MUSORO WE KUFUNDA 15
NGOMA 30 Baba Angu Mwari Wangu Uye Shamwari Yangu
“Kugara no Ushamwari Wakabamba na Mwari” Zvakatinakira!
“Kandiri zvakandinakira kukhwedera dhuze na Mwari.”—PIS. 73:28.
CINANGWA
Kuona kuti tingagara kudini no ushamwari wakabamba na Djehovha uye kuti ngei izvona zvakanaka katiri.
1-2. (a) Zvinyi zvinodikanwa kuti mugare no ushamwari wakabamba no munhu? (b) Ticaonei mu fundo ino?
RANGARIRAI ngezve shamwari yenyu yakanaka. Ushamwari wenyu wakatanga kudini? Zvinoita hingana kuti makapedza nguwa muri mwese uye makagara meciziya zvinetso zvaaibatana nazvo, makaziya kuti ngazvipi zvaanopfarira uye zvaasikapfariri. Imwimwi makaona kuti shamwari yenyu yainga ino mawara okuti maishamisika nawo uye maida kuateedzera. Nokuhamba ke nguwa, imwimwi makatanga kuda shamwari yenyu.
2 Kugara no ushamwari wakabamba no umweni kunoda nguwa uye kupeta masimba. Tingabhuyawo zvimwezvo no ushamwari wedu na Djehohva. Mu fundo ino, ticada kuona kuti tingagara kudini no ushamwari wakabamba na Mwari uye kuti ngei kuita izvona zvakanaka. Asi cokutanga, tinoda kuona kuti ngei zvakanaka kukhwedera dhuze na Djehovha Shamwari yedu yakanaka.
3. Ngei tecidikana kurangarira pazvakanakira kukhwedera dhuze na Djehovha? Panganidzai.
3 Zvinokosha kurangarira kuti zvakanaka kudini kukhwedera dhuze na Djehovha. Izvona zvicatiitisa kuti tinyase kurumbwa tecigara shamwari yake. (Pis. 63:6-8) Ngo muezaniso, pasi rese anhu anoziya kuti zvakanakira uthongo kurhya zviro zvinowaka mwiri, kuita maezersisiyo, kuwata nguwa yakasisira uye kumwa mvura yakawanda. Asi anhu akawanda aazvikoshesi uye anosiya zviya zvinoita kuti uthongo wawo ugare wakanaka. Patinorangarira ngezve mugumisiro we kugara no uthongo wakanaka, zvinotiitisa kuti tiite zviya zvinowaka uthongo. Nge mushobo umwewo, isusu tinozviziya kuti kugara no ushamwari na Djehovha zvakatinakira. Asi kurangarira ngezve migumisiro we ushamwari uwona zvingatiitisa kuti tinyase kukhwederera dhuze no Shamwari yedu yakanaka, Djehovha.—Pis. 119:27-30.
4. Mupisarema wakabhuyei pana Pisarema 73:28?
4 Erengai Pisarema 73:28. Mutari we Pisarema 73 wainga ari Murevhi wakagadzwa kuti aseenze hingana muembi mu tempro ya Djehovha. Zvinobvira kuti iyana wainga waakuseenzera Djehovha ke makore akawanda. Kunyazi zvakadaro, iyena wakaona kuti zvaikosha kudziedzurira uyewo kuedzurira amweni kuti zvainga zvakanaka “kukhwedera dhuze na Mwari.” Ndiupi mugumisiro wakanaka we kuita izvona?
“KUGARA SHAMWARI YA MWARI” KUNOTIPASA MUPFARO
5. (a) Ngei kugara shamwari ya Djehovha kunoita kuti tipfare? (b) Maererano na Zvierengo 2:6-16 pasai muezaniso wakananga wekuti ungwaru wa Djehovha ungamubetserai uye ungamudziirirai kudini?
5 Ushamwari wedu na Djehovha paunorumbwa wakabamba, isusu tinonyasa kupfara. (Pis. 65:4) Tingabhuya izvona ngo zvikonzero zvakawanda. Ngo muezaniso, patinoerenga Bhaibheri toseenzesa zviya zvatinobvunzwa na Djehovha, isusu tinogara no uzii. Uzii uwona unotidziirira pakupfuridzirhwa kuti tiite zviro zvakashata uye kuita zvitema zvakakura. (Erengai Zvierengo 2:6-16.) Ndiyo ndaa Bhaibheri rinobhuya kuti: “Anopfara munhu unoona ungwaru uye unoona uzii.”—Zvie. 3:13.
6. Cinyi cakaita kuti mupisarema aruze mupfaro?
6 Zviri pamhene kuti kunyazi shamwari dza Djehovha nguwa dzimweni dzinogara dzakatsukwara. Mutari we Pisarema 73 wakaruza mupfaro paakasiya kuti marangariro akashata amubate-bate. Iyena wakanyangadzwa uye wakagara no shanje dze anhu anoita zvakashata ngekuti, mu musoro make, wakaona kuti aya asikarangariri Mwari uye mitemo Yake ainga ari anhu ano upenyu wakanaka. Mupisarema wakaguma pakugara no marangariro akashata okuti anhu anoita zvecisimba uye anodzikudza ndiwona anhu akapfuma ano uthongo wakanaka uye aana matambudziko akawanda. (Pis. 73:3-7, 12) Iyena wakanetseka maningi zvekuti nguwa imweni wakatanga kudzibvunzisa kuti, kupeta masimba kaaita kuti aseenzere Djehovha zvezvirokwazvo zvaikosha here. Tingakwanisa kuona kutsukwara kaakaita nge masoko aakareketa ekuti: “Zvezvirokwazvo kupeta masimba kandakaita kuti ndigare no mwoyo wakacena uye kusuka kandakaita nyara dzangu kuti ndigare ndisina ndaa, ndakazviitira nyore.”—Pis. 73:13.
7. Patinozwa kutsukwara cinyi catinodikana kuita? (Onaiwo kapa.)
7 Kunyazi ecizwa akatsukwara, mupisarema wakaita ciito kuti acinje marangariro ake. Iyena “wakapinda mu mbuto cena ya Mwari,” uye imona Djehovha akagadzirira marangariro ake. (Pis. 73:17-19) Nyamasi uno, Djehovha Shamwari yedu yakanaka, anoziya paya patinonga takatsukwara. Kana tikakumbira nhungamiriro uye totendera rubetso raanotipasa eciseenzesa Soko rake Bhaibheri uye ungano, tingakwanisa kugara no simba kuti tirhwisane no kutsukwara. Uye kana tikatanga kudzirhya mwoyo zvekuti totama kuziya zvekuita, Djehovha acatinyaradza uye kuita kuti tigare takaterama.—Pis. 94:19.a
Murevhi wakatara Pisarema 73 ari pa mberi pe“mbuto cena ya Mwari” (Onai ndima 7)
“KUGARA SHAMWARI YA MWARI” KUNOTIPASA CINANGWA MU UPENYU UYE KARIRO
8. Bhuyai makomborero anodarika mairi e kugara shamwari ya Mwari?
8 Zvakanaka maningi kugara shamwari ya Mwari nge zvikonzero zvimweni zviiri. Cokutanga, kunotipasa cinangwa ce zvirokwazvo mu upenyu. Cocipiri, kunotipasa kariro yakagondeka mune ramangwana. (Djer. 29:11) Ngatimbobhuye ngezve kubetserhwa katinoizwa nge zvikonzero zviiri izvi.
9. Ngei kugara shamwari ya Djehovha kunotipasa cinangwa mu upenyu?
9 Anhu akawanda nyamasi uno, anobhuya kuti Mwari akuna. Hino, awona anorangarira kuti upenyu auna cinangwa uye kuti nokuhamba ke nguwa, anhu aacazoraramizve. Asi, kugara shamwari ya Djehovha kunotipasa cinangwa mu upenyu. Kufunda Bhaibheri kunotigondesa kuti “Mwari ariyo uye kuti anopasa mubairo anhu ese anomupsvaka no mwoyo wese.” (Aheb. 11:6) Kusiya izvona, Djehovha akatisika tino cido cokuda kumuseenzera. Patinoita izvona, tinopfadzwa maningi mu upenyu.—Dhe. 10:12, 13.
10. Maererano na Pisarema 37:29 Djehovha akagondesei ku aya anomugonda?
10 Nyamasi uno, anhu akawanda aana kariro yakabamba ngezve ramangwana. Iwona anorangarira kuti upenyu—ngewe kuseenza, kuwaka, kugara no ana uye kuedza kuiga mare kuitira kana akazocembera. Mwari aaiti dii rawo, asi aseenzi a Djehovha anokanda kariro yawo kuna Djehovha. (Pis. 25:3-5; 1 Ti. 6:17) Isusu tinogonda Mwari wedu uye shamwari yedu. Tinorugondo rokuti iyena acadzadzisa zvese zvaakagondesa. Tinoetsera zviro zvakawanda zvakanaka mune ramangwana maka-maka kunamata Djehovha nokusikaperi mu Paraizo.—Erengai Pisarema 37:29.
11. Makomborero api amweni e kugara shamwari ya Djehovha?
11 Kugara no ushamwari na Mwari kunounza makomborero akakura katiri. Ngo muezaniso, kana tikaita cishaishi uye tocinyuka, Djehovha anogondesa kutirekerera. (Isa. 1:18) Nge kudaro, tinokwanisa kurarama tino hana yakacena, tisikadzipasi ndaa nge zvishaishi zvakadarika. (Pis. 32:1-5) Kusiya izvona, tinomakomborero akakura ekupfadza Djehovha. (Zvie. 23:15) Zvezvirokwazvo imwimwi munokwanisa kurangarira ngezve makomborero amweni ekugara shamwari ya Mwari. Asi tingarumbwa kudini tecikhwedera dhuze na Djehovha?
RUMBWAI “MECIKHWEDERA DHUZE NA MWARI”
12. Imwimwi makaitei kuti mugare shamwari ya Mwari?
12 Kana imwimwi muri Mukristu wakabhabhatidzwa imwimwi makaita zviro zvakawanda kuti mugare shamwari ya Mwari. Imwimwi mafunda zvokwadi zvakawanda ngezva Djehovha uye Djesu, macinyuka pa zvitema zvenyu, mapangidza kutenda kuna Mwari uye mapeta masimba kuti muite kuda kake. Asi kuti tigare tino ushamwari wakanyasa kubamba na Mwari, tinodikana kurumbwa teciita izvona.—Ako. 2:6.
13. Zviro zvipi zvitatu zvinotibetsera kuti tirumbwe tecikhwedera dhuze na Djehovha?
13 Cinyi cicatibetsera kuti tirumbwe tecikhwedera dhuze na Djehovha? (1) Tinodikana kurumbwa tecierenga uye tecifunda Bhaibheri. Asi cinangwa cedu acidikani basi kugara ce kufunda fundiso dzekutanga ngezva Mwari. Tinodikana kuedza kuzwisisa kuti Mwari anorangarira kudini uye kuti iyena anoda kuti isusu tiitei, pedzepo toseenzesa izvona mu upenyu wedu. (Aef. 5:15-17) (2) Tinodikana kubambisa kutenda kedu nge kunyasa kurangarira mishobo yakawanda yekuti Djehovha anotipangidza kudini rudo rake. (3) Tinodikana kurumbwa tecizonda zviro zvisikapfadzi Djehovha uye totama kutamba no anhu anoita zviro izvona.—Pis. 1:1; 101:3.
14. Zvinyi zvatinodikana kuita zuwa no zuwa kuti tipfadze Djehovha? (1 Akorinti 10:31) (Onaiwo mafoto.)
14 Erengai 1 Akorinti 10:31. Zvinokosha maningi kupeta masimba kuti tiite zviro zvinopfadza Djehovha. Izvona azvindobatanidzi basi kuparidzira uye kupinda misangano. Zvinobatanidzawo zviya zvatinoita zuwa no zuwa. Ngo muezaniso, patinogara anhu akatendeka pa zviro zvese uye patinopasawo anweni zviya zvatinazvo tinopfadza Djehovha. (2 Ako. 8:21; 9:7) Iyena anodawo kuti tipangidze kuti tinoreremedza cipo co upenyu. Isusu tinokhwedera dhuze ku uya Akatipasa upenyu nge kurhya uye kumwa pakati no pakati uyewo kucengetedza upenyu wedu nge mishobo imweni. Pese patinopeta masimba kuti tipfadze Djehovha kunyazi pa zviro zvakaita hingana kuti zvidoko, tinoita kuti rudo rake katiri ritunhudzirike.—Ruka 16:10.
Kutekenya takacengeteka, kuita maezersisiyo uye kurhya zviro zvinowaka uthongo uyewo kupangidza rupo, i mishobo minganani yekupfadza Djehovha (Onai ndima 14)
15. Tinodikana kubata kudini amweni?
15 Djehovha anopangidza unaki ku anatsi uye ku aya asina unatsi. (Mat. 5:45) Iyena anoetsera kuti tiitewo zvimwezvo. Ngo muezaniso, isusu atibhui zvakashata “ngezve anhu amweni, atireketedzani, uye tinopangidza upfawi ku anhu ese.” (Tito 3:2) Ndiyo ndaa, kunyazi munhu asikatendi Djehovha isusu atirangariri kuti tinokosha kudarika iyena. (2 Ti. 2:23-25) Patinopangidza unaki uye toreremedza anhu amweni, tinorumbwa tecikhwedera dhuze na Mwari wedu.
BAMBISAI “USHAMWARI WENYU NA MWARI” KUNYAZI MUKAITA ZVISHAISHI
16. Mutari we Pisarema 73 wakatanga kuzwa kudini nge ndaa ye zvishaishi zvake?
16 Nguwa dzimweni, nge daa ye zvishaishi zvatinoita tingatanga kurangarira kuti Djehovha aaciripizve shamwari yedu. Mutari we Pisarema 73 wakatanga kuzwa mazwiro akatodzana. Iyena wakati: “Tsoka dzangu dzainga dzasara padoko kuti dzipauke, ndainga ndasara padoko kuti ndimbwere.” (Pis. 73:2) Iyena wakatenderawo kuti “wakarhwadziwa” uye kuti wainga asikanyasi “kurangarira kuita hingana cinyama cisikarangariri.” (Pis. 73:21, 22) Iyena wakarangarira kuti nge ndaa ye zvishaishi zvake iyena wainga asikacakoshizve uye wainga ari munhu wainga asikacasisiri rudo ra Djehovha.
17. (a) Pamugariro wake waishupha mupisarema wakaitei? (b) Muezaniso wake unotifundisei? (Onaiwo mafoto.)
17 Kana mupisarema wakarangarira kuti wainga waruza ushamwari wake na Djehovha, mazwiro awona akadarika ciripo ripoco. Zvinoita hingana kuti pa mugariro wake unoshupha iyena wakaona kukosha ke kukhwedera dhuze na Mwari zvekuti iyena wakati kuna Djehovha: “Asi zvino, ndiri nemwi nguwa dzese [Djehovha]; makabata moko wangu kwawo. Imwimwi munonditungamirira no mazano enyu uye mumasure mazvo, munonditungamirira kuti ndikudzwe.” (Pis. 73:23, 24) Patinonga takaremba kana takaora mwoyo isusuwo tinodikana kupsvaka rubetso ra Djehovha, iyena i buwe rinotibambisa. (Pis. 73:26; 94:18) Kunyazi kana tambosiya kushamwaridzana na Djehovha ke kacinguwa, tinodikanazve kuwaka ushamwari wedu naye ngekuti tinoziya kuti iyena “akagadzirira kurekerera.” (Pis. 86:5) Pamigariro inoshupa ye upenyu wedu ndipona patinodikana kunyasa kukhwedera dhuze na Mwari.—Pis. 103:13, 14.
Patinonga takaremba pane zvekunamata tinodikana kukhwedera dhuze na Djehovha nge kunyasa kubatikana pa zviro zve kunamata (Onai ndima 17)
“BAMBISAI USHAMWARI WENYU NA DJEHOVHA” NOKUSIKAPERI
18. Ngei tinodikana kurumbwa tecibambisa ushamwari wedu na Djehovha nokusikaperi?
18 Isusu tingarumbwa tecibambisa ushamwari wedu na Djehovha nokusikaperi. Tinoziya izvona ngekuti Bhaibheri rinobhuya kuti makwanza, ungwaru uye uzii wa Djehovha “zvakadzika maningi.” Isusu atizombosii kufunda ngezva Djehovha.—Aro. 11:33.
19. Pisarema rinotipasa rungondo rei?
19 Pisarema 79:13 inoti: “Hino, isusu anhu enyu uye mabira enyu, ticamutendai nokusikaperi, uye ticabhuya ngezve mbiri yenyu ku mibarirhwana inoteera.” Pamunokhwedera dhuze na Mwari, imwimwi mungagarawo no rugondo rokuti: ‘Mwari i buwe re mwoyo wenyu uye nhaka yenyu nokusikaperi.’—Pis. 73:26.
NGOMA 32 Tsigirai Djehovha!
a Aya anozwa ecinetseka, ecidzirhya mwoyo kana kuti akatsukwara ke nguwa yakareba, pamweni angadikana kupsvaka rubetso re mamedhiko. Kuti muziye zvakawanda ngezvazvo onai Murindiri, N.° 1 2023 mu ciShona.