Isusu Atiripi Tega

1-2. (a) Ngei tecidikana kubhuya kuti atiripi tega paya patinobatana no matambudziko? (b) Ticaonei mu fundo ino?

PATINOBATANA no matambudziko akakura, tinokwanisa kuzwa tiri tega, kuita hinga tiri mucibharko cidoko pakati pe bahari panonga peciitika dutu rakakura. Asi cokwadi ngece kuti atiripi tega. Baba edu ano rudo Djehovha, ari kuona matambudziko edu. Uye andizvopi basi, iyena anotibetsera kuti tiakunde. No rudo, iyena anogondesa kuti: “Ndicakubetsera.”—Isa. 41:10.

² Mu fundo ino, ticaona mishobo mirongomuna inoseenzesa Djehovha kuti aticengete (1) iyena anotitungamirira, (2) anotipasa zvatinoda, (3) anotidziirira, uye (4) anotinyaradza. Azvinei no matambudziko api hawo atinobatana nawo mu upenyu, Djehovha anogondesa kuti aazotikanganwi. Iyena aazombotisii. Hino, isusu atiripi tega.

DJEHOVHA ANOTITUNGAMIRIRA

3-4. Djehovha anotitungamirira kudini? (Pisarema 48:14)

³ Erengai Pisarema 48:14. Djehovha anoziya kuti atikwanisi kudzitungamirira uye kuti tinoda nhungamiriro dzake. Iyena anotungamirira kudini anhu ake nyamasi uno? Umwe we mushobo ngewe kuseenzesa Bhaibheri. (Pis. 119:105) Iyena anoseenzesa Soko rake kuti atifundise kuita zvisananguro zvakanaka, kusakurira mawara anotibetsera kuti tipfare zvino uye kuti tizogare no upenyu usikaperi mune ramangwana.a Ngo muezaniso, iyena anotifundisa kuti titame kucengeta bundu, kugara akatendeseka uye kuda amweni zvecibva mu mwoyo. (Pis. 37:8; Aheb. 13:18; 1 Ped. 1:22) Kana tikadaro, tinogara abereki, amuna, akadzi uye shamwari dzakanaka.

⁴ Kusiya izvona, Djehovha akaita kuti mu Bhaibheri mutarhwe ngano dzakaitika kamare dze anhu akabatana no zvinetso uye mazwire akaezana no edu. (1 Ako. 10:13; Tig. 5:17) Kuerenga ngano idzi uye kuseenzesa zvatinofunda, zvakatinakira ngo ndaa ye zvikonzero zviiri. Cokutanga, tinozwisisa kuti atiripi tega—amweni ari kubatanawo no mugariro wakaezana no wedu uye ari kushingirira ecibetserhwa na Djehovha. (1 Ped. 5:9) Uye cocipiri, tinofundira kukwanisana no zvinetso zvedu.—Aro. 15:4.

5. Djehovha anoseenzesa ani kuti atitungamirire?

⁵ Djehovha anoseenzesawo hama uye hanzvadzi kuti dzititungamirire.b Ngo muezaniso, aonereri e nharaunda nguwa dzese anovhakacira ungano kuti atibambise. Mharidzo dzawo, dzinobambisa kutenda kedu uye dzinotibetsera kuti tirumbwe takabatana. (Zvii. 15:40–16:5) Akuru e ungano anopetawo masimba akakura kuti abetsere muparidzi umwe na umwe kuti arumbwe akabamba pa kutenda kake. (1 Ped. 5:2, 3) Abereki anofundisa ana awo kuti ade Djehovha, kuti aite zvisananguro zvakanaka uye agare no maitiro akanaka. (Zvie. 22:6) Uye hanzvadzi dzino maesperiensiya akawanda dzinobetsera madjaha, dzinopasa muezaniso wakanaka, mazano anoseenza uye kuabambisa.—Tito 2:3-5.

6. Tingapangidza kudini kutenda no zvese zvinoizwa na Djehovha kuti atitungamirire?

⁶ Djehovha anoita dii rake kuti atitungamirire. Tingapangidza kudini kutenda kedu ngo zvese zvaanoita kuti atitungamirire? Zvierengo 3:5, 6, inoti: “Gonda Djehovha no mwoyo wako wese, usagonde no kuzwisisa kako.” Kana tikaita izvona, “iyena acanatsirisa makwanza edu.” Izvi zvinoreya kuti iyena acatibetsera kuti tisabatane no matambudziko akawanda uye kuti tigare no upenyu unopfadza. Tinotenda maningi Djehovha ngo kunyasa kuziya umwe na umwe wedu uye ngokutipasa mazano ano rudo!—Pis. 32:8.

DJEHOVHA ANOTIPASA ZVATINODA

7. Djehovha anotipasa kudini zviya zvatinoda? (Afiripi 4:19)

⁷ Erengai Afiripi 4:19. Pane kutitungamirira basi, Djehovha anotipasa zvatinoda. Kuita kudini? Iyena anokomborera kupeta masimba katinoita kuti tione zvekurhya, zvekupfeka uye pe kugara. (Mat. 6:33; 2 Ate. 3:12) Zviri nyore kunetseka ngo ndaa ye zviro izvi, asi Djehovha anotibvunza kuti atidikani kunyanya kudzirhya mwoyo. Djehovha anogondesa kuti aazombosii aseenzi ake akatendeka paya paanonga ecida kubetserhwa. (Mat. 6:8; Aheb. 13:5) Tingakwanisa kunyasa kumugonda paya paanobhuya kuti acatipasa zvese zvatinoda.

8. Djehovha akabetsera kudini Dhavhidhi?

⁸ Onai kuti Djehovha akabetsera kudini Dhavhidhi. Dhavhidhi wakapedza makore akawanda ecitiza mambo Sauri. Pa nguwa ii inoshupha, Djehovha akapasa Dhavhidhi uye anarume ake zvese zvaaida kuti ararame. Ecirangarira kuti Djehovha akaabetsera kudini pa makore ese aya, Dhavhidhi wakatara kuti: “Kubvira ndiciri mudjaha dakara zvino ndacembera, andisati ndamboona munhu munatsi ecisiiwa kana ana ake ecipsvaka zvekurhya.” (Pis. 37:25) Imwimwi pamweni makambozwawo rudo ra Djehovha, paakamucengetai kana kuti paakacengeta hama dzimweni mu nguwa dzinoshupha.

9. Paya panoitika tsawana, Djehovha anotipasa kudini zviya zvatinoda? (Onaiwo mafoto.)

⁹ Djehovha anotipasawo zvatinoda paya panoitika tsawana dzinoitika dzoga. Ngo muezaniso, pakaitika nzara yakakura ku Djerusarema mu zana re makore rokutanga, Akristu e ku mbuto dzakasiyana-siyana akatumira hama dziya rubetso radzaida. (Zvii. 11:27-30; Aro. 15:25, 26) Nyamasi uno, anhu a Djehovha anopangidzawo rupo rimwe-rimwero. Kana pakaitika tsawana, Djehovha anoseenzesa hama no hanzvadzi kuti dzipase zvekurhya, mvura, zvekupfeka uye mitombo ku aya ari ku mbuto iyona yaitika tsawana. Cikwata ce kuwaka cinobetsera kugadzirisa nyumba dzo hama uye Nyumba dze Umambo dzahidhika. Kusiya izvona, aseenzi a Djehovha aanonoki kubetsera panocokuita no mu ndangariro, zve ku mwiya ku aya aruza nyumba dzawo kana kuti anhu aanoda.c

10-11. Mafundei pano zvakaitika na Borys?

¹⁰ Djehovha ano rupo rakakura maningi zvekuti anotocengetawo aya ekuti aasati aakumuseenzera. Teciteedzera muezaniso wake, isusu tinopsvaka mikana yekuti tipangidzire unaki ku aya ekuti aanamati na isusu. (Aga. 6:10) Kakawanda kakhona, izvona zvinopasa upupuri wakanaka. Onai zvakaitika na Borys, dhiretori we cikora cimweni ku Ucrânia. Kunyazi wainga asiripi Mupupuri wa Djehovha, iyena waibata no unaki afundi ainga ari Apupuri a Djehovha uye waireremedza zvaanotenda. Borys paakasanangura kutiza ku dii raiita hondo kuti aende ku mbuto yakacengeteka mu nyika iyona, hama dzedu dzakamubetsera. Pedzepo, iyena wakapinda Cirangaridzo ce Rufu ra Djesu. Ecirangarira zvese izvi zvaakaizirhwa no hama, Borys unoti: “Apupuri a Djehovha akandipangidzira unaki uye akandicengeta, inini ndinodikana kuatenda.”

¹¹ Isusu tingakwanisawo kuteedzera usisi wa Djehovha nge kupangidzira rudo ku ese aya anodikana kupangidzirhwa, kutobatanidzawo aya asikamuseenzeri. (Ruka 6:31, 36) Tinoda maningi kuti maitiro edu e rudo aitise kuti anhu akhwedere dhuze na Mwari wedu. (1 Ped. 2:12) Asi kunyazi izvona zvikatama kuitika, isusu ticazwa mupfaro wakakura ngo kubetsera amweni, ngokuti: “Kupasa kuno mupfaro kudarika kutambira.”—Zvii. 20:35.

DJEHOVHA ANOTIDZIIRIRA

12. Djehovha anogondesa kudziirira anhu ake hinga cikwata ngo mushobo upi? (Pisarema 91:1, 2, 14)

¹² Erengai Pisarema 91:1, 2, 14. Nyamasi uno, Djehovha anopikira kudziirira anhu ake panocokuita no ku mwiya kana kuti iyena anobetsera aseenzi ake kuti arumbwe ano ushamwari wakabamba naye. Djehovha aazotenderi kuti Sathani apedze kunamata ke cokwadi. (Juau 17:15) Uye tingakwanisawo kugara no rugondo rese rekuti pa “kutambudzika kukuru” Djehovha acadzadzisa gondeso yake ye kudziirira anhu ake, haiwa basi pa zviro zve ku mwiya, asiwo pa zviro zve ku nyama.—Zvak. 7:9, 14.

13. Djehovha anodziirira kudini munhu umwe na umwe we aseenzi ake?

¹³ Djehovha anodziirira kudini aseenzi ake umwe na umwe? Eciseenzesa Bhaibheri, Djehovha anotibetsera kuzwisisa musiyano we zviro zvakanaka uye zvakashata. (Aheb. 5:14) Patinoseenzesa zvokwadi zvisikacinji zviri mu Soko rake, tinodziirirhwa pa dii re ku mwiya uye re ku nyama. (Pis. 91:4) Djehovha anotidziirirawo eciseenzesa ungano. (Isa. 32:1, 2) Hama dzedu dzinoda Djehovha uye dzinorarama maererano no cokwadi cake cisikacinji. Patinonga tino hama dzedu tinobambiswa uye tinogara no simba ratinoda kuti tirhwisane no maitiro akashata.—Zvie. 13:20.

14. (a) Ngei Djehovha ecitendera kuti aseenzi ake ashuphike? (b) Pisarema 9:10 inotipasa gondeso ipi? (Onaiwo masoko e pasi.)

¹⁴ Zvezvirokwazvo, kareko Djehovha akadziriira aseenzi ake anganani pa zviro zvinocokuita no ku nyama. Asi, amweni aitambudzika uye kufa ngo ndaa ye matambudziko akasiyana-siyana. Nyamasi uno, umwe na umwe wedu ungakwanisawo kutambudzika ngo ndaa ye zviro zvinoitika “zvisikakarirhwi.” (Mup. 9:11) Kusiya izvona, aseenzi anganani a Djehovha e kare akabatana no kuteererhwa uye kuuraiwa, zvekuti zvingaitikawo na isusu nyamasi uno. Djehovha anosiya izvona zveciitika kuti apangidze kuti Sathani ndi munyepi. (Djobo 2:4-6; Mat. 23:34) Djehovha pamweni aangabvisi matambudziko ese atinobatana nawo, asi Bhaibheri rinogondesa kuti Djehovha aazosii aya anomuda.d—Pis. 9:10.

DJEHOVHA ANOTINYARADZA

15. Djehovha anotinyaradza kudini eciseenzesa munamato, Soko rake uye misangano? (2 Akorinti 1:3, 4)

¹⁵ Erengai 2 Akorinti 1:3, 4. Nguwa dzimweni, tinorhwadziwa ngo ndaa ye kufirhwa no munhu watinoda kana kuti kubatana no kudzirhya mwoyo. Zvinouno, pamweni muri kusongana no mugariro unoita kuti muzwe muri mwega. Kodi uripo munhu unomuzwisisai here? Honde, Djehovha anomuzwisisai. Iyena aazwi kurhwadziwa kedu basi, asiwo “anotinyaradza pa matambudziko edu ese.” Iyena anozviita kudini? Patinoita munamato kuna Djehovha uye todeketera tecikumbira rubetso, iyena anotipasa ‘runyararo Rake rinodarika kuzwisisa kese.’ (Afi. 4:6, 7) Tinonyaradzwawo paya patinoerenga zviya zvaanotibvunza kuti tiite mu Soko rake. Bhaibheri rinopangidza kutida kunoita Djehovha, kutifundisa no uzii kaanoita uye kutipasa kariro yakanaka. Uye misangano ye Cikristu inotinyaradzawo. Ikona, tinokwanisa kuzwa rudo re hama no hanzvadzi uye kubambiswa nge zviya zvatinofunda mu Bhaibheri.

16. Muezaniso wa Nathan na Priscilla unotifundisei?

¹⁶ Onai zvakaitika kuna Nathan na Priscilla, anogara ku Estados Unidos. Muezaniso wawo unopangidza kuti Djehovha anotinyaradza uye anotibambisa eciseenzesa Bhaibheri. Mu makore manganani adarika, awona akasanangura kuenda ku mbuto inodiwa aparidzi akawanda. Nathan unopanganidza kuti: “Isusu tainga tino rugondo rekuti Djehovha aizokomborera kupeta masimba kedu.” Asi paakaguma ikona, ciripo-ripoco awona akatanga kusongana no matambudziko e uthongo uye kutama zvekurarama nazvo. Mumasure me cinguwa, awona akahwirira kumba kawo, asi matambudziko anocokuita no kutama mare akarumbwa aripo. Nathan eciedzurira zvakaitika, iyena unoti: “Djehovha ainga asikatikomboreri hinga mushobo wataietsera. Inini ndairumbwa ndecibvunzisa kuti: Kodi ciripo ciro cakashata candakaita here?” Asi no kuhamba ke nguwa, Nathan na Priscilla akazoona kuti Mwari ainga asikazi kuasiya pa nguwa iya kamare yaaida. Nathan unoti: “Pa nguwa ii inoshupha, Bhaibheri rakagara shamwari yakanaka kandiri, irona rakandipasa mazano e uzii uye rakandibambisa. Pane kuti tikande ndangariro dzedu pa matambudziko ataisongana nawo pa nguwa iyona, takakanda ndangariro dzedu pakuti Djehovha aitibetsera kudini. Izvona zvakatipasa rugondo rokuti Djehovha aizorumbwa ari ku dii redu pa matambudziko ataizosongana nawo mune ramangwana.”

17. Djehovha akanyaradza kudini Helga? (Onaiwo foto.)

¹⁷ Hama no hanzvadzi dzedu dzinotinyaradzawo. Onai zvakaitika na Helga, unogara ku Hungria. Ke makore akawanda, iyena wakasongana no matambudziko akakura maningi akaita kuti agare asina kariro uye aone hingana asikakoshi. Asi ecirangarira zvakaitika, iyena unokwanisa kuona kuti Djehovha akamubetsera kudini eciseenzesa hama no hanzvadzi. Iyena unoti: “Inini ndaidikana kuseenza, kucengeta mwana wangu wairhwara uye kurhwisana no matambudziko amweni akasiyana-siyana. Djehovha paiona kuti ndainga ndisisina simba, iyena aindibetsera. Pa makore 30 adarika, apana kana zuwa rimwe haro rokuti Djehovha aazi kudzadzisa gondeso yake yekundinyaradza. Kakawanda kakhona, Djehovha aiseenzesa masoko e unaki uye anopfadza, anobva ku hama no hanzvadzi. Pa nguwa yandaida, ndaitambira mensaji, kartau kana kuti ndaisimbwa.”

18. Tinganyaradza kudini amweni?

¹⁸ Kunyaradza amweni ndi mushobo we kuteedzera Mwari wedu uye ndi makomborero katiri. Asi tingazviita kudini izvona? Nge kupurutana amweni no mwoyo unononoka kutsamwa, kubhuya ngo mushobo unonyaradza uye ngo kubetsera uya unoda. (Zvie. 3:27) Isusu tinopeta masimba kuti tinyaradze aya arikushuphika, kubatanidza asikaseenzeri Djehovha. Anyacigarisano edu paanofirhwa, paanorhwara kana kudzirhya mwoyo, isusu tinoavhakacira, tinonyasa kuapurutana uye tinoapangidza tsamba dze Bhaibheri dzinonyaradza. Kuteedzera Djehovha, “Mwari we kunyaradza kese,” kunounzisa mungumisiro wakanaka. Tingakwanisa kubetsera hama no hanzvadzi dzedu kuti dzishingirire uyewo kupfawisa mwoyo ye aya asikaseenzeri Djehovha teciita kuti ade kuziya cokwadi.—Mat. 5:16.

DJEHOVHA NGUWA DZESE ARI KU DII REDU

19. Djehovha anoticengeta kudini uye isusu tingamuteedzerawo kudini?

¹⁹ Zvezvirokwazvo, Djehovha anorangarira ese aya anomuda. Iyena aatisii paya patinobatana no matambudziko. Djehovha anoticengeta hinga mushobo unocengeta baba mwana wawo no rudo. Iyena anotitungamirira, anotipasa zviya zvatinoda, anoticengeta uye anotinyaradza. Tingakwanisa kuteedzera Baba edu ano rudo nge kubetsera uye kubambisa aya ari kusongana no matambudziko. Izvirokwazvo kuti zvinetso uye matambudziko ticarumbwa tecibatana nazvo mu nyika ino, asi tingakwanisa kugonda kuti Djehovha ari ku dii redu. Iyena anogondesa kuti: “Usathye, ngokuti ndinewe.” (Isa. 41:10) Hino, tino rugondo rakakura rekuti atiripi tega!