1-3. Mibvunzo ipi inoizwa no anhu pamusoro pe akafa? Uye magereja amweni anodaira kudini mibvunzo ii?

BHAIBHERI rinotithembesa kuti icaguma nguwa yekuti “kufa akucazoonekizve.” (Zvakapangidzwa 21:4) Mu Fundo 5, takafunda kuti rusudzunuro rinotipasa mukana kuti tione upenyu usikaperi. Asi anhu acirikufa. (Muparidzi 9:5) Ngokudaro, umwe mubvunzo mukuru watinomutsa ndewekuti: Cinyi cinoitika katiri patinofa?

² Mhinduro ye mubvunzo uu tinonyanya kuida maka-maka kana tafirhwa no munhu watinoda. Pamweni tingadzibvunzisa kuti: ‘Aenda kupi? Ari kutiona here? Angatibetsera here? Ticazomuonazve here?’

³ Magereja anodaira mibvunzo idzi nge mishobo yakasiya-siyana. Amweni anofundisa kuti kana mainga muri munhu akanaka, munoenda kudenga uye kana maiita zvakashata, munoenda koopiswa mu gehena. Amweniwo anofundisa kuti pamunofa munogara mudzimu kuti muende korarama no anyaukama enyu akafa kare. Amwenizve anofundisa kuti pamunofa mopedza kutongwa, mucabarhwazve kana kuhwirirazve ku upenyu no muiri umweni, pamweni hingana munhu kana cinyama.

4. Murangariro upi wakatodzana unofundiswa no magereja pamusoro pe akafa?

⁴ Magereja anoita hinga ari kufundisa zviro zvakasiyana maningi. Asi ese akabatana pa murangariro umwewo. Awona anofundisa kuti kana munhu akafa pano ciro cinobuda corumbwa cecirarama. Kodi ndizvodi kamare?

PATINOFA TINOENDA KUPI?

5, 6. Cinyi cinoitika katiri patinofa?

⁵ Djehovha anoziya zvinoitika katiri patinofa uye akatibvunza kuti munhu paanofa, upenyu wake unotoperawo. Kufa, kunoreya kutama upenyu. Hino, munhu paanofa mazwire ake no nzero dzake azvirumbwi zvecirarama ku mbuto imweni.a Patinofa ationi, atizwi kana kurangarira.

⁶ Mambo Soromoni akatara kuti “akafa apana caanoziya.” Akafa aana rudo kana uzondi, uye “mu Guwa amuna basa kana kuronga mazano kana uzii kana ungwaru.” (Erengai Muparidzi 9:5, 6, 10.) Uye Pisarema 146:4, Bhaibheri rinotibvunza kuti munhu paanofa “marangariro ake” anofawo.

DJESU AKATII NGE ZVE MAGARIRE E AKAFA?

7. Djesu akareketei nge zve magarire e akafa?

⁷ Paakafirhwa no shamwari yake Razaro, Djesu akati ku afundi ake: “Razaro, shamwari yedu, yawata.” Asi Djesu ainga asikadi kureketa kuti Razaro aizorora. Djesu akabhuya pamhene: “Razaro afa.” (Juau 11:11-14) Hino, Djesu akaezanisa rufu hingana kuwata. Iyena aazi kubhuya kuti Razaro ainga ari kudenga kana no hama dzake dzainga dzakafa. Aatozi kubhuya kuti Razaro ainga ari kupiswa mu gehena kana kubarhwazve hingana munhu umweni kana hingana cinyama. Haiwa, zvaiita hingana Razaro arikuwata asikaroti. Pano matarhwa amwenizve anoezanisa kufa hingana kuwata. Estevha paakauraiwa, Bhaibheri rinoti, “iyena akawata mu rufu.” (Zviito 7:60) Muphostori Pauro akatarawo nge zve MaKristu amweni ainga “akawata mu rufu.”—1 Akorinti 15:6.

8. Tinoziya kudini kuti Mwari aazi kutisika kuti tizofe?

⁸ Mwari akasika Adhamu na Evha kuti azofe here? Haiwa! Djehovha akaasika kuti adakadzwe no upenyu nokusikaperi, ano uthongo wakakwana. Djehovha paakasika anhu, akaasika no cido ce kurarama nokusikaperi. (Muparidzi 3:11) Hingana madzibaba asikadi kuti ana awo acembere no kufa, ndizvoo zvinoda Djehovha katiri. Asi kana Mwari akatisika kuti tirarame nokusikaperi, hino ngei tecifa?

NGEI TECIFA?

9. Ngei mutemo wakapaswa Adhamu na Evha wainga usikashuphi kuzwira?

⁹ Mu munda we Edheni, Djehovha akati kuna Adhamu: “Pa miti yese ye mu munda ungarhya hako dakara waguta. Asi usarhye mucero we muti wo kuziya zvakanaka no zvakashata, ngokuti zuwa raunourhya zvirokwazvo ucafa.” (Genesi 2:9, 16, 17) Mutemo uu wakadjeka wainga usikashuphi kuzwira, ngokuti Djehovha ainga akasisira kubvunza Adhamu na Evha kuti cinyi cakanaka ne cinyi cakashata. Ngokuzwira Djehovha aizopangidza kuti anoreremedza ucangamire wake. Awona aizopangidzawo kuti aitenda zvakadini zvese zvaainga apaswa.

10, 11. (a) Sathani akacengedza kudini Adhamu na Evha? (b) Ngei zvakaizwa na Adhamu na Evha zvisikarekererhwi?

¹⁰ Zvinotsukwarisa kuziya kuti Adhamu na Evha akasanangura kusakazwira Mwari. Sathani akati kuna Evha: “Zvirokwazvo here kuti Mwari akati musarhye micero ye miti yese ye mu munda?” Ecipindura Evha akati: “Tingarhya hedu micero ye miti yo mu munda. Asi, nge zve mucero we muti uri pakati pe munda, Mwari akati: ‘Musauurhye, kana kuubata, mukandodaro mucafa.’”—Genesi 3:1-3.

¹¹ Hino, Sathani akati: “Zve zvirokwazvo amuzofi. Ngokuti Mwari anoziya kuti zuwa ramunourhya madziso enyu acapenyeswa uye mucaita hingana Mwari, meciziya zvakanaka no zvakashata.” (Genesi 3:4-6) Sathani aida kuti Evha arangarire kuti aikwanisa kudzisanangurira pacake zvakanaka no zvakashata. Pa nguwa imweyo akanyepawo nge zvaizoitika kana akatama kuzwira. Sathani akati Evha ainga asikazofi, ngokudaro Evha akarhya mucerowo pedzepo akapasawo mwamuna wake. Adhamu na Evha aizviziya kuti Djehovha ainga akaarambidza kurhya mucero uwona. Paakaurhya, akasanangura kusazwira mutemo wakadjeka uye usikashuphi kuzwira. Akapangidzawo kusareremedza Baba wawo wo kudenga ane rudo. Zvaakaita azvirekererhwi!

12. Ngei zvakaita Adhamu na Evha zvakarhwadza maningi Djehovha?

¹² Zvinorhwadza kuziya kuti madzibaba edu okutanga ainga asikareremedzi Musiki wawo zvakadaro! Maizozwa kudini kana ana enyu amakaseenzera ne simba kuti muarere ozomupandukirai ngokuita zviya zvamakaarambidza? Amurhwadziwi ndizvo here?

13. Djehovha aida kureyei paakati ‘ngokuti uri mavhu ucahwirara ku mavhu’?

¹³ Paakatama kuzwira Mwari, Adhamu na Evha akaruza mukana wo kurarama nokusikaperi. Djehovha akati kuna Adhamu: ‘Ngokuti uri mavhu ucahwirira ku mavhu.’ (Erengai Genesi 3:19.) Izvi zvinoreya kuti Adhamu aizoitazve mavhu, kuita hingana asikambozi kusikwa. (Genesi 2:7) Mu masure mokuita citema, Adhamu akafa uye aazozi kuzoonekazve.

14. Ngei tecifa?

¹⁴ Kudai Adhamu na Evha akazwira Mwari, akadai aciri kurarama na nyamasi uno. Asi paakatama kuzwira Mwari, akaita citema, ngokudaro akazofa. Citema cakaita hingana nhenda yakashata yatakabarhwa nayo kubva ku madzibaba edu okutanga. Tese takabarhwa no citema ndiyo ndaa tinofa. (Aroma 5:12) Asi izvi andizvopi zvaida Mwari katiri. Mwari ainga asikadi kuti anhu afe, ndiyo ndaa Bhaibheri rinodainza rufu kuti “muzondi” wedu.—1 Akorinti 15:26.

COKWADI CINOTISUDZUNURA

15. Kuziya cokwadi ngo pamusoro pe akafa kunotisudzunura kudini?

¹⁵ Cokwadi ngo pamusoro pe akafa cinotisudzunura pa marangariro akawanda ekunyepa. Bhaibheri rinotifundisa kuti akafa aarhwadziwi kana kutsukwara. Atikwanisi kureketa nawo uye awonawo aatoreketi. Atingaabetseri uye awona aatibetseriwo. Apana caanokwanisa kuita kuti atikuwadze, hino atidikani kuathya. Asi magereja akawanda anofundisa kuti akafa aciri kurarama ku mbuto imweni, uye kuti tinokwanisa kuwabetsera kana tikapa mare mapadri kana aya anozwi acena. Asi patinoziya cokwadi ngo pamusoro pe akafa, atizonyeperhwi.

16. Manyepo api anofundiswa no magereja akawanda ngo pamusoro pe akafa?

¹⁶ Sathani anoseenzesa magereja ekunyepa kuti atinyepere uye anoita kuti tirangarire kuti akafa aciri kurarama. Ngo muezaniso, magereja amweni anofundisa kuti kana munhu akafa pano ciro cinobuda corumbwa cecirarama ku mbuto imweni. Gereja renyu rinofundisa izvona here kana kuti rinofundisa zvinobhuya Bhaibheri ngo pamusoro pe akafa? Sathani anoseenzesa manyepo kuti andundire anhu kure na Djehovha.

17. Ngei murangariro wokuti anhu anopiswa mu muriro mu gehena unosvipisa Djehovha?

¹⁷ Zvinofundiswa no magereja akawanda zvinothyisa. Ngo muezaniso, magereja amweni anofundisa kuti anhu akashata acapiswa mu muriro usikaperi mu gehena. Manyepo aya anosvipisa Djehovha. Mwari aangambotenderi kuti anhu atambudzwe kudaro! (Erengai 1 Juau 4:8.) Munoona kudini munhu anopanga mwana wake ngo kupisa nyara dzake pa muriro? Zvirokwazvo maizomuona hinga munhu wakashata maningi. Mainga musikazodi kana kumuziya. Sathani anodawo kuti tione zvakadaro Djehovha!

18. Ngei tisikadikani kuthya anhu akafa?

¹⁸ Magereja amweni anofundisa kuti munhu paanofa anoita mudzimu. Magereja aya anofundisa kuti tinodikana kukudza kana kutothya midzimu ii, ngokuti iyona ingakwanisa kugara shamwari dzedu dzino simba kana azondi edu anothyisa. Anhu akawanda anotenda manyepo aya. Ngo kuthya akafa awona anotoanamata pane kunamata Djehovha. Edzurirai kuti akafa aakwanisi kuona kana kuzwa ciro, ndiyo ndaa atidikani kuathya. Djehovha ndiye Musiki wedu. Ndiye Mwari we zvirokwazvo uye tinodikana kunamata iyena basi.—Zvakapangidzwa 4:11.

19. Kuziya cokwadi ngo pamusoro pe akafa kunotibetsera kudini?

¹⁹ Patinoziya cokwadi ngo pamusoro pe akafa tinosudzunurhwa pa manyepo e magereja. Cokwadi ici cinotibetsera kuzwisisa zvipikirhwa zvakanakisisa zva Djehovha zvinocokuita no upenyu wedu uye ramangwana redu.

20. Ticafundei mu fundo inoteera?

²⁰ Kareko, museenzi wa Mwari unozwi Djobo akabvunzisa kuti: “Kana munhu akafa, angararamazve here?” (Djobo 14:14) Kodi zvingaitadi kamare kuti munhu akafa araramezve? Mhinduro yatinopaswa na Mwari mu Bhaibheri inopfadza maningi. Ticazviona mu fundo inoteera.

1-3. Tese takaita hingana tiri mukaraboso mei, uye Djehovha acatisudzunura kudini?

NGATITI matongerhwa kurarama mu karaboso ke upenyu wese nge ciro camusikazi kuita. Apana kariro kuti mucasudzunurhwa. Upenyu wenyu woita hingana wapera ipona, uye apana camungaita kuti mubude. Pa nguwa iyona, moziya munhu ano simba rokumubudisai uye wotomuthembesai kuti acamubetserai! Maizozwa kudini?

² Tese takaita hingana tiri mukaraboso ro rufu. Apana catingakwanisa kuita kuti tibude. Asi Djehovha ane simba rekutibvisa mu karaboso ro rufu. Uye akatigondesa kuti “muzondi wokupedzesera, rufu, acatsakatiswa.”—1 Akorinti 15:26.

³ Cimborangarirai kuzorodzwa kamucazwa pamucararama musikathyizve kufa! Asi Djehovha aazobvisi basi rufu. Acaunzawo akafa ku upenyu. Cimborangarirai kuti izvi zviri kuda kureyei kamuri. Mwari anogondesa kuti “aya asina simba ari mu rufu” acararamazve. (Isaya 26:19) Izvi ndizvo zvinodainzwa no Bhaibheri kuti rumuko.

PATINOFIRHWA NO MUNHU WATINODA

4. (a) Cinyi cingatinyaradza kana tikafirhwa no munhu we mu mhuri medu kana shamwari tsika ndi tsikewo? (b) Ndiani ainga ari shamwari tsika ndi tsikewo dza Djesu?

⁴ Patinofirhwa no munhu we mu mhuri medu kana shamwari tsika ndi tsikewo tinorhwadziwa maningi. Tinopererhwa no mazano. Apana catingakwanisa kuita kuti timuhwirinzezve ku upenyu. Asi Bhaibheri rinotipasa nyaradzo ye zvirokwazvo. (Erengai 2 Akorinti 1:3, 4.) Ngationei muezaniso umweni unopangidza kuti Djehovha na Djesu anoda maningi kumutsa adikani edu. Djesu paainga ari pa nyika pano, iyena aienda koona Razaro no hama dzake, Marita no Maria. Ese ari atatu ainga ari shamwari tsika ndi tsikewo dza Djesu. Bhaibheri rinoti: ‘Djesu waidisa Marita, munukuna wake, na Razaro.’ Asi zuwa rimweni Razaro akafa.—Juau 11:3-5.

5, 6. (a) Djesu akaitei paakaona hama no shamwari dza Razaro dzecicema? (b) Ngei zvinonyaradza kuziya mazwire a Djesu nge zve rufu?

⁵ Djesu akaenda konyaradza Marita na Maria. Marita paakazwa kuti Djesu ainga ari kuuya, akaenda koosongana naye kunza ke thaundi. Akapfara ngokuona Djesu, asi akati kaari: “Kudai mainga muri pano, hama yangu ingadai isikazi kufa.” Marita akarangarira kuti Djesu ainga anonoka kuuya. Pedzepo Djesu akaona Maria munukuna wa Marita ecicema. Eciona kutsukwara kawo, iyena akarhwadziwa nazvo uye akacemawo. (Juau 11:21, 33, 35) Akazwa kurhwadziwa katinozwa patinofirhwa no munhu watinoda.

⁶ Kuziya kuti Djesu anorhwadziwawo ne rufu hingana zvatinoita, kunotinyaradza ngokuti Djesu akaezana na Baba wake. (Juau 14:9) Djehovha ano simba rekubvisa rufu nokusikaperi, uye ndizvo kamare zvaacaita mbai-mbai pano.

“RAZARO, BUDA KUNZA!”

7, 8. Ngei Marita ainga asikadi kuti buwe ribviswe pa guwa ra Razaro, asi Djesu akaitei?

⁷ Djesu paakaguma pa guwa rainga rakaigwa Razaro, musuwo waro wainga wakafungwa no dzikubuwe. Djesu akati: “Bvisai buweri.” Asi Marita ainga asikadi kuti ribviswe. Mutumbi wa Razaro wainga waano mazuwa marongomuna. (Juau 11:39) Marita ainga asikazvizii zvaida kuita Djesu kuti abetsere hama yake.

⁸ Djesu akati kuna Razaro: “Buda kunza!” Marita na Maria zvaakazoona zvakaashamisa. “Mwanarume ainga akafa akabuda ano muoko no mirenje dzakapomberhwa nge djira.” (Juau 11:43, 44) Razaro ainga amutswa kuti araramezve! Iyena akasonganiswazve no hama no shamwari dzake. Awona aikwanisa kumubata, kumupsvasa no kucedza naye. Ici cishamiso cikuru! Djesu akamutsa Razaro.

“MUSIKANA, NDINOKUTI, ‘MUKA!’”

9, 10. (a) Ndiani akapasa Djesu simba re kumutsa anhu? (b) Ngei zviitiko zvekumutswa ke anhu zvecitibetsera maningi?

⁹ Kodi Djesu aimutsa anhu no simba rake here? Haiwa. Asati amutsa Razaro, Djesu akanamata kuna Djehovha, uye Djehovha akamupasa simba kuti amutse Razaro. (Erengai Juau 11:41, 42.) Razaro andiepi basi akamutswa. Bhaibheri rinotibvunza nge zve musikana umweni ainga ano makore 12 ekubarhwa airhwara maningi. Baba ake, Jairo, ainga asikacazii cokuita, uye akadeketera kuna Djesu kuti arape mwana wawo. Ainga asina mwana umwenizve. Pa nguwa yaaireketa na Djesu, anarume amweni akaguma uye akati: “Mwana wenyu afa! Muciri kushuphirei henyu Mufundisi?” Asi Djesu akati kuna Jairo: “Usathye, gara no kutenda basi, uye iyena acaponeswa.” Djesu akaenda kumba ka Jairo pamwepo naye. Paaiguma dhuze no pa nyumba pa Jairo, Djesu aikwanisa kuzwa anhu ecicema. Djesu akati kaari: ‘Musaceme, ngokuti aazi kufa, asi ari mu hope.’ Madzibaba e musikanewo akadai akambodzibvunzisa kuti Djesu ari kuda kubhuyei. Djesu akakumbira ese ainga ari mumba kuti abude uye akatora madzibaba e musikanewo kuti aende painga pakaradzikwa mwana wawo. Djesu akabata nyara ye musikanewo zve upfawi uye akati kaari: “Musikana, ndinoti kauri, ‘muka!’” Cimborangarirai kupfara kakaita madzibaba ake musikanewo paakamuka ciripo-ripoco wotanga kuhamba! Mwana wawo ainga amutswa na Djesu. (Marko 5:22-24, 35-42; Ruka 8:49-56) Kubvira pa zuwa irona, pese paaiona mwana wawo aiedzurira zvaakaizirhwa na Djehovha eciseenzesa Djesu.a

¹⁰ Anhu ese akamutswa na Djesu no kuhamba ke nguwa akazofazve. Asi zvatinoerenga nge zve anhu aya zvinotibetsera ngokuti zvinotipasa kariro ye zvirokwazvo. Djehovha anoda maningi kumutsa anhu, uye acazviita.

ZVIITIKO ZVE BHAIBHERI NGE ZVE KUMUTSWA KE ANHU ZVINOTIFUNDISEI?

11. Muparidzi 9:5 inotifundisei nge zva Razaro?

¹¹ Bhaibheri rinobhuya pamhene kuti “akafa apana caanoziya.” Izvi ndizvo zvakaitika kuna Razaro. (Muparidzi 9:5) Hinga zvakarekethwa na Djesu, zvaiita hingana Razaro ari mu hope. (Juau 11:11) Paainga ari mu guwa, Razaro “apana caaiziya.”

12. Tinoziya kudini kuti Razaro akamutswadi kamare?

¹² Razaro paakamutswa na Djesu, anhu akawanda akazviona. Na azondi a Djesu aitoziyawo nge zve cishamiso ici. Razaro ainga ecirarama, uye izvi zvaipangidza pamhene kuti ainga amutswadi kamare. (Juau 11:47) Kupinda izvi, anhu akawanda aienda koona Razaro. Izvi zvakaita kuti atange kutenda kuti Djesu ainga atumwadi na Mwari. Azondi a Djesu aazi kudakadzwa nazvo, ndiyo ndaa akaronga mazano kuti auraye Djesu na Razaro.—Juau 11:53; 12:9-11.

13. Ngei tinogonda kuti Djehovha acamutsa anhu akafa?

¹³ Djesu akati “ese aya ari mu makuwa e anorangarirhwa” acamutswa. (Juau 5:28) Izvi zviri kuda kureya kuti anhu ese anorangarirhwa na Djehovha acamutswa. Asi kuti Djehovha amutse munhu, anodikana kuedzurira mugariro wake. Kodi anokwanisa kuzviita here? Kudenga kune mabhirionji e nyeredzi. Bhaibheri rinobhuya kuti Djehovha anoziya zina re nyeredzi imwe na imwe. (Erengai Isaya 40:26.) Kana Djehovha ecikwanisa kuedzurira zina re nyeredzi imwe na imwe, izvi zvinotigondesa kuti anokwanisa kuedzurira mugariro wo munhu waanoda kumutsa. Kupinda izvi, Djehovha ndiye akasika zviro zvese, hino ngatigondei hedu kuti ane simba re kumutsa anhu akafa.

14, 15. Masoko akabhuyiwa ndi Djobo anotifundisei nge zve kumutswa?

¹⁴ Mwanarume akatendeka, Djobo, aitenda kuti akafa acamutswa. Iyena akabvunzisa kuti: “Kana munhu akafa, angararamazve here?” Hino akati kuna Djehovha: “Mucadainza, uye inini ndicadaira. Mucasuwa basa re nyara dzenyu.” Honde, Djobo aizviziya kuti Djehovha anoda maningi kumutsa akafa.—Djobho 14:13-15.

¹⁵ Munozwa kudini nge zve kumutswa ke akafa? Pamweni mungadzibvunzisa kuti, ‘Hama no shamwari dzangu dzakafa, dzicamutswawo here?’ Zvinonyaradza kuziya kuti Djehovha anoda maningi kumutsa akafa. Ngationei zvinobhuya Bhaibheri kuti anhu acamutswa acagara kupi uye kuti ndiani acamutswa?

“ACAZWA IZWI RAKE UYE ACAMUKA”

16. Anhu acamutswa kuti ararame pa nyika pano acagara no upenyu wakaita kudini?

¹⁶ Kareko, anhu ese akamutswa akasonganiswa no mhuri ne shamwari dzawo pa nyika pano. Ndizvo zvicaitikawo mberiyo, asi ngo mushobo wakakhwirira. Ngei? Ngokuti ese aya acamutswa pa nyika pano, acagara no mukana wo kurarama nokusikaperi asikacafizve. Uye acagara mu nyika yakasiyana maningi no yatiri kurarama mazuwa ano. Musina hondo, anhu anoputsa mutemo ne matenda.

17. Ndiani acamutswa?

¹⁷ Ndiani acamutswa? Djesu akati “ese aya ari mu makuwa e anorangarirhwa acazwa izwi rake obuda.” (Juau 5:28, 29) Uye Zvakapangidzwa 20:13 inotiti: “Bahari rakabudisa akafa ainga ari mariri, uye rufu ne guwa zvakabudisa akafa ainga ari mazviri.” Honde, mabhirionji e anhu akafa acararamazve. Muphostori Pauro akareketa kuti “anatsi no ashaishi” acamutswa. (Erengai Zviito 24:15.) Izvi zviri kuda kureyei?

18. Anhu “anatsi” acamutswa ndianani?

¹⁸ “Anatsi” anobatanidza aseenzi a Djehovha akagondeka akararama pa nyika Djesu asati auya pasi pano. Akadai hingana, Abrahamu, Sara, Mozesi, Ruti, uye Esteri acamutswa kuti ararame pa nyika pano. Mungaerenga nge zve anhu aya mu bhuku ra Ahebheru 11. Zvakadiniwo no aseenzi a Djehovha akagondeka anofa mazuwa ano? Awona anobatanidzwawo mu anhu “anatsi,” ngokudaro acamutswawo.

19. “Ashaishi” acamutswa ndianani? Djehovha acaapasa mukana wokuitei?

¹⁹ “Ashaishi” anobatanidza mabhirionji e anhu asikazi kuona mukana wokuziya Djehovha. Kunyazi hawo akafa, Djehovha aazi kuwakanganwa. Acaamutsa oapasa mukana wokufunda nge zvake no kumuseenzera.

20. Ngei anhu amweni asikazomutswi?

²⁰ Izvi zviri kuda kureya kuti anhu ese acamutswa here? Haiwa. Djesu akareketa kuti anhu amweni aazomutswi. (Ruka 12:5) Ndiani acasanangura kuti munhu uu anoita kumutsa kana kuti aaiti? Djehovha ndiye mutongi wo kupedzesera, asi akapasawo Djesu simba “re kutonga apenyu no akafa.” (Zviito 10:42) Munhu wese anonga akatongwa kuti akashata mwoyo uye asikacinji ndiye basi asikazomutswi.—Onai pakazwi Nyasai Kuzwisisa n.º 17.

KUMUTSWA KUTI AENDE KUDENGA

21, 22. (a) Anhu acaenda kudenga acamutswa ne muiri wakadini? (b) Ndiani munhu wokutanga akamutswa kuti ararame kudenga?

²¹ Bhaibheri rinotibvunzawo kuti anhu anganani acaenda koorarama kudenga. Anhu acamutswa kuti ararame kudenga, aazomutswi no muiri we nyama. Djehovha acaamutsa kuti ararame kudenga hinga zvisikwa zve mwiya.

²² Djesu ndiye munhu wokutanga akamutswa kuti ararame kudenga. (Juau 3:13) Mu masure me mazuwa matatu Djesu auraiwa, Djehovha akamumutsa. (Pisarema 16:10; Zviito 13:34, 35) Djesu aazi kumutswa ne muiri we nyama. Muphostori Pedru akapanganidza kuti Djesu “akauraiwa pa nyama asi akamutswa mu mwiya.” (1 Pedru 3:18) Djesu akamutswa hinga munhu we mwiya ano simba! (1 Akorinti 15:3-6) Asi Bhaibheri rinobhuya kuti andiepi ega aizomutswa kudaro.

23, 24. Ndiani anoumba “cikwata cidoko” cakabhuiwa na Djesu, uye anhu angana?

²³ Asati afa, Djesu akabvunza afundi ake akagondeka kuti: “Ndiri kuenda komugadzirirai mbuto yokugara.” (Juau 14:2) Izvi zviri kuda kureya kuti ateereri a Djesu anganani aizoenda koorarama naye kudenga. Anhu angana? Djesu akaadainza kuti “cikwata cidoko” ngokuti aizonga ari anhu padoko basi. (Ruka 12:32) Muphostori Juau akabvunzwa numero yawo paakaona Djesu ‘akagara pa Dunhu re Ziyoni [kudenga], pamwepo no 144 000.’—Zvakapangidzwa 14:1.

²⁴ MaKristu 144 000 aizomutswa riini? Bhaibheri rinotibvunza kuti izvi zvaizoitika Djesu Kristu paanonga ecitonga. (1 Akorinti 15:23) Tiri kurarama mu nguwa iyona zvino pano, uye anhu akawanda anoumba 144 000 atopera kumutswa kuti ararame kudenga. Ese aciri pa nyika pano, paanofa anomutswa ciripo-ripoco kuti aende kudenga. Asi anhu akawanda acamutswa kuti ararame mu Paradhizo pa nyika pano.

25. Ticafundei mu fundo inoteera?

²⁵ Mbai-mbai pano, Djehovha acasunungura anhu pa rufu, uye rufu ricabviswa nokusikaperi! (Erengai Isaya 25:8.) Asi anhu acaenda kudenga acada koitei ikona? Bhaibheri rinopanganidza kuti acagara atongi na Djesu mu Umambo. Ticada kufunda zvakawanda nge zve utongi uwona mu fundo inoteera.