MUSORO WE KUFUNDA 30
NGOMA 97 Soko ra Mwari Upenyu
Kodi Tingarumbwa Here Tecifunda no Fundiso Dzekutanga dze Bhaibheri?
“Ndinorumbwa ndecimuedzurirai zviro izvi, kunyazi mecizviziya uye makanyasa kubamba mu cokwadi.”—2 PED. 1:12.
CINANGWA
Kuona kuti fundiso dzekutanga dze Bhaibheri dzatakafundira patakatanga kufunda Bhaibheri dzingatibetsera kudini nyamasi uno.
1. Fundiso dzokutanga dzo Bhaibheri dzakacinja kudini upenyu wenyu?
FUNDISO dzekutanga dze Bhaibheri dzakacinja upenyu wedu. Ngo muezaniso, pamakatanga kufundira kuti zina ra Mwari ndi Djehovha, imwimwi makatanga kukhwedera dhuze naye. (Isa. 42:8) Mumasure me kufunda kuti cinyi cinoitika munhu paanofa, imwimwi amuzizve kudzibvunzisa kuti anyaukama enyu akafa ainga ecinetseka. (Mup. 9:10) Uye pamakafundira kuti nyika icagara Paraizo, makaima kunetseka ngezve ramangwana renyu. Makagara no cokwadi cekuti maizoraramapi ke makore anokwana kuita 70 kana kuti 80 basi, asi maizorarama nokusikaperi.—Pis. 37:29; 90:10.
2. Ngei tingabhuya kuti kunyazi Akristu akakura pakunamata angabetsereka no fundiso dzokutanga dzo Bhaibheri? (2 Pedru 1:12, 13)
2 Isusu tinorumbwa tecibetsereka no fundiso idzi dzekutanga dze Bhaibheri. Mu tsamba yake ye cipiri, muphostori Pedru wakatarira Akristu ainga akanyasa “kubamba mu cokwadi” kana kuti aiga akakura pakunamata. (Erengai 2 Pedru 1:12, 13.) Mu nguwa iyona, afundisi ekunyepa uye anhu akashata aiedza kuapausa pakutamata kakacena. (2 Ped. 2:1-3) Pedru waida kubambisa hama kuti adzibetsere kuramba fundiso idzona. Hino, iyena wakaaedzurira zviro zvaainga afunda. Fundiso idzona dzaizobetsera Akristu kuti arumbwe akagondeka kuna Djehohva dakara ku mugumo.
3. Muezaniso upi unotibetsera kuona kuti fundiso dzokutanga dzo Bhaibheri dzinokosha kunyazi ku aya akakura pakunamata?
3 Kunyazi teciseenzera Djehovha ke makore akawanda, tingarumbwa tecifundira zviro zvipsva pa fundiso dzekutanga dze Bhaibheri. Ngo muezaniso, mai anokwanisa kunyasa kubika uye mwana wawo we musikana angaseenzesa maegredhienti amwewo kuti abike kovhi. Asi nokuhamba ke nguwa, maiwo angaseenzesa maegredhienti awona kuti abike nge mukhaindi umweni uye wakasiyana. Nge mushobo umwewo, anhu aakuseenzera Djehovha ke nguwa yakareba uye afundi e Bhaibheri apsva, anoziya fundiso dzekutanga dzimwe-dzimwedzo dze Soko ra Mwari. Asi awona pamweni angaona fundiso idzona nge mishobo yakasiyana. Mugariro wedu uye basa ratiri kuita mu sangano ra Djehovha pamweni zvacinja kubvira patakabhabhatidzwa. Asi kunyasa kurangarira ngezve zvokwadi zvatakafunda kare, kunotibetsera kuona mishobo yatingaiseenzesa pa migariro wedu zvino. Ngatione kuti aya aakuseenzera Djehovha ke nguwa yakareba angafundei no fundiso dzitatu dzekutanga dze Bhaibheri.
DJEHOVHA NDI MUSIKI
4. Kuziya kuti Djehovha ndiye Musiki, zvakabata-bata kudini upenyu wenyu?
4 Isusu tinonyasa kuziya kuti nyika no zvese zviri mairi zvakasikwa no Musiki ano ungwaru uye simba. Bhaibheri rinoti: “Akawaka zviro zvese ndi Mwari.” (Aheb. 3:4) Asi isusu tingafundira zvakawanda no cokwadi ici cokuti Djehovha ndi Musiki. Iyena anotirangarirawo uye anoziya zvakatinakira. Hino, kuziya kuti Djehovha ndi Musiki, kakacinja upenyu wedu uye kakaita kuti upenyu wedu ugare no cinangwa.
5. Cokwadi cipi co Bhaibheri cinotibetsera kudzidodosa? (Isaya 45:9-12)
5 Kuziya kuti Djehovha ndi Musiki, kunotibetsera kuti tidzidodose. Ngo muezaniso, pano nguwa yekuti Djobo wakabhuya zvakashata ngezva Djehovha. Iyena wakanyanya kudzirangarira uye wakaedza kupangidza kuti wainga asina ndaa. Kuti amubetsere, Djehovha akaedzurira Djobo kuti Djehovha ainga ari Musiki we masimba ese. (Djobo 38:1-4) Ngo kuedzurirhwa kaakaizwa, Djobo wakazwisisa kuti zvese zvinoizwa na Djehovha nguwa dzese zvakanaka. Paakapanganidza kuti anhu aadikani kudziona kuti akakurisisa kudarika Mwari, Isaya wakatara eciti: “Kodi dongo ringabhuya here ku muumbi waro kuti: ‘Uri kuumbei?’”—Erengai Isaya 45:9-12.
6. I nguwa ipi yakanaka yekuti tinyase kurangarira ngezve ungwaru uye simba re Musiki wedu? (Onaiwo mifanikiso.)
6 Mukristu paanotanga kuziya zvakawanda, iyena ungakwanisa kunyanya kudzigonda pane kupsvaka nhungamiriro dza Djehovha uye dze Bhaibheri. (Djobo 37:23, 24) Asi kana munhu akatanga kurangarira kuti ungwaru uye simba re Musiki azviezaniswi, izvona zvicamubetsera kuti arumbwe ecidzidodosa uye kuzwisisa kuti zvinorangarirhwa na Djehovha zvinokosha maningi kudarika maonero ake kamare.—Isa. 40:22; 55:8, 9.
Cinyi cingatibetsera kuti tigare no maonero ari pakati no pakati ngezve maonero edu kamare? (Onai ndima 6)d
7. Rahela wakaitei kuti atendere nhungamiriro ipsva?
7 Kuedzurira kuti Djehovha ndi Musiki kakabetsera Rahela unogara ku Eslovênia kutendera nhungamiriro dzipsva dze sangano. Iyena unopanganidza eciti: “Nguwa dzimweni inini ndinoona kuti zvinoshupha maningi kutendera nhungamiriro dzinganani dze aya ari kutungamirira. Ngo muezaniso, inini ndakaona Ciziiso ce Dare Rinotungamirira #8 ca 2023. Kunyazi zvakadaro, pandakatanga kuona hama ino mandebvu yeciita mharidzo, ndakanetseka maningi. Hino, ndakanamata kuna Djehovha uye ndakamukumbira kuti andibetsere kutendera cinjo iyona.” Rahela wakazwisisa kuti nge kugara Musiki we denga no nyika, Djehovha anokwanisa kutungamirira sangano rake mu gwanza rakanaka. Zvakadini kamuri? Zvinomushuphiraiwo here kutendera mazwisisiro mapsva kana kuti nhungamiriro dzipsva dze sangano? Kana zviri izvona, ciro cakanaka camungaita ngece kudzidodosa uye kubvisa nguwa kuti munyase kurangarira ngezve ungwaru uye simba re Musiki wedu.—Aro. 11:33-36.
MWARI AAKONZERI MATAMBUDZIKO
8. Ngei zvakamunakirai kufundira kuti Djehovha andiyepi anokonzera matambudziko?
8 Ngei Mwari ecitendera matambudziko? Anhu akawanda asikazii mhinduro we mubvunzo uu anonyangadzwira Mwari uye aatenderi kuti iyena ariyo. (Zvie. 19:3) Ngo dii rimweni, imwimwi makafunda kuti citema uye kutama kukwana ndizvo zvinokonzera matambudziko, haiwa Djehovha. Imwimwi makafundawo kuti mwoyo unononoka kutsamwa wa Djehovha ku anhu wakaita kuti mamirionji e anhu amuziye uye aone mushobo waacapedza matambudziko ku anhu ese. (2 Ped. 3:9, 15) Zvokwadi izvi zvakamunyaradzai uye zvakabambisa ushamwari wenyu na Djehovha.
9. Mugariro upi watinodikana kuedzurira kuti ngei Djehovha ecisiya kuti matambudziko aitike?
9 Isusu tinozviziya kuti tinodikana kugara anhu ano mwoyo unononoka kutsamwa patinoetsera kuti Djehovha apedze matambudziko. Asi isusu kana kuti munhu watinoda akabatana no matambudziko, kubathwa zvisina unatsi kana kufirhwa, tingarangarira kuti Djehovha ari kunonoka kupedza matambudziko. (Abha. 1:2, 3) Pamigariro yakaita hingana hii, zvakanaka maningi kuedzurira zvikonzero zvinoitisa kuti Djehovha atendere kuti anhu akanaka abatane no matambudziko.a (Pis. 34:19) Uye tinganyasawo kurangarira ngezve cinangwa ca Djehovha ce kupedza matambudziko nokusikaperi.
10. Cinyi cakabetsera Anne mumasure me kufa ka mai ake?
10 Kuziya cokwadi ngezve matambudziko kungatibetsera kuti tishingirire. Anne, unogara ku citsuwa ce Mayotte ku oceano Índico unoti: “Makore manganani adarika inini ndakafirhwa na mai angu uye izvona zvakaita kuti ndipererhwe. Asi nguwa dzese ndinopsvaka kuedzurira kuti Djehovha andiepi anokonzera matambudziko. Kusiya izvona, iyena anoda maningi kupedza zviro zvese zvinoita kuti titambudzike uye kumutsa anhu atinoda. Kunyasa kurangarira ngezve zvokwadi izvi, kunondibetsera kuti ndigare no runyararo randisikakwanisi kupanganidza.”
11. Kuziya zvikonzero zvinoita kuti Djehovha atendere matambudziko kunotibetsera nge mushobo upi?
11 Kuziya kuti ngei Mwari ano mwoyo unononoka kutsamwa uye anosiya matambudziko, zvinotiitisa kuti tirumbwe teciparidzira. Muphostori Pedru wakapanganidza kuti mwoyo unononoka kutsamwa wa Djehovha unopasa mukana anhu akawanda kuti acinyuke uye azoponeswe. Pedzepo iyena wakatara kuti: “Rangarirai kuti munodikana kugara anhu akaita kudini. Munodikana kugara anhu ano muhambiro wakacena uye meciita mabasa e kudzipira no mwoyo wese kuna Mwari.” (2 Ped. 3:11) Imwe ye mishobo yekuita “mabasa ekudzipira no mwoyo wese kuna Mwari,” i kuparidzira. Kuita hingana Baba edu, isusu tinoda anhu uye tinoda kuti awona ararame nokusikaperi mu nyika ipsva. Djehovha aciri kurumbwa ecipasa anhu e mu ndima medu mukana we kumunamata. Uye imwimwi muno makomborero ekuseenza pamwepo na Mwari uye kubetsera anhu akawanda amunokwanisa kufunda ngezvake mugumo usati wauya!—1 Ako. 3:9.
ISUSU TIRI KURARAMA MU “MAZUWA EKUPEDZESERA”
12. Kuziya kuti tiri kurarama mu mazuwa ekupedzesera kunotipasa rugondo ripi?
12 Bhaibheri rinonyasa kupanganidza kuti anhu aizogara akadini mu “mazuwa ekupedzesera.” (2 Ti. 3:1-5) Nge kuona maitiro akashata e anhu akatitenderedza zvinoita kuti tizwisise kuti uphorofita uu uri kudzadzika. Kuzwisisa cokwadi ici kunoita kuti tinyase kugonda Soko ra Mwari.—2 Ti. 3:13-15.
13. Tecirangarira ngezve muezaniso wa Djesu pana Ruka 12:15-21, tinodikana kudzibvunzisei?
13 Kuziya kuti tiri kurarama mu mazuwa ekupedzesera, kunotibetsara kuti tinyanye kubatikana pa zviro zvinokosha. Pana Ruka 12:15-21 Djesu akabhuya ngezve muezaniso wekuti tinodikana kukanda ndangariro dzedu pa zviro zvinonyanya kukosha. (Erengai.) Ngei mwanarume mupfumi unodainzwa kuti “wakapusa?” Haiwa ngokuti iyena wainga akapfuma, asi ngokuti wainyanya kukoshesa zviro zvakashata. Iyena waidziunganidzira upfumi asi “wainga asikazi kupfuma kuna Mwari.” Ngei zvaaita zvainga zvakashata maningi? Mwari akabvunza Mwanarumewo kuti: “Usiku uno ucauraiwa.” Muezaniso uu unotifundisei? Yasara nguwa doko kuti mugumo ugume. Hino tinodika kudzibvunzisa kuti: ‘Zvinangwa zvangu zvinopangidza kuti ndiri kuseenzesa nguwa yangu no ungwaru here? Zvinangwa zvipi zvandiri kukohomedzesa ana angu kuti agare nazvo? Ndinoseenzesa nguwa yangu, simba rangu uye zvandinazvo kuti ndidziunganidzire upfumi kana kuti ndinounganidzira upfumi kuna Mwari?’
14. Ngei zvinokosha kunyasa kurangarira ngezve zvipangidzo zvinopangidza kuti tiri kurarama mu mazuwa ekupedzesera, uye esperiensiya ya Miki inopangidza kudini izvona?
14 Patinonyasa kurangarira ngezve zvipangidzo zvinopangidza kuti tiri kurarama mu mazuwa ekupedzesera, izvona zvingakwanisa kucinja mushobo wedu we kurarama. Ndizvo zvakaitika no hanzvadzi imweni inozwi Miki. Iyona inoti: “Pandakapedza kufunda, inini ndaida maningi kugara mupsvakisisi we upenyu we zvinyama, uye kuti ndiseeze no basa irona. Uyewo, ndaida kugara mupiyonera we nguwa dzese uye kuseenza kunodiwa aparidzi akawanda. Asi shamwari dzakakura pakunamata dzakandibetsera kuona kuti kodi inini ndaizokwanisadi here kubatikana pa basa rangu uye kudzadzisa zvinangwa zvangu zvekunamata? Awona akandiedzurira kuona kuti mugumo we nyika ino yaa dhudze uye kuti mu nyika ipsva inini ndaizofunda ngezve zvinyama nokusikaperi. Hino, ndakasanangura kuita kurso yainga isikazonditoreri nguwa yakawanda uye yaizondifundisa mabasa aizondibetsera pakurarama. Nge mushobo uwona, ndakakwanisa kurumbwa ndeciseenza hingana mupiyonera we nguwa dzese uye no kuhamba ke nguwa ndakazoenda kaidiwa aparidzi akawanda, ku Equador.” Nyamasi uno, Miki no mwamuna wake ari kuseenza hingana aonereri e nharaunda ku Equador.
15. Muezaniso wa Tiyago unopangidza kudini kuti atidikani kuremba kuparidzira anhu? (Onaiwo foto.)
15 Kuedzurira kuti tiri kurarama mu mazuwa ekupedzesera, kunotibetsera kuti tirumbwe tecikoshesa basa re kuparidzira kunyazi munhu paanoramba masoko akanaka paanotanga kuparidzirhwa. Zvezvirokwazvo, anhu angacinja. Onai muezaniso wa Tiyago hama ya Djesu. Iyena wakaona no madziso ake kamare Djesu ecikura, ecigara Mesiya uye mufundisi asikaezaniswi. Kunyazi zvakadaro, ke makore akawanda Tiyago aazi kugara mufundi wa Djesu. Iyena wakagara mufundi mumasure mekuti Djesu amutswa, uye wakagara mufundi unoshingaira maningi!b (Juau 7:5; Aga. 2:9) Hino, musarembe kuparidzira anyaukama enyu uye anhu e mu ndima menyu asati atenda cokwadi. Zvingaita kuti pamweni zvamunoabvunza nyamasi, zvicagara no mugumisiro wakanaka mu nguwa yo mberi, pamweni dambudziko guru rikatanga.c
Cinyi cingatiitisa kuti tisarembe kuparidzira anyaukama edu asikaseenzeri Djehovha? (Onai ndima 15)e
RUMBWAI MECIKOSHESA ZVIEDZURIRO ZVA DJEHOVHA
16. Zviedzuriro zva Djehovha zvakamubetserai kudini? (Onaiwo bhokisi rakazwi “Seenzesai Zvokwadi zvo Bhaibheri kuti Mubetsere Amweni.”)
16 Dii rimwe re zvekurhya zvekumwiya zvatinopaswa zvinogadzirirhwa anhu asikazii zvakawanda ngezve Bhaibheri. Ngo muezaniso, mharidzo dzinoizwa pa musangano we mapeto e sumana, marevhista ku anhu ese uye maartigo no mavhidhiyo ari mu saiti jw.org, anoizirhwa maka-maka anhu asiripi Apupuri a Djehovha. Kunyazi zvakadaro, zviedzuriro izvi zva Djehovha zvingakwanisa kutibetserawo. Izvona zvinotunhudzira rudo redu kuna Mwari, zvinobambisa kutenda kedu mu Soko rake Bhaibheri uye zvinotibetsera kugara afundisi akanaka.—Pis. 19:7.
17. Mugariro upi watinodikana kunyasa kurangarira fundiso dzokutanga dzo Bhaibheri?
17 Isusu Apupuri a Djehovha tinopfara patinotambira mazwisisiro mapsva e cokwadi ce Bhaibheri. Asiwo tinokoshesa maningi fundiso dzekutanga dze Bhaibheri dzakatiitisa kuti tipinde mu cokwadi. Patinotambira nhungamiriro dze sangano asi torangarira kuti maonero edu uye mushobo wedu we kuita zviro ndiwo wakanaka, tinodikana kudzidodosa uye toedzurira kuti Djehovha, Musiki wedu ano ungwaru uye simba, ndiye ari kutungamirira sangano. Isusu kana kuti munhu watinoda akabatana no matambudziko, zvaizonga zvakanaka kugara no mwoyo unononoka kutsamwa uye kurangarira kuti ngei Djehovha ecitendera kuti matambudziko aitike. Pakusanangura mushobo we kuseenzesa mare yedu uye nguwa yedu, tinodikana kurumbwa tecikoshesa zviro zvinonyanya kukosha uye kuedzurira kuti tiri kurarama mu mazuwa ekupedzesera. Kana tikadaro, zviedzuriro zva Djehovha zvicarumbwa zveciita kuti tigare anhu ano ungwaru uye kutibetsera kuti tirumbwe tecimuseenzera takagondeka.
NGOMA 95 Ruvheneko Rinorumbwa Recivheneka
a Onai artigo yakazwi “Zvichaita Kuti Kutambura Kwose Kukurumidze Kupera” mu Murindiri wa 15 ya Mayo ya 2007 pa mapaji. 21-25 mu ciShona.
c Onai artigo yakazwi “Tinoziyei ngezve Mushobo Ucatonga Djehovha Anhu Mune Ramangwana?” mu Murindiri wa Mayo 2024 mapaji. 8-13.
d KUPANGANIDZWA KE MAFOTO: Mukuru unopasa maonero ake asi akuru amweni aatenderani nawo. Mumasure mazvo, iyena unoringisa kudenga kakadzara no nyeredzi uye unozwisisa kuti unodikana kugara no maonero ari pakati no pakati ngezve maonero ake kamare.
e KUPANGANIDZWA KE MAFOTO: Pa fundo yayo ye munhu ega, hanzvadzi inoona zvipangidzo zviri kupangidza kuti tiri kurarama mu mazuwa ekupedzesera. Izvona zvinoiitisa kuti ifonere hama yayo uye kuiparidzira.