuti awona asanyase kukhorovhera upenyu. Kana imwimwi muri djaha, munoona kuti kuseenzera Djehovha kunoita kuti musapfadzwe no upenyu here? Mudjaha umweni unozwi Jim wakati: “Inini ndairangarira kuti upenyu wangu wainga usikapfadzi nge ndaa yekuti ndainga ndiri Mupupuri wa Djehovha. Zvaiita hingana kuti adoni angu ainyasa kukhorovhera upenyu ecienda kumabiko, kunamorari uye kutamba mitambo inopangidza zvecisimba. Inini ndaindoenda basi kumisangano uye mu basa rekuparidzira.” Murangariro wakadaro wakabata-bata kudini Jim? Iyena unoti: “Inini ndakatanga kuita zviro zvinganani zvakashata pacifise-fise uye ke kanguwa, ndaiona kuti zvainga zvakanaka. Asi izvona azvizi kutora nguwa yakareba ngekuti ndainga ndisikazwi mupfaro wezvirokwazvo. Inini ndakatanga kurangarira ngezve zvokwadi zvisikacinji zve Bhaibheri zvandakasanangura kufuratira. Hino, ndakasanangura kuhwirira kuseenzera Djehovha no mwoyo wese, kubvira ipona ndakanyasa kuona kuti Djehovha aidaira kudini minamato yangu.”

20. Imwimwi masanangura kuitei?

²⁰ Mutari we pisarema wakaemba kuna Djehovha eciti: “Anopfara munhu wamunosanangura uye wamunokhwededza dhuze nemwi kuti agare mu ruwanze renyu.” (Pis. 65:4) Tinoda kurumbwa tino rugondo rimwero hingana rainga rina Djoshuwa paakati: “Asi kandiri inini no e pa nyumba pangu, ticaseenzera Djehovha.”—Djs. 24:15.