Anhu Amweni Anorangarirei ngezve Munamato?
“Pandinoita munamato, ndinozwa hingana kuti Mwari ari kudii rangu, ecibata moko wangu uye ecinditungamirira pandinonga ndapsveteka, ndisikazii zvokuita.”—MARÍA.
“Mukadzi wangu wakaita makore 13 ecirhwara nhenda yo kanseri uye akazofa. Inini ndinoedzurira ndeciita munamato kuna Djehovha mazuwa ese. Inini ndaizwa kuti Djehovha aindipurutana uye aizwa marhwadzo angu. Izvona zvaindipasa runyararo.”—RAÚL.
“Munamato i cipo cinoshamisa ca Mwari ku anhu.”—ARNE.
Kuna María, Raúl, Arne, uye amweni akawanda, munamato i cipo cinokosha. Nge kuita munamato, awona anozwa kuti angareketa na Mwari, kumutenda uye kukumbira rubetso rake. Awona anotendera no mwoyo wese masoko ari mu Bhaibheri anoti: “Iri ndiro rugondo ratinaro maari, kuti kana tikakumbira ciro cipi haco maererano no kuda kake, iyena anotizwa.”—1 Juau 5:14.
Asi anhu akawanda anorangarira kuti zvinoshupha kutendera zvinofundiswa no Bhaibheri ngezve kuita munamato kuna Mwari. Steve unopanganidza zvaairangarira ngezve munamato. Iyena unoti: “Shamwari dzangu nhatu dzakafa pandainga ndino makore 17, imwe yakafa no tsawana yo karu uye shamwari dzimweni mbiri dzakafira mu praya.” Mumasure mwazvo, Steve wakaitei? Iyena unoti “Inini ndakanamata kuna Mwari ndecimubvunzisa kuti ngei zvese izvi zvainga zvaitika, asi andizi kudairhwa. Hino, ndakarangarira kuti: ‘Zvinobetserei kuita munamato?’” Kuitawo hingana Steve, akawanda anorangarirawo kuti minamato yawo aidairhwi, ndiyo ndaa anotorangarira kuti azvibetseri kuita munamato.
Asi ici andicopi basi cikonzero cinoita kuti anhu arangarire kuti aadikani kuita munamato. Anhu amweni anorangarira kuti Mwari anoziya zviro zvese, hino isusu atidikani kuita munamato kaari tecireketa zvinetso zvedu kana kuti kukumbira ciro.
Amweni anorangarira kuti Mwari aadi kuzwa minamato yawo nge ndaa ye zviro zvakashata zvaakaita kare. Jenny unopanganidza kuti: “Inini ndinotsukwara maningi uye ndacinyuka ngo zviro zvese zvakashata zvandakaita. Ndiyo ndaa, ndinozwa hingana kuti andisisiri kupurutanwa na Mwari.”
Kuzotiwo imwimwi? Munorangarirei ngezve munamato? Kudai makambogarawo no mazwiro hinga e anhu aya amborekethwa nge zvawo, mucapfara maningi nge kuziya kuti Bhaibheri rinotii ngezve munamato. Isusu tingagonda no zvinobhuiwa no Bhaibheri.a Irona ringatibetsera kuti tigumire mhinduro dze mibvunzo dzinokosha, hingana idzi:
Kodi Mwari anopurutanadi kamare minamato yedu?
Ngei minamato imweni aidairhwi?
Cinyi candinodikana kuita kuti Mwari azwe minamato yangu?
Munamato ungandibetsera kudini?
a Minamato yakawanda ye aseenzi akagondeka a Mwari yakatarhwa mu Bhaibheri, kutobatanidzawo minamato ya Djesu. Matarhwa e Cihebheru, anoziikanwa hingana Testamento yo Kare, ano minamato inokwana kuita 150.