A pee i te hiˈoraa o te mau peropheta: Nahuma
1. Eaha ta tatou e haapii ra i roto i te buka a Nahuma?
1 Te faaite ra te mau vahi paparari o Nineve tahito e e faatupu iho â Iehova i te tahoo i nia i to ˈNa mau enemi. Mai ta Nahuma i tohu, aita roa ˈtu te enemi ino roa ˈˈe e nehenehe e upootia. (Nah. 1:2, 6) E huti mai tatou i te mau haapiiraa no ta tatou taviniraa ma te hiˈopoa maite i ta Nahuma i tohu.
2. Eaha ta tatou e rave no te faaite noa i te poroi oaoa?
2 A horoa i te tamahanahana e te tiaturiraa: I te taioraa matamua, e au ra e e parau faautuaraa noa i roto i te buka a Nahuma. I nia ia Nineve iho â râ, te oire pu teoteo no Asura tahito. (Nah. 1:1; 3:7) Teie râ, ua oaoa roa to Iehova nunaa a faaroo ai i tera faautuaraa. Ua faaitoito o Nahuma i te mau ati Iuda. O “tamahanahana” hoi te auraa o to ˈna iˈoa. Ua parau oia ia ratou e e fatata to ratou enemi i te haamouhia! I muri aˈe, ua haapapu Nahuma e e ‘haapuraa etaeta Iehova i te mahana ahoaho.’ (Nah. 1:7) I roto i te pororaa, e faaite atoa tatou i te parau apî oaoa a faaitoito ai ia vetahi ê ia imi i te haapuraa ia Iehova.—Nah. 1:15.
3. E nafea ia pee i te hiˈoraa o Nahuma a paraparau ai tatou no nia i te hopea o teie ao ino?
3 A faaohipa i te mau hiˈoraa e faahohoˈaraa: Ua faaurua Iehova ia Nahuma ia faaau i to Nineve haamouraa i to Thèbes (No-Amona), te oire Aiphiti tahito tei haamouhia e to Asura. (Nah. 3:8-10) Ia paraparau tatou ia vetahi ê no nia i te hopea o teie ao ino, a haafaufaa i te mau parau tohu Bibilia te haapapu ra e e faatupu iho â Iehova i ta ˈna parau i roto i te mau parau rii faufaa atoa. Ei hiˈoraa, a haere ai te mau nuu a Babulonia e Medai no te tairi ia Nineve i 632 hou te Mesia, ua parari te anavai Hidekela no te ûa puai. Ua topa ˈtura te tahi tuhaa o te mau patu rarahi o te oire. Mai ta Iehova i tohu, ua haru-oioi-hia o Nineve.—Nah. 1:8; 2:6.
4. E nafea ia faaohipa i te mau parau maramarama e ohie ia taa i roto i te taviniraa?
4 A faaohipa i te mau parau maramarama e ohie ia taa: Te faaite ra to Nahuma huru papairaa e ua faaohipa oia i te mau taˈo no te faataa e no te haaputapû. Mea maramarama atoa ta ˈna mau parau. (Nah. 1:14; 3:1) E hinaaro atoa tatou e faaohipa i te huru paraparau ohie ia taa. (Kor. 1, 14:9) I te farereiraa matamua, a haapapu maitai eaha te tumu o to oe tere. A haapii ai i te Bibilia i te mau taata, a tauturu ia ratou ia tiaturi ia Iehova e i ta ˈNa parau ma te faaite atu e nafea ratou e faufaahia ˈi i te mau papai.—Roma 10:14.
5. Eaha te haapapuraa ta tatou e ite ra i roto i ta Nahuma i tohu?
5 E itehia i roto i te buka a Nahuma e ua tiaturi oia e e faatupu iho â Iehova i ta ˈNa parau. A piri ai te haamouraa o te ao a Satani, e tamahanahana teie mau parau a te Atua ia tatou: “E ore e papiti mai te ati i te tupuraa.”—Nah. 1:9.