Zuzee wainga ari umwe we ana adoko a Djakobo. Iyena wainga ari mwana waidiwa maningi na Djakobo. Nge ndaa yazvo, madzikoma ake akamuitira shanje uye aimuzonda. Zuwa rimweni, Zuzee wakarota hope dzainga dzisikazwisisiki uye iyena wakadzipanganidzira ku hama dzake. Awona aazi kupfarira hope dza Zuzee. Unoziya kuti hama dzake dzakarangarirei? Idzona dzakarangarira kuti Zuzee waida kugara mambo wawo. Kubvira ipona, idzona dzakatotunhudzira kumuzonda.

Zuwa rimweni, madzikoma a Zuzee ainga ari kure ecicengeta mabira dhuze no Sikemu. Djakobo wakatuma Zuzee kuti aende koona kuti madzikoma ake ainga akadini. Paakaona Zuzee eciuya, awona akatanga kubhuya kuti: ‘Onai, Zuzee ari kuuya. Ngei isusu atiurai muroti uu?’ Zuzee paakaguma, hama dzake dzakamubata uye dzakamukhandira mu rindi rakadzika. Pa nguwa iyona kamare paidarika anarume anganani aienda ku Edjipitu. Hino, Djudha umwe we hama dza Zuzee wakati: ‘Ngatisamuuraye! Zvakadini tomutengesa kuti iyena agare muranda.’ Hino, awona akatengesa Zuzee ku anarume aya no mare inokwana kuita 20 dze prata ku atengesi e ku Midhiyani aienda ku Edjipitu.

Pedzepo, akatotesa macira a Zuzee no ngazi yo n’ombe kuti zviite hingana kuti iyena wainga auraiwa no cinyama. Awona akaenda no macirewo kuna Djakobo uye akamubvunzisa kuti: ‘Kodi macira aya ngaa Zuzee?’ Djakobo wakarangarira kuti mwana wake Zuzee wainga afa uye wakatsukwara maningi. Djakobo wainga asikadi kunyaradzwa.

Paakaguma ku Edjipitu, Zuzee wakatengwa no mwanarume umweni unokosha waizwi Potifari uye wakagara muranda wake. Asi Djehovha akarumbwa ecibetsera Zuzee. Potifari wakaona kuti Zuzee waiseenza zvakanaka uye kuti waikwanisa kumugonda. Pasati patodarika nguwa yakareba, Potifari wakasiya zvese zvaainga anazvo mu nyara dza Zuzee.

Mukadzi wa Potifari wakatanga kuona kuti Zuzee wainga akabamba uye wakarungama. Mazuwa ese, iyena waikumbira Zuzee kuti aite zvepamaponde naye. Zuzee waizoitei? Nguwa dzese iyena wairamba uye waimubvunza kuti: ‘Haiwa! Andingaiti izvona. Izvona zvakashata. Imwimwi ndimwi mukadzi wa Potifari uye awona anondigonda. Kana inini ndikaita zvepamaponde na imwimwi, Djehovha acatsukwara maningi uye inini andidi kuti izvona zviitike!’

Zuwa rimweni, mukadzi wa Potifari wakaedza kubambidzira Zuzee kuti aite naye zvepamaponde. Iyena wakabata macira a Zuzee, asi Zuzee wakabuda ecigogoma. Potifari paakaguma pa nyumba, mukadzi wake wakabhuya kuti Zuzee waida kumudzipa. Potifari wakanyangadzwa maningi uye wakaita kuti Zuzee akandwe mu kadheya. Kodi Djehovha akakanganwa Zuzee here? Ngatione.

Zuzee paainga ari mu kadheya, Faraoo mambo we Edjipitu wakarota hope dzekuti apana munhu waikwanisa kudzipanganidza. Asi mwanarume umweni wakabvunza Faraoo kuti Zuzee waikwanisa kududzira hope idzona. Hino Faraoo wakatuma munhu kuti aende kootora Zuzee mu kadheya.

Faraoo wakabvunzisa Zuzee kuti: ‘Unokwanisa kududzira hope dzandarota here?’ Zuzee wakapanganidza kuti: ‘Ke makore 7, Edjipitu icagara no zvekurhya zvakawanda, uye pedzepo pacadarika makore 7 e nzara. Hino sanangurai mwanarume uno uzii kuti acengete zvekurhya kuitira kuti anhu asafe no nzara.’ Faraoo wakati: ‘Ndasanangura iwewe! Ucagara wecipiri pa kutonga mu Edjipitu!’ Ngei Zuzee wakakwanisa kududzira hope dza Faraoo? Ngokuti Djehovha akabetsera Zuzee.

Zuzee wakacengeta zvekurhya zvakawanda ke makore 7. Pedzepo, akazoguma makore e nzara. Nzara yakazokura maningi zvekuti anhu e mbuto dzese aienda ku Edjipitu kootenga zvekurhya. Djakobo uwo wainga ari ku Kanani wakatoziyawo kuti ku Edjipitu kainga kuno zvekurhya. Hino wakatuma ana ake kuti aende ikona.

Paakaguma ku Edjipitu, hama dza Zuzee dzakaenda koobhuya no mwanarume waitengesa zvekurhya. Paakamuona akahwarara pamberi pake, asi aazi kuzviziya kuti mwanarumewo wainga ari Zuzee. Asi Zuzee wakaziya hama dzake uye wakaedzurira hope dzaakarota paainga aciri mudjaha. Kuti aziye kuti hama dzake dzainga dziciri no mwoyo wakashata, Zuzee wakaabvunza kuti: ‘Imwimwi muri avhevhi. Imwimwi muri kuda kurhwisana no Edjipitu.’ Awona akadaira kuti: ‘Haiwa, atiripi avhevhi! Isusu tirikubva ku Kanani. Tainga tiri ana 12, asi hama yedu imweni yakafa uye mudoko wasara na baba edu.’ Zuzee wakaabvunza kuti: ‘Kana imwimwi mukaunzisa munukuna wenyu pano, ndicatenderana no zvamuri kureketa.’ Hino hama dza Zuzee dzakahwirira ku Kanani.

Mumasure me kacinguwa, awona akahwirirazve ku Edjipitu kuti atenge zvimweni. Pa nguwa iyona, awona akatora munukuna wawo waizwi Bhenjamini kuti aende naye. Paakasonganazve na Zuzee awona aazi kumuziya. Hino Zuzee wakasanangura kuedza hama dzake. Iyena wakafisa kopo ye prata mu saku ra Bhenjamini uye wakabhuya kuti: ‘Aya aba kopo yangu ye prata. Psvakai mu masaku awo.’ Aseenzi a Zuzee akaita izvona uye akaona kopo mu saku ra Bhenjamini. Hama dza Zuzee dzakathya maningi. Awona aazi kugara no mwoyo wakashata hinga zvaakaita na Zuzee. Awona akadeketera eciti: ‘Tapota, musaphanice Bhenjamini. Phanicai isusu.’

Izvi zvakaita kuti Zuzee agare no rugondo kuti hama dzake dzainga dzacinja. Hino iyena aazi kukwanisa kudzibata. Zuzee wakatanga kucema eciti: ‘Ndini Zuzee, hama yenyu. Baba angu aciri apenyu here?’ Hama dzake dzainga dzisikazvitenderi kuti Zuzee wainga aciri mupenyu. Hino Zuzee wainga ano shungu nawo here? Haiwa. Kuti apangidze kuti wainga arekerera hama dzake, Zuzee wakabhuya kuti: ‘Musanetseke nge ndaa ye zviya zvamakandiitira. Mwari akandituma kuno kuti ndiponese upenyu wenyu. Asi ndapota, endai mootora baba angu muaunzise kuno.’

Hama dza Zuzee dzakahwirira ku Kanani uye dzakapanganidzira baba awo Djakobo masoko anopfadza. Pedzepo, akaatora oenda nawo ku Edjipitu. Zuzee wakazoonanazve na baba ake mumasure me kudarika nguwa yakareba asikazi kuonana.