Ia aravihi atu â i roto i te taviniraa—A faaineine i te taata no te farerei-faahou-raa

No te aha e mea faufaa ˈi? Ia anaanatae te hoê taata, e hinaaro tatou e farerei faahou ia ˈna i to ˈna fare no te pipi i te huero o te parau mau tei tanuhia. (Kor. 1, 3:6) No reira, hou a faarue ai i te taata, e mea tia ia faaau i te taime tano no te farerei-faahou-raa. E mea tia atoa ia tuu i te hoê uiraa no te tauaparauraa i mua. E anaanatae ïa te taata no te farerei-faahou-raa. E mai te peu e pahono te papai ta tatou i vaiiho i taua uiraa ra, e hinaaro iho â oia e taio i te reira. E ineine ïa te taata no te tauaparauraa i mua inaha ua faaoti-ê-na-hia te tumu parau e ua ite oia eaha te tupu. Ia farerei faahou tatou i te taata, a faataa ia ˈna e ua hoˈi mai tatou no te pahono i te uiraa tei faahitihia i te aparauraa matamua.

Nafea ïa?

A faaineine ai oe no te pororaa i tera e tera fare, a faaoti eaha te uiraa ta oe e tuu no te farerei-faahou-raa. E uiraa paha no nia i te hoê tumu parau faahitihia i roto i te papai ta oe e pûpû aore ra i roto i te tahi atu papai ta oe e vaiiho i te farerei-faahou-raa.
Ia hope te aparauraa e te taata e anaanatae ra, a faaite e te hinaaro mau nei oe e tauaparau faahou ia ˈna e a tuu i te uiraa ta oe i faaineine. I te tahi tuhaa fenua, e ohipa noa te taata e aita ratou e faaau oioi i te taime no te hoê farerei-faahou-raa. E parau ïa oe: “E taime tano anei teie no te farerei ia oe i te fare? [A vaiiho ia ˈna ia pahono.] E hinaaro vau e farerei poto ia oe i te hebedoma i mua no te pahono i teie uiraa . . . Mai te peu e ohipa oe ia hoˈi faahou mai au, a parau noa mai.”
A faaoti ai i te taime no te farerei-faahou-raa, a tapea i ta oe parau. (Mat. 5:37) Ia hope te aparauraa, a faaineine i te taata no te hoˈi faahou mai.

Ta oe e rave i teie avaˈe:

A faaineine ai no te taviniraa, a faaoti atoa i te uiraa ta oe e pahono i te farerei-faahou-raa. A faaite i te reira i te tahi atu mau taata poro e apiti ia oe i roto i te taviniraa.