Nafea ia faaohipa i te ripene vidéo apî
1 Ua oaoa roa paha outou i te iteraa e ua matara te hoê ripene vidéo oia hoi Te mau Ite no Iehova: Te faanahonahoraa i muri mai i te iˈoa. Te vai ra teie ripene na roto i te reo beretane no teie taime. Mea oaoa roa ia manaˈo i te mau ravea huru rau e nehenehe ai tatou e faaohipa i teie ripene. I muri aˈe i to matou mataitairaa i teie ripene vidéo e 55 minuti, te tiaturi nei matou e e putapû-roa-hia outou i teie hohoˈa anaanatae e te faito maitai roa.
2 Te faaite nei teie hohoˈa vidéo i te faanahonahoraa a te mau tavini a Iehova o te pahono ra i te faaueraa a Iesu e poro i te parau apî maitai e ati noa ˈˈe te fenua nei (Mat. 24:14). Te faataa ra teie hohoˈa i te mau ohipa iho â râ a te Betela no Brooklyn e a te Vahi faaapuraa a te Taiete Watchtower, te horoa atoa mai ra oia i te hoê hiˈoraa nehenehe mau no nia i te ohipa na te ara a te mau Ite no Iehova. Fatata roa, e noaa teie ripene i te feia o tei ani i te tahi na ratou na roto i te arai o te amuiraa. A tapao na e ua paruruhia te mau tiaraa mana o teie ripene e ua opanihia ia tataipitihia.
3 I muri aˈe i to outou mataitairaa i teie ripene, peneiaˈe e hinaaro outou e ia fanaˈo atoa vetahi ê. Ia vai râ? Ua faaineine-taa-ê-hia teie ripene no te faaite atu i te feia e haapii ra i te Bibilia na muri ia tatou e o te rave nei i te mau haereraa i mua maitatai. Te faaitoito atu nei matou ia mataitai atu outou e teie mau taata, no te mea e iriti te reira i te uputa no te mau tauaparauraa i muri iho. Mai te peu e e ani mai te taata haapii, e nehenehe e horoa ˈtu i te ripene e ia faahoˈihia mai, ia faaite atu oia i te tahi atu mau taata, aore ra e nehenehe o ˈna e ani i te hoê na ˈna.
4 Aita anei vetahi o to outou mau fetii i roto i te parau mau? No te aha outou e ore ai e faanaho no te mataitai e o ratou? Peneiaˈe e riro te reira ei ravea no te tauaparau no nia i ta tatou faanahonahoraa e ta tatou mau tiaturiraa. E riro atoa teie hohoˈa ei faaitoitoraa no te mau taurearea. Ia ite ratou i teie mau rahiraa taurearea o te pûpû nei ia ratou no te turu i te Basileia, eita e ore e e itoitohia ratou ia opua atoa e rave i te taviniraa ma te taime taatoa.
5 Te tiaturi nei matou e e aratai teie ripene vidéo apî i te mau taata e rave rahi ia haafaufaa ˈtu â i te faanahonahoraa a Iehova e te ohipa o ta ˈna e rave nei i roto i te ao atoa nei.