“Rumbwai Meciteera” Djesu Mumasure me Kubhabhatidzwa

1-2. Munhu unogara no makomborero api mumasure me kubhabhatidzwa?

MUPFARO mukuru kubhabhatidzwa uye kugara nhengo ye mhuri ya Djehovha. Aya akaita izvona uye ano ushamwari we padhuze na Djehovha, anotenderana no masoko a Dhavhidhi anoti: “Anopfara munhu wamunosanangura uye momukhwededza padhuze penyu kuti agare muberere renyu.”—Pis. 65:4.

² Djehovha anonyasa kusanangura aya anoita dii re mhuri yake. Hingana zvataona mu fundo yadarika, iyena anokweya anhu aya anoda kugara no ushamwari wakabamba naye. (Tig. 4:8) Pamunodzipira kuna Djehovha uye mobhabhatidzwa munogara no ushamwari unokosha Naye. Uye imwimwi mungakwanisawo kugara no rugondo rekuti mumasure me kubhabhatidzwa Djehovha “acamudururirai makomborero dakara pasisina camunokonerhwa.”—Mara. 3:10; Djer. 17:7, 8.

3. Mukristu wakadzipira uye obhabhatidzwa uno ubaba upi wakakura? (Muparidzi 5:4, 5)

³ Zviri pamhene kuti kubhabhatidzwa i kutanga basa. Imwimwi munodikana kupeta masimba kuti murumbwe makagondeka kuna Djehovha, kunyazi mecibatana no matambudziko uye miedzo. (Erengai Muparidzi 5:4, 5.) Hingana mufundi wa Djesu, imwimwi munodikana kuita zviri zvese kuti muteedzere muezaniso wa Djesu uye zvese zvaakafundisa. (Mat. 28:19, 20; 1 Ped. 2:21) Fundo ino icamubetserai kuti muite izvona.

“RUMBWAI MECITEERA” DJESU KUNYAZI NO MATAMBUDZIKO UYE MIEDZO

4. Afundi a Djesu anodikana kuthwara “mutanda we kutambudzikira” nge gwanza ripi? (Ruka 9:23)

⁴ Musarangarire kuti mumasure mekubhabhatidzwa imwimwi amucabatani no matambudziko. Kubhuya zvazviri, Djesu akasiya pamhene ku afundi ake kuti awona aizothwara “mutanda we kutambudzikira.” Uye awona aizodikana kuita izvona “zuwa rimwe na rimwe.” (Erengai Ruka 9:23.) Kodi no masoko aya Djesu aida kubhuya kuti afundi ake aizogara ecitambudzika here? Haiwa, andizvopi. Asi iyena akasiya pamhene kuti pane kugara no makomborero basi, afundi ake aizobatana no matambudziko uye matambudziko amweni aizoshupha maningi.—2 Ti. 3:12.

5. Djesu akapikira makomborero api ku aya akasiya zvese kuti aseenzere Djehovha?

⁵ Pamweni makambobatana nokuphikiswa no umwe we mu mhuri menyu kana kutombosiyawo zviro zve kunyama ngekuti maida kukanda Umambo wa Mwari pa mbuto ye kutanga. (Mat. 6:33) Kana zvakadaro, mungagara no rugondo rekuti Djehovha anozviziya zvese zvamakamuitira. (Aheb. 6:10) Pamweni matozwisisa kuti masoko aya a Djesu ngee cokwadi: “Apana munhu akasiya nyumba, hama, hanzvadzi, mai, baba, ana, kana minda, nge ndaa yangu uye nge ndaa ye masoko akanaka asikatambiri mu nguwa ino zvakapethwa ka 100—nyumba, hama, hanzvadzi, mai, ana, uye minda, uku ecitambudzwa—uye mune ramangwana, upenyu usikaperi.” (Mark. 10:29, 30) Apana mubvunzo kuti makomborero amatambira akawanda maningi, kudarika zviro zvipi hazvo zvamakasiya.—Pis. 37:4.

6. Ngei munodikana kurumbwa mecirhwisana no “cido ce nyama” mumasure me kubhabhatidzwa?

⁶ Mumasure me kubhabhatidzwa imwimwi munodikana kurumbwa mecirhwisana no “cido ce nyama.” (1 Juau 2:16) Kubhuya zvazviri, imwimwi muciri mubarirhwana usikazi kukwana wa Adhamu. Nguwa dzimweni, mungazwa hingana muphostori Pauro. Iyena wakati: “Zvezvirokwazvo, ndinonyasa kupfarira mutemo wa Mwari maererano no zvandiri nge cemukati, asi ndinoona mutemo umweni uri mu mwiri wangu wecirhwisana no mutemo we ndangariro dzangu uye wondiitisa muranda ku mutemo we citema uri mu mwiri wangu.” (Aro. 7:22, 23) Pamweni paya, imwimwi mungaora mwoyo ngo ndaa ye zvishaishi zvenyu. Asi, kuedzurira gondeso yamakaitira Djehovha pamakadzipira kaari, ndizvona zvinomupasai simba kuti murhwisane no miedzo ipi hayo. Cokwadi ngecekuti mhiko yamakaitira Djehovha icaita kuti upenyu wenyu ugare nyore pamucasongana no miedzo. Kuita kudini?

7. Kudzipira kenyu kuna Djehovha kucamubetserai kuti murumbwe makagondeka kaari nge gwanza ripi?

⁷ Pamunodzipira kuna Djehovha imwimwi munonga mecidziramba. Izvona zvinoreya kuti imwimwi mucaramba zvese zvisikapfadzi Djehovha. (Mat. 16:24) Ndiyo ndaa, pamunonga meciedzwa imwimwi amutori nguwa mecirangarira kuti munodikana kuitei. Ngekuti imwimwi munonga meciziya kuti cinyi camunodikana kuita—kurumbwa makatendeka kuna Djehovha. Mucarumbwa mecipfadza Djehovha uye pamugariro uwona imwimwi mucagara hinga Djobo. Kunyazi paakabatana no mugariro unoshupha maningi, iyena wakati: “Dakara dafa, andizosiyi kugondeka kangu kuna Mwari!”—Djobo 27:5.

8. Kunyasa kurangarira ngezve munamato wenyu wekudzipira kungamubetserai kudini kuti mukunde miedzo?

⁸ Kunyasa kurangarira munamato wamakaita pamakadzipira kuna Djehovha, ndikona kucamupasai simba kuti mukunde muedzo upi hawo. Ngo muezaniso, imwimwi maizoda munhu unonga awaka kana kuwakwa here? Zviri pamhene kuti haiwa! Imwimwi makagondesa kuna Djehovha kuti amuzoiti zviro zvakadaro. Kana imwimwi mukatama kusiya kuti mazwiro akashata apinde mu mwoyo menyu, amuzogari no basa rekuda kuabvisa. Ngekudaro, imwimwi munonga ‘musikapindi’ mu “gwanza re anhu anoita zvakashata.”—Zvie. 4:14, 15.

9. Kunyasa kurangarira ngezve munamato wenyu wekudzipira kucamubetseraiwo kudini kuti mukande zviro zvekunamata pa mbuto yokutanga mu upenyu wenyu?

⁹ Zvakadini kana mukaona basa rakanaka asi ricamupingaidzai kuti mupinde musangano? Imwimwi mucaziya zvekuita. Ngokuti musati maona basa irona, imwimwi mainga maita cisananguro cekuti apana ciro caizomupingaidzai kuti mupinde misangano yese. Hino imwimwi amuzotendi basa irona. Kunyasa kurangarira ngezve muezaniso wa Djesu kungatibetsera maningi pa mugariro iwona, iyena ainga akagadzirira kupfadza Baba ake nguwa dzese. Uyewo kuita hingana Djesu, isusu tinodawo kupfadza Mwari.—Mat. 4:10; Juau 8:29.

10. Mumasure me kubhabhatidzwa, Djehovha acamubetserai kudini kuti “murumbwe meciteera” Djesu?

¹⁰ Cokwadi ngecekuti miedzo yamucabatana nayo, icamupasai mukana kuti mupangidza kuti imwimwi munoda ‘kurumbwa meciteera’ Djesu. Uye imwimwi mungagara no rugondo rekuti Djehovha acamubetserai kuti muite izvona. Bhaibheri rinoti: “Mwari akagondeka, uye aazomusii meciedzwa kupinda zvamunokwanisa kushingirira; asi pamunonga meciedzwa, Mwari acamupsvakirai gwanza rekubuda naro kuti mukwanise kushingirira.”—1 Ako. 10:13.

MUNGARUMBWA KUDINI MECITEERA DJESU

11. Mushobo upi wakanaka we kurumbwa meciteera Djesu? (Onaiwo foto.)

¹¹ Djesu akaseenzera Djehovha no mwoyo wese uye aiita munamato kaari nguwa dzese. (Ruka 6:12) Kana mecida kurumbwa meciteera Djesu mumasure me kubhabhatidzwa, zvakanaka maningi kuita zviro zvinoita kuti mugare dhuze na Djehovha. Bhaibheri rinoti: “Pasinei no kubudirira pa kunamata kataita dakara zvino, ngatirumbwei tecihamba mu gwanza irona.” (Afi. 3:16) Pamweni paya, imwimwi mucazwa maesperiensiya e hama no hanzvadzi dzakasanangura kuita zvakawanda mu basa ra Djehovha. Pamweni idzona dzakatopinda Cikora ce Aziisi e Umambo kana kutocinja ecienda ku mbuto inodiwa aparidzi akawanda. Kana mugariro wenyu wecitendera, mungagarawo no zvinangwa zvakadai. Anhu a Djehovha nguwa dzese anopsvaka mikana yekuita zvakawanda mu basa re kuparidzira. (Zvii. 16:9) Asi zvakadini kana musikakwanisi kuita izvona pa nguwa ino? Musarangarire kuti imwimwi amukoshi kudarika hama dziya dzinoita zvakawanda. Cinokosha ngecekuti munodikana kurumbwa mecishingirira. (Mat. 10:22) Musambokanganwe kuti Djehovha anopfara maningi no zviya zvamungaita maererano no mugariro wenyu uye zvamunokwanisa. Ndizvona zvicamubetserai kuti murumbwe meciteera Djesu mumasure me kubhabhatidzwa.—Pis. 26:1.

12-13. Imwimwi mungaitei kana mukaona kuti kushingaira kenyu kaakuthurudzika? (1 Akorinti 9:16, 17) (Onaiwo bhokisi rakazwi: “Rumbwai Mecigogoma.”)

¹² Munodikana kuitei kana mukazwa kuti amuciripi kunamata no mwoyo wese uye kana kuti amucaripi kupfarira kuparidzira hinga zvamaiita kare? Zvingaitaiwo kuti amucapfariri maningi zvekuerenga Bhaibheri hinga zvamaiita kare. Kana izvona zvikaitika mumasure me kubhabhatidzwa musarangarire kuti amucina mwiya mucena wa Djehovha. Hinga anhu asikazi kukwana, mazwiro edu angakwanisa kucinja. Kana amuciripi kushingaira hingana kare, rangarirai ngezve muezaniso we muphostori Pauro. Iyena waipeta masimba kuti ateedzere Djesu, asi Pauro waizviziya kuti pamweni paya wainga asikazogari no cido cakabamba cekuita zviya zvaidikanika kuti aite. (Erengai 1 Akorinti 9:16, 17.) Zvekuti wakati: “Kunyazi ndikazviita ndisikadi, ndiciri nawo ubaba wandakapaswa.” Nge masoko amweni, Pauro wainga akagadzirira kuita basa rake re kuparidzira azvinei nokuti wainga ecizwa kudini.

¹³ Nge mushobo umwewo, musaite zviro maererano no mushobo wamuri kuzwa. Garai makagadzirira kuita zviro zvakanaka kunyazi musikadi kuzviita. Kana mukarumbwa meciita zviro zvakanaka, no kuhamba ke nguwa mazwiro enyu angacinja uye ogara akanyasa kunaka. Kugara no urongwa wakanaka we kuita zviro zvekunamata, fundo ye munhu ega, kuita munamato, kupinda misangano uye kuparidzira ndizvona zvicamubetserai kuti murumbwe meciteera Djesu mumasure me kubhabhatidzwa. Kusiya izvona, hama dzikaona kushingirira kenyu pakuseenzera Djehovha, idzona dzicazwawo dzakabambiswa.—1 Ate. 5:11.

“RUMBWAI MECIDZIONGORORA . . . RUMBWAI MECIDZIEDZA”

14. Cinyi catinodikana kudziongorora nguwa no nguwa uye ngei? (2 Akorinti 13:5)

¹⁴ Ciro cimweni cingamubetserai mumasure me kubhabhatidzwa ngece kutora nguwa yekudziongorora imwimwi kamare. (Erengai 2 Akorinti 13:5.) Pamweni paya, zvakanaka maningi kudusa nguwa yekuongorora kuti muone kuti maitiro enyu akaita kudini. Ngo muezaniso, dziongororei kuti murikukwanisa kuita munamato mazuwa ese, kuerenga uye kufunda Bhaibheri, kupinda misangano uye kubuda mu basa re kuparidzira. Psvakai mishobo yekunyasa kukhorovhera zviro zvese izvi. Ngo muezaniso, dzibvunzisei kuti: ‘Ndinokwanisa kupanganidzira amweni fundiso zvekutanga dze Bhaibheri here? Pano zvandingaita kuti ndinyase kupfadzwa nge basa re kuparidzira here? Minamato yangu yakananga uye inopangidza kuti ndinonyasa kugonda Djehovha no mwoyo wese here? Kodi ndiri kupinda misangano nguwa dzese here? Pa mugariro iwona, ndinganyasa kudini kuteya nzee uye kupasa mhinduro?’

15-16. Mafundei kubva kuna Robert ngezve kukunda miedzo?

¹⁵ Ciro cimweni cinokosha i kuziya pamakarembera. Hama imweni inozwi Robert yakabhuya ngezve esperiensiya imweni inonyasa kupanganidza izvona, iyona inoti: “Pandainga ndino makore 20, inini ndainga ndino basa raiita kuti ndisapedze zuwa rese ndeciseenza. Zuwa rimweni mudoni wangu we kubasa we mwanakadzi wakandipika kuti ndiende ku nyumba kake mumasure me kukhumuka. Iyena wakabhuya kuti isusu taizosara tiri tega uye kuti ‘taizotamba maningi.’ Pakutanga inini ndakapsvaka zvikonzero uye pakupedzesera ndakabhuya kuti haiwa uye ndakamupanganidzira kuti ngei ndairamba.” Robert wakakwanisa kurhwisana no muedzo uu uye izvona zvinosimbwa. Asi mumasure mekurangarira zvakaitika Robert wakazwisisa kuti iyena waidikana kuita nge mushobo wakasiyana. Iyena unoenderera eciti: “Inini ndaitodikana kuramba mupiko wake pakutanga kamare hingana zvakaita Zuzee no mukadzi wa Potifari. (Gen. 39:7-9) Kubhuya zvazviri, inini ndakashamisika nge kuzwisisa kuti zvakandishuphira kuramba. Izvona zvakandibetsera kuona kuti ndaidikana kubambisa ushamwari wangu na Djehovha.”

¹⁶ Kuita hingana Robert zvinokosha maningi kuongorora mazwiro enyu. Kunyazi mukakwanisa kukunda miedzo dzibvunzisei kuti: ‘Kodi inini ndatora nguwa yakareba kuti ndibhuye haiwa?’ Kana imwimwi mukazwisisa kuti munodikana kugadzirisa, musadzipase ndaa. Pane kudaro, pfarai ngekuti maona pamakarembera pacino nguwa. Namatai kuna Djehovha ngezve paya pamakarembera uye itai zviro zvinobambisa cido cenyu cekuda kuzwira Djehovha.—Pis. 139:23, 24.

17. Zina ra Djehovha rakabatanidzwa kudini pa esperiensiya ya Robert?

¹⁷ Pano cimweni catingafunda ngezve esperiensiya ya Robert. Robert unobhuyazve kuti: “Mumasure mekuti ndaramba mupiko we mudoni wangu we kubasa, iyena wakati: ‘Makarokoto, iwewe waphasa pa muedzo uu!’ Pedzepo inini ndakamubvunzisa kuti izvona zvinoreyei. Iyena wakandipanganidzira kuti shamwari yake imweni yakambogara Mupupuri wa Djehovha yakabhuya kuti madjaha ese e Apupuri a Djehovha anorarama upenyu uwiri uye kana akaona mukana wekuita ciro cakashata, awona anoita. Hino iyena wakabvunza shamwari yake kuti waizozviedza na inini. Ndakapfara maningi ngekuti ndakakwanisa kukudza zina ra Djehovha.”

18. Mashinga kuitei mumasure me kubhabhatidzwa? (Onaiwo bhokisi rakazwi: “Mafundo Mairi Amucapfarira Maningi.”)

¹⁸ Pamunodzipira kuna Djehovha uye mubhabhatidzwa, imwimwi munopangidza kuti munoda kukudza zina ra Djehovha azvinei no zvingaitika. Uye imwimwi mungagara no rugondo rekuti Djehovha anonyasa kuziya miedzo yese yamunobatana nayo. Uye iyena anokomborera kupeta masimba kamunoita kuti murumbwe makagondeka. Imwimwi mungagara no rugondo rekuti eciseenzesa mwiya make mucena Djehovha anomupasai simba ramunoda. (Ruka 11:11-13) No rubetso ra Djehovha, imwimwi mucakwanisa kurumbwa meciteera Djesu mumasure me kubhabhatidzwa.