FUNDO 11
Mungaitei Kuti Munyase Kubetserhwa ne Bhaibheri?
Zvakamboitika kamuri kuda kuita basa rakakura maningi here? Kuti zvireruke, pamweni mungada kuripungura mu madimbu madoko. Imwimwi mungaitawo kudaro pakuerenga Bhaibheri. Pamweni mungadzibvunzisa kuti: ‘Ndotangira papi?’ Mufundo ino, ticaona zviro zvakareruka zvamungaita kuti mude kufunda Bhaibheri zvoita kuti kurierenga kamucaita kupfadze.
1. Ngei tecidikana kuerenga Bhaibheri nguwa dzese?
Munhu unoerenga Bhaibheri, kana kuti “Mutemo wa Djehovha,” unopfara maningi mu upenyu. (Erengai Pisarema 1:1-3.) Kuti mutange, edzai kuerenga Bhaibheri mazuwa ese pazvimiseswa zvinganani. Pamunonga maakunyasa kuziya Soko ra Mwari, zvicamuitira nyore kupfadzwa nge kuerenga Bhaibheri.
2. Mungaitei kuti mubetserhwe ne kuerenga Bhaibheri?
Kuti mukhorovhere zvakanaka kuerenga kamunoita Bhaibheri, munodikana ‘kurangarira’ zvamunonga mecierenga. (Djoshuwa 1:8) Izvi zvinoreya kuti munodikana kumboima kakumborangarira zvamunonga maerenga. Pamunonga mecierenga, dzibvunzisei kuti: ‘Izvi zvinondifundisei nge zva Djehovha Mwari? Ndingazviseenzesa kudini mu upenyu wangu? Ndingaseenzesa kudini zvandiri kuerenga kuti ndibetsere anhu amweni?’
3. Mungaona kudini nguwa yekuerenga Bhaibheri?
Zviri kumushuphira kuti muone nguwa yekuerenga Bhaibheri here? Akawanda edu tinorangarirawo kudaro. Cimboedzai “kuseenzesa nguwa yenyu zvakanakisisa.” (Aefeso 5:16) Imwimwi mungaita kudaro ngokupsvaka nguwa pazuwa kuti muerenge Bhaibheri. Anhu amweni anosanangura kuerenga Bhaibheri kuciri macibesi-besi paanomuka mu hope. Asi amweni anosanangura kuzorierenga nguwa imweni, aakuda kusvusvura. Amwenizve anopfadzwa ngokuerenga Bhaibheri zuwa parinonga rabira, asati aenda kowata. Hino zvakadini kamuri? I nguwa ipi yakamunakira?
FUNDAI ZVAKAWANDA
Onai mazano angamubetsera kuti mupfadzwe ne kuerenga Bhaibheri. Onaizve kuti mungagadzirira kudini kuti mubetsereke pamunofunda Bhaibheri.
Kuita hingana pamunofundira kurhya zviro zvamusati makamborhya, imwimwi mungapfarirawo kufundira kuerenga Bhaibheri
4. Pfadzwai nge kuerenga Bhaibheri
Zvezvirokwazvo pamweni azviripi nyore kutanga kuerenga Bhaibheri. Asi mungafundira “kugara no cido cakakura” kana kuti kuzwa kuda kurierenga. Ndizvonawo zvinoitika munhu paanofunda kuti arhye ciro caainga asati akamborhya. Erengai 1 Pedru 2:2, pedzepo cedzai nge zve mubvunzo unoteera:
Munorangarira kuti kuerenga Bhaibheri mazuwa ese zvicamupfadza zvokuti munonga mooda kurumbwa mecirierenga here?
Ridzai VHIDHIYO uye onai zvakaizwa no anhu amweni kuti apfarire kuerenga Bhaibheri. Pedzepo cedzai nge zve mibvunzo dzinoteera.
Mu vhidhiyo yetaona, zvitsinzwa zvipi zvaikangaidza madjaha kuti aerenge Bhaibheri?
Cinyi cakaabetsera kuti arumbwe ecierenga Bhaibheri?
Zvinyi zvaakaita kuti apfadzwe ne kuerenga Bhaibheri?
Mazano:
Sanangurai Bhaibheri rakanyasa kuturikirhwa uye risikashuphi kuerenga. Mungasanangura pa Shanduro yeNyika Itsva rinooneka mumireketero yakawanda.
Tangai kuerenga matii amunoona kuti anomupfadza kuerenga. Onai mazano amweni mu bhokisi “Tangai kuerenga Bhaibheri renyu.”
Tarirai paphepa zvamunonga maerenga mu Bhaibheri. Kuti zvidaro, seenzesai bhokisi “Urongwa we Kuerenga Bhaibheri.”
Seenzesai aprikativho JW Library. Nayo, imwimwi munokwanisa kuerenga nokuzwa Bhaibheri muthurufunu yenyu, tablet kana mu computador.
Seenzesai apêndice ye Shanduro yeNyika Itsva. Iyona ino mamapa, mabhokisi no ma glossário anoita kuti kuerenga kenyu Bhaibheri kupfadze.
5. Gadzirirai fundo yenyu ye Bhaibheri
Erengai Pisarema 119:34, pedzepo cedzai nge zve mubvunzo unoteera:
Ngei zvakanaka kuti tiite munamato tisati taerenga Bhaibheri kana kuti tisati tarifunda?
Mungakhorovhera kudini fundo imwe na imwe ye bhuku rino? Pamunonga mecigadzirira kuti mufunde, edzai kuita zvinoteera:
Erengai ndima dzekutanga dze fundo yakhona.
Erengai tsamba dze Bhaibheri uye onai kubatana kadzinoita no zvamunonga maerenga.
Tsurutsutai masoko e ndima inopasa mhinduro dze mibvunzo imwe na imwe. Izvi zvicamubetsera kuzocedza nge zve fundo yakhona no mufundisi wenyu.
Maizviziya here?
Apupuri a Djehovha anoseenzesa ma Bhaibheri akaturikirhwa zvakasiyana-siyana. Asi awona anoda maningi kuseenzesa Shanduro yeNyika Itsva yeMagwaro Matsvene ngekuti irona ngere cokwadi, riri nyore kuzwisisa uye rinoseenzesa zina ra Mwari.—Onai fundo ye pa saiti “Apupuri a Djehovha Anoseenzesa Bhaibheri Rakasiyana no ma Bhaibheri Amweni Here?”
ANHU AMWENI ANOTI: “Kufunda Bhaibheri i basa rakakura maningi. Kusiya izvona, andina nguwa uye ndakaremba.”
Munorangarireiwo?
MUCIGWAGWA
Kuti mubetsereke nge zviro zvinofundiswa nge Soko ra Mwari, psvakai nguwa ye kuerenga Bhaibheri, itai munamato kuti muzwisise zvamuri kuerenga uye nyasai kugadzirira fundo imwe na imwe.
Mibvunzo yekuhwirinzira
Mungaitei kuti munyase kubetserhwa ne Bhaibheri?
I nguwa ipi yamungasanangura kuerenga ne kufunda Bhaibheri?
Ngei zvecibetsera kuti mugadzirire fundo yenyu ye Bhaibheri?
ZIYAI ZVAKAWANDA
Onai mazano angamubetsera kuti kuerenga kamunoita Bhaibheri kupfadze.
“Zvamungaita Kuti Mubetserhwe Nge Bhaibheri” (Murindiri N.° 1 ya 2017, mu )
Onai mazano matatu angamubetsera kuti mungaerenga kudini Bhaibheri.
“Bhaibheri Ringandibetsera Kudini?—Dii 1: Ziyai Zvakanaka Bhaibheri Renyu” (Fundo ye mu saite)
Onai kuti mungapfarira kudini kuerenga Bhaibheri.
“Bhaibheri Ringandibetsera Kudini?—Dii 2: Pfadzwai nge Kuerenga Bhaibheri” (Fundo ye mu saite)
Seenzesai mazano e anhu aano makore akawanda ecierenga Bhaibheri.